മത്തായി 11
11
തണ്ണിക്ക് മുളുഗ്‌സ്‌റ ഓഗന്നാന്‌മ് ഏസുമ്
1ഏസു തന്ന് സൊല്ലുപഡി ണഡാക്ക പന്നന്റ് ആള്‌ഗാക്ക് ഈ കാര്യഗണ പഡിസിന പ്‌റ എഗുദാര്‌ദ് പട്ടണാക്ക്‌റാഗ പഡിസ്യാമ് ണല്ല സേദിന സൊല്ല്യ ബേ്ണ്ടിമ് അദിലി ഇര്‌ന്ത് പോനാ്.
2ക്‌റ്‌സ്‌ത്ത് സെയ്‌ര കാര്യഗണ തണ്ണിക്ക് മുളുഗ്‌സ്‌റ ഓഗന്നാ് ജെയിലിലി ബെത്ത് കേ്ട്ട്, തന്ന് സൊല്ലുപഡി ണഡാക്കവാര്‌ണ ഏസു പട്ട്‌ക്കെ സൊല്ലിബ്‌ട്ട്: 3<<ബര്യ പോരവാ് ണീത്തേഗ? ഇല്ലെ, ബേ്റെ ആള്‌ണ എമ്മ കാത്തിര്‌ക്കുഡോഗ?>> എന്ത് കേ്ക്ക്യ ബെത്താ്.
4ഏസു അവാര്‌ക്കെ: <<ണിമ്മ തിലിമ്പി പോയി ഇപ്പ് കണ്ടാദ്‌ണാമ് കേ്ട്ടാദ്‌ണാമ് ഓഗന്നാന്‌ക്കെ സൊല്ലി. 5കുറുഡാര്‌ക്ക് പാര്‌വെ, മൊണ്ടിഗ എ്ന്ത് ണഡാക്കാര്, കുസ്‌ട്ട ണോയിക്കാറാര് തെ്ളിരാര്, സെ്ഗ്‌ഡാര്‌ക്ക് കാദ് കേ്ക്ക്‌ദ്, സത്തവാര് ഉജുറേ്റാര്, ഏ്ളെഗാക്ക് ണല്ല സേദിന സൊല്ലുറാ്. 6ആന ണാന്‌ത്തെ ക്‌റ്‌സ്‌ത്ത് എന്ത് സന്തേഗ പഡാത്തവാ് ബാഗ്യക്കാറാ്>> എന്ത് സൊന്നാ്.
7ഓഗന്നാന്‌ദ് സൊല്ലുപഡി ണഡാക്കവാര് പോന പ്‌റ ഏസു ആള്‌ഗാക്കെ ഓഗന്നാന പറ്റി ഇച്ചെ സൊല്ല്യ പ്‌ഡിത്താ്: <<ണിമ്മ എന്തണ കാണ്യ ബെ്ട്ടെകാഡ്‌ക്കെ പോനേര്? കാറ്റിലി ആഡ്‌റ ഓഡേനാഗ? 8ഇല്ലെ, പിന്നെ ണിമ്മ എന്തണ കാണ്യ പോനേര്? ണല്ല മിന്‌മിന ഉഡുപ്പിക്കിര്‌ക്ക ആള്‌ണാഗ? അല്ല, ണല്ല മിന്‌മിന ഉഡുപ്പിക്കിര്‌ക്കവാര് റാജകോട്ടേലിത്തെ ഇര്‌ക്കുവാര്. 9അല്ല, പിന്നെ ണിമ്മ എന്തണ കാണ്യ പോനേര്? ഒരു സാമിദാസ്‌ണാഗ? സെരിത്തെ സാമിദാസ്‌ണ ബ്‌ഡ ബെല്ല്യവാനായി ഇര്‌ക്കവാനാത്തെ എന്ത് ണാന് ണിമാക്കെ സൊല്ലുറെ.
10<ണാന് എന്ന് സേദിക്കാറാന ണിനാക്ക് മുദ സൊല്ലിബ്‌ഡുവെ,
അവാ് ണിനാക്ക് ബേ്ണ്ടി ആള്‌ഗണ ഒരിക്കി ബെക്കുവാ്>#മലാക്കി 3:1
എന്ത് എ്ള്‌ദിര്‌ക്കാദ് ഇയാള്‌ണ പറ്റിത്തെ. 11ണേര്‌മായിമ് ണാന് ണിമാക്കെ സൊല്ലുറെ, പൊമ്പുളെഗാക്ക് പ്‌റാന്തവാരിലി തണ്ണിക്ക് മുളുഗ്‌സ്‌റ ഓഗന്നാന ബ്‌ഡ ബെല്ല്യവാ് ആര്‌മ് ഇല്ലെ. എന്താല്‌മ് സാമി ആള്‌റാദ്‌ക്ക് പട്ടവാരിലി റമ്പ സിന്നവാ് ആയിര്‌ക്കവാ് ഗൂഡി ഓഗന്നാന ബ്‌ഡ ബെല്ല്യവാ്ത്തെ. 12തണ്ണിക്ക് മുളുഗ്‌സ്‌റ ഓഗന്നാ് ബന്ത ണാളിലിര്‌ന്ത് ഇന്നാരമാട്ട്‌ക്ക്‌മ് സാമി ആള്‌റവാര്‌ദ് കൂട്ടാക്കെ എജേയ ബേ്ണ്ടി ഗട്ടിക്കാറാരാന ആള്‌ഗ തമാക്ക് മുഡിര അളാവുക്ക് ഓരാഡി ണോഡുറാര്.#11:12 ഗ്‌റീക്കിലി ഈ സൊല്ലുസുലാക്ക എന്തായെന്റ് സൊക്കാന തെര്യ. 13എല്ല സാമിദാസ്‌ഗാമ്, മോസെ ബെത്ത സാമി സട്ടഗാമ് ബര്യ പോര കാര്യണ പറ്റി ഓഗന്നാന്‌ദ് കാലമാട്ട് സൊന്നാര്. 14ബരുവാ് എന്ത് സൊല്ലിര്‌ന്ത ഏല്യാവു താനെത്തെ തണ്ണിക്ക് മുളുഗ്‌സ്‌റ ഓഗന്നാ്. ഇദ്‌ണ ണമ്പ്യ ണിമാക്ക് മനേസ്സിര്‌ന്ത ണമ്പിരി. 15കേ്ക്ക്യ മനേസ്സിര്‌ക്കവാ് കേ്ക്കുഡൊ.
16-17ആന ഇപ്പേത്ത കാലാത്തില്യ ആള്‌ഗണ ണാന് ഏദ്‌ക്കെ എജേത്ത് സൊല്ലുവെ? സന്തേക്ക്‌റാഗ കുക്കാന്ത് കൊണ്ട്:
<എമ്മ ണിമാക്ക് ബേ്ണ്ടി കുവാല് പ്‌ഡിത്തേര്,
ആന ണിമ്മ ആട്ട് ആഡാലെ.
എമ്മ ണിമാക്ക് ബേ്ണ്ടി സുലാക്ക സൊല്ലി അഗ്‌ദേര്,
ആന ണിമ്മ ണെഞ്ച്‌ണ മാര്‌ണ അഡിത്ത് അഗാലെ>
എന്ത് തമ്മ് എ്ണേവുക്കാറാര്‌ക്കെ ഒളേത്ത് സൊല്ലുറ മക്കഗാക്ക് സമാത്തെ അവാര്. 18എല്ല ആള്‌ഗാമ് തിന്ത്‌കുഡിത്ത് ണഡാക്ക പാസെ ഓഗന്നാ് തിന്ത്‌കുഡിത്ത് ണഡാക്കാലെ. അച്ചെ ഇര്‌ക്കവാനായി ബന്ത <അയാള്‌ക്ക് കെ്ട്ടജാദി ഇര്‌ക്ക്‌ദ്> എന്ത് അവാര് സൊല്ലുറാര്. 19മന്‌സാനായി പ്‌റാന്തവാ് എല്ല ആള്‌ഗണാമ് പാസെ തിന്ത്‌മ് കുഡിത്ത്‌മ് ബന്താ്. അച്ച്‌ളവാന <ഇദാ തീനിപോറാന്‌മ് കുഡ്യാന്‌മ് ണ്‌ഗ്‌ദി പിരിക്കവാര്‌ദ്‌മ് പാവ സെയ്‌ദ് ണഡാക്കവാര്‌ദ്‌മ് എ്ണേവുക്കാറാ്> എന്ത് അവാര് സൊല്ലുറാര്. ഒരുത്താന്‌ക്ക് സാമി കൊഡുത്ത ബുദ്ദിര്‌ന്ത, അവാ് സെയ്‌ര കാര്യാത്തിലി അദ്‌ണ കാണില.>>
ഏസുണ ണമ്പാത്ത പട്ടണാത്തിലി ഇര്‌ക്കവാര്‌ക്ക് ബര ദണ്ടണെ
20പ്‌റ ഏസു താന് മൊത്തന അദിസ്യഗ സെയ്‌ദ പട്ടണാത്തിലി ഇര്‌ക്കവാര് തമ്മ സെയ്‌ര പാവാത്തിലിര്‌ന്ത് സാമി സാരി ബരാത്താദ്‌ണാലെ ഇച്ചെ സൊല്ലി അവാര്‌ണ സണ്ടെ കൊഡുക്ക്യ പ്‌ഡിത്താ്. 21<<കോരെസീന്‌ക്കാറാരെ, അവ്വൊ ണിമാക്ക് സെറ്റെ കജട്ട കജട്ടത്തെ! ബേദ്‌സെയ്‌ദെക്കാറാരെ, അവ്വൊ ണിമാക്ക് സെറ്റെ കജട്ട കജട്ടത്തെ! ണിമ്മ് പട്ടിലി ണഡാന്ത അദിസ്യഗ സോര് പട്ടണാത്തിലിമ് സീദോന് പട്ടണാത്തിലിമ് ണഡാന്തിര്‌ന്ത, അദില്യവാര് തമ്മ സാമി സാരി തിലിമ്പിനേര് എന്ത് കാട്ട്യ ബേ്ണ്ടി എപ്പോതാനെ സാക്ക് കൊത്തുണ കെ്ട്ടി ബൂദിന ഉരുവുക്ക് അട്ടി ദുക്കപട്ട് സാമി സാരി തിലിമ്പിര്‌ക്കുവാര്. 22ആന സോര്‌ക്കാറാര്‌ക്ക്‌മ് സീദോന്‌ക്കാറാര്‌ക്ക്‌മ് കെ്ഡേത്ത ദണ്ടണേന ബ്‌ഡ മ്‌ഗ്‌ന്ത ദണ്ടണെ ബിദി സൊല്ലുറ ണാളിലി ണിമാക്ക് കെ്ഡേക്കു എന്ത് ണാന് ണിമാക്കെ സൊല്ലുറെ. 23കവറ്‌ണഗൂമ് പട്ടണക്കാറാരെ, ണിമ്മ മേലോഗാക്ക് സമ ഉജാന്തവാര? ഇല്ലെ, ണിമ്മ പാദാളമാട്ട് താന്ത് പോവേര്. ണിമ്മ് പട്ടിലി സെയ്‌ദ അദിസ്യഗെല്ല സോദോമ് പട്ടിലി സെയ്‌ദിര്‌ന്ത, അയ്യി പട്ടണ ഇപ്പ്‌മ് ഇര്‌ന്തിര്‌ക്കു. 24ആന സോദോമ്‌ക്കാറാര്‌ക്ക് കെ്ഡേത്ത ദണ്ടണേന ബ്‌ഡ മ്‌ഗ്‌ന്ത ദണ്ടണെ ബിദി സൊല്ലുറ ണാളിലി ണിമാക്ക് കെ്ഡേക്കു എന്ത് ണാന് ണിമാക്കെ സൊല്ലുറെ.>>
സോറ്റിര്‌ക്കവാരെ ദാപാറിരി
25അയ്യി ഗള്യേലിതാനെ ഏസു ഇച്ചെ സൊന്നാ്: <<മേലോഗാക്ക്‌മ് ബൂലോഗാക്ക്‌മ് ആണ്ടവാനായിര്‌ക്ക അപ്പാനെ, ണിനാക്ക് ണാന് ണണ്ണി സൊല്ലുറെ. ണീ ഈ കാര്യഗണെല്ല ബുദ്ദിക്കാറാര്‌ക്ക്‌മ്, അറുവാളിഗാക്ക്‌മ് മറേസി ബെത്ത് സിന്ന പ്‌ള്ളെഗണ പാസെ തണിമോഡെ ണഡാക്കവാര്‌ക്ക് ബെ്ളിപഡ്‌സി കൊഡുത്തേനല്ല. 26ണേര്‌ത്തെലപ്പ അച്ചെ സെയ്യാത്തെ ണിനാക്ക് ആസെ ഇര്‌ന്താദ്.
27എന്ന് അപ്പാ് എല്ലാദ്‌ണാമ് എന്ന് കയ്യിക്ക് ഒപ്പഡിത്തിര്‌ക്കാ്. അപ്പാന്‌ക്ക് അല്ലാദെ മഗാന ആര്‌ക്ക്‌മ് തെരിരാദില്ലെ. അദേപാസെ മഗാന്‌ക്ക്‌മ് മഗാ് ആര്‌ക്ക് ബെ്ളിപഡ്‌സ്യ ആസെപഡ്‌റാനൊ, അവാന്‌ക്ക്‌മ് അല്ലാദെ ബേ്റെ ആര്‌ക്ക്‌മ് അപ്പന തെരിരാദ്‌മില്ലെ.
28പാഡ്‌പട്ട് സോറ്റിര്‌ക്കവാര്‌മ്, ആരവാരത്തോഡെ ഇര്‌ക്കവാര്‌മാന ആള്‌ഗ മുച്ചുഡാമ് എന്ന് പട്ട്‌ക്ക് ബായിരി, ണാന് ണിമാണ ദാപാറ്യ ബെക്കുവെ. 29ണാന് പൊറിമോഡെ ഇര്‌ക്കവാന്‌മ് തണിമെക്കാറാന്‌മ് ആനാദ്‌ണാലെ ണാന് സൊല്ലുറ കാര്യണ സെയ്‌ദ് കൊണ്ട് എന്നോഡെ ഇര്‌ന്ത് പഡിരി. അച്ചെ സെയ്‌ദ ണിമ്മ ണിമ്മദ്യോഡെ ഇര്‌ക്കുവേര്. 30ണാന് സെയ്യ സൊല്ലുറ കാര്യ ണിമാക്ക് ഏറ്റ്‌കൊള്ള്യ ബെല്ല്യ ബുദ്ദിമുട്ടില്ലാത്താദ്‌മ്, ണാന് തര സൊമെ കന ഇല്ലാത്താദ്‌മ്‌ത്തെ.>>
Trenutno odabrano:
മത്തായി 11: സാമിദ് സേദി
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Life Literature
