Wikhikən 4
4
1Nit tehc tan toci 'Sakəmamowal okəcicitonepən Palosiyək okisi notəmatiniya Sesohsəl okisehlan okisi paptihsowehlan piyemiyəkceyawiw noci kehkimacihi skatək tetpiw Sapatis;
2Cikaw skat Sesohs paptiysowehlowekw, kenok tanik wetəkehkimocik ohəkek paptiysowelowatowək;
3Onəkətəmənepən Leswihsowahkik əlihepən Koliletk.
4Cowi lisapihepən Samelik.
5Nit tehc pəkəcihe otenek Samelik 'cey liwisowiw Sihkəl, kwihiw ktakəmikwsis tan Sakop kisi milatpən 'kwəssəl, Sosepəl.
6Nət Sakop wiwhtapilməsit nit tet iyopən. Sesohs nit tehc kəspənewos ənholpesin wiwhtapilməsilit. Tamahal apaskwi.
7Nit Sameliyewiskw pəkəcihe onatapiləm. Sesohs 'tiyal: Sihmowin.
8'Ciw ekehkimatpənihi lapasopənik otenek onatənohməniya mehcowakən.
9Naka nit tehc Sameliyewiskw 'tiyal: Tan leyo kil Leswihsowiyən ekwecimiyən eləsmiyən nil, nil Sameliyewiskw? Ipəcəl Leswihsək Sameliyewiyək skat osiwehkaltoltiwiwk.
10Sesohs 'tiyal: Kəcitowənsəpən Kelowəsit otolelməkwemkeweyam naka, kcicihətsəpən tan wen yəhosk Sihmowin, kilowatəmowanepənp, kmilkonepənp samakwan pemawhsowik.
11Ehpit 'tiyal: Sakəm, towapilməsot kətama ktiwaw, wiwhtapilməsit pihtalkət; nit tehc tama tet ktiyn yot samakwan pemawhsowik?
12Kil kpiyemispe skatək kəmihtakwsənok Sakop, tanek milinməkpən yot wiwtapilməsit, wecəsəmitpən nekəm, naka onican, naka otohem?
13Sesohs 'tiyal: Msiw wen tan wecəsəmit yot samakwan, apcəc kətowasəmo;
14Kenok tan wen wecəsəmit samakwan tan nil melokc, skatəc kətowasəmiw askəmiw. Kenok samakwan tan milokc nil, otapilməsinc ohəkek, limos kakəmitehec askəmawsowakənək.
15Ehpit 'tiyal: Sakəm, milen yot samakwan, welaman skatəc nkətowosəmiw, kesəna skatəc nockowihaw natapiləmo.
16Sesohs 'tiyal: Ulih wihkwiman koskitahpem, kockowihan yot.
17Ehpit itəm: Kətama noskitahpemiw. Sesohs 'tiyal: Kolamehitəm Kətama noskitahpemiw:
18Ipəcəl kil nanopənik koskitapemək; kenok oskitap tan ewət təkec skat nisowiwniw. Uleyo itəmən.
19Ehpit 'tiyal: Sakəm, nəmihton knikanikcicitakewinowin.
20Nmihtakwsənok təlyəmihatopənik yot wocok, kenok kilowaw ktitəmotipa Selosalemk ecowitəlyəmcamək.
21Sesohs 'tiyal: Ehpit, olamsitowin tepənaskowihak ckoce tanəc toci skatəc wihwinowamawiwa Mihtakwsit Kelowəsit yot wocok, kesəna Selosalemk.
22Kilowaw skat kəcicitoniya tan kekw wihwinowatəmekw. Nilon nkəcicihan tan wihwinowamokət; ipəcəl kikewakən ocihe Leswihsow ikək.
23Kenok tepənaskowihak kətiyəkehe təkec ikehe, tan toci olamewakəni imihewinowək wihwinowamawalc Mihtakwsilicil Kelowəsitəl mcəcakow ikək olamewakən ikək. Ipəcəl Mihtakwsit Kelowəsit okwilowahə wihwinowamkon yəhəht.
24Kelowəsit kehtakwsiw, tanik wihwinowamacik, otahcowi liwihwinowamawal kehtakwsow ikək, olamewakən ikək.
25Ehpit 'tiyal: Nkəcicihton tan Mimkwenot ckowihe, tan eliwisit Niweskw. Tan toci pəkəciyatəc msiw kekwsal ktakənotəm akonenowəl.
26Sesohs 'tiyal: Nil weskowiməl, nil nət.
27Nit tehna, opetapasilin tanihi ekehkimacihi asəkitəhasoltowək oskowiman ehpilicil. Kenok kətama wen itəmo, Kekw kilowahtowən kesəna, kekwse weci oskowimət?
28Ehpit onəkəlal otatowahpiləməsotiyəl, əlihe otenek, 'tiya pəmawsowino,
29Ckowapasikw, sakihok pəmawsowin, tan akənotəmowitpən tan msiw kekwseyal elitahkiyanpənil. Skat nət tan Mimkwenot, Niweskowit?
30Nit tehc ntiyahpasitit otenek, petapasowək tan eyilit.
31Nit tehna tanik ekekimocik ohəkek wikotəmowaniya. Sesohsəl 'tiyawal: Nsakəmamən, mits.
32Sesohs 'tiya: Ntiyn micowakən tan mihci, tan kilowaw skat kecicitowekw.
33Nit tehc notəkehkimocik yəhotoltowək: Wen maci kekwse okisipeciptowan tan mihcihlit?
34Sesohs 'tiya: Nit nilo ntəlehtakan nekəm otolitəhatəmowakən tan pitəkimitpən, nkisehtowan otəlohkewakən.
35Skat ktitəmopa mehc newowək kisosək toci kowakwnikhətin? Sakihək, ktiholpa, wonakehtək ksiskowal sakihək pemskotekil, ipəcəl təkec wateptehtol ociksiywətahso; (Ipəcəl təkec wapewəl kisleskwteyatol oci kowəkwnahso.)
36Nekəm tan temsawet oməsənəmən apenkakən, kowakənihke askəmawsowakən ikək: welaman nekəm tan ekihket nekəm tan ekihket nekəm tan temsawet mawiwolitəhasowəkc.
37Nit tehc əlihak yot kəlosowakən: Peskw kihke, kətək təmsawe.
38Kpəcitahkalopən ktəmsawan tan skat kisi sikəlokhətəmowekopən. Kətəkik oskitapek sikəlokhətopənik, kilowaw kəsiyapasiniyahpən osikəlohkewakənowək.
39Ktanakwsowək Sameliyehkewiyək yot otenek təleyak, olamsətəməniyal ohəkek oci ehpit okəlosowakənəl, tan elinspiwolamit, itəm: Nekəm nəstomakonəl msiw kekwseyal tanil elehtakiyanpənil.
40Nit tehc tan toci Sameliyehkewiyək petapasihtit eyyilit, wikotəmowaniya, wiciyeyakoniya. Nit tet kwənihiyo nisokəniw.
41Apc piyemiktanakwsowək weciw lamsətəmohtihtit nekəm okəlosowakənəl.
42'Tiyal ehpilicil: Təkwih nolamsətəmotinen skatək kil kəlosowakənək ipəcəl nilon notowan nkəcicihan wət nət olamewakən ikək onocikikehowan oskitkəmikw.
43Kisi nisokənəkak Sesohs ocimacehe, yot tet, pəkəcihe Koliletk.
44Ipəcəl Sesohs elinspiwolameh nikanikcicitakewino skat okici təmitəhamkwəssiwən omətkik.
45Nit tehc toci pəkəcihe Koliletk Koliletkewiyək wihkwehlawal, ipəcəl kisi nəmihtoniyapənil msiw kekwsal kisehtakwpənil Selosalemk wikhəpaltimək. Ipəcəl nekəmaw petapasopənik etliwikhəpaltimkəpən.
46Nit Sesohs apc pəkəcihe Cehnek, Koliletk, tan tet etli mekwapakehtakwpən samakwan. Tan wen espisakəmawit, spisakəm iw, tan 'kwəssəl etliksinokalicil Cepəlniyəmk.
47Tan toci kisi notəmat Sesohsəl opəkəcihalin Leswihsowahkik, kisocahin Koliletk, opəkəcanəl wihkotəmowan otəlipənikwesilin, okikəhan 'kwəssəl; ipəcəl kətimeciniyəl.
48Sesohs 'tiyal: Skat nəmihtowən kinowaskoltikənəl naka, asəkitəhaswakənəl, skatəc kolamsətəmowən.
49Spisakəm 'tiyal: Sakəm ckowipənekwes meskw nkwəss mehcinekw.
50Sesohs 'tiyal: Macəha, kwəss pəmawso. Oskitap welamsətək kəlosowakən tan Sesohs iyalat. Omacəhan.
51Nit pemipənekwesit otasikako oskinosəm, otəliyakənotəmowawal, 'tiyawal: Kwəss pəmawso.
52Toci papehcimat tan toci omacehwol məlsines. 'Tiyawal: Wəlako nekwt acihe lowikənəkewe paskotikən, həpəsowahkən ekwihoht.
53Nit tehc mihtakwsəl okəcicitolin nit timiyaw paskotikən Sesohs iyalatpən, Kwəss pəmawso. Olamsətəmən nekəm, naka mniw wik elipəskak.
54Nit yot nisewe kinowaskoltikən Sesohs kisehtakw, kis kisocihat Leswihsowahkik, pəkəcihe Koliletk.
Trenutno odabrano:
Wikhikən 4: PQM2014
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Maliseet Gospel of John © Canadian Bible Society, 2014