Cakacaka 11
11
Soli Tukutuku ko Pita ki na Lotu mai Jerusalemi
1A ra sa rogoca ko ira nai apositolo kei ira na veiwekani mai Jutia ni ra sa vakabauta na vosa ni Kalou ko ira talega era sa matanitu tani. 2Ia ni sa lako cake mai ki Jerusalemi ko Pita, era sa veileti kaya ko ira sa cili, 3a ra sa kaya, “Ko sa curu vei ira na tamata era sa sega ni cili, ka kana vata kei ira.” 4A sa vakatekivu ko Pita me vakamacalataka vakaituvatuva na ka vei ira, ka kaya, 5“Au a tiko e na koro ko Jopa ka masu, ia ka’u a raica e dua na raivotu. Sa dua na ka sa lako sobu mai, e vaka nai tutuvi levu, sa tukuci sobu mai lomalagi e na tutuna vava, ka sa yaco sara kivei au. 6Ia ni ka’u sa vakaraica matua, ka vakananuma, au sa kunea kina na manumanu ni vanua e yavai va, kei na manumanu kila, kei na veika sa dauqasi voli, kei na manumanu vuka. 7Au sa qai rogoca e dua na vosa sa kaya vei au, ‘Tucake, Pita; mo vakamatea ka kania.’ 8Ia au sa qai kaya, ‘Kakua noqu Turaga; ni se sega vakadua ni dua na ka vakatabui se na ka tawa-savasava me curu ki gusuqu.’ 9Ia sa qai rogo tale vei au na vosa mai lomalagi, ‘A ka sa vakasavasavataka na Kalou, mo kakua ni kaya ni tabu.’ 10A sa yaco vakatolu na ka oqo; ka sa qai yavi kece tale ki lomalagi. 11Ka raica, e le tolu na tamata sa qai tadu ki na vale ka’u sa tiko kina, a ratou sa talai mai Sisaria vei au. 12A sa kaya vei au na Yalo Tabu me’u lako vata kei iratou, ka me kakua ni veileti na lomaqu. Ka keitou sa lako vata talega kei na veiwekani oqo e lewe ono, ka keitou sa curu ki nona vale na tamata ko ya. 13A sa tukuna vei keitou ko koya, ni sa raica na agilosi e na nona vale, sa wavu tu, ka kaya vua, ‘Mo talatala ki Jopa, me lakovi Saimoni, a yacana talega ko Pita; 14ko koya ena tukuna vei iko nai tukutuku ko na bula kina, kei ira kecega na nomu lewe ni vuvale.’ 15Ia ni ka’u sa vakatekivu me’u vosa, sa yaco vei ira na Yalo Tabu, me vaka vei keda e na kenai vakatekivu. 16#Caka 1.5Au sa qai nanuma na vosa ni Turaga, ni sa kaya ko koya, ‘Sa dina ka veipapitaisotaki ko Joni e na wai, ia dou na papitaisotaki e na Yalo Tabu.’ 17Ia ni sa qai solia vei ira na Kalou nai solisoli me vaka vei keda, koi keda sa vakabauta na Turaga ko Jisu Karisito, ko cei koi au me’u tarova rawa na Kalou?” 18Ni ra sa rogoca na veika oqo, era sa galu ga. A ra sa vakarokorokotaka na Kalou, ka kaya, “Sa dina sa qai solia na Kalou vei ira talega na veimatanitu tani na veivutuni me ra bula kina.”
Nai Soqosoqo Lewe-ni-lotu mai Anitioki
19 #
Caka 8.1-4
Ia ko ira sa dui veiseyaki e na veivakacacani sa tubu e na vuku i Sitiveni, era sa lako vaka ki Finisia, kei Saipurusi, kei Anitioki, ka ra sa tukuna na vosa vei ira duaduaga na Jiu. 20Ia sa so vei ira era sa kai Saipurusi kei Kirini, ni ra sa yaco ki Anitioki, era sa vosa vei ira era sa vulagi mai na veimatanitu tani, a ra sa vunautaka na Turaga ko Jisu. 21A sa tiko vata kei ira na liga ni Turaga, ka ra sa lewe vuqa kina sa vakabauta ka ra sa saumaki mai vua na Turaga. 22Sa qai yaco na kedrai tukutuku kivei ira nai soqosoqo lotu mai Jerusalemi, ka ra sa talai Panapasa me lako sara ki Anitioki. 23Ia ni sa tadu ko koya, ka raica na cakacaka loloma ni Kalou, sa reki kina, a sa vakarota vei ira kecega me ra kabita na Turaga e na loma e gumatua; 24ni sa tamata vinaka ko koya, ka sa sinai e na Yalo Tabu kei na vakabauta. A sa lewe vuqa kina na tamata sa vakaikuritaki vua na Turaga. 25Sa qai lako ko Panapasa ki Tarisu me vakasaqarai Saula, 26ia ni sa kunea, sa kauta ki Anitioki. A sa dua na yabaki taucoko erau sa dausoqoni vata kina kei ira nai soqosoqo lotu, ka ra sa lewe vuqa erau sa vakavulica. Ia mai Anitioki era sa vakatokai taumada kina na tisaipeli me ra lotu Vakarisito.
Na Dausiga Levu
27Ia e na gauna ko ya sa lako mai na parofita eso mai Jerusalemi ki Anitioki. 28#Caka 21.10A sa tucake e dua vei ira, ko Akapo na yacana, a sa tukuna, ka sa vakavuna na Yalo Tabu, ni na yaco e muri na dausiga levu e na vanua taucoko (a ka oqori sa yaco e na gauna sa tui kina ko Kilotiu). 29Ia era sa lewa ko ira sa lotu me ra solia yadua na nodra ka-ni-loloma, me vaka era sa dui rawata, vei ira na veiwekani era sa tiko mai Jutia; 30a ra sa kitaka vaka talega kina, ka vakatalai Panapasa kei Saula me rau kauta vei ira na qase.
Trenutno odabrano:
Cakacaka 11: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj