Kejadian Uram 1
1
Er Imtamnyi biryi im ab tukwe ab kikniboka imtam dinyi babyi, tukwetam dinyi babyi, utotoa nirya kiknibmou deyok
1:1–2:7
1Yuma kobdob ara Er Imtamnyi biryi im ton tukwe ton kiknibmou. 2Yuma talak ara tukwetam utotoa nirya ton kum kuramwe. Eda, a talak ara kunuk dem akwe dakloamwe. Ba, Er Imtamnyi Kanya Roh ara talyi karen me deici kengkeng eryibaramwe.
3Ura, Er Imtamnyi biryi, “Berekdur,” ebmou. Ba, Erci ebmou to berekmou. 4Berekmou ura, Er Imtamnyi biryi dinmou uca, berengna berekmou ara, “Teleb,” tenebmou. Ura, kunuk yuk berengna yuk wiboka bokeibmou. 5Ura, Er Imtamnyi biryi berengna si ara, “Kitingtam,” eboka si dobmou. Ba, kunuk si ara, “Lukunda,” eboka si dobmou. Ura, lukunda inibmou ani, berekmou. Er Imtamnyi biryi ato kuboka kiknibmou tum ara yuma uki tum aryi kiknibmou.
6Ura, Er Imtamnyi biryi, “Me noutam wilimna keica langlang bitinyi eitam me yuk, outam me yuk kibdur,” ebmou. 7Ura, Er Imtamnyi biryi eitam me yuk-outam me yuk kibdeibmou to kunubmou. 8Ba, eitam kibdeibmou dinyi ara, “Im,” eboka si dobmou. Ba, outam kibmou dinyi si ara, “Tukwe,” eboka si dobmou. Ura, lukunda inibmou ani, berekmou. A kiknibmou tum ara uki bitinyi tum aryi kiknibmou.
9Ura, Er Imtamnyi biryi ato ebmou, “Im amwetam kubmou me nirya ara neik dikum akwe bulubdur,” ebmou. Ba, Er ebmou to kunuboka me neik dikum akwe outam bulubmouci, tukwe dem taklobmou. Ba, tukwe dem taklobmou dikum ara mutuk kib kibdeibmou. 10Ura, Er Imtamnyi biryi tukwe ilim dikum ara, “Tukwe,” eboka si dobmou. Ba, me bulubdeibmou dikum si ara, “Weik me kwan,” eboka si dobmou. Ura, Er Imtamnyi biryi diramwe uca, a ukubdeibmou to ara telebto kubmou ura, “Teleb,” tenebmou.
11Ura, Er Imtamnyi biryi ato ebmou, “Utotoa nirya yin dinyi babyi, yin kum dinyi babyi nirya luk betekoka abdur,” ebmou. Ba, Er ebmou tok kunubmou. 12Ba, tukwe deici asi du mourande dinyi babyi, du mouboka yalyi aryi betengnande dinyi babyi yala nirya betekoka abmou. Ura, Er Imtamnyi biryi, “Ato kubmar ara teleb,” tenebmou. 13A tum lukunda inibmou ani, berekmou. A kiknibmou tum ara uki winiryi tum aryi kiknibmou.
14Ura, Er Imtamnyi biryi ato ebmou, “Imtam aryi kuboka berekwande dinyi kunubdur,” ebmou. Ba, kunuboka imtam berengkwamwe dinyi kiknibmou. Ura, lukunda yuk, kitingtam yuk bokeibmou. Ba, a berengna aryok talak yuk-yuk likeibmou. Ara, kiting ara kitingtam berengna kibdeibmou. Ba, wala ara lukunda berengna kibdeibmou. Ura, kiting yuryibin-weleyibin kimna ab, wala o berekde-o berekde bana ab, uki o berekde-o berekde bana ab kiknibdeibmou. 15Ani, Er Imtamnyi biryi ato ebmou, “Imtam kubkwande dinyi aryi tukwetam nirya berekwande,” ebmou ba, kunubmou. 16A kiknibmou dinyi ara weik berengna akwe bitinyi kiknibmou. Ara, “Iya weik berengna ara kitingtam berengkwande,” tenen kiting kiknibmou. Ba, “Mitikto berengna ara lukunda berengkwande,” tenen wala kiknibmou. Ani, lukunda berengna ara kurya ababyi ton kiknibmou. 17Ba, imtam dinyi kiknibmoua nirya ara, “Tukwetam berengkwande,” tenen kiknibmou. 18Ura, kitingtam aryi berengna dinyi babyi, lukunda berengna dinyi babyi sirya kiknibmou. Ura, a kiknibmou dinyi nirya ara, “Teleb,” tenebmou. 19Ura, lukunda inibmou ani, berekmou ura, lukunda ab kitingtam ab kiknibmou. A kiknibmou tum ara uki dumbaryi tum aryi kiknibmou.
20Ura, Er Imtamnyi biryi ato ebmou, “Me umbura kam kubkwande dinyi nirya ab, im dub ol langlang eryibankwande dinyi ab kunubdur,” ebmou. 21Ba, me umbura lulungnande dinyi yala amuma nirya ab, maka yala amuma nirya im karin ol langlang eryiban dinyi nirya ab kiknibmou. Ura, Er Imtamnyi biryi, “Ato kiknibne to ara teleb,” tenebmou. 22Ura, Er Imtamnyi biryi ato eboka kisal dangna dinyi karebmou, “Me umbura kam kubkwandum dinyi yala nirya, mi yaldakoka me umbura weik kibde bindarur. Ani, maka tukwe kibtam kuboka, ol langlang eryibinkwande dinyi ababyi, maka du deiboka, odei-odei yaldakde bindarur,” eboka kisal dangna dinyi karebmou. 23Ura, a tum inibmou ani, sirya berekmou. A kiknibmou tum ara uki amubaryi tum aryi kiknibmou.
24Ura, Er Imtamnyi biryi ato ebmou, “Tukwetam kam kurande dinyi yala nirya, yan yoa babyi, ninyi winin dinyi babyi, baitam kurande dinyi babyi, tonda mundu tang deib yibarande dinyi babyi, yala yuk-yuk nirya tukwetam aryi anabkwaming,” tenebmou. Ba, Erci tenebmou to kunuboka anabmai. 25Ura, tukwetam kam kun dinyi babyi, baitam kurande dinyi nirya babyi, ninyi winin dinyi yala nirya babyi, tukwetam mundu tang deib yibarande dinyi nirya babyi, a kiknibmou dinyi nirya asi Er Imtamnyi biryi, “A dinyi telebto kiknibman,” tenebmou.
26Ura, Er Imtamnyi biryi ato ebmou, “Ura, Nun kunun toanun teneibdeboka kiknibkub. Ba, Nun kunub toanun kiknibmabyi ninyi aryi me umbura kubkwande dinyi ab, tukwe kibtam kubkwande dinyi ab, mundu tang deici yibinkwande dinyi ab, tukwetam nirya kam lulungkwande dinyi ab nirya asi a kiknibmabyi dinyi asi erci taleboka kalikde binkwande,” ebmou. 27Ura, Er Imtamnyi biryi Er kurur toanun teneibdeboka, ninyi sal kiknibmou. Ani, Er kurur toanun akwe teneibdeboka ner ababyi kiknibmou. Ato kuboka sun nang bitinyi kiknibmou. 28Ura, Er Imtamnyi biryi ato eboka kisal dangna dinyi karebmou, “Sunci mabwe ilinto deiboka, odei-odei yaldakde birurum. Ba, tukwetam nirya sun yaldangna aryi langkarikde binkwande. Ba, sun yaldangna aryi langkarikoka me kin kurande dinyi babyi, mutuk kib kurande dinyi babyi, im karin kurande dinyi babyi, nirya sun dinyi akwe kiboka kalikde binkwandum,” ebmou.
29Ani, ton ato ebmou, “Tukwetam co du yuk-yuk nirya du mouboka yalyi aryi betekde binkwande dinyi kiknibmasin ara sun yina ati kiknibmasin. A kiknibdeibmasin asi yibde kunkwandarur! 30Ba, tukwe kib kam kun dinyi ab, im karin ol langlang eryiban dinyi ab ara sun yina yuk kiknibdeibman. Ara, tukwe kib utotoa luk betekoka abkwande dinyi yala nirya ara tukwe kib kubkwaming kamyoa sun yina yibde kunkwaming ati kiknibdeibman,” ebmou. Ba, Er ebmou to nirya kunubmou. 31Ura, Er Imtamnyi biryi a kiknibmou dinyi nirya dinmou uca, ton manmalina kum kubmou. Eda, a kiknibmou dinyi nirya ara iya telebto akwe kiknibmou asi asing eibmou. A kiknibmou tum ara uki nabaryi tum aryi kiknibmou.
Trenutno odabrano:
Kejadian Uram 1: MTG
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
@LAI 2007 (New Testament), @LAI2022 (Old and New Testament)