मत्ती 16
16
फरीसियों द्वारा यीशु तैं परखै जांण
(मरक 8:11-13; लूका 12:54-56)
1 # 16:1 फरीसियों ल अर सदूकियों ल संमणी ऐ के यीशु कि अजमैश कनु कु वेकु बोलि “हम तैं स्वर्गीय चमत्कार का चिन्ह दिखौ।” 2वेल ऊं तैं जवाब दींनि “रुमुक जुग तुम बुल्दा कि मौसम ठिक रालो किलैकि आसमान लाल च।” 3अर सूबेर बुल्दा कि आज तुफान आलो किलैकि आसमान लाल अर बदल्युं च तुम स्वर्ग का लक्षण देखि के वेको भेद बतै सकदा छा पर बगत का चिन्ह का भेदों तैं किलै नि बतै सकदां? 4यु युग का बुरा अर व्यभिचारी लोग चमत्कार का चिन्ह ढुंडणा छिन पर योना परमेश्वर का तरपां बट्टी बुल्ण वला का चिन्ह तैं छोड़ी के कुई और चिन्ह ऊं तैं नि दिये जालो अर उ, ऊं तैं छोड़ी के चलि गै।
फरीसियों अर सदूकियों कु खमीर
(मरक 8:14-21)
5चेला झील का पल्या छाला मा पौंछिनी पर उ रुट्टि लिजांण बिसरी गै छा। 6यीशु ल ऊंमा बोलि, “देखा तुम फरीसियों का अर सदूकियों का खमीर बट्टी सचेत रयां।” 7उ आपस मा विचार कन लगि गैनी “हम मा रुट्टि नि च इलै उ बुल्णु च।” 8यु जांणि के यीशु ल ऊंमा बोलि, “हे अधुरा विश्वासियों, तुम आपस मा किलै यु विचार कना छा कि हम मा रुट्टि नि च?” 9क्य तुम अभि तक नि समझयां? क्य तुम तैं ऊं पाँच हजार मनिख्युं कि पाँच रुट्टि याद नि च अर क्य यु भि याद नि च कि तुम ल टुकड़ों का कथग ठुपरा कठ्ठा करिनी? 10अर न तुम तैं ऊं चार हजार मनिख्युं कि सात रुट्टि याद छिन अर न यु भि कि तुम ल कथग ठुपरा भोरिके उठै छा? 11कि तुम अभि तक भि नि समझयां कि मिल तुम मा रुट्टि का बारा मा नि बोलि, पर यु कि तुम फरीसियों ल अर सदूकियों का खमीर बट्टी सचेत रैयां। 12तब ऊंकी समझ ऐ गै कि यीशु ल रुट्टि का खमीर से न बल्कि फरीसियों कि अर सदूकियों कि झूठी शिक्षा से सचेत रौंणु कु बोलि छो।
पतरस कु यीशु तैं मसीह स्वीकार कन
(मरक 8:27-30; लूका 9:18-21)
13यीशु कैसरिया अर फिलिप्पी नगर मा ऐ अर अपड़ा चेलों बट्टी पुछण लगि गै “कि लोग मि मनिख कु नौंनो कु क्य बुल्दींनि” 14ऊंल बोलि “कुछ त यूहन्ना बपतिस्मा दींण वलो बुल्दींनि अर कुछ एलिय्याह अर कुछ यिर्मयाह जु परमेश्वर का तरपां बट्टी बुल्ण वला मा बट्टी कुई एक भि बुल्दींनि।” 15यीशु ल ऊंमा बोलि पर तुम मेरा बारा मा कि सुचदियां की मि कु छो? 16शमौन पतरस ल जवाब दींनि “तु ज्यूँदो परमेश्वर कु नौंनो मसीह छै।” 17यीशु ल वे तैं जवाब दींनि, “हे शमौन पतरस योना का नौंना तु धन्य छै किलैकि न मांस अर न ल्वे ल पर मेरा बुबा ल जु स्वर्ग मा च वेल य बात त्वे पर प्रगट कैरी।” 18अर मि भि त्वे मा बुल्णु छौं कि तु पतरस छै अर तु यु ढुंगा पर अपड़ी मण्डलि बंणौलु अर अधोलोक का फाटक वेको मुकाबला नि कैरी सकला। 19मि त्वे तैं स्वर्ग राज्य कि चाबी दयुलु : अर जु कुछ तु धरती पर बंधिलि उ स्वर्ग मा बंधे जालो अर जु कुछ तु धरती पर खोलिलि उ स्वर्ग मा खुलै जालो। 20तब यीशु ल चेलों तैं चितै के बोलि, कि मेरा बारा मा यु कै मा नि बुल्यां की मि मसीह छो।
अपड़ी मौत का बारा मा यीशु की भविष्यवाणी
(मरक 8:31-9:1; लूका 9:22-27)
21वे बगत बट्टी यीशु अपड़ा चेलों तैं सिखौंण लगि गै, “कि जरूरी च कि मि यरूशलेम शहर कु जौं अर दाना-सयाणों का अर प्रधान याजक अर मूसा की व्यवस्था तैं सिखांण वलो का हथ से भौत दुःख उठै के मरै जौं अर तिसरा दिन ज्यूँदो हवे जौं।” 22ईं बात पर पतरस वे तैं अलग मा लिजै के झिड़कंण लगि गै अर बुल्ण लगि गै कि “हे प्रभु परमेश्वर नि कैर कि कभि त्वे दगड़ी इन हो।” 23वेल पिछनैं फरकि के पतरस तैं झिड़की के बोलि, “हे शैतान मेरा संमणी बट्टी दूर हवे जा त्वे बट्टी मि तैं ठोकर मिलणी च किलैकि तु परमेश्वर का तरपां बट्टी नि सुचणी बल्कि मनिख्युं कि तरपां बट्टी सुचणी छै।”
यीशु का पिछने चलण कु मतलब
24तब यीशु ल अपड़ा चेलों मा बोलि, “जु कुई मि दगड़ी आंण चौ उ अपड़ी इच्छाओं तैं छोड़ी के अर अपड़ी सूली उठै के मेरा पिछनैं औ।” 25किलैकि जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ी आत्मा तैं गवांलू उ अनन्त जीवन तैं पालो। 26जु मनिख सैरा दुनिया तैं पै ल्यो अर अपड़ा आत्मा तैं ख्वे द्यो य मनिख अपड़ा प्राण का बदला क्य दे सकद? 27जब मि मनिख कु नौंनो अपड़ा स्वर्गदूतों का दगड़ी अपड़ा बुबा कि महिमा मा आलो वे बगत उ हर एक तैं वेका कामों का अनुसार प्रतिफल दयालो। 28मि तुम मा सच बुल्णु छौं कि, “जु इख म खड़ा छिन ऊंमा बट्टी कुई-कुई इन छिन कि जब तक मि मनिख कु नौंनो परमेश्वर का राज्य का सामर्थ का दगड़ा आंण नि दिखला तब तक ऊंल मुरण भि नि च।”
Trenutno odabrano:
मत्ती 16: GHMNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
