Yohana 8
8
1Yesu a̱ wrak a̱ nat tazwa tsok ka ban yei Zeitun nu ni. 2Ba̱ta̱ntson ka̱ntson tat ka na̱ brek a̱ ba i bat Ka̱za na, sa̱rei ba̱nyet ba a̱ tung a̱ tyong a̱ ku krang, na̱ swrang a̱ nwa ba̱ zzek. 3Ba̱malam Truwang ba bu ba̱nyet Farisa na i nyyai ba̱ a̱mbyring a̱yaan ba ku pyyem i kan-a̱naan, a̱ bu tyyi na̱ sseng a̱ta̱ssi mba ka. 4Ba hywa di Yesu, “Malam, a ryi a̱mbyring a̱ni ba ku pyyem na̱ shyi ka̱yat kan-a̱naan ba̱ a̱ra̱ntyok. 5Ka̱yat Truwang ka Musa a̱ za zzek zi mang taka̱i a̱ra̱mbyring ani hywat. Nwan, a̱nzan a hywa?” 6Ba yin zzim a̱mi a̱ ga ku tssem a̱ shya ryen na ba nin ku tyyak ni. Yesu a̱ ta̱kwut a̱ jem kyang i dibvuk ti di ka̱ta̱hrung. 7Ba brek a̱ sseng a̱ swat a̱ ku zzim, na̱ yrek a̱ sseng a̱ hywa da̱ mba, “A̱yin nu a̱ bvwo na̱ ka̱n yya a̱ka̱tuk nkyang ni ba na̱ yet ka̱son a̱ ku mak.” 8A̱ bo ta̱kwut a̱ bo jem kyang i dibvuk ti brak. 9Ba bu hok a̱mi a̱ bvwot ba̱ ya-yring. Ba̱nekwo ba mba a̱ yin yet ka̱son a̱ drok, kpikpit a sin tssup, ba bu wwon Yesu ba̱ a̱mbyring a̱ywu na̱ sseng ka̱rek ka. 10Na̱ yrek a̱ sseng, a̱ hywa da̱ nu, “Ara̱mbyring! Ba̱nyet iya a̱ shyi ke? A̱nyan mba a̱ na̱ rot an shirya ji?”
11A̱ra̱mbyring u a̱ hywa, “A̱ntyok ka̱ryi! A̱yin ba.”
Yesu a̱ hywa, “Nzuk ma a̱mi. Da̱ nat i bu ryok yya a̱ka̱tukyya ba.”]
Yesu a̱mi a̱ yet ka̱bvwa sai ka
12Yesu a̱ bo ryat ba̱ mba a̱ hywa, “Nzuk n yet ka̱bvwa sai ka̱sa ka. A̱yin nu a̱ n tssup ni a̱ ni cong i ka̱bvwa sai sucet, di na̱ bo byyi cong an dyin ba.”
13Ba̱nyet Farisa na i hywa da̱ nu, “A yya shaida diccu nwan. Ba̱ryat nwan ba a̱ byyi cet ba.”
14Yesu a̱ hywa, “Ko n si bu yya shaida diccu nzuk, kyang a n dyat ni yet ka̱ryong, rot n bvwo ka̱rek ka n nin nyyai ni n bo n bvwo ka̱rek naat nzuk ka. Nyin yi bvwo ka̱rek ka n nin hyok ni ba, da̱ nyin ba bvwo ka̱rek ka n nin naat ni ba. 15Shirya nyin ji yet nying ba̱neywu. Nzuk n yya a̱yin shirya ba. 16Ma n si bu naat yya shirya ji, se shirya nzuk ji i yet ka̱ryong rot n shyi diyin ba. A̱tyyi nu a̱ n tom ni a̱ shyi ba̱ nzuk. 17Truwang nyin ji hywa, ‘Ki shaida ba̱nyet ba̱hwa si mon, to ba̱ryat iya a̱ yet ka̱ryong.’ 18N tyyei kyang a n yet i, A̱tyyi nzuk u a̱ n tom ni brak a̱ bo tyyei.”
19Ba ku zzim a̱ hywa, “A̱tyyi nwan nu a̱ shyi ke?”
Yesu a̱ hywa da̱ mba, “Yi n bvwo ba, da̱ nyin ba bvwo A̱tyyi nzuk u ba. Yi da n bvwo, se nyin ba bvwo A̱tyyi nzuk u.”
20Yesu a̱ yin dyat ba̱ryat bani ka̱ram ka na̱ yin zzek ka̱yat bat Ka̱za ka ni ka̱yat bat ka ba yin saai a̱kwati ka-kyang nu ni. Ma a̱yin a̱ ku pyyem ba, rot ka̱ram nu ka a̱ kan ba ba.
Yi ni maai ba ka̱rek ka n ni naat ni ba
21Yesu a̱ bo hywa da̱ mba, “N ni drok n ya wwon. Yi ni n cat, da̱ nyin ba ni n shya ba. Yi ni kwi ka̱yat a̱ka̱tukyya nyin. Yi ni maai ba ka̱rek ka n nin naat i ba.”
22Ba̱cecet ba̱nyet Yahuda ba a̱ hywa, “Yi hok, a̱ hywa di zi ni maai ba ka̱rek ka na̱ naat i ba. A̱ ni ya hywat o?”
23Yesu a̱ hywa, “Yi nyyai kyi ka̱byen, nzuk n nyyai Tazwa. Nyin yi nyyai i ka̱sa kani, ma nzuk n yet a̱nying ka̱sa a̱ni ba. 24Nkpa n byyi n nin ya tyyei, yi ni kwi ka̱yat a̱ka̱tukyya nyin. Nyin ba ma̱ ni kwi ka̱yat nji ka ki yi rak shim da̱ ‘Nzuk a̱mi n yet Kristi nu’.”
25Ba ku zzim, “Nwan yet a̱nyan?”
Yesu a̱ hywa, “N yet kyang a n ka̱n ya tyyei nyyai ka̱tsitsrang ka ni. 26Nkyang n shyi ba̱gingang nying na n ni ryat tazwa nyin ni, n bo n ya yya shirya ni. Ma a̱tuba nu a̱ n tom ni a̱ yet a̱ntyok ka̱ryong; kyang a n hok da̱ nu ni, nkpa n ma̱n tyyei ba̱nyet ka̱sa ba.”
27Ba bvwo di Yesu a̱ ryat ba̱ryat ba tazwa A̱tyyi nu ka ba. 28Yesu a̱ bo hywa da̱ mba, “Ka̱ram ka yin yrek Ka̱won A̱neywu ni, ka̱ yemi yi nin bvwo ‘Nzuk a̱mi n yet Nzuk u’. Ka̱ram iya a̱mi yi nin bvwo nkyang a n yya ni yet nying diccu nzuk ba, ma n dyat bu kyang a A̱tyyi nzuk u na̱ n zzek ni. 29A̱yin nu a̱ n tom ni a̱ ri shyi ba̱ nzuk; a̱ n wwon diyin ba, rot kozan ka̱ram n yya kyang a ku myim ni.”
30Ba̱nyet ba̱gingang a̱ yin hok zzek nu na a̱ ku ryi ndya mba na.
Ba̱kwwa bu ba̱nyet swat a̱ccu mba
31Yesu a̱ hywa di ba̱nyet ba a̱ ku san ni, “Ki yi hok zzek nzuk a, nyin a̱mi yet na̱won pfong nzuk na. 32Yi ni bvwo ka̱ryong, ka̱ryong a̱ ma̱ ya san a̱ kaai a̱ wwon.”
33Ba hywa da̱ nu, “Zi yet na̱mbvon Ibrahim, da̱ njit ba ka̱n yet ba̱kwwa a̱yin ba; ba̱ a̱nzan a̱n byyi an hywa di ba ni za san a̱ kaai a̱ wwon?”
34Yesu a̱ hywa da̱ mba, “Ka̱ryong a̱mi n ya tyyei, a̱yin nu a̱ yya a̱ka̱tukyya ni a̱ yet a̱kwwa a̱ka̱tukyya. 35A̱kwwa a̱ shyi ka̱ryi ka kozan ka̱ram ba, ma ka̱won ka̱ryi ka a̱n shyi kozan ka̱ram. 36Ki Ka̱won ka a̱ ya san a̱ kaai a̱ wwon, yi bu yet ba̱kwwa ba, ko ba̱cincong. 37N wa n bvwo ka̱sak ka yin yet na̱mbvon Ibrahim a ni, nyin ba bun cat n hywat a, rot yi rak hok zzek nzuk a. 38N ya tyyei kyang a A̱tyyi nzuk u na̱ n tyyei ni, ma nyin yi tssup kyang a a̱tyyi nyin nu na̱ ya tyyei ni.”
39Ba hywa da̱ nu, “Ibrahim a̱mi a̱ yet a̱tyyi njit u.”
Yesu a̱ hywa da̱ mba, “Yi da n yet ba̱hwai Ibrahim ba, se nyin ba yya kyang a nu na̱ yin yya ni. 40Sa̱rei kyang a n ka̱ n yya ni ku seyak ya tyyei ka̱ryong ka n hok di Ka̱za ni ba; nyin ba wu kwan bu zwang n hywat. Ibrahim a̱ yin yya kyang ku ryi a̱mi ba. 41Kyang a a̱tyyi nyin nu na̱ yya ni a̱mi yi yya.”
Ba hywa, “Njit zi yet na̱won a̱za̱n kei ba; Ka̱za ba̱diyin a̱mi a̱ yet A̱tyyi njit u.”
42Yesu a̱ hywa da̱ mba, “Ka̱za a̱mi a̱ da n yet A̱tyyi nyin nu di ka̱ryong, se nyin ba n cat, rot n nyyai di Ka̱za nnaani n shyi kyi. N ba ba diccu nzuk ba; nka a̱mi a̱ n tom. 43A̱nzan a̱n byyi ba̱ryat nzuk ba ban ya kaat hok maai a? Rot yin maai hok kyang a n dyat i ba. 44Yi yet ba̱hwai a̱tyyi nyin a̱gwam a̱ka̱tuk tswa nu, yi bu cat i yya kyang a a̱tyyi nyin nu na̱ cat i. Nyyai ndoson a̱ yet a̱hywaai ba̱nyet, di na̱ byyi a̱huhwa ka̱ryong i swat ka̱sa nu ba, rot ka̱ryong a̱ shyi a nu ba. Ka̱ram ka na̱n bvei diraa ni a̱ yya kyang a ku myim ni, rot a̱ yet a̱bvei diraa a̱ bo yet a̱tyyi ba̱nyet diraa. 45N ya kok ka̱ryong, nkpa n byyi yi ni n shim ba. 46A̱nyan ka̱yat nyin a̱ maai n dot di n yya a̱ka̱tuk nkyang? Ki ka̱ryong n ma̱n kok, a̱nzan a̱ ya bvwo shim a. 47A̱yin nu a̱ yet a̱nying Ka̱za ni a̱ pfong ba̱ryat Ka̱za ba. Rot nyin yi yet ba̱nying Ka̱za ba, nkpa n byyi yin hweyak a̱pfo nyin na.”
Yesu bu Ibrahim
48Ba̱nyet Yahuda na i hywa di Yesu, “Ka̱ryong a̱mi zi hywa baa? A yet a̱ntyok Samariya i bu byyi a̱ka̱tuk tswa!”
49Yesu a̱ hywa da̱ mba, “N byyi a̱ka̱tuk tswa ba. N tyyei shii A̱tyyi nzuk, ma nyin yi n byai. 50Nzuk n cat shii domin diccu nzuk ba, ma a̱yanyet a̱n shyi a̱ cat, nu a̱ yya shirya ji. 51Ka̱ryong a̱mi n ya tyyei, a̱yin nu a̱ tssup ba̱ryat nzuk ba ni a̱ byyi kwu ba hat a̱ba̱da.”
52Ba̱nyet Yahuda na i hywa, “To, naani zi bvwo ba̱zizrak a byyi a̱ka̱tuk tswa. Ibrahim a̱ yin kwu bu sa̱rei kpikpit ba̱nyet tyyei ba̱ryat Ka̱za na, ma nwan ba hywa da̱ a̱yin nu a̱ tssup ba̱ryat nwan ba ni a̱ ni kwu ba hat a̱ba̱da. 53A̱tyyi njit u Ibrahim a̱ yin kwu, nwan ba hywa da a ku ra̱u yemi, ka̱ni? Ba̱nyet tyyei ba̱ryat Ka̱za ba sa̱rei a̱ kwi, ma a hwa da̱ a̱nyan a yet?”
54Yesu a̱ hywa da̱ mba, “Ki n cat shii nying diccu nzuk, ku ni n brang di kyang ba. A̱yin nu a̱ ni n yrek i a̱mi a̱ yet A̱tyyi nzuk u, nu a̱mi brak yi bu hywa da̱ a̱ yet Ka̱za nyin ka. 55Yi ku bvwo ba, ma nzuk n ku bvwo. Ki n ton di n ku bvwo ba, diraa n bvei da̱ nyin ni, ma n ku bvwo n bo n tssup ba̱ryat nu ba. 56A̱tyyi nyin nu Ibrahim a̱ yin gwai na̱ nin dyi nom nzuk a; a̱ ma̱ bu kpo ryi a̱ hok ansham.”
57Ba̱nyet Yahuda na hywa, “Ka! A ka̱n tat a̱rya nswak pfon ba, a cong ni ka̱n dyi Ibrahim?”
58Yesu a̱ hywa da̱ mba, “Ka̱ryong n ya tyyei, nyyai ba ka̱n byin Ibrahim ba ‘N nin shyi!’ ”
59Ba bvwa kpang a̱ tyyi mbvak a̱ nin ku mang, ma Yesu a̱ ba̱ brik a̱ drok i bat Ka̱za na.
Trenutno odabrano:
Yohana 8: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
