PUDUT 13
13
Abram Idi Lut Patad
1Idi Abram neremuat rat bang bawang Masir, dengan awanneh idi amung-amung luk ieh kuan, matun Tana' Negeb. Idi Lut pana' nemaya' neneh. 2Idi Abram ineh lun do' dengan mula' aya', pirak, idi amas teh. 3Idi ieh nenalan maya' dalan luk nedalanneh atun rat Tana' Negeb macing déi' Baitel, ieh ineh su luk inanneh nelupo pun-pun, arang Baitel dengan Ai; 4macing su bubpun luk pinudutneh ineh. Idi Abram nesembayang inan Tuhan.
5Idi Lut luk nemaya' ni Abram ineh, inan dumba, amék, idi sapi', idi lepo kibung teh. 6Idi na tana' ineh miak inan didueh tebawang, ngaceku aya' didueh pelaba ula'. 7Idi teh inan aceh kedaluh arang lun matar aya' Abram dengan lun matar aya' Lut. Idi bang kareb ineh lun Kanaani idi lun Prisi mo' tebawang nan tana' ineh.
8Idi kebala Abram ni Lut, “Kiteh ini dingetameh. Na do' demulun kiteh pekedaluh. 9Do' kiteh patad. Do' mili' tana' luk pianmu. Iko amé i léi, idi ui améi'i léi.”
10 Idi Lut nenier aput raket Abpa' Yarden macing déi' Soar, idi inan petap abpa', mepad kudeng Kabun Eden idi tana' Masir. Ieh ineh atun ratnan Tuhan nengukum bawang Sodom idi Gemora. 11Idi Lut nemili' raked Abpa' Yarden kuanneh. Idi ieh nenalan iné' pa busat aco. Idi didueh nepatad. 12Idi Abram tebawang déi' Kanaan. Iamo' Lut tudo bang bawang-bawang rayeh luk luun raked abpa' ineh. Idi ieh nelupo muneng ku bawang Sodom. 13Idi lemulun bang bawang Sodom ineh pelaba dat idi pelaba sala' pa kiung Allah.
Abram Mepura' Amé' Déi' Hebron
14Pangeh Lut nepatad rat ni Abram, kebala Tuhan ni Abram, “Do' iko nier libut-libut rat su luk inanmu tuped ineh. 15 Ngaceku amung-amung tana' luk sirenmu ineh, Ui maré namu, idi nan inulmu macing ruked-ruked. 16Idi Ui miak ngula' inulmu ineh mepad kudeng kinula' abuh tana'. Kudeng miak ngiap abuh tana' ineh, idi teh miak ngiap inulmu ineh. 17Do' iko amé' aput-aput tana' ineh, ngaceku amung ineh barénKu namu.” 18Idi Abram nemubuh leponeh idi nelupo muneng ku lawa kayuh Mamré luk meraben luk bang bawang Hebron. Idi ieh nemudut aceh bubpun kuan Tuhan déi'.
Trenutno odabrano:
PUDUT 13: BLD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
BALA LUK DO' Lun Bawang Bible © The Bible Society of Malaysia 1982, Second Edition 1998.