Luka 5
5
Mǝgwiim Yesu Gǝ Taƙa
(Matiyu 4.18-22; Markus 1.16-20)
1Gǝme tet Yesu ɗi ƙǝ ɗai shik pǝ nuu Janisarat, ƙin tehl gǝ ƙǝ tul ba gaii ni dang gǝ ƙyel shik Naan. 2Se Yesu naa shii ƙǝ yem vǝel shang pǝ ham, gǝ mǝtaam mǝ yaa sheep ƙǝ et yem ben, mǝ pǝ taaru yun gǝ vǝyang. 3Yesu zum gǝme shii gǝ ƙǝ a mǝ Siman, se ƙwol ƙin ni ƙan dang tus shii ni ning kaa ƙin ɗǝǝn ham lee. Se Yesu tong ɗǝǝn shii ni ƙambi ke tehl.
4Nƙong gǝ Yesu ƙǝ pǝn pǝ shik gǝ yaa, se ƙwol ƙin Siman ƙane, “Ga het shii ni ga kaa ƙin ɗǝǝn pe gǝ ywe se ga sang taaru ni dang gǝ yaa sheep ning.”
5Siman piing ƙane, “Mesƙaam, mǝ shem sheep ti ne byen npai se mǝ yaa gǝme bi ƙet. Pǝ ga ƙwol ta ti, se a la sang taaru ni.”
6Ɗǝǝn gǝ mǝ shin ti ne se mǝ yaa sheep ne ɓǝng taaru ke mang gǝ tee. 7Ti se mǝ yong mǝnye yun ƙin sai kaa ɗǝǝn nƙwa shii dang mǝ baa lapƙa yun ning. Mǝ baa se mǝ gam shii gǝ dip ƙin sheep shii ke mang gǝ yuwa ƙin mǝep.
8Ɗǝǝn gǝ Siman gǝ mǝ yong a Biturus ƙǝ naa bi shik se, shang duum ƙa pǝfiim ni pǝshiim Yesu se ƙwol ƙane, “Mesƙaam, a ƙyee gǝdang ga ƙus han ƙet, pǝ han a gǝ shin shikgǝbis!” 9Ƙapǝ sheep gǝ mǝ ƙǝ yaa ni ɗaii ni ƙin nƙwa mǝnye ni gǝ dibit, 10ƙin mǝllu mǝep mǝ yaa sheep gǝ ƙǝ a Yaƙǝbu ƙin Yaya, njip Zabadi.
Se Yesu ƙwol ƙin Biturus ƙane, “Pǝ ga la loot ƙet, taam ye ɗǝǝn gǝ mǝɦan shiim se ga la yaa taam a tehl.” 11Taam se mǝ dǝl shii yun mǝ pǝet ƙin pǝ nuu. Mǝ et bi gǝ dibit mǝ mǝen gǝdang Yesu.
Yesu Ɗong Gǝ Kumƙwop
(Matiyu 8.1-4; Markus 1.40-45)
12Yesu ɗi taam gǝme pee, se gǝme gwiim gǝ kumƙwop baa ben. Naa Yesu se shang ɗai ƙa fiim ni duum ƙaa ni yil, teen ƙane, “Mesƙaam, ga ɗem se ga la ɓoot gǝ ɗong han.”
13Yesu shel sai dok gwiim ni ƙane, “A ɗem, ga ɗong ƙwei!” Ne ben se kumƙwop ni pǝt shik mǝǝp.
14Taam se Yesu ƙwol ƙin ni ƙane, “Ga la ƙamkooi ƙin megwiim ƙet, ndaan se ga mǝɦan ga niin ƙasak ke gǝ tok Naan, ti se ga pe bi gǝ tok Naan ƙiyee gǝ Musa ƙǝ ƙwol ƙa shik ɗak e, dang ning a ƙɔɔi shik gǝ ƙam ta ke mǝep.”
15Dip ƙin a gǝne, se mǝ ƙyel ƙɔɔi bi mǝǝp ni maa gǝ ɓok, taam se tehl ne ɓǝng ke mang baa dang gǝ ƙyel ni dang ɗong gɔk mǝep ning. 16Ndaan se Yesu di tong ƙǝ mǝɦan ke tong nangshin mǝtaam pee nee ƙa nƙa dang teen Naan ning.
Yesu Ɗong Gwiim Gǝ Waan
(Matiyu 9.1-8; Markus 2.1-12)
17Ntet gǝme gǝ Yesu ƙǝ ɗi ƙǝ ƙambi, se Farisi mǝep ƙin mǝ man paa shak gǝ le ɗǝǝn pee dibit ke ƙayil Galili ƙin gǝ ke Hudiya ƙin Rushelima mǝep di ɗi ƙǝ twaat ben. Se gǝɓal Long ɗi gǝ mene ƙin ni dang gǝ ɗong mǝ gɔk. 18Se mǝtaam jesƙaam mǝ ƙǝ mang gǝme gǝ fyanaan mǝ ba ƙin ƙa ƙyeem, mǝ ƙalak dang gǝ zum ƙin ni ɗǝǝn lu ni dang mǝ ɓǝt ning pǝshiim Yesu. 19Mǝ tal yei gǝdang mǝ zwom ƙet pǝ kaam ni, se mǝ han ƙin gǝ gɔk ni ƙa lu, se mǝ leng pe ƙakok lu ni shang nak ƙamei kaam ni ne pǝshiim Yesu.
20Yesu naa fɔlɔk mǝep gǝ ɓǝt se ƙane, “Gǝshaai na, mǝ mang shikgǝbis ga mǝni ti.”
21Farisi mǝep ƙin mǝ ƙambi paa ni mǝ mang gǝ shep ne en yun mǝ ƙane, “Gwiim shi min ta a gǝden dang vǝal Naan ning e? A gǝden ƙat ta gǝ ɓoot gǝ mang shikgǝbis ƙǝ Naan ƙet e?”
22Yesu man shik gǝ mǝ ƙǝ ɗi mǝ shep, se tal ƙane, “Gu shep shik bi shak ɗǝǝn fɔlɔk gun a pǝ bin? 23A gǝɗang jel ta e, a gǝ mǝ ƙan, ‘Mǝ mang shikgǝbis ga ti e,’ a gǝ ƙan, ‘Ga yaal mǝɦan e?’ 24Dang gu man ning gu ƙan, Nla Gwiim se ɗi ƙin ɓal ƙayil dang gǝ mang shikgǝbis....” Se ƙwol ƙin gǝ fyanaan ni ƙane, “A ƙwol ƙin ga, ga yal, ga mang ƙyeem ga, ga waa lu.” 25Ne ben pǝshiim mǝep se gǝ gɔk ni yal, mang bi petei ni waa lu tong ƙǝ pyep Naan. 26Bi ni ɗaii tehl gǝ dibit se mǝ pyep Naan. Mǝ di mang mǝ luoot mǝ ƙane, “Mǝ naa bi ƙamei gǝ shuut nƙin shi.”
Yesu Yong Lawi
(Matiyu 9.9-13; Markus 2.13-17)
27Nƙong bi shik, se Yesu ƙa pǝt se naa gǝme gǝ tul gǝndung gǝ sum ƙǝ a Lawi ƙǝ tong pe bishiit ni. Yesu ƙwol ƙin ni ƙane, “Ga baa gǝdang na,” 28se Lawi yal, et bi gǝ dibit mǝɦan gǝdang Mǝǝp.
29Se Lawi dwom kaam pe gǝ se gǝ byen ke Yesu nlu ni, se mǝ tul gǝndung ne ɓǝng ƙin nƙwa tehl mǝ baa se bi ne ƙashak ƙin Yesu mǝep ƙin mǝgwiim ni. 30Se Farisi mǝep ƙin mǝ ƙambi paa shak mǝ ƙǝ tane a mǝtaam mǝep e mǝ nyang ƙin mǝgwiim Yesu mǝ ƙane, “A ɗang dang gu se bi ning gu swaa bi ne pǝsuk ƙin mǝ tul gǝndung ƙin ‘mǝ shin shikgǝbis e’?”
31Yesu piing pǝ mǝep ƙane, “A gwiim gǝlong gɔk la tang ta gǝɗak ƙet, se tang a gǝ gɔk. 32A wul a dang gǝ yong gwiim mǝ mang ƙan yun a mǝ ɗerɗes ƙet, a dang gwiim mǝ man yun ƙǝ a mǝ shin shikgǝbis, dang mǝ et shikgǝbis ning mǝ ba dang Naan.”
Mǝ Tal Ɗi Yesu Ƙa Ɓǝt Gǝ Ɗum
(Matiyu 9.14-17; Markus 2.18-22)
33Se mǝ ƙwol ƙin Yesu mǝ ƙane, “Mǝgwiim Yaya ƙat ɗum ɓǝt yun mǝ teen Naan. Mǝgwiim Farisi shin tane ndaan, se nmak yii muut pǝ bi gǝ se ƙin gǝ swaa.”
34Se Yesu piing ƙane, “Mǝ ƙat la ƙan mǝ mazep gwiim gǝ ɓaat ɗik la ɗum ɓǝt yun ne ƙayit mǝǝp a? 35Ndaan se dang pe wa yuu ƙong gǝdang mǝ mang gǝ ɓaat ɗik ni ning pǝ mǝep; la taam ben se mǝ ɗum ɓǝt yun.”
36Se ƭat tangtiis shi ke mǝep ƙane, “Gǝme gwiim gǝ ƙat la tee pǝ tuun gǝ pǝǝ dang taan ning shik gǝ shii ɗi ƙet, ƙǝ shin ne, se la yim ndem tuun gǝ pǝǝ ni, se gǝ pǝǝ shik ƙǝ taan e la ƙam ƙin gǝ shii ni ƙet. 37Ndaan se gǝme gwiim gǝ ƙat la laan jimmǝǝs ɗǝǝn paai gǝ shii ɗi ƙet. Ƙǝ shin ne se, jimmǝǝs ni la pyerem paai mǝni, se la wut shang se paai mǝni la dem. 38La ne ƙet, mǝ la laan jimmǝǝs a ɗǝǝn paai gǝ pǝǝ ta det. 39Ndaan se gǝme gwiim gǝ ƙat laa nƙong ƙǝ swaa mǝǝs ti, se yim tang jimmǝǝs ɗi ƙet, pǝ la shin se ƙan, ‘A mǝǝs ni ɗong ta.’ ”
Trenutno odabrano:
Luka 5: MTL
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©️2022 Luke Initiative for Scripture Translation
