Yohana 7
7
Yesu bu ba̱wumbeyang nu
1Ka̱ram ka ba bun tyak ni, Yesu a̱ cong a̱ kat ka̱byen Galili, a̱ bo cat cong i ka̱byen Yahudiya ka ba rot ba̱cecet ba̱nyet Yahuda ba ka̱ yemi a̱ yin cat ku hywat. 2Ka̱ram a̱swa mbvut ba̱nyet Yahuda ka ka bu bvat ba̱cincong, 3ba̱wumbeyang Yesu ba a̱ hywa da̱ nu, “Drok nat Yahudiya, ba̱nyet ba a̱ na̱ tssup ni a̱ ga si ryi kyang a a yya ni. 4A̱nyan a̱ ni ye nyyak kyang a na̱ yya ni ka̱ wa cat ba ku bvwo? Ka wu maai yya nkyang ani, da̱ wruk, ka̱sa ka sa̱rei a̱ na̱ bvwo ra!” ( 5Ba̱wumbeyang nu ba ma a̱ yin ku san ba.)
6Yesu a̱ hywa da̱ mba, “Ka̱ram nzuk ka a̱ ka̱n yya ba. Nyin kozan ka̱ram a̱ yet da̱ nyin. 7Ka̱sa ka a̱ ni maai a̱ ya rak ba, ma nzuk ka n dak rot kozan ka̱ram n ba̱ tyyei a̱ka̱tukyya mba nu. 8Yi ya ka̱son nat ka̱rek a̱swa ka. Nzuk n bai ka̱rek a̱swa ka ba, rot ka̱ram nzuk ka a̱ ka̱n yya ba.” 9A̱ hywa a̱mi, wwon a̱ brek a̱ swrang Galili.
Yesu ka̱bvwa a̱swa mbvut
10Ba̱wumbeyang ba ba bu nat ka̱rek a̱swa ka, Yesu a̱ ba̱ tssup, ma a̱ yin bubang. 11Ba̱cecet ba̱nyet Yahuda ba a̱ yin shyi i ku cat, a̱ zzim a̱ hywa, “A̱ wa shyi ke?”
12Ba̱nyet ba̱gingang ka̱rek a̱swa ka a̱ nwa ya shwwang. Ba̱yanyet a̱ hywa, “A̱ yet a̱tsatsak a̱yin.” Ba̱yanyet a̱ hywa, “Kaai, a̱ raai bu ba̱nyet ba.” 13Ma ba̱ yin dyat ba̱ryat nu ba ba̱ ntsang, rot ba yin pfong ka̱wun ba̱cecet ba̱nyet Yahuda ka.
14A̱swa nu na̱ bu tat a̱katyyi, Yesu a̱ nwa ka̱yat bat Ka̱za ka a̱ nwa zzek ba̱nyet ba. 15Ba̱cecet ba̱nyet Yahuda ba a̱ yya ka̱hat ba̱gingang a̱ hywa, “A̱ntyen a̱ni a̱ yya ni a̱n byyi bvwo na a̱mi, di na̱ ka̱n nat makaranta ba?”
16Yesu a̱ hywa da̱ mba, “Zzek nzuk a yet nying diccu nzuk ba, ku nyyai di Ka̱za. Nka a̱mi a̱ n tom. 17A̱yin nu a̱ cat yya kyang a Ka̱za ka cat na̱ yya ni a̱ ni bvwo ki zzek nzuk a yet nying Ka̱za ki ku ma̱n yet nying diccu nzuk. 18A̱yin nu a̱ ryat di cet diccu nu ni a̱ cat a̱ shya shii nying diccu nu; ma a̱yin nu a̱ cat shii a̱yin na a̱ ku tom ni a̱ byyi ka̱ryong, nu da̱ bvei diraa ba. 19Nyin a̱mi Musa a̱ yin ya ryi Truwang ji, ka̱ni? Ma ba a̱yin nyin nu a̱ tssup Truwang ji ni. A̱nzan a̱n byyi yin cat n hywat a?”
20Ba̱nyet ba a̱ hywa da̱ nu, “A byyi a̱ka̱tuk tswa. A̱nyan a ryi na̱ cat na̱ hywat a?”
21Yesu a̱ hywa, “N yya kyang bu yring, sa̱rei nyin yi yya ka̱hat. 22Yi tyyi ka̱bawon ncen ka̱tuk A̱sa̱ba̱t, rot Musa a̱ yin ya tyyi tyei ncen na (ma Musa a̱mi ba, ba̱tyyi nyin ba a̱ yin nwa yya na ba ka̱n byin Musa ba). 23Ki yi tyyi ka̱won ncen ka̱tuk A̱sa̱ba̱t ho yi bu byyan Truwang Musa ji, to, a̱nzan a̱ ya tyyi yya diryen ho n creng a̱yin ka̱tuk A̱sa̱ba̱t? 24Yi ryok yya shirya nyin ji a a̱ssi ba; yi tssup ka̱ryong.”
Ka̱ nu a̱ yet Kristi nu?
25Ba̱yanyet nyyai Urushalima a̱ hywa, “A̱yin a̱ni a̱mi ba cat a̱ hywat baa? 26Na̱ nu a̱ sseng ka̱yat ba̱nyet ka a̱ ryat, da̱ a̱yin na̱ krang ba̱ nu ba. Ki ba̱cecet njit ba a̱ bvwo ka̱sak ka nu a̱mi a̱ yet Kristi nu ni? 27Ma ki Kristi nu a̱ ba, a̱yin a̱ ni bvwo ka̱bvwa ka na̱n hyok ni ba, ma sa̱rei njit zi bvwo ka̱rek nyyai a̱ntyen ka ni.”
28Yesu na̱ shyi i ba̱ zzek a i bat Ka̱za na, a̱ yrek diwan nu ti tazwa a̱ hywa, “Yi n bvwo ansham bu bvwo ka̱bvwa nyyai nzuk ka. Ma n ba ba diccu nzuk ba. A̱yin nu a̱ n tom ni a̱ yet a̱ntyok ka̱ryong. Yi ku bvwo ba. 29Ma nzuk n ku bvwo rot n nyyai da̱ nu, nu a̱ bo n tom.”
30Ba kwan zwang ku pyyem, ma a̱yin a̱ si wa ku sak bvak ba, rot ka̱ram nu ka a̱ ka̱n yya ba. 31Ba̱nyet ba̱gingang ka̱yat ba̱nyet ka a̱ yin tung ni a̱ ku san ka̱yat ndya mba ka, a̱ hywa, “Ki Kristi nu a̱ ba, a̱ ni yya nkyang ka̱hat na a̱ ra̱u a̱yin a̱ni e?”
Ba tom ba̱dogari ba si pyyem Yesu
32Ba̱nyet Farisa na i bu hok ba̱nyet ba ba ya shwwang a̱mi tazwa Yesu ka, mba bu ba̱cecet ba̱gado Ka̱za ba ba tom ba̱dogari ba si ku pyyem. 33Yesu a̱ si hywa da̱ mba, “N ni yen da ka̱baram ba̱ nyin, n si nat da̱ a̱yin nu a̱ n tom ni. 34Yi ni n cat, da̱ nyin ba ni n shya ba, rot ka̱rek ka n nin shyi ni yi ni maai sin tat a ba.”
35Ba̱cecet ba̱nyet Yahuda ba a̱ nwa ya zzim a̱ hywa, “Ke na̱n naat zi nin wi ku ryi na? Ka̱ a̱ naat na̱nkrang Girit na̱bvwa na ba̱nyet Yahuda na ba swat i a̱ si zzek Helenawa na? 36A̱ hywa da̱ njit, ‘Yi ni n cat, da̱ nyin ba ni n shya ba, da̱ nyin ba ni maai ba ka̱rek ka n ni n nat i ba.’ A̱nzan na̱ hwa?”
Ncen ba̱shekwot wwat sucet
37Ka̱tuk a̱ngbom nom a̱swa ka, nka a̱ yin yet a̱gba̱dang nom u, ka̱tuk iya Yesu a̱ ta̱za a̱ sseng a̱ yrek diwan nu ti a̱ hywa, “A̱yin nu a̱ pfong na̱shyi ni na̱ ba da̱ nzuk a̱ sswa. 38Da̱ni di ba̱ryat Ka̱za ba ban hywa ni, ‘A̱yin nu a̱ n dyi rya nu na ni, ncen ba̱shekwot sucet a̱ ni tyong nyyai i rya nu na.’ ” 39Yesu a̱ yin dyat Tswa Ka̱za ji ba̱nyet ku tssup ba ba ni san ni. Ma ka̱ram iya ba ka̱n shya Tswa Ka̱za ji ba, rot ka̱ram iya Yesu na ka̱n ta̱za a̱ sook dityok nu ti ba.
Ba̱nyet ba a̱ ya tra a̱n yya sot swa
40Ba̱nyet ba̱gingang a̱ hok ba̱ryat nu ba a̱ hywa, “A̱ntyen a̱ni a̱mi a̱ yet A̱ntyok tyyei ba̱ryat Ka̱za nu.”
41Ba̱yanyet a̱ hywa, “Nu a̱mi a̱ yet Kristi nu.”
Ba̱yanyet a̱ hywa, “Kristi nu a̱ nin nyyai Galili ba. 42Ba̱ryat Ka̱za ba a̱ hywa di Kristi nu a̱ ni nyyai an sot Dawuda, ba ku byin i Batalami, ka̱nkrang ka Dawuda na̱ yin swat i.” 43Ba̱ryat ba tazwa nu ka a̱ si ba̱ kwwat a̱cecet. 44Ba̱yanyet a̱ cat ku pyyem, ma a̱yin a̱ maai ku sak bvak ba.
Ba̱cecet ba̱nyet Yahuda ba a̱ rak san Yesu
45Ba̱dogari ba a̱ brek a̱ nat, ba̱nyet Farisa na bu ba̱cecet ba̱gado Ka̱za ba a̱ yin ba̱ tom ni a̱ si ba̱ zzim, “A̱nzan a̱n ya bvwo si ba ba̱ nu na?”
46Ba̱dogari ba a̱ hywa, “A̱yin a̱ maai ryat ba̱ryat da̱ a̱ntyen a̱ywu ni ba.”
47Ba̱nyet Farisa na i hywa, “A̱ si ya raai meyang o? 48Yi ka̱n hok a̱yin ka̱yat ba̱nyet Farisa ka bu ba̱cecet ba̱nyet Yahuda ba a̱ san zzek nu na ni e? 49Ba̱nyet bani a̱ bvwo Truwang Musa ji ba, rot a̱mi Ka̱za ka ma̱n ba̱ shyi.”
50Nikodimu nu a̱ yin nat di Yesu a̱ta̱tuk ka ni a̱ yin shyi ba̱ mba. A̱ hywa, 51“An Truwang njit ji zi byyi sak a̱yin bang ba, se ba ku zzim a̱ hok a̱bvun nu nu.”
52Ba hywa da̱ nu, “A ma̱ nyyai Galili ka a? Da̱ cyang ba̱ryat Ka̱za ba ansham i ryi ka ni shya ka̱ram ka a̱ntyok tyyei ba̱ryat Ka̱za na̱ ka̱n wruk Galili ni.”
A̱mbyring u ba yin pyyem i kan-a̱naan ni
[ 53Ba kam koyan a̱ drok a̱ nat ka̱ryi,
Trenutno odabrano:
Yohana 7: kaj
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2011, Wycliffe Bible Translators, Inc. All rights reserved.
