NAANAA 3
3
Bisãsiri kɛ̃kɔ̃ana kũ Ludao
1Mlɛ̃̀ mɛ́ à manafiki vĩ de pɔ́ kũ Dikiri Luda kɛ̀nɔla pínki, akũ à nɔgbɛ̃ là à pì: Luda pì àsun dàkoo pì lí ke nɛ́ blenloo? 2Akũ nɔgbɛ̃ wè mlɛ̃̀ɛ pìia à pì: Óni fɔ̃ ò dàkoo pì línɛ ble, 3ama lí kũ à kú dàkoo pìi guragura, Luda pì òsun a nɛ́ blero òsun ɔ naa sero, de òsun garo yãi. 4Akũ mlɛ̃̀ɛ pìnɛ: Áni garo fá! 5Zaakũ Luda dɔ̃ tó a blè, á wɛ́ ni kɛ̃ áni gɔ̃ lán a bà, ánigɔ̃ a mana dɔ̃ kũ a vãnio.
6Kũ nɔgbɛ̃ è lí pì nɛ́ mana, akũsɔ̃ a blena nigɔ̃ nna ani tó gbɛ̃ wɛ́ kɛ̃, akũ à a nɛ́ kɛ̃̀ à blè. À kpà a zãa dɔ, akũ à blè se. 7Ń pla ń pínki ń wɛ́ kɛ̃̀, akũ ò dɔ̃̀ sà kũ ò kun pótompo. Akũ ò gboroda lá nàbi ò yĩ̀ḿma.
8Kũ gɔ̃gbɛ̃ kũ a nanɔo Dikiri Luda kĩni mà àtɛn kure dàkoo pìi gũn ɔkɔsi, akũ ò ùtɛnɛ dàkoo pì lán. 9Akũ Dikiri Luda lɛ́ zù gɔ̃gbɛ̃i à pì: Ń kú mámɛɛ? 10À wèa à pì: Kũ ma n kĩni mà, akũ vĩna ma kũ kũ má kun pótompo yãi, akũ ma utɛ. 11Akũ Dikiri Luda a là à pì: Dí mɛ́ à ònnɛ ń kun pótompoo? Lí kũ ma ginnɛ ǹ a nɛ́ ble, n blèn yá? 12À wèa à pì: Nɔgbɛ̃ kũ n kpàma àgɔ̃ kú kũmao mɛ́ à lí pì nɛ́ kpàma ma blè. 13Akũ Dikiri Luda nɔgbɛ̃ là à pì: Bɔ́yãi n kɛ̀ lɛɛ? À wèa à pì: Mlɛ̃̀ mɛ́ à ma kɛkɛ, akũ ma blè. 14Akũ Dikiri Luda pì mlɛ̃̀ɛnɛ:
Kũ n kɛ̀ lɛ, ĩnigɔ̃ láaribona pɔ́ ũ
de bɛ pɔ́kãdenɔ kũ nɔ̀bɔsɛ̃ntɛnɔla pínki,
ĩnigɔ̃ táa o n kùua,
bùsutitin ĩnigɔ̃ ble ari n wɛ̃̀ndi lɛ́n.
15Mani ibɛrɛ da mɔkɔ̃n kũ nɔgbɛ̃o dagura,
n buri kũ a burio dagura.
A buri ni n mì wí,
ĩni a gbátoki kĩnna.
16Akũ à pì nɔgbɛ̃nɛ:
Mani n nɔ̀sinaa wari karannɛ,
ĩnigɔ̃ nɛ́ i kũ wãwão.
N zã ni nigɔ̃ kúmmamɛ,
anigɔ̃ kí ble n musu.
17Akũ à pì gɔ̃gbɛ̃nɛ:
Lákũ n n nanɔ yã mà nà,
lí kũ ma ginnɛ ǹ a nɛ́ ble n blè,
ma láari bò zĩtɛa n yãi,
ɔsi kũ ɔsioon ĩnigɔ̃ pɔ́ble en
ari n wɛ̃̀ndi lɛ́n.
18Ani lɛ̀nɔ kũ lá ũkãdenɔ butɛnnɛ,
gbasa ǹ burapɔnɔ ble.
19Ísimmawaranaa gũnn ĩni pɔ́ble en
ari ǹ ɛra ǹ gɛ̃o bùsun,
zaakũ gwen ma n bon.
Bùsutitimɛ n ũ,
ĩni ɛra ǹ gɔ̃ bùsutiti pìi ũmɛ.
20Adamu tɔ́ kpà a nanɔnɛ Awau, zaakũ gbɛ̃ pínki daimɛ. 21Dikiri Luda bára uta kɛ̀ Adamunɛ kũ a nanɔo, akũ à dàńnɛ. 22Akũ à pì: Bisãsiri a mana kũ a vãnio dɔ̃̀ sà, à gɔ̃̀ lán ó bà. Óni gínɛ à lí wɛ̃̀ndide nɛ́ kɛ̃ à ble de àsungɔ̃ kun gɔrɔ sĩnda pínkiro yãi. 23Akũ Dikiri Luda pɛ̀a à a bò Ɛdɛni dàkoo pìi gũn. Akũ Adamu gɛ̀ɛ à zĩtɛ kũ Luda a bòn zĩ kɛ. 24Kũ Dikiri Luda pɛ̀a, akũ à kɛrubunɔ kàtɛ Ɛdɛni dàko ifãboki kpa, de ògɔ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.
Trenutno odabrano:
NAANAA 3: BB2005
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bisã Bible © SIM International, 2005.