Joni 10
10
Na Vosa Vakatautauvata ni Bai ni Sipi
1 “E dina, e dina, au sa kaya vei kemudou, o koya sa sega ni curu e katuba ni bai ni sipi, ia sa kaba cake e na tikina tani, sai koya oqo na daubutako ka daukovekove. 2Ia ko koya sa curu e katuba, ko koya oqo nai vakatawa ni sipi. 3Sa dolavi koya nai vakatawa-ni-katuba, a sa vakarogoca na domona ko ira na sipi. A sa kacivi ira na nona sipi e na yacadra ko koya, ka tuberi ira ki tautuba. 4Ia ni sa kauti ira na nona sipi ki tautuba sa liutaki ira, a sa muri koya ko ira na sipi; ni ra sa kila na domona. 5Ia era na sega ni muria na vulagi, era na dro tani ga vei koya; ni ra sa sega ni kila na domo ni vulagi.” 6Sa cavuta vei ira na vosa vakatautauvata oqo ko Jisu, ka ra sa sega ni kila na veika sa cavuta vei ira ko koya.
Ko Jisu nai Vakatawa Vinaka
7Sa qai kaya tale vei ira ko Jisu, “E dina, e dina, au sa kaya vei kemudou, oi au na katuba ni sipi. 8Ko ira kece sa liu mai vei au era sa daubutako ka daukovekove, a sa sega ni vakarogoca na nodra vosa na sipi. 9Oi au na katuba. Kevaka sa curu kina e dua na tamata e na vukuqu, ena vakabulai, ka na daucuru mai ka daucuru yani, ka na kune kakana. 10Sa sega ni lako wale mai na daubutako, me butako ga, ka ravuravu, ka vakarusa. Au sa lako mai me rawa vei ira na bula, ia me rawa vakalevu sara.
11 “Oi au nai vakatawa vinaka. Sa solia na nona bula nai vakatawa vinaka e na vukudra na sipi. 12Ia ko koya sa voli na nona cakacaka, ka sega ni koya nai vakatawa, ka sa sega ni taukeni ira na sipi, sa raica na wolifa ni sa lako tiko mai, ka sa biuti ira na sipi ko koya ka dro—a sa kati ira na wolifa ka sa vakatolosevi ira. 13Sa dro ko koya sa voli na nona cakacaka, ni sa vakakina ko koya, ka ni sa sega ni daunanumi ira na sipi. 14#Maciu 11.27; Luke 10.22Oi au nai vakatawa vinaka. Ia ka'u sa kilai ira sa noqu, ia ko ira sa noqu era sa kilai au, 15me vaka sa kilai au ko Tamaqu, ka me vaka ka'u sa kilai Tamaqu, ka'u sa solia talega na noqu bula e na vukudra na sipi. 16Eso tani tale na noqu sipi, era sa sega ni tiko e na bai oqo. Sa kilikili me'u kauti ira talega mai, a ra na rogoca na domoqu. Ena qai dua bau na qele ni sipi, ka dua bau nai vakatawa. 17A ka oqo sa lomani au kina ko Tamaqu, ni'u sa solia na noqu bula, me'u kauta tale. 18Sa sega e dua sa kovea oqo vei au, ia ka'u sa solia vakai au ga. Au sa rawata me'u solia, ia ka'u sa rawata me'u kauta tale. Ai vunau oqo sa solia mai vei au ko Tamaqu.”
19Era sa qai veileti tale na Jiu e na vuku ni vosa oqo. 20A sa lewe vuqa vei ira sa kaya, “Sa curumi koya e dua na tevoro, a sa lialia; dou sa rogoci koya e na vuku ni cava?” 21Eso tani era kaya, “Sa sega ni vakaoqo na vosa ni tamata sa curumi koya e dua na tevoro. Sa rawata beka e dua na tevoro me dolava na mata ni mataboko?”
Era sa Besetaki Jisu ko Ira na Jiu
22Sa qai ia mai Jerusalemi na solevu ni vakasavasavataki ni vale-ni-soro, a sa vula i liliwa. 23A sa lako voli ko Jisu e na vale-ni-soro, e na varada nei Solomoni. 24Era sa qai vakavolivoliti koya na Jiu, ka kaya vua, “A cava so na kena dede ko sa sega ni vakataudeitaka kina na loma i keimami? Kevaka ko sai koya na Karisito, tukuna vakamacala mai vei keimami.” 25Sa kaya vei ira ko Jisu, “Au a tukuna vei kemudou, ia dou sa sega ni vakadinata. A cakacaka ka'u sa kitaka e na yaca i Tamaqu, o koya oqo sa vakadinadina vei au. 26Ia dou sa sega ni vakadinata, ni dou sa sega ni noqu sipi. 27Sa rogoca na noqu vosa ko ira na noqu sipi, ia ka'u sa kilai ira, ka ra sa muri au. 28Ia ka'u sa solia vei ira na bula tawa mudu, ia era na sega sara ni rusa, se dua e kaliraki ira mai na ligaqu. 29A Tamaqu, ko koya sa soli ira vei au, sa uasivia na ka kecega, a sa sega e dua sa rawata me kaliraki ira mai na liga i Tamaqu. 30Keirau sa dua bauga kei Tamaqu.”
31Sa qai tomitomika tale na vatu ko ira na Jiu, me ra vakaviriki koya. 32Sa kaya vei ira ko Jisu, “E vuqa na cakacaka vinaka ka'u a vakatakila vei kemudou mai vei Tamaqu. A cava na cakacaka vei ira oqo dou sa vakaviriki au kina?” 33#Vsoro 24.16Sa kaya vua ko ira na Jiu, “Sa segai e na vuku ni cakacaka vinaka keimami sa vakaviriki iko kina, e na vuku ga ni nomu vosavakacacataka na Kalou, e na vuku talega ni ko sa tamata ga, ka sa qisi iko mo Kalou.” 34#Same 82.6Sa kaya vei ira ko Jisu, “Sa sega li ni volai e na nomudou vunau, ‘Au a kaya, Dou sa kalou’? 35Kevaka sa vakatokai ira me ‘kalou’ ko koya, ni sa yaco vei ira na vosa ni Kalou—ka sa sega ni rawa ni vakacalai nai Vola Tabu— 36dou sa kaya li vua sa lesia na Tamaqu ka tala ki vuravura, ‘Ko sa vosavakacacataka na Kalou’, ni'u sa kaya, ‘Koi au na Luve ni Kalou’? 37Kevaka ka'u sa sega ni kitaka tiko na cakacaka i Tamaqu, kakua ni vakabauti au. 38Ia kevaka ka'u sa kitaka, ka kevaka dou sa sega ni vakabauti au, mo dou vakadinata ga na cakacaka, ka mo dou kila ka vakadinata kina ni sa tiko vei au ko Tamaqu, ka'u sa tiko vei koya koi au.” 39Era sa qai via vesuki koya tale, ia sa lako tani ko koya mai na ligadra.
40 #
Joni 1.28
A sa lako tale yani ko koya ki tai kadua ni Joritani, ki na yasana sa veipapitaisotaki kina eliu ko Joni, a sa tiko kina. 41A sa lewe vuqa era sa lako vua, ka ra kaya, “Sa sega ni kitaka e dua na ka-mana ko Joni, ia sa dina ga na ka kecega sa vosataka ko Joni e na vuku ni tamata oqo.” 42A ra sa lewe vuqa sa vakabauti koya mai kea.
Trenutno odabrano:
Joni 10: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
