MATAYO 5
5
Mabirikiro a he ntuvi
1Ekinavone luvungano lwa vantu, akakwea he ntuvi, ekinaikae si, varateri vakwe vakamswia. 2Akavushija momo wakwe akavacheja ekiti,
Varela vwedi
(Luk. 6:20-23)
3“Varela vwedi ni vala e vakiva va he ngoro, ambu vufumwa vwa uko wanga ni vwa uko wanga ni vwavo
4Varela vwedi ni vala vesononoya; ambu venetujwa.
5Varela vwedi ni vala vena vuhoo; ambu avo venepala masanga.
6Varela vwedi ni vala vena nza na nkiru ya singirisya, ambu avo veneighutijwa.
7Varela vwedi ni vala vena mbonea; ambu avo venevoneiwa.
8Varela vwedi ni vala vena ngoro yeelile; ambu avo venemvona Mrungu.
9Varela vwedi ni varekundanya; ambu avo veneitangwa vana va Mrungu.
10Varela vwedi ni vala verierieshwa vuntu vwa singisirya; ambu vufumwa vwa uko wanga ni vwavo.
11Mu varela vwedi unywi, vekinemurara na kumurieriesha na kumuchungija vintu vivivi vya mongo vyose vuntu vwangu. 12Izihirwani na kung’ara, ambu kitumulilo chenyu uko wanga ni kibaha; ambu nirevwo vuntu verierieshe varoti vala vemurongorire.”
Mafundisho a munyu na taa
(Mrk. 9:50; 4:21; Luk. 14:34-35; 8:16; 11:33)
13Unywi mu munyu wa isanga, mira kakicha munyu wekisuha, unegerwa kini nesa ukoe? Teuve wa neri, esire utaghwa noko nze na kuvatirwa ni vantu.
14Unywi mu kianga cha si ii, muzi weho wanga he ntuvi, teuveiwa kuvisika. 15Neri vantu teveasha taa na kuigera he kizembe, esire he kivandiko, nayo iangajija vose veho ndeni he nyumba. 16Nirehuvo, kianga chenyu kiangajije vantu vose, nesa vavone mirongire yenyu yedi, vamkaze Vava wenyu wa uko wanga.
Viziomo vya kae na viziomo vyakwe Yesu
17“Musiti nezie kuvusha myomongwa kana varoti, sizie kuvusha esire kuikolosha. 18Kididi nimutio, Mhaka wanga na si vyekinevuka, mira katembe kamwe kana kankwaruro kamwe ka myomongwa tekekavuke, sari vyose vikoloke. 19Heicho kila mntu enevusha iazero imwe he ao madori na kucheja vantu huvo, he vufumwa vwa uko wanga eneitangwa mdori he vose; mira uo eneronga na kucheja vwo, uo he vufumwa vwa uko wanga eneitangwa m’baha. 20Ambu nimutio, ‘Singisirya yenyu yekisakela ila ya vaandiki na Vafarisayo, temukaingie neri he vufumwa vwa uko wanga.’”
Oro na kukoma
(Luk. 12:57-59)
21“Mwesikie iti vantu va kae vetiwe, ‘Usikome! na mntu ekikoma chemvaie kulahwa.’ 22Mira mi nimutio, Ula emsikiwa mndughu wakwe oro, chemvaie kulahwa; na ula em’beresha mndughu wakwe, chemvaie kutikwa kitala; na ekimrighia, kimtara kugerwa he moto wa gehena.
23Wekiete itasi lako he meza ya mtaso, aho wekikumbuka iti mndughu wako ena kintu nawe, 24shigha itasi lako hala he meza ya mtaso, utonge urongeharehiana na mndughu wako, unahunduke utase itasi lako. 25Hareha na mmasa wako hecheri, hala mwereho naye nzieni, nesa asirekutika he mzalaha, na mzalaha akakuinkija he msikari ukagerwa he kichungo. 26Kididi nikutio, ‘Tukafafume neri, sari ukenje kuiha ila senti yakenjija.’”
Kivivi
(Mat. 18:8-9; Mrk. 9:43-48; Mat. 19:9; Mrk. 10:11-12; Luk. 16:18)
27“Mwesikie iti chetiwe, ‘Usishinde!’ 28Mira mi nimutio, ‘Kila mntu emrereha mntu wa kiche na kummotokia, akenja kushinda naye he ngoro yakwe.’ 29Iziso lako la kume lekikuhosha, ling’ole ulitaghe noko hae; ambu keba irungo lako liteke, kukela mwiri wako wose wekigerwa he gehena. 30Na mkono wako wa kume wekikuhosha, uteme uutaghe noko hae; ambu ni keba irungo lako imwe liteke kukela mwiri wako wose wekigerwa he gehena.”
31“Kangi chetiwe, ‘Mntu ekimshigha mche wakwe amunke talaka.’ 32Mira mi nimutio, ‘Kila mntu emshigha mche wakwe esire he vuntu vwa kushinda, amghosha mrashinda; na mntu ekimghuha ula eshighiwe, eshinda.’”
Idi na kukurigha
33“Kangi mwesikie iti vantu va kae vetiwe, ‘Usiaghie na kusakolosha, mira umkoloshije Mrungu kila wemuaghiie.’ 34Mira mi nimutio, ‘Usikurighe he kintu neri; neri kwa kulanga uko wanga, ammbu niho kichumbi cha Mrungu cha Kifumwa; 35neri kwa kulanga si ii, ambu niho hantu evikia maghu akwe, neri kwa kulanga Yerusalemu, ambu niwo muzi wa Mfumwa M’baha. 36Neri usikurighe kwa mtwi wako, ambu tuidima kughosha lujwii lumwe luoke lujewa kana lujiru.’ 37Mira viteto vyenyu vioke, ‘Yee, yee’; ‘hai, hai’; ambu chevecha aho kifuma he ula mvivi.”
Kuchwa sire
(Luk. 6:29-30)
38“Mwesikie iti chetiwe, ‘Iziso kwa iziso, na ijegho kwa ijegho.’ 39Mira mi nimutio, ‘Musifeirane na mntu mvivi, mira ula ekubigha isaa la kume, mgharushije na ili lingi. 40Na mntu eenda kukulaha na kughuha nkanzu yako, mshighie hata ikwembe. 41Na mntu eenda kukutitikija kutonga ikenda la maili mwe, tonga naye mbiri. 42Munke ula ekuomba, na ula eenda kukuambala usimvonye goshi.’”
Lukundo na miikarire yedi
(Luk. 6:27-28, 32-36)
43“Mwesikie iti chetiwe, ‘Umkunde mghenji wako, na, umvihiwe mnzo wako.’ 44Mira mi nimutio, ‘Kundani vanzo venyu, vaombieni vala vemurieriesha; 45nesa muoke vana va Vava wenyu eho uko wanga, ambu ye ekweja izuva lakwe livaiye vavivi na vedi, kangi egushija venye kitea mvua na vesina kitea. 46Ambu mwekivakunda vala vemukundie unywi, muvona mhako ani? Hata vareghuha kodi teveraketa huvo? 47Kana mwekivakezya vandughu venyu du, mukela na kini? Hata vantu va kiisanga teveraketa huvo? 48Heicho unywi muneoka vekoloke sa vuntu Vava wenyu wa uko wanga ekoloke.’”
Trenutno odabrano:
MATAYO 5: CHSUNT67
Istaknuto
Podijeli
Kopiraj
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhr.png&w=128&q=75)
Želiš li svoje istaknute stihove spremiti na sve svoje uređaje? Prijavi se ili registriraj
Chasu New Testament © Bible Society of Tanzania, 1967.