मत्ति 14

बपतिस्मा हेवाल युहन्नानिन हव्कान्तोर

(मर ६:१४-२९; लूका ९:७-९)

1ओदबेरा गलीलि प्रदेशतोर राजाल हेरोदेस येसुना चर्चा केन्जतुर, 2“येर बपतिस्मा हेवाल युहन्नाल आन्दुर। ओर हातोरिगाडाल असा जिवेमातोर इन्जोर आश्चरयता बुतो कियाना लाव ओनिगा तोहान्तांग” इदाम ओर आपुनोर दास लोकुरकुन इतुर।

3-4बाक्याकि हुचुक दिया मुने हेरोदेस युहन्नान दोहच जेहलतिगा वाटस मतोर। हेरोदेस आपुनोर तमो फिलिप्पुसना मुत्ते हेरोदियासिन आपुना मुत्ते किस इरस मतोर। इद कारणते “नियमता अनुसार इद उचित हिले” इन्जोर युहन्ना हेरोदेस राजान पकाय बेरा चेतेहकिस इतुर#लूका ३:१९-२०; लेव्य १८:१६; २०:२१ । 5ओर युहन्नान हव्काना इच्चा किन्दुर मति लोकुरक ओन परमेस्वरना पोल्लो वेहवाल समजेमान्दुर इन्जोर लोकुरकुन वरियन्दुर।

6मति हेरोदेसना जनमदिया यहुन्नानिन हव्किलाय उन्दि सन्दि पुटतु ओद पोल्लो इदाम मता, हेरोदियासना पेडि कार्यक्रमदिगा येन्दस हेरोदेसिन गिरदा कितु। 7असके बाताले निमा तलकिकि अदेन नना निकुन हियाका इन्जोर ओर शपथ किस ओद पेडिन वाचा हितुर। 8ओद आपुना अवहारि करहिस हिता अनुसार, “बपतिस्मा हेवाल युहन्नाना तला दळियातिगा इगाय नाकुन तरा” इन्जोर तलकिहतु। 9राजाल दुःखि आतुर मति आपुना शपथ सबोय वरताह लोकुरक केन्जतुरक इन्जोर ओद शपथ मानेमायाना आयो इदाम किया परोर आतुर। इन्जोर युहन्नाना तला हिसिम्ट इदाम आग्या हितुर। 10अनि ओर जेहलदिगा सयनिक लोकुरकुन लोहच युहन्नाना तलातुन कदियतुर। 11अनि ओना तला दळियातिगा ततुर अनि पेडिन हितुर, अनि ओद आपुना अवहारिना हेरे ओतु। 12असके युहन्नानोर चेला लोकुरक वातुरक अनि ओना मुरदातुन ओस मिसितुरक, अनि ओरक हन्जुन ओद पोल्लो येसुन वेहतुरक।

येसु सयुंग हजार मानेयकुन जेवन तिहान्तोर

(मर ६:३०-४४; लूका ९:१०-१७; युह ६:१-१४)

13इद केन्जतुर असके येसु सान्डे अगडाल पसियतुर अनि ओर डोंगातिगा अन्जुन अगडाल बोदे सुनसान जागादिगा वरोरे हतुर। लोकुरक इद केन्जुन नाट-नाटेनाल ताकसोरे ओना परके वातुरक। 14ओर नहारता टकातिगा रयतुर असके उन्दि हजोर भीळ हुळतुर अनि ओरा पोरो दया वातु अनि ओरा बिमारितुन सुदरे कितुर।

15बेरा मुलत असके ओनोर चेला लोकुरक येसुना हेरे वास, “इद सुनसान जागा मन्ता अनि बेरा आयिला आता, ओरक नाटेनिगा हन्जुन आपुना साटि जेवन अस तरीर इन्जोर लोकुरकुन लोहकाट” इदाम इतुरक। 16मति येसु ओरकुन, “ओरा हन्दाना जरुरि हिले। निमाटे ओरकुन तिन्दिला हिम्ट” इन्जोर इतुर। 17ओरक येसुन, “इगा मावा हेरे सयुंग रोटिंग अनि रन्ड मीन्कुन तासिस असा बाराय हिले” इन्जोर इतुरक। 18“ओव नावा हेरे तराट” इन्जोर येसु इतुर। 19असके येसु लोकुरा भीळतुन रोन्डातिगा उदिलाय वेहतुर, अनि अव सयुंग रोटिंग अनि रन्ड मीन्कुन पयतुर, अनि स्वरगतिके हुळस धन्यवाद किस रोटिनुंग किळहिच-किळहिच चेलाह लोकुरकुन हितुर अनि चेला लोकुरक लोकुरकुन हितुरक। 20सबोय लोकुरक तिन्जुन ओरा पोटा पन्जतु असके पिसता तुकळेतांग बारा ओडिंग निन्दितांग चेला लोकुरक ताहतुरक। 21अनि तिनवालोर आसक अनि बालकिन तासिस, लगभग सयुंग हजार मानेयक मतोरक।

येसु एतापोरो ताकान्तोर

(मर ६:४५-५२; युह ६:१५-२७)

22असके पजा येसु लोकुरकुन आपुना लोन हन्दिला हितुर। असके आपुनोर चेला लोकुरकुन डोंगातिगा उदस ओना मुने ओरक नहारता होदपाकाळ हनिर इन्जोर दन्दरे कितुर। 23ओर लोकुरकुन सार कितुर असके पजा प्रार्थना कियान साटि अलगो मटा पोरो हतुर, अनि नुलपेहबेरा ओर अगा वरोरे मतोर। 24ओदबेरा डोंगा गलील नहारता टकाताल पकाय लक हन्ज मता। वळिय मुनेटाल वासोर मता इन्जोर ओरा डोंगा पळवाते होलेमासोरिंग मता। 25अनि येसु वियाना मुने कोरकुसेंग बेरा नहारता एतापोरो ताकसोर ओरा हेरे वान्दुर। 26चेलालोर ओन नहारता एतापोरो ताकाना हुळसुन वरियतुरक। अनि “येर भुत आन्दुर” इन्जोर पकाय वरेते जोरदे किलसोर केयिला लागतुरक। 27असके येसु ओरासंग वळकतुर, “हिमते मन्ट नना आन्दान, वरियमाट” इन्जोर इतुर। 28पतरस ओन उत्तर हितुर, “हे प्रबु, निमाय आन्दि ते नाकुन निया हेरे एर पोरो ताकसोर वायाना आग्या हिम” इन्जोर इतुर। 29“वाय” इन्जोर येसु इतुर। असके पतरस डोंगातिगाडाल रयसुन येसुना हेरे हन्दान साटि एर पोरो ताकिला लागतुर। 30मति वळियतुन हुळसुन वरियतुर अनि मुळन्दिला आस मन्दुर असके जोरदे, “हे प्रबु, नाकुन पिसहा” इन्जोर किलसोर केयतुर। 31येसु सान्डे कय मुने किस ओन पयतुर, “निकुन नावागा विस्वास हिले बहे? निमा बाक्या शंका किति?” इन्जोर इतुर। 32असके येसु अनि पतरस डोंगातिगा अन्जतुरक असके वळिय रोमत। 33असके डोंगातिगा मतोरक दुसरो चेला लोकुरक, “खरोय निमा परमेस्वरनोर मरि आन्दि” इदाम इन्जुन ओना आरादना कितुरक।

येसु गन्नेसरत प्रदेशतिगा बिमार लोकुरकुन सुदरे किन्तोर

(मर ६:५३-५६)

34ओरक गलील नहारता होदपाकाळ रयसुन गन्नेसरत प्रदेशतिगा अवतुरक। 35असके अगाडोर लोकुरक ओद डोंगाते वातोर ओर येसु आन्दुर इदाम पुतुरक अनि ओरक हेरे गुरेटांग प्रदेशते मन्तोरक सबोय लोकुरा हेरे येसु इगा मन्तोर इदाम पोल्लो लोहच वेहतुरक असके ओद प्रदेशतोर सबोय बिमार लोकुरकुन ओना हेरे ततुरक। 36अनि केवल ओना सन्दराता कोडितुन इटका इन्जोर ओन विनन्ति कितुरक। अनि ओन इटतुरक सबोय लोकुरक सुदरेमातुरक।

Trenutno odabrano:

मत्ति 14: fmu

Istaknuto

Podijeli

Kopiraj