Vakatekivu 3
3
Nai Tekitekivu ni Valavala Ca
1 #
Vtaki 12.9; 20.2 Ia sa qaseqase cake na gata mai na manumanu kecega ni vanua ka bulia na Kalou ko Jiova.
A sa kaya ko koya vua na yalewa, “Oi, sa kaya bagi na Kalou, ‘Mo drau kakua ni kania na vuanikau kecega e na were’?” 2A sa kaya na yalewa ki na gata, “Sa tara me keirau kania na vua ni veikau e na were; 3ia na vuanikau ga sa tu e loma ni were, sa kaya kina na Kalou, ‘Drau kakua ni kania, drau kakua talega ni tara, de drau mate.’ ” 4A sa kaya vua na yalewa na gata, “Drau na sega dina ni mate; 5ni sa kila na Kalou e na siga drau na kana kina ena qai yadra dina na matamudrau, ka drau na vaka na Kalou, ni drau na kila na ka vinaka kei na ka ca.” 6Ia ni sa kunea na yalewa sa yaga na kau me kakana, ka sa ka talei ki na mata, ka sa kau me da gadreva me da vuku kina, sa qai tauca na vuana ka kania; ka solia talega vua na watina erau tiko kaya, ka sa kania talega ko koya. 7A sa qai dolavi na matadrau, ka rau sa kila ni rau sa luvawale; ka rau sa qai cula vata na drau ni lolo, ka cakava na nodrau liku.
8A rau sa rogoca na domo ni Kalou ko Jiova ni sa lako voli e na were, e na mudremudre ni yakavi, ka rau sa vunitaki rau e loma ni veikau ni were, ko Atama kei na watina mai na mata ni Kalou ko Jiova. 9A sa kaci vei Atama na Kalou ko Jiova, ka sa kaya vua, “Ko sa tiko evei?” 10A sa kaya ko koya, “Ka'u a rogoca na domomuni e na were, ia ka'u a qai rere, ni'u sa luvawale; ka'u a qai vunitaki au.” 11A sa kaya, “Ko cei sa tukuna vei iko ni ko sa luvawale? Ko sa kana beka mai na kau ka'u a vakarota vei iko mo kakua ni kania?” 12A sa kaya ko Atama, “Na yalewa ko ni a solia me keirau tiko kaya, ko koya ga sa solia vei au na vuanikau, ka'u a qai kania.” 13#2Kori 11.3; 1Timo 2.14A sa qai kaya na Kalou ko Jiova vua na yalewa, “A cava na ka oqo ko sa kitaka?” A sa kaya na yalewa, “Sa vosa vaqaseqase vei au na gata, ka'u a qai kania.”
Vakatauca na Nona Lewa na Kalou
14A sa kaya na Kalou ko Jiova ki na gata,
“Ni ko a kitaka na ka oqo,
ko na cudruvi vakalevu vei ira na manumanu e yavai va,
vei ira talega na manumanu kila kecega ni vanua;
ko na dolo ga e ketemu,
ko na kania talega na kuvu-ni-soso
e na veisiga kecega ni nomu bula.
15 #
Vtaki 12.17
Ia ka'u na vakaveimecakitaki kemudrau kei na yalewa,
kei na nomu kawa kei na nona kawa;
ena butuqaqia na ulumu ko koya,
ia ko na katia na bukubuku-ni-yavana.”
16Sa kaya vua na yalewa ko koya,
“Au na vakalevutaka na nomu rarawa ni ko sa kunekune;
ko na daurarawa ni ko sa vakasucu gone,
ia ko na qaravi koya na watimu,
ena lewai iko talega ko koya.”
17 #
Ipe 6.8
A sa kaya vei Atama,
“Ni ko a vakarorogo ki na vosa ni watimu,
ka sa kania na vuanikau
ka'u a vakarota vei iko, ka kaya,
‘Mo kakua ni kania,’
sa cudruvi na qele e na vukumu;
ko na kana mai kina e na rarawa e na veisiga kece ni nomu bula;
18ena vakatubura talega vei iko na kau votovotoa kei na soni;
ia ko na kania na co ni vanua.
19E na buno ni matamu
ko na kania kina na kemu kakana,
ka yacova na siga ko na suka tale kina ki na qele,
ni ko a buli mai kina eliu;
ni ko sa kuvu ni qele ga,
ia ko na suka tale mo kuvu ni qele.”
20Ia ko Atama, sa vakatoka na yaca ni watina ko Ivi [Sa bula]; ni sa tinadra na tamata kecega sa bula. 21Ia na Kalou ko Jiova, sa cakava vei Atama kei na watina nai sulu kuli ni manumanu, a sa vakaisulutaki rau.
Vakasevi mai Iteni ko Atama kei Ivi
22 #
Vtaki 22.14
A sa kaya na Kalou ko Jiova, “Raica, sa yaco na tamata me vaka e dua vei kedatou, me kila na ka vinaka kei na ka ca; ia oqo, de sa dodoka na ligana ka taura talega na vua-ni-kau ni bula, ka kania, ka bula tawa mudu kina”— 23e na ka oqo sa vakatalai koya tani kina na Kalou ko Jiova mai na were ko Iteni, ka me wereca na qele ka buli mai kina ko koya. 24A sa vakasava tani kina na tamata ko koya; a sa lesi rau na jerupi me tiko mai na were ko Iteni e na yasana ki na tokalau, kei na yameyame ni bukawaqa e vaka nai seleiwau, sa veigoleyaki tiko, me vakatawa na sala ki na kau ni bula.
Trenutno odabrano:
Vakatekivu 3: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj