മത്തായി 18
18
മുക്ക്യമാനവാ് ആര്?
1അയ്യി ഗള്യേലിതാനെ തന്ന് സൊല്ലുപഡി ണഡാക്കവാര് ഏസു പട്ട്‌ക്കെ ബന്ത്: <<സാമി ആള്‌റാദ്‌ക്ക് പട്ടവാരിലി ആര് ബെല്ല്യവാ്?>> എന്ത് കേ്ട്ടാര്.
2അക്കുളെ ഏസു ഒരു സിന്ന മ്‌ഗാണ തന്ന് പട്ട്‌ക്ക് ഒളേത്ത് അവാര്‌ദ് ണഡ്‌ക്കെ ണില്ലിസി ഇച്ചെ സൊന്നാ്: 3<<ണിമ്മ മനേസ്സ് മാറി പിന്നേമ് സിന്ന പ്‌ള്ളെഗണ പാസെ ആഗാദെ പോനാക്കി ണിമ്മ സാമി ആള്‌റവാര് ആഗമാട്ടേര് എന്ത് ണേര്‌മായിമ് ണാന് ണിമാക്കെ സൊല്ലുറെ. 4അദ്‌ണാലെ ഈ പ്‌ള്ളെഗണ പാസെ അവാനവാ് മനേസ്സാറ തണിന്ത് ണഡാക്കവാ്ത്തെ സാമി ആള്‌റാദ്‌ക്ക് പട്ടവാരിലി റമ്പ മുക്ക്യമാന ആള്. 5ഈ ദിന്‌സ് മ്‌ഗാണ എന്ന് പേരിലി തങ്കാരിക്കവാ് എനാണാമ് തങ്കാരിക്കാ്.>>
പാവ സെയ്യ ആസെ പ്‌ഡിസ്‌റാദ്
6<<എനാണ ണമ്പിര്‌ക്ക ഈ സിന്നവാരിലി ഒരുത്താന പാവ സെയ്യ ബെത്താക്കി അവാന്‌ക്ക് മ്‌ഗ്‌ന്ത ദണ്ടണെ കെ്ഡേക്കു. അദ്‌ണ ബ്‌ഡ അവാ് കവുത്ത്‌ക്കെ ബെല്ല്യ ബീസ്‌കല്ല്‌ണ കെ്ട്ടി അവാന കഡാല്‌ക്ക് താത്ത്‌റാദ് അവാന്‌ക്ക് ണല്ലാദ്.
7ആള്‌ഗാക്ക് പാവ സെയ്യ ആസെപ്‌ഡ്‌സ്‌റാദ്‌ണാലെ ഉലഗാക്ക് സെറ്റെ കജട്ട കജട്ടത്തെ. അച്ച്‌ള കാര്യഗ ഒപ്പ ണഡാക്കാദ്‌ത്തെ. ആന ആര് പാവ സെയ്യ ആസെപ്‌ഡ്‌സ്‌റാരൊ അവാന്‌ക്ക് സെറ്റെ കജട്ട കജട്ടത്തെ! 8ണിന്ന് കയ്യ്യൊ കാലൊ ണിനാണ പാവ സെയ്യ ബയ്യി ബെത്താക്കി അദ്‌ണ ബെ്ട്ടി എക്ക്. റണ്ട് കയ്യിമ് റണ്ട് കാല്‌മ് ഇര്‌ക്കവാനായി കെ്ഡാത്ത ഗെ്ണ്ടഗ കുയ്യിക്ക് ബീ്റാദ്‌ണ ബ്‌ഡ ഒറ്റെ കാലനായൊ ഒറ്റെ കയ്യനായൊ എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസ്‌റാദ്‌ത്തെ ണിനാക്ക് ണല്ലാദ്. 9ണിന്ന് കണ്ണ് ണിനാണ പാവ സെയ്യ ബയ്യി ബെത്താക്കി അദ്‌ണ സൊളോണ്ടി എ്ഡ്‌ത്തെക്ക്. റണ്ട് കണ്ണോഡെ കെ്ഡാത്ത തീ ണരഗാക്കെ ബീ്റാദ്‌ണ ബ്‌ഡ ഒറ്റെ കണ്ണാനായി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസ്‌റാദ്‌ത്തെ ണിനാക്ക് ണല്ലാദ്.>>
കാണാദായെക്കിന കൊറ്യാഡ്‌ദ് കദെ
10<<ഈ താന്തവാരിലി ഒരുത്താന ബീസാക്ക് ബെലെ ഇല്ലാത്തവാ് എന്ത് ണെനേക്കാദെ ഇര്‌ക്ക്യ സൂസാരിത്ത്‌കൊള്ളിരി. എന്ത്‌ക്കെന്റ മേലോഗാത്തിലി അവാര്‌ദ് കാര്യണ ണോഡുറ ദൂദല മോലോഗാത്തിലി ഇര്‌ക്ക എന്ന് അപ്പന എപ്പ്‌മ് കണ്ട്‌കൊണ്ടെ ഇര്‌ക്കാര് എന്ത് ണാന് ണിമാക്കെ സൊല്ലുറെ. 11കാണാദായെക്കിനാദ്‌ണ കാപാറ്റ്യാത്തെ മന്‌സാനായി പ്‌റാന്തവാ് ബന്താദ്#18:11 കാണാദായെക്കിനാദ്‌ണ കാപാറ്റ്യാത്തെ മന്‌സാനായി പ്‌റാന്തവാ് ബന്താദ്. ഈ സൊല്ലുസുലാക്ക മുദായിര്‌ന്ത കായിദണ ണോഡി എ്ള്‌ദിന പഗ്‌ദി കായിദാത്തിലി ഇല്ലെ..
12ഇദ്‌ണ പറ്റി ണിമ്മ എന്ത ണെനേക്കേര്. ഒരുത്താന്‌ക്ക് ണൂറ് കൊറ്യാഡ് ഇര്‌ക്ക്‌ദ് എന്ത് ബെയ്യിരി. അദിലി ഒരു കൊറ്യാഡ് അലാന്തെക്കിന തൊന്നൂറ്റി ഒമ്പാദ് കൊറ്യാഡ്‌ണാമ് മലേക്കെ താനെ ബ്‌ട്ട് തള്ളി അലാന്തെക്കിനാദ്‌ണ മലെമല്യ പോയി പരാക്കാദില്ലേഗ? 13പരാന്ത് കെ്ഡേസിനാക്കി, അലാന്തെക്കാത്ത തൊന്നൂറ്റി ഒമ്പാദ് കൊറ്യാഡ്‌ഗണ പിര്യപഡ്‌റാദ്‌ണ ബ്‌ഡ പരാന്ത് കെ്ഡേസിന ആഡ്‌ണ ണെനേത്ത് റമ്പ പിര്യപൊങ്കുവാ് എന്ത് ണേര്‌മായിമ് ണാന് ണിമാക്കെ സൊല്ലുറെ. 14അദേപാസെത്തെ ഈ താന്തവാരിലി ഒരുത്താ് ബീസാക്ക് കാണാദായെക്ക്‌റാദ് മേലോഗാത്തിലിര്‌ക്ക ണിമ്മ്‌ദ് അപ്പാന്‌ക്ക് പ്‌ഡിക്ക മാട്ട.>>
ഒരുത്താ് പാവ സെയ്‌ദ എന്ത സെയ്‌ഡൊ
15<<ഏസുക്കാറാരിലി ഒരുത്താ് ണിന്നോഡെ പാവേങ്ക് സെയ്‌ദാക്കി ണീമ് അവാന്‌മ് തന്യെ ഇര്‌ക്കാട്ടി അവാ് സെയ്‌ദ പാവണ പറ്റി ബോദ്യ ബര്‌സി കൊഡുക്കുഡൊ. അച്ചെ ണിന്ന് ണായണ അവാ് കേ്ട്ട ണീ അവാന സാമി സാരി തിലിപ്പിനെ. 16അച്ചെ ണിന്ന് ണായണ അവാ് കേ്ക്കാദെ പോന ഒന്റൊ റണ്ടൊ ആള്‌ഗണ കൂട്ടി പോഡൊ. എന്ത്‌ക്കെന്റ <റണ്ടൊ മൂണൊ ആള്‌ഗാദ് ബാക്കാലെ എല്ല കാര്യഗാമ് ഒറേപ്പാക്ക്‌റമല്ല.>#മറ്‌ദെ സൊല്ലുറ സട്ട 19:15 17അവാര് സൊല്ലുറാദ്‌ണ അവാ് കേ്ക്കാദെ പോന ഏസുക്കാറാര് കൂട്ടാക്കെ സൊല്ലുഡൊ. അവാര് സൊല്ലുറാദ്‌ണാമ് അവാ് കേ്ക്കാദെ പോന അവാ് ണിനാക്ക് ഏസുണ ണമ്പാത്തവാന പാസേമ് ണ്‌ഗ്‌ദി പിരിക്കവാന പാസേമ് എന്ത് ണെനേത്ത് കൊള്ളു.
18സാമി ആള്‌റാദ്‌ക്ക് കഡാക്ക്യ ഉള്ള ബാസണ തുറാക്ക്യാമ് അഡേക്ക്യാമുള്ള തുറാപ്പ്‌കയ്യിന ണാന് ണിനാക്ക് തരെ. ണിമ്മ ബൂമിലി ബേ്ഡ എന്ത് ബെക്കാദ്‌ണെല്ല മേലോഗാത്തിലിമ് ബേ്ഡ എന്ത് ബെക്കുവാ്. ണിമ്മ ബൂമിലി സെയ്യ ബ്‌ഡ്‌റാദ്‌ണെല്ല മേലോഗാത്തിലിമ് സെയ്യ ബ്‌ഡുവാ് എന്ത് ണേര്‌മായിമ് ണാന് ണിമാക്കെ സൊല്ലുറെ.
19ണാന് ണിമാക്ക് പിന്നേമ് സൊല്ലുറെ, ബൂമിലി ഏദ് കാര്യാക്ക് ആനാല്‌മ് ണിമ്മ് കൂട്ടാത്തിലി റണ്ട് ആള് ഒരേ മനേസ്സോഡെ ബേ്ണ്ടികൊണ്ട മേലോഗാത്തിലിര്‌ക്ക എന്ന് അപ്പാനോഡിര്‌ന്ത് അദ്‌ണ കെ്ഡേസുവാര്. 20എന്ത്‌ക്കെന്റ എന്ന് പേരിലി റണ്ടൊ മൂണൊ ആള്‌ഗ ഏദ് പട്ടിലെല്ല കൂഡ്‌റേരൊ അദില്യെല്ല ണാന് ഇര്‌ക്കെ.>>
പൊറിമെ ഇല്ലാത്ത ബേലെക്കാറാ് കദെ
21അക്കുളെ പത്ത്‌റോസ് ഏസു പട്ട്‌ക്കെ ബന്ത്: <<ആണ്ടവാനെ, ഒരുത്താ് എനാക്ക് ണേരെ പാവ സെയ്‌ദാക്കി ണാന് എത്തിനി ജമ്പ് പൊറുക്കുഡൊ, ഏ്ള് ജമ്പ് മദ്യ?>> എന്ത് കേ്ട്ടാ്.
22അക്കുളെ ഏസു: <<ഏ്ള് അല്ല, ഏ്ള് എ്ളാവദ് ജമ്പ് പൊറുക്കുഡൊ എന്ത് ണാന് ണിനാക്കെ സൊല്ലുറെ>> എന്ത് സൊന്നാ്.
23<<സാമി ആള്‌റാദ് എങ്കാദ് തന്ന് ബേലെക്കാറാര്‌ദ് കണാക്ക് ണോഡി തീക്ക്യ ആസെപഡ്‌റ ഒരു റാജാവുക്ക് സമ. 24റാജാവു കണാക്ക് ണോഡ്യ പ്‌ഡിക്കാട്ടി, പത്തായിര താലന്ത്#18:24താലന്ത് ഒരു താലന്ത് എങ്കാദ് ഒരു ബേലെക്കാറാന്‌ദ് പദിനഞ്ച് ബര്‌സാക്ക്‌മ് മേല് കെ്ഡേക്ക കൂലിന ബ്‌ഡ ബെലെ ബരു. അല്ലാദെ പോന ഒരു താലന്ത് എങ്കാദ് മുപ്പത്ത്യഞ്ച് കില തൂക്ക ഉള്ള പൊന്നൊ ബെ്ള്ള്യൊ ബരു. കുറ്യാപ്പെ ബാങ്കിന ഒരുത്താന റാജാവു പട്ട്‌ക്ക് കൂട്ടി ബന്താര്. 25അവാന്‌ക്ക് താന് ബാങ്കിന കുറ്യാപ്പേന കൊഡുക്ക്യ മുഡ്യാത്താദ്‌ണാലെ അവാന്‌ദ് പണ്ണാഡി അവാനാമ് അവാന്‌ദ് പെ്ണ്ട്‌പ്‌ള്ളെഗണാമ് അച്ചെ അവാന്‌ക്കിര്‌ക്ക എല്ലാദ്‌ണാമ് ബിറ്റ് കുറ്യാപ്പേന കെ്ട്ടി തീക്ക്യ സൊന്നാ്.
26അദ്‌ണാലെ അവാ് പണ്ണാഡിദ് കാല്‌ക്കെ ബ്‌ന്ത്: <റാജാവെ എനാണ സെറ്റെ പൊറുക്കുഡോമെ! ണാന് എല്ലാദ്‌ണാമ് തന്ത് മുഡിക്കെ> എന്ത് ബേ്ണ്ടിനാ്. 27അക്കുളെ റാജാവുക്ക് അവാനോഡെ കറ്‌മ്മ പ്‌ഡിത്ത് കുറ്യാപ്പേന ഇല്ലാദാക്കി ബ്‌ഡാമ് സെയ്‌ദാ്.
28അയ്യി ബേലെക്കാറാ് പോര ബയ്യിലി ബെത്ത് തനാക്ക് ണൂറ് ദിനാറ്#18:28ണൂറ് ദിനാറ് പണ ഒരു ദിനാറ് എങ്കാദ് ഒരു ആള്‌ദ് ഒരു ണാള്‌ദ് കൂലിത്തെ. പണ തര്യ ഇര്‌ക്ക തന്ന്‌ദൊപ്പ ബേലെ സെയ്‌രവാന കണ്ട്, അവാന്‌ദ് കവുത്ത്‌ണ പ്‌ഡിത്ത് ഇ്റ്‌ക്കി: <ണീ എന്നോഡെ ബാങ്കിന കുറ്യാപ്പേന കെ്ട്ടി മുഡി> എന്ത് സൊന്നാ്.
29അക്കുളെ അവാന്‌ദൊപ്പ ബേലെ സെയ്‌രവാ് അവാന്‌ദ് കാല്‌ക്കെ ബ്‌ന്ത്: <എന്നോഡെ സെറ്റെ പൊറുക്കുഡോമെ, ണാന് തന്ത് തീക്കെ> എന്ത് ബേ്ണ്ടിനാ്.
30ആന അവാ് അച്ചെ സൊല്ലിറ്റ്‌മ് അയാള് കേ്ക്കാലെ. അവാന പ്‌ഡിത്ത് എ്ഡ്‌ത്ത് പോയി കുറ്യാപ്പേന തീക്കമാട്ട്‌മ് അവാന ജെയില്‌ക്ക് പ്‌ഡിത്ത് ഇക്കിസിനാ്. 31ഇച്ചെ സെയ്‌ദാദ്‌ണ അവാന്‌ദൊപ്പ ബേലെ സെയ്‌രവാര് കണ്ട് അവാര് ദുക്കപട്ടാര്. പ്‌റ അവാര് പോയി തമ്മ് റാജാവുക്കെ ണഡാന്ത കാര്യണ മുച്ചുഡ സൊന്നാര്.
32അക്കുളെ അവാന പണ്ണാഡി ഒളേത്ത് ബര്‌സി: <കേ്ഡ്‌ഗെ്ട്ട ബേലെക്കാറാനെ, ണീ എനാണ ബേ്ണ്ടികൊള്ളുഗാട്ടി ണാന് ണിന്ന് കുറ്യാപ്പേന ഇല്ലാദാക്കി തന്തേനല്ല? 33എനാക്കെ ണിനാണ കറ്‌മ്മ പ്‌ഡിത്ത്‌ദ്. അദ്‌ണ പാസെ ണിന്ന്‌ദൊപ്പ ബേലെ സെയ്‌രവാനോഡെ ണിനാക്ക്‌മ് കറ്‌മ്മ പ്‌ഡിക്ക ബേ്ഡാഗ?> എന്ത് സൊന്നാ്. 34അച്ചെ പണ്ണാഡിക്ക് മൊനെ ബന്ത്, അവാ് തന്നോഡിര്‌ന്ത് ബാങ്കിന കുറ്യാപ്പേന കെ്ട്ടി മുഡിക്കമാട്ട്‌ക്ക് അവാന ജെയില്‌ക്കെ ഇക്കി കൊഡിമെപഡ്‌സ്യ ബ്‌ട്ടാ്.
35ണിമ്മ ഒരൊരു ആള്‌മ് അഡ്‌ത്തവാരോഡെ മനേസ്സാറ പൊറുക്കാദെ പോന ണിമാണാമ് മേലോഗാത്തിലിര്‌ക്ക എന്ന് അപ്പാ് ഇച്ചെത്തെ സെയ്‌വാ്.>>
Trenutno odabrano:
മത്തായി 18: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
