Matéus 3
3
Yohánɛs Ǹtíi-nzoɓan ag lɔ́g líkálo
(Mlk 1.2-6; Lúk 3.1-6; Yhn 1.19-23)
1Múŋ á nyúŋ alɔ́, Yohánɛs Ǹtíi-nzoɓan ɔ pámlé á éyāŋ yé Yúdēa, ag tɛ́ɛ́ likálo nɛ́: 2«Támán aɓé wáná miní vēŋé bílɛ̄m, átɔm nɛ́ Likanʼyɛ lí lóō li lɛ́ ɓɛɓɛ!» 3Yohánɛs Ǹtíi-nzoɓan a lɛ nyɔ́ mut Esáya m̀pɔ́tle-a-Ɔlolómɛ̄ a ŋgí kwɛlene, kí ag laga nɛ́: «Cíŋ ɛg lón á éyāŋ nɛ: ‹Miní ɓoŋhán nzen nyí Nyɔ́ŋ-Ɛsáŋɛ́, miní tɛ́ɛ́yɛ́ mílɔ̄ŋ mɛ́ɛ́ sim›.» 4Yohánɛs a ɓɛ́ɛ́ a jáhɛ mbɔ́tí nyí voŋ ví tít bí ŋga yáŋa nɛ́ kámɛl, la ŋgóli nyí ekogo ɛ́ tít á ŋkuɓá. A ŋgí dí jā átātáŋgá la weé nyú á pɛ́ɛ́. 5Ɓot bí Yélūsalɛm, ɓá bí Yúdēa bísɛ la ɓá bí nyúŋú mií á lɔm lí Yɔ́ldan bísɛ bí ŋgí sɔ́ ápah Yohánɛs a ɓɛ́ɛ́. 6Bí ŋgí páha miɓé máɓá la nyɛ́ á tí ɓɔ́ nzoɓan á lɔm lí Yɔ́ldan.
(Lúk 3.7-9)
7Kasig Yohánɛs a ŋgí ɛ́n ŋgándag ɓōt bí Élōg-Falísái la ɓá bí Élōg-Sadúkái bíg sɔ́ lí kuh lí nzóɓan á yóg yɛ́ɛ̄, ɔ yó ɓɔ́ nɛ́: «Á mbóta péé, nzáá a yéglɛ́ ɓɛ́nɛ li nāŋga lí ɔ́ūn ví Ɔlolómɛ̄ ví ŋga sɔ́ m̀bíí é? 8Ɓɔŋán hɔ́ mam miláám mí ŋga étɛ nɛ́ maná veŋé bílɛ̄m; 9ndí miníh laglág ɓé la ɓɛ́nɛ-mɛ̄n nɛ́: ‹Bi byɛ́ɛ Áblaháam ákaa ɛtáŋɛ wahá›. Átɔm nɛ́, mag laga ɓɛ́nɛ nɛ́, Ɔlolómɛ̄ ag la li yaanɛ lí yí ŋgɔg ɓɔɔ́n bí Áblaháam. 10Ŋkulaŋ a lɛ́ m̀ɓoŋhágan á lí sɛ́m lí míkaŋ mí bíéé; jɔ́ hɔ́ nɛ: eéé la eéé ɛ́ ŋgá úm ɓé mítām mílāām, ɛ́g kɛ li sɛ́mɓɛ, la yɔ́ ɛ́ lééɓɛ́ á nzáan.»
(Mlk 1.7-8; Lúk 3.15-18; Yhn 1.24-28)
11«Ma, mag tíi ɓɛ́nɛ nzoɓan átē a mindím nyí ɛ ŋga étɛ nɛ́ maná tám áɓē wáná, munú vēŋé bílɛ̄m, ndí nyɔ́ a ŋga sɔ́ ámbúh yáma ag loo ma ŋguu. Mih kɔ́ɔ́ ɓé ma nyɛ́ li ɓógtɛ lí bítāmbí. Ndí nyɛ́, ág kɛ ɓɛ́nɛ li tíi lí nzóɓan nyí nzáan la nyí M̀búl Mpúán. 12Ag kɛ li púɛ lí yáli yɛ́ɛ́, a byee evɛ́nd á wɔ, á lí ɓága lí mítū la miíh, mí a ŋga kɛ́ li naŋɛ á ákoa wɛ́ɛ́. Ndí tín la mitú, ag ɓɔŋ ɓɔ́ lísalká jé a ŋga kɛ́ li dígɛ á nzáan nyí ɛ ŋgá dím ɓé.»
Nzoɓan nyí Yésus
(Mlk 1.9-11; Lúk 3.21-22; Yhn 1.29-34)
13Múŋ á nyúŋ alɔ́, Yésus ɔ ɓógyé á Galiléa li kɛ á lɔm lí Yɔ́ldan, nɛ́ Yohánɛs a tí nyɛ́ nzóɓan. 14Yohánɛs ɔ sómo lí ɓen, ɔ yó nɛ: «Ma nɛ́ mi kɔɔ́ la nzoɓan yɔɔ, láá pɛ wa nɛ́ ɔ ŋgɔ sɔ́ á yóg yama!» 15Yésus ɔ pélē nyɛ nɛ́: «Mwahɛ́ yɔ́ ɛ́ ɓɔ̄ŋɓɛ́ náŋ vɔ́ŋɔ́ɔ; átɔm nɛ́ náŋ nɛ́ bi ŋga kɛ́ li ɓɔŋ lí yé ɛ́sɛ ɛ́ tɛ́ɛ́ sim á miíh mí Ɔ́lolómɛ̄.» La Yohánɛs ɔ tímān lí yéɓe nɛ́ náŋ a ɓɔ́ŋɓɛ́ɛ. 16Ɛnɛ́ Yésus a kūh nzóɓan, ɔ pámlé á míndīm. Á nlemlem á éceg, lóō lú léglan la nyɛ́ ɔ ɛ́n M̀búl á Ɔ́lolómɛ̄ ág suhle nyɛ́ ákaa ɔɓeŋ. 17Váŋ nɛ́ cíŋ ya sɔ́lé á lóō yú lágá nɛ: «Nyɔ́ nɛ́ a lɛ̄ edidíŋɛ yáma Mɔɔ́n, nyɔ́ ma ɛ́n m̀ɓɛɛŋ nɛ́ mi pɔ́hɔ́.»
Trenutno odabrano:
Matéus 3: NTB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2023, CABTAL