Matéus 6
6
Nyaa nyí li tíi lí ŋ̀yɛ́ɛ́yɛ́ɛ likaale
1«Nyɔŋán lítāt, miníh ɓɔŋɔ́g ɓé mām mí bíɓasɛ byáná ɔ́sū ví ɓot, á lí ɓɔŋ nɛ́ bí ɛ́n ɓɛ́nɛ; náŋ miní ŋgá kɛ ɓé lí kuh lí nsála tɔ wá nyú á ŋga sɔ́le la Ɛsɔ́ŋɛ́ wāná nyɔ́ a lɛ á lóō. 2Eceg ɔ ŋgɔ tíi hɔ́ ŋ̀yɛ́ɛ́yɛ́ɛ likaale, ɔh tɛ́ɛ́g ɓé líkálo á ɔ́sū ví éceg, ákaa ɓot bí ɔ́taɓa bí ŋga ɓɔ̄ŋ á ndáá-míɓomán la á mílɔ̄ŋ, á li somo nɛ́, ɓot bí tí ɓɔ́ lípēm. La mbálɛ, mag laga ɓɛ́nɛ nɛ́, ɓá kūh nsála wáɓá. 3Ndí wa, eceg ɔ ŋgɔ tíi ŋ̀yɛ́ɛ́yɛ́ɛ likaale, wɔ wɔ́ɔ á m̀ɓɛ́ŋgáa wáh nyɛɛ ɓé lí yí lí yé nyú á m̀ɓɛ́nlómɛ a ŋga ɓɔ̄ŋ, 4á lí ɓɔŋ nɛ́ likaale jɔ́ɔ lí loo á nsɔlɓɛ́, la náŋ, Ɛsɔ́ŋɛ́ nyɔ́ a ŋga ɛ́n á nsɔlɓɛ́ ag kɛ wa lí sála.»
Láá mut a nyɛ́ɛ lí kánɛ
5«Eceg miní ŋga kánɛ, miníh ɓɛ́ɛ́g ɓé kaa ɓot bí ɔ́taɓa, ɓá bí ŋga dīŋ li kánɛ lí bítɛ̄tɛ́lí á ndáá-míɓomán la á míkāndán mí nzen, á lí somo nɛ́ ɓot bísɛ bí ɛ́n ɓɔ́. La mbálɛ, mag laga ɓɛ́nɛ nɛ́, ɓá man lí kuh lí nsála wáɓá. 6Ndí wa, eceg ɔ ŋgɔ sómo li kánɛ, níŋgí á tuúm ndáá yɔ́ɔ, ɔ lēg likooká, ɔ kánɛ Ɛsɔ́ŋɛ́, Loó jɔ́ɔ nyɔ́ a lɛ váŋ á nsɔlɓɛ́. La náŋ, Ɛsɔ́ŋɛ́ nyɔ́ a ŋga ɛ́n wa á nsɔlɓɛ́ ag kɛ wa lí sála. 7Eceg miní ŋga kánɛ, miníh bulhɛ́gɛ́ ɓé bíɓaŋgá á lí timanɛ lí mílemlem mí mām, kaa ɓot bí ŋgá yéɓe ɓé la Ɔlolómɛ̄. Bíg ɔ́ŋɔ nɛ́ ányúū ŋgandag mpɔ́t yaɓá nɛ Ɔlolómɛ̄ a ŋga yáhɛ nzag yáɓá. 8Miníh punkágán hɔ́ ɓé lā ɓɔ́, ányúū nɛ Ɛsɔ́ŋɛ́ wāná ag yí yé miní byɛ́ɛ̄ kóó, sɔ́kágánɛ́ miníg ɓat nyɛ́ yɔ́.»
Likánɛ lí «Á Ɛtáŋɛ wahá a lɛ á lóō»
(Lúk 11.2-4)
9«Ɓɛ́nɛ hɔ́, kánhánɛ nɛ́:
‹Á Ɛtáŋɛ wahá nyɔ́ a lɛ á lóō,
ɓɔ̄ŋ nɛ́ joó jɔ́ɔ lí ɓɛ́ lipúán,
10Likanʼyɛ jɔ́ɔ lí sɔ̄,
nsom wɔ́ɔ á ɓɔ̄ŋɓɛ́ɛ
á sí ákaa á lɛ́ á lóō.
11Tí ɓɛ́hɛ lidí jáhá lí ví ɔlɔ́ ví lɛn;
12laakɛ́ ɓɛ́hɛ avuha wáhá,
ákaa ɓɛ́hɛ ki bi ŋga láakɛ ɓá bí ŋga vúhle ɓɛ́hɛ;
13ɔh mwahkɛ́gɛ́ ɓé ɓɛ́hɛ nɛ́ bi kú á míceglan,
ndí suŋ ɓɛ́hɛ á mɔ̄ mí Ǹlem.›
14Ákaa ɛ́sɛ, kíyáɓɛ́nɛ maná laakɛ́ ɓot ávuha wáɓá, Ɛsɔ́ŋɛ́ wāná nyɔ́ a lɛ á lóō nyɛ́g ag kɛ ɓɛ́nɛ li laakɛ; 15Ndí kí manáh laakɛ ɓé ɓot avuha wáɓá, tɔ Ɛsɔ́ŋɛ́ wāná nyɛ́g a ŋgá kɛ ɓé ɓɛ́nɛ li laakɛ lí ávuha wáná.»
Láá mut a nyɛ́ɛ li ɓɔŋ lí étɔɔ-nzal
16«Eceg miní lɛ́ á etɔɔ-nzal, miníh kágág ɓé mísū, kaa ɓot bí ɔ́taɓa bí ŋga ɓɔ̄ŋ. Bíg yaanɛ misú máɓá nyaa etám á lí étɛ lí ɓot bísɛ nɛ́ bí lɛ́ á étɔɔ-nzal. La mbálɛ, mag laga ɓɛ́nɛ nɛ́, ɓá kūh nsála wáɓá. 17Ndí wa, eceg ɔ lɛ̄ á etɔɔ-nzal, so ásū wɔ́ɔ, ɔ kóm libíndɛ á m̀mú, 18á lí ɓɔŋ nɛ́ ɔh éthɛ́gɛ́ ɓé ɓot nɛ́ ɔ lɛ̄ á étɔɔ-nzal, amáh sig Ɛsɔ́ŋɛ́ nyɔ́ a lɛ váŋ á nsɔlɓɛ́; la náŋ, Ɛsɔ́ŋɛ́ nyɔ́ a ŋga ɛ́n wa á nsɔlɓɛ́ ag kɛ wa lí sála.»
Abyaŋ nyú á ŋga nāŋɓɛ á lóō
(Lúk 12.33-34)
19«Miníh somlág ɓé lí komanɛ lí ábyaŋ nyú á sí, ápah misɛ́g la máŋglēt bí ŋga lɔ́ɔ byoóm bísɛ, ápah ɓot bí wíī bí ŋga ɓól mílɛ̄ɛ̄, la ɓɔ́ ɓá yíí. 20Ndí miní kómánɛ ja ábyaŋ nyú á lɛ́ á lóō, ápah misɛ́g tɔ máŋglēt bí ŋgá pám ɓé, ápah ɓot bí wíī bí ŋgá ɓól ɓé milɛ́ɛ́ tɔ li yíí. 21Átɔm nɛ́, ápah abyaŋ wɔ́ɔ á lɛ, váŋ ki nɛ́ m̀mím wɔ́ɔ á lɛ.»
Etúlkáŋ yé nyúū mut
(Lúk 11.34-36)
22«Diíh nɛ lí lɛ́ étūlkáŋ yé nyúū mut. Kíyáɓɛ́nɛ diíh jɔ́ɔ lí lɛ́ hɔ́ mbólí, nyuú yɔ́ɔ ɛsɛ̄ ɛg ɓɛ́ á mípūū. 23Ndí, kíyáɓɛ́nɛ diíh jɔ́ɔ líg kɔn, nyuú yɔ́ɔ ɛsɛ̄ ɛg ɓɛ́ á lívito. Kíyáɓɛ́ hɔ́ nɛ, mipúú mí lɛ́ á átē wɔ́ɔ mí lɛ́ lívito, livito jɔ́ɔ lí lɛ́ viuú!»
Li pɔhɔ lí Ɔ́lolómɛ̄ tɔ nɛ́ ŋkuh
(Lúk 16.13)
24«Mut tɔ wa a sē hɔ́ ɓé nɛ a lá lí sále lí ɓásāŋɛ́ bíɓáa: tɔ yá ɓɔŋ láá, ag síŋgɛ nyɔ́ wa ndí a díŋɛ́ nyɔ́ŋɔ́, tɔ nɛ́ ag kɛ li átɓe la wa, ndí a yáŋa nyɔ́ŋɔ́. Miní sē hɔ́ ɓé nɛ maná ɓɛ́ miníg sále Ɔ́lolómɛ̄ ndí miníg sále ki ŋkuh.»
Li ɓɛ́la lí lípitá la Ɔlolómɛ̄
(Lúk 12.22-31)
25«Jɔ́ nɛ́ mi ŋga laga ɓɛ́nɛ nɛ́, ányúū eniŋ yáná, miníh kótóg ɓé la yé miní ŋga kɛ́ li dí, tɔ ányúū nyuú yáná yé miní ŋga kɛ́ li jál. Ɓaá eniŋ ɛ́ ŋgá loo ɓé lídī, nyuú ki ɛ lōo mbɔ́tí é? 26Léɓyán ánɔn á lóō; á ŋgá ɓɛl ɓé tɔ li pumu, á ŋgá komanɛ ɓé lídī á ákoa, ndí Ɛsɔ́ŋɛ́ wāná nyɔ́ a lɛ á lóō ag díɛ́hɛ wɔ́! Ɓaá miní ŋgá véé ɓé díyɛ ŋgandag li loo lí wɔ̄ é? 27Nzáá á póla yaná, átē a mitaka mɛ́ɛ́, a lɛ́ nɛ a lááɓɛ́ éniŋ yɛ́ɛ́ tɔ pupúhú ná é? 28Yéé miní ŋga táka ányúū mbɔ́tí é? Léɓyán ákaa mbonji pɛ́ɛ́ ɛ́ ŋga náŋ; ɛ́ ŋgá sál ɓé tɔ li lɔndɔ, 29ndí mag laga ɓɛ́nɛ nɛ́, tɔ káísa Salómo nyɛ́-mɛ̄n, átē á lipém jɛ́ɛ́ lísɛ, āh jál ɓé ɔ́lɔ̄ tɔ̄ vá ákaa mbonji ya. 30Kíyáɓɛ́nɛ Ɔlolómɛ̄ ag jáhɛ bikáá bí míndīī náŋ, bí bí lɛ́ nɛ lɛn bí lɛ́ váŋ, ndí líkɛ̄ɛ̄ byá lééɓɛ́ á nzáan, nɛ láá hɔ́, a sē ɓé nɛ a ɓɔ́ŋlé ɓɛ́nɛ li loo náŋ, á ɓot bí ŋyéɓé ntɔ́ga ɓá! 31Miníh kótóg hɔ́ ɓé ndí tɔ li ɓatɓan nɛ́: ‹Yéé bi ŋga kɛ́ li dí é? Yéé bi ŋga kɛ́ li nyú é? Tɔ nɛ́ yéé bi ŋga kɛ́ li jál é?› 32Bíŋ bísɛ, ɓot bí ŋgíla ŋyéɓé nɛ bí ŋga sómo byɔ́ ɛ́h ɓɛ́ ɓé lí tɔmb. Ndí, Ɛsɔ́ŋɛ́ wāná nyɔ́ a lɛ á lóō, ag yí nɛ́ miní byɛ́ɛ́ kóó la bíŋ byoóm bísɛ. 33Somlán yágá líkanʼyɛ la etɛ́l-sim yé Ɔ́lolómɛ̄, míŋí mam mísɛ, bíg kɛ ɓɛ́nɛ mɔ́ lí kondye. 34Miníh kótóg hɔ́ ɓé ányúū likɛ́ɛ́; likɛ́ɛ́ ag kɛ li kótle lí nyɛ́-mɛ̄n. Ɔlɔ́ sig la ɛyɛɛ́ mbɛgɛ.»
Trenutno odabrano:
Matéus 6: NTB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2023, CABTAL
