Luka 6
6
Apalete Nɛ́ Kimuenewi
1Nɛ Kimoenewui tili abha Yesu aga nikpe buya mɛ afla, klɛ yɛ badɔkpasɛ be ze dzyini nikpe, klɛ bɛ wũse akpɛ balɛ bukpli mɛ gɛ batã. 2Farisianɛ teli be bisi asɛ, “Kɛdeso gɛ nɔ bhɛtɛ kɛdɔ nɛ gɛ kɛma kɛdzoɛ abha nɛ Kimuenewi nɛabha?”
3Yesu ebushunu akɔalɛ asɛ, “Nɔ dɛ kla kɛdɔ nɛ gɛ Daviti abhɛtɛ kɛlɛbe nɛ gɛ bubhɛ yi yɛ nɛ yɔhaɛalɛ? 4Etsoku Kpayavu nɛ mɛ, klɛ ada yɛkɔ gbɛ̃gbɛvu yuyula atã, kɛ gɛ kpayaɔzakɔanɔ ko ba kɔɛdzo sɛ batã. Klɛ akɔ banɔ nɛ gɛ balɛ yɛ shu nɛ tsyɛ.” 5Ɔkɛlɛ Yesu etsre alɛ asɛ, “Anɔdzyrame Yi enu Apalete kɔ Kimuenewi.”
6Nɛ Kimuenewi bhlatɔ abha Yesu avɛ oxogokɔvu nɛ mɛ klɛ akasɛdɔ, klɛ anɔ teli aza ɔkɛlɛ gɛ yɛ kɛŋa ɔhwɔɛ no si ku. 7Farisianɛ anɛ̀ ɛshãdɔkasɛ baa pɛ kɛdzo sɛ tɛ be bu buzizi akɔ Yesu, kɛlɛso be di yɛ mɔmɔ sɛ abakɔ anɔ nɛ shu bhui nɛ Kimuenewi nɛabha. 8Pɔ Yesu amɔ kibui nɛ gɛ batrɔ nɛ tɔkpu mɛ klɛ etsre anɔ nɛ gɛ yɛ ɔhwɛ nɛ osi ku nɛ asɛ, “Lɔ kititi tɛ ɔbɔza banɔnyanɔ amɛ.” Kɛlɛso ada lɔ kititi nɛ ɔkɛlɛ.
9Ɔkɛlɛ Yesu aɖɔ etsre alɛ sɛ, “Ibisi nɔ sɛ, kiɖueɖu ɔshã nɔ kɔɛ dzo nɛ Kimuenewi nɛabha: tɛ babhɛtɛ kɛdzyɔgo pɛnɔ tɛ babhɛtɛ kizizi, tɛ bayɛkɛ ɛkpã kɔ anɔ pɛnɔɔ bezi yɛ ɛkpã?”
10Yesu edi banɔ nɛ atsya, klɛ etsre anɔ nɛ asɛ, “Nunɔ wɔ ɔhwɛ.” Anɔ nɛ abhɛtɛ kana gɛ aɖɔ, klɛ yɛ ɔhwɛ nɛ okoeyi. 11Pɔ ba mɔ oblo gɛganɛɛ klɛ baɖɔ nɛ aglɔ mɛ sɛ kɛde ba ba bhɛtɛ Yesu.
Bakpɛkpɛ Lɔfɔnɛtɛabha
12Ewuianɛ wui tili Yesu ekoeyi avɛ butu nɛabha sɛ tɛ ede klukpaya, klɛ aza ɔkɛlɛ elishi ekulu Kpaya. 13Gɛ kevlɔ nɛ na, eklu yɛ badɔkpasɛ amɛna yɛ ɔbha klɛ ebu banɔ lɔfɔnɛtɛabha nɛ balɛmɛ, gɛ edzu balɛ nyi asɛ bakpɛkpɛ: 14Simɔn (agɛ akɔ nyi asɛ Petro) yɛ adzya Andreasɛ, Yakobo, Yohanɛsɛ, Filipo, Bartelomeo, 15Mateo, Tomasɛ, Yakobo Alfeosɛ yɛ yi, Simɔn gɛ be klu asɛ Ishuahwɛzɛza, 16Yuɖasɛ Yakobo yɛeyi, anɛ Yuɖasɛ Iskarɔtɛ, gɛ ebe dzi akpɛ yɛ ahwɛ.
Tɛyuyula Nɛ Butɔ
17Yesu ezhi avɛ nɛ alɛ klɛ ada lɔɛtiti nɛ ɔsusɔ̃ kɔ. Yɛ badɔkpasɛ kɛha gbla za ɔkɛlɛ klɛ banɔɛza gbɛgbla de Yuɖea, Yerusalɛm, nɛ Tire anɛ Sidon keni nɛ tɔ, 18gɛ ba ba sɛ tɛ ba be nu yɛ ebui klɛ tɛ ebeke balɛ banya. Bagɛ ɛfufɔɛzizi kpɛ alɛ tɔ ebeke balɛ bunya, 19klɛ banɔ petee ba pɛɛ asɛ tɛ be hunɔ yɛ, alasɛ kemie koeyi nɛ yɛ mɛ klɛ ke bu bunya nɛ balɛ petee shui mɛ.
20Yesu gɛ edi yɛ badɔkpasɛ, aɖɔ sɛ:
“Bayula wunɔ agɛ nɔ dɔɛ tsyui,
alasɛ wunɔɛyɛ klɛ nu Kpaya kusiŋakɔ
21Bayula wunɔ agɛ bubhɛ yi ɔtsɔnɛ,
alasɛ wunɔ bo xui.
Bayula wunɔ agɛ nɔ biyo ɔtsɔnɛ,
alasɛ wunɔ bɔ mɔɛ̃mɔɛ̃.
22Bayula nɔ kɛbelɛlɛ nɛ gɛ banɔ egu nɔ,
onugɛ bebunɔ nɛ balɛshi klɛ ba kula nɔ
klɛ beklu wunɔe nyi anasɛ bezizi,
alasɛ nɛ Anɔdzyrame yɛ Eyi nɛ shu.
23“Nɔmɔ samɛ nɛ kiwui lɛlɛ nɛabha klɛ tɛ nɔ lɔtɛ̃ kɔ same mumɔ, alasɛ kɛdɔ gbɛgbla lɛ kɔnɔ nɛ owũsise. Alasɛ kana balɛ akalɛ nɛ abhɛtɛ ebuia nɛdi nɛ batɔnu nɛ shu.
24“Pɔ butɔ kɔ wunɔ agɛ nɔ mɔ ehoeyi,
alasɛ nɔ tɛyɛkɛ wunɔ kibui dzyɔgo.
25Butɔ kɔ wunɔ agɛ nɔ ŋaɛdɔ oxwui mɔmɔ ɔtsɔnɛ,
alasɛ bubhɛ ba yi nɔ.
Butɔ kɔ wunɔ agɛ nɔ mɔɛ̃mɔɛ̃ ɔtsɔnɛ,
alasɛ nɔ bɔ nyɛnya amɛ klɛ nɔ bɔ biyo.
26Butɔ kɔ nɔ kibe lɛ mɛ gɛ banɔ gelee aɖɔ kibui dzyɔgo nɛ nɔ shu,
alasɛ kana bale akalɛ nɛ abhɛtɛ avɛnɔ itro batɔnu nɛ shu.
Tɛdɛdɛmɛnɔ Kɔ Ba Gɛ Ba Dɛpɛɛ Anɔɛbui
27“Pɔ ɛtsre nɔ sɛ anɔ nɛ gɛ enu mɛ bui: Dɛmɛ nɛ agɛ adɛ pɛɛ wɔɛ bui, bhɛtɛ kɛdɔdzyɔgo kɔ bagɛ be gu wɔ, 28yula bagɛ ba ɖɔɛbui akpɛ wɔ, klukpaya kɔ bagɛ ba bhɛtɛ wɔɛ zizi. 29Onugɛ anɔ teli ehu wɔɛdɔ nɛ buzhɔ trukpo, tsyina bubhla nɛ tsyɛ ɔkɔɛ yɛ. Onugɛ anɔ teli ayikɔ wɔ kabhawui, tɛxe yɛ dzo kɔ yɛ kesiawi nɛ tɛyɛyɛkɔ. 30Kɔ anɔnyanɔ gɛ ebisi wɔɛ dɔ, klɛ onugɛ anɔ teli ayɛkɔ kɛdɔnɔ gɛ kɛnu wɔɛ yɛ, tɛtsodzi ɔyɛkɛ lɛ nɛ yɛ ahwɛ. 31Bhɛtɛ dɔ kɔ banɔ bhlatɔ anasɛ gɛ ɔbɔ pɛɛ sɛ tɛ ba bhɛtɛ kɔ wɔ.
32“Onugɛ ɔdɛmɛ nɛ ba gɛ ba dɛmɛ nɛ wɔ, kabha vɛvɛ ɖuwoeɖu lɛ nu kɔ wɔ? ‘Buzizi elete’ tsyɛ ba dɛmɛ nɛ ba gɛ ba dɛmɛ nɛ alɛ. 33Klɛ onugɛ ɔbhɛtɛ kɛdzyɔgo kɔ bagɛ babhɛtɛ kɛdzyɔgo kɔ wɔ, kɛdzyɔgodɛ ɖuweɖu lɛ nu kɔ wɔ? ‘Buzizi elete’ tsyɛ ba bhɛtɛ kɛnɛ. 34Klɛ onugɛ ɔpa kɛdɔ kɔ banɔ nɛgɛ ɔmɔsɛ ba be tsodzi lɛ abuya kɔ wɔ, kɛdɔ dzyɔgodɛ ɖuwoeɖu lɛ nu kɔ wɔ? ‘Buzizielete’ tsyɛ ba pa kɛdɔ kɔ ‘buzizi elete’ gɛ ba pɛɛ sɛ tɛ be tsodzi abuya kɛlɛ petee akɔa lɛ. 35Pɔ dɛmɛ nɛ bagɛ ba dɛ pɛɛ́ wɔɛ bui, bhɛtɛ kɛdzyɔgo kɔ alɛ, klɛ pa kɛdɔ kɔ alɛ tɛ ɔtɔdi dzoɛnu sɛ ɔbɔ tsodzi ɔyɛkɛ kɛdɔnyɛdɔ nɛ ba lɛ ahwɛ. Ɔkɛlɛ wɔɛ bhɛ tri, klɛ nɔ bodzi Owũsise Apaletedɛ yɛ yialɛ, alasɛ yɛ yɛyamɛyɔ kɔ ba gɛ betehuahwɛ nɛ bagɛ balɛ kɛtɔkpumɛ gɛganɛ. 36Di anɔ eshutukubui, anasɛ gɛ wɔ Aka edi anɔ eshutukubui.
Kebhuikuklu Nɛ Babhlatɔ
37“Tɛ kluebhui, klɛ be ti be kluebhui nɛ wɔ. Nɔ tɛ bu anɔ kɛpɔ tɛ Kpaya tsyɛ ebebu wunɔɛ pɔ. Nɔ yɛkɔtsye, klɛ ba ba yɛkɔ etsyé nɔ. 38Kɔɛdɔ, klɛ tɛ ba bakɔ wɔɛdɔ. Kedzyidzyi dzyɔgo, gɛ otu ka lɛ kibhi mɛ ɔkpɛ, gɛ oshuku alɛ ɔtsya klɛ kɛyuku agbɛgba, ba ba balɛ lɛ atrɔ wɔ kɛtsrɛta abha. Alasɛ nɛ kedzyidzyi nɛ xwɛ gɛ ɔwa, kalɛ ba bayɛkɔ akpɛ kɔ wɔ.”
39Yesu akpɛ kɛkpalɛ nɛ akɔ alɛ sɛ: “kɛwɔ̃hupupu elete abana kɛwɔ̃hupupu elete agbanɔ? Banɔ editabha ba ta tɛ wɔle ku ozimɛ? 40Adɔkpasɛ adɛ dɛ yɛ adɔkasɛ, pɔ anɔnyanɔ gɛ bakasɛ yɛ dɔ beke aba za anasɛ yɛ adɔkasɛ.
41“Kɛde so gɛ odi osi apɛ bhli nɛ gɛ akpasɛ wɔadzya kɛwɔ̃hũ nɛ mɛ ɔkɔ klɛ ɔtɔ yɛkɔ kibuinyɛbui nɛ kesukpogunu nɛ gɛ akpasɛ wɔ kɛwɔ̃hu nɛ mɛ ɔkɔ? 42Kɛlɛ ɔbɔ na ɖɔ tsre wɔ adzya, ‘Adzya, kɔ mɛ bu osi apɛ bhli nɛ wɔ kɛwɔ̃hũ nɛ mɛ,’ nɛ kɛbe lɛ gɛ wɔnahwɛ ɔdɛ mɔ kesukpogunu nɛ wɔ nahwɛ kɛwɔ̃hũ nɛ mɛ? Wɔ etroni, putɔ tɛ obu kesukpogunu nɛ wɔ kɛwɔ̃hũ nɛ mɛ, klɛ flogo pɛ ɔbɔ mɔ mɔmɔ pɛ obo bu osi apɛ bhli nɛ wɔadzya kɛwɔ̃hũ nɛ mɛ.
Osi Nɛ̀ Ɔle Eyuyu
43“Osi dzyɔgo lɔtɛ yu eyuyu zizi, ɔdɔgɔsɛ osi zizi lo yu eyuyu dzyɔgo. 44Osi kanyaka ɔlɛ eyuyu ba yɛkɔ akpɛ ɔlɛ kɛxawũ nɔ. Anɔ atɛ gɔ kabhɔ eyuyu denɔ kigbigbe shu, ɔdɔgɔsɛ ba gɔ vãyɛ̃ eyuyu nɛ exeosi shu. 45Anɔ dzyɔgo edenɔ kɛdɔ dzyɔgo amɛna nɛ kɛdzyɔgo gɛ abala nɛ yɛ idzyi mɛ, klɛ anɔ zizi amɛna kɛdɔ zizi gɛ kɛnu kizizi gɛ abala nɛ yɛ idzyi mɛ. Alasɛ kɛ gɛ dɛ idzyi kɛlɛ onugbu ɔɖɔ.
Ebuiti Nɛ Agã Bevudzu
46“Kɛde so gɛ nɔ klu mɛ sɛ, ‘Apalete, Apalete,’ klɛ nɔ tɔ bhɛtɛ kibui nɛ gɛ ɛɖɔ? 47Ɛbakasɛ nɔ kɛdɔnɔ nɛ gɛ enu anasɛ agɛ aba mɛ ɔkɔ klɛ enu mɛ bui klɛ ayɛkɔ akpɛ tɛbhɛbhɛtɛ mɛ. 48Edzi anasɛ anɔ gɛ èdzu buvu, gɛ etsu ozi gɛ lɔ dzu klɛ akpɛ bu lɛe si nɛ aklãgbu abha. Kɛbenɔ gɛ budekeni yi gbɛgba gɛ odi na yalɛ buvu nɛ, pɔ budɛ hwanɔ lɛ, alasɛ bana lu dzu. 49Pɔ anɔ nɛ gɛ enu mɛ bui klɛ adɛ yɛkɔ lɛ akpɛ tɛbhɛbhɛtɛ mɛ enu anasɛ anɔ gɛ edi tsu ozi gɛ lɔ dzu klɛ edzu buvu nɛ atrɔ kɛsukpa kpɛkpaɛ abha. Kɛbenɔ nɛ gɛ budekeni nɛ odi ba yalɛ buvu nɛ, bu tsra klɛ bu yɛ petee.”
Trenutno odabrano:
Luka 6: tcd
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Ghana Institute of Linguistics, Literacy and Bible Translation
