मत्ति 15

यहुदि लोकुरा रीति-रिवाज पालन कियानाता बारेते प्रश्न

(मर ७:१-१३)

1असके येरुसलेमताल हुचुलोर परीसि अनि मूसाना नियमतुन करिहवालोर येसुना हेरे वातुरक। 2“नियोर चेलालोर पुरकातोर लोकुरा रिवाजतुन बाक्या मानेमायोर? ओद रिवाज मानेमायोर आस कय नोरवाय रोटिंग बाक्या तिन्तोरक?” इन्जोर इन्दिला लागतुरक। 3येसु ओरकुन उत्तर हितुर, “निमाट वने आपुना रिवाजता कारण बाक्या परमेस्वरना आग्या मानेमायविट? 4बाक्याकि ‘आपुनोर बाबो अनि आपुना अवाहारिना आदर किम्ट’ अनि ‘बाबो या अवाहारिना अपमान बोरे केविर ते ओन हव्किला पहाजे’ इदाम परमेस्वर आग्या हितुर#निर २०:१२; व्यव ५:१६; निर २१:१७; लेव्य २०:९। 5मति निमाट इन्तोरिट, ‘निकुन मदत कियाना चिज नना परमेस्वरतुन सोपे कितोना इन्जोर मिया बाराय मदत किया परोन इदाम बोरे आपुना बाबोन या अवहारिन इन परान्तोर।’ 6इदाम ओन आपुनोर अवाल-बाबोना आदर कियाना जरुरि हिले इन्जोर निमाट करहान्तोरिट। इद प्रकारते निमाट आपुना रिति-रिवाज मानेमातोर ओद कारणते परमेस्वरना पोल्लोतुन कमजोर बने कितोरिट। 7हे कपटि लोकुरक, परमेस्वरना पोल्लो वेहवाल यशायाह मिया बारेतेः

8‘येर लोकुरक टोडिते नावा आदर किन्तोर,

मति ओरा मन नावाताल लक मन्ता।

9अनि केवल मानेयकना नियमतुन पालन कियाना साटि करहान्तोर

इन्जोर येरक बेकार रितिते नावा उपासना किन्तोरक’

इदाम यशायाह वेहता ओद पोल्लो येरा बारेते बराबर मता#यश २९:१३।”

मानेयकुन परमेस्वरना मुने अशुद्ध किन्तांग ओव पोल्लोंग

(मर ७:१४-२३)

10असके येसु लोकुरकुन आपुना हेरे केयस ओरकुन इतुर, “केन्जुन समजेमाम्ट, 11मानेयतुन परमेस्वरना मुने अशुद्ध किन्ता चिज टोडिते लोपा दान्ता चिज आयो मति टोडिताल पसियान्ता पोल्लोंग मानेयतुन परमेस्वरना मुने अशुद्ध किन्ता।” 12असके चेला लोकुरक येसुना हेरे वासुन, “परीसि लोकुरक इद पोल्लो केन्जुन निया विरोद किन्तोरक इन्जोर बाताल निमा पुन्तोन?” इन्जोर येसुन इतुरक। 13येसु ओरकुन, “स्वरगतोर नावोर बाबो उरसोर अव सबोय मराहकुन हिरतासंग तेहकस वाटानुर। 14ओरकुन हन्दिला हिम्ट, ओरक अन्दराह उपदेश हेवालोर मन्तोर। अनि आन्दराल मानेय अन्दराहकुन हरि तोहानुर ते इवुरास गुमियातिगा अरानुरक#लूका ६:३९” इन्जोर उत्तर हितुर।

15इद केन्जुन पतरस ओन “इद पिटो माकुन समजेहकिस वेहा” इन्जोर इतुर। 16येसु आपुना चेलालोरकुन इतुर, “बाताल निमाट इदेक वने इदेना बारेते समजेमायविट? 17टोडिलोपा दान्ता बाताले ओद पोटातिगा हन्जुन बाहरो पसियस दान्ता इन्जोर बाताल निमाट पुनविट? 18मति टोडिताल बाहर पसियान्ता पोल्लो ओद मन्दाल पसियान्ता अनि ओदे मानेयतुन परमेस्वरना मुने अशुद्ध किन्ता#मत्ति १२:३४। 19बाक्याकि खराब विचार, हव्काना, व्यभिचार, दुसरो आळदा या मुजोनासंग खराब संबन्द, कलाना, खोटाल गवाहि अनि निन्दा इद सबोय पोल्लोता विचार मानेयना मन्दाले पसियान्तांग। 20मानेयतुन परमेस्वरना मुने अशुद्ध किन्तांग इवे आन्दुंग; मति कय नोरवा जेवन कियाना मानेयतुन परमेस्वरना मुने अशुद्ध केवो।”

कनानि जातिता आळ येसुनिगा विस्वास किन्ता

(मर ७:२४-३०)

21येसु अगडाल पसियसुन सूर अनि सिदोन प्रदेशतिके हतुर। 22ओद प्रदेशताल उन्दि कनानि जातिता आळ पसियत, “हे प्रबु, दावुदनोर मरि, नाकुन दया किम, नावा पेडिन दुष्टात्मा पकाय तकलिप कियाला आता” इन्जोर जोरदे इन्दिला लागतु। 23मति येसु अदेन बाराय उत्तर हेवोर आतुर। असके ओनोर चेला लोकुरक वासुन ओन, “ओद मावा परके जोरदे किलसोर वायिला आता अदेन लोहचिम” इदाम विनन्ति कितुरक। 24येसु ओरकुन “केवल इस्रायेल लोकुरा मायतांग बेळांगना शिवाय दुसरो बोना साटिय नाकुन लोहोर” इदाम उत्तर हितुर। 25मति ओद वातु येसुन नमस्कार किस, “हे प्रबु, नाकुन मदत किम” इन्जोर इन्दिला लागतु। 26ओर अदेन “बालकना रोटि नयकना मुने वाटाना बेस आयो” इन्जोर उत्तर हितुर। 27ओद इतु, “इंगो प्रबु, मति नयक पिला वने मालकाना जेवनताल अरता सितातुन तिन्तांग” इन्जोर इतुर। 28असके येसु अदेन, “हे बायि, निया विस्वास हजोर मन्ता। निया इच्चा लेहका निया साटि आयि” इन्जोर उत्तर हितुर। अनि ओदे बेरा अदेना पेडि बेस आतु।

अलग-अलग बिमार लोकुरकुन येसु सुदरे किन्तोर

29येसु अगडाल गलील नहारता टकाहेरे वातुर अनि मटा पोरो अन्जुन उदितुर। 30असके पकाय भीळ ओना हेरे वातु। ओरक आपुनासंग लंगळाह, अन्दराह, मुकाह, बयराह, ठुटाह अनि दुसरो पकाय लोकुरकुन ओना हेरे ततुरक, अनि ओरकुन ओना काल्कपोरो वाटसितुर, अनि ओर ओरकुन सुदरे कितुर। 31मुकाह वळकान्तोरक, मुरस ताकवालोरक बेस आन्तोरक, लंगळाह ताकान्तोरक, अनि अन्दराह हुळान्तोरक इन्जोर लोकुरक हुळसुन आश्चरय किस इस्रायेलना परमेस्वरना महिमा कितुरक।

येसु नालुंग हजार लोकुरकुन तिहान्तोर

(मर ८:१-१०)

32येसु आपुना चेलालोरकुन केयस, “येरक मून्ड दियाताल नावासंग मन्तोर अनि ओरा हेरे तिन्दान साटि बाराय हिले इन्जोर नाकुन इद भीळता दया वान्ता। ओरक हरतिगाय अवकेमास मनिर इन्जोर ओरकुन करवस्ता लोहाना नावा इच्चा हिले” इन्जोर इतुर। 33चेला लोकुरक येसुन इतुरक, “माक इचोन पकाय भीळतुन पन्जहान साटि इचोक रोटिंग माकुन इद सुनसान जागातिगा बगाडाल पुटानुंग?” 34येसु ओरकुन, “मिया हेरे बचोक रोटिंग मन्तांग?” इन्जोर ओरकुन पुच्चेमातुर। “सात रोटिंग, अनि हुचुक हुडलांग मीन्क वने मन्तांग” इन्जोर ओरक इतुरक। 35असके येसु लोकुरकुन जागादिगा उदान साटि आग्या हितुर। 36अनि अव सात रोटिनुंग अनि मीन्कुन येतस परमेस्वरना धन्यवाद किस किळिहतुर अनि आपुनोर चेलालोरकुन हितुर, अनि चेलालोर अदेन लोकुरकुन हितुरक। 37इदाम सबोय लोकुरक तिन्जुन पोटा पन्जतु अनि चेलालोर पिसतांग रोटिनांग तुकळेते सात ओडिंग निन्दितांग ताहतुरक। 38तिन्वालोर आसक अनि बालकिन तासिस नालुंग हजारक मानेयक मतोरक। 39पजा ओर भीळतुन हन्दिला किस डोंगातिगा अन्जतुर अनि मगदन देशता टकातिगा हतुर।

Trenutno odabrano:

मत्ति 15: fmu

Istaknuto

Podijeli

Kopiraj