Joni 13
13
Sa Vuya na Yavadratou na Nona Tisaipeli ko Jisu
1Ia ni se bera na solevu ni Lako-sivia, ka sa kila ko Jisu sa yaco mai na nona gauna me lako tani yani e vuravura oqo vua na Tamana, ka ni sa lomani ira na nona era sa tiko e vuravura, sa lomani ira ki nai vakataotioti. 2Ia ni ra sa vakayakavi tiko, ni sa vakatubura oti na tevoro e na loma i Jutasa Isikarioti, na luve i Saimoni, me soli koya yani. 3A sa kila ko Jisu ni sa solia ko Tamana na ka kecega ki na ligana, ka ni sa lako mai vua na Kalou ko koya, a sa lako tale yani vua na Kalou, 4sa tucake mai nai vakayakavi, ka luvata na nona i sulu, ka kauta mai e dua nai solo, ka vauca ki tolona. 5Ni sa oti oqo sa livia na wai ki na dari, ka vakatekivu me vuya na yavadra na tisaipeli, ka solota e nai solo sa vau ki tolona.
6Sa qai lako mai ko koya vei Saimoni Pita, ka sa kaya vua ko koya, “Noqu Turaga, ko ni na vuya li na yavaqu?” 7Sa vosa ko Jisu, ka kaya vua, “A ka ka'u sa kitaka ko sa sega ni kila edaidai, ia mai muri ga ko na qai kila.” 8Sa kaya vua ko Pita, “Kemuni na sega sara ni vuya na yavaqu.” Sa kaya vua ko Jisu, “Kevaka ka'u sa sega ni vui iko, ko sa sega ni rawata e dua na ka vei au.” 9Sa kaya vua ko Saimoni Pita, “Noqu Turaga, me segai walega na yavaqu, a ligaqu talega kei na uluqu.” 10Sa kaya vua ko Jisu, “Ko koya sa sili oti, sa yaga vua me vuya na yavana ga, a sa savasava taucoko. Ka dou sa savasava, ia sa segai ni kemudou kece.” 11Ni sa kilai koya ena soli koya yani, a ka oqo sa kaya kina ko koya, “Dou sa sega ni savasava kece.”
12 #
Luke 22.27
Ni sa qai vuya oti na yavadra, ka sulumaka tale na nona i sulu, sa tiko sobu tale, ka kaya vei ira, “Dou sa kila na ka ka'u sa kitaka vei kemudou, se segai? 13Dou sa vakatokai au me'u Vakavuvuli ka Turaga talega—ka dou sa dina sara, ni'u sa vakakina. 14Ia kevaka ka'u sa vuya na yavamudou, koi au na nomudou Turaga kei nai Vakavuvuli, sa dodonu talega mo dou veivui yava vakai kemudou. 15Ni'u sa solia e dua nai vakarau vei kemudou, mo dou kitaka vakakina me vaka ka'u sa kitaka oti vei kemudou. 16#Maciu 10.24; Luke 6.40; Joni 15.20E dina, e dina, au sa kaya vei kemudou, sa sega ni levu na tamata dauveiqaravi ka lailai na nona turaga; se levu ko koya sa talai ka lailai ko koya sa talai koya. 17Kevaka dou sa kila na veika oqo, dou sa kalougata kevaka dou sa kitaka. 18#Same 41.9Au sa sega ni vosa me baleti kemudou kecega; au sa kilai ira ka'u sa digitaka. Ia me vakayacori kina nai Vola Tabu, ‘O koya keirau sa kana madrai vata kaya, sa leqeti au e nai bukubuku-ni-yavana.’ 19Au sa qai tukuna vei kemudou ni se bera ni yaco mai, mo dou vakabauta ni sai au, ni sa yaco mai. 20#Maciu 10.40; Mari 9.37; Luke 9.48; 10.16E dina, e dina, au sa kaya vei kemudou, o koya sa vakacegui ira yadua ka'u sa tala, sa vakacegui au; ia ko koya sa vakacegui au, sa vakacegui koya sa talai au mai.”
Sa Tukuna Rawa ko Jisu na Nona Bukiveretaki
(Maciu 26.20-25; Marika 14.17-21; Luke 22.21-23)
21Ni sa vosa oti vakaoqo ko Jisu, sa rarawa na lomana, ka sa vakatakila, ka kaya, “E dina, e dina, au sa kaya vei kemudou, e dua vei kemudou ena soli au yani.” 22Era sa qai veiraici na tisaipeli, ni ra sa lecava se sa tukuni cei ko koya. 23A sa vakararavi e na lomasere i Jisu e dua vei ira na nona tisaipeli—ko koya sa lomana ko Jisu, 24ka sa deguvacu yani vua ko Saimoni Pita me tarogi Jisu se ko cei sa tukuna tiko ko koya. 25Ia ko koya sa vakararavi e na lomasere i Jisu, sa kaya vua, “Kemuni na Turaga, ko cei beka ko ya?” 26Sa kaya ko Jisu, “Sai koya ga ka'u na solia vua na tiki ni madrai oqo ni'u sa tonia.” Ia ni sa tonia oti na tiki ni madrai, sa solia vei Jutasa Isikarioti, na luve i Saimoni. 27Ia ni sa taura oti na tiki ni madrai, sa qai curumi koya ko Setani. Sa qai kaya vua ko Jisu, “Na ka ko via cakava, mo cakava vakatotolo sara.” 28Sa sega ni kila e dua vei ira sa tiko me kana, se cava sa vosa kina vakaoqo vua ko koya. 29Era nanuma eso, me vaka ni sa dautaura tiko na taga i lavo ko Jutasa, ni sa kaya vua ko Jisu, “Volia na veika ena yaga vei keda e na kana vata”; se me solia na ka eso vei ira era dravudravua. 30O koya oqo, ni sa qai taura oti na tiki ni madrai ko koya, sa lako vakusakusa sara ki tautuba. A sa bogi.
Nai Vakaro Vou
31Ni sa curu oti ki tuba ko koya, sa kaya ko Jisu, “Sa qai vakarokorokotaki oqo na Luve ni Tamata, ka sa vakarokorokotaki na Kalou e na vukuna. 32Kevaka sa vakarokorokotaki na Kalou e na vukuna, e na vakarokorokotaki koya talega na Kalou e na vukuna vakai koya ga, ka na vakarokorokotaki koya sara. 33#Joni 7.34Na luvequ lomani, au na tiko vakalailai ga kei kemudou. Dou na vakasaqarai au, ia me vaka ka'u a kaya vei ira na Jiu, ka'u sa kaya vaka talega kina vei kemudou, ‘Dou sa sega ni lako rawa ki na vanua ka'u sa lako yani kina.’ 34#Joni 15.12,17; 1Joni 3.23; 2Joni 1.5E dua na vunau vou ka'u sa solia vei kemudou, mo dou veilomani, me vaka ka'u sa lomani kemudou, mo dou veilomani talega vakakina. 35A ka oqo era na kila kina na tamata kecega ni dou sa noqu tisaipeli, kevaka dou sa veilomani.”
Sa Tukuna Rawa ko Jisu na Veicakitaki i Pita
(Maciu 26.31-35; Marika 14.27-31; Luke 22.31-34)
36Sa kaya vua ko Saimoni Pita, “Kemuni na Turaga, ko ni sa lako kivei?” Sa kaya vua ko Jisu, “A vanua ka'u sa lako kina, ko sa sega ni muri au rawa kina edaidai; ia mai muri ga, ko na muri au.” 37Sa kaya vua ko Pita, “Kemuni na Turaga, au sa sega ni muri kemuni rawa edaidai e na vuku ni cava? Au na solia na noqu bula e na vukumuni.” 38Sa kaya vua ko Jisu, “O na solia li na nomu bula e na vukuqu? E dina, e dina, au sa kaya vei iko, ni se bera ni tagi na toa, ko na cakitaki au vakatolu.
Trenutno odabrano:
Joni 13: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
