Luka 24
24
Jesu I Too Napu Me Tepa Le
(Matiu 28.1-10; Maka 16.1-8; Jon 20.1-10)
1Sarusaruku lolotoro na musaqara Sade, qolero ne iri zae leṉa ne, iri pala za pata inonoli velaka go iri vanama bana go. 2Ṉalu iri za dokae leṉa ne iri za mia ipaka iri kokoqu ze go siporaṉa na leṉa ne i kuziki bana, 3gonae iri keba za loboro ne, do iriki miasoba kaega tokamana Jesu. 4Iri degere mana iri lete nureke ne pata ni doka go, iri ara goso nae ria lama sadaka so iru go kaki karua valeke iru va keba ne poga ni lete damara go, iru lama degere de iri koego. 5Pasi nae qolero ne iri lete sareki, gonae iri tudu mana reṉa za pua ne, karua valeke ne iru sine ne qira qolero ne, “Avigo tane qamu taqi ze go basoe too de iri koego vano le ne? 6Iki koe kaega dena, ia itoo napu me tepa le ne. Muna nanao tarua pata ni sine bana ne qamu go, ṉalu ni ara koego Qalili. 7Ni sine go, ‘Era Tuna basoe ne tarina vazao ve de iri koego vano vasakata pata mana tarina vae vale ava, do taramuzina kapisa musaqara era tuna too napu me tepa le.’ ” 8Qolero ne iri nanao soba zaqe to sekoro dena, ni sine bana go Jesu.
9Iri kasi ne leṉa ne mana iri za sine ne qira ria manoga kameka disipoloro ne, mana osiqira ria iri koego de igogo ne ṉalu nae. 10Qolero ne, ria to Maria Madalena, Joana mana Maria sinana Jemisi, ria de mana kero ne qolero, goto iri za sine ne qira apostoloro ne tarama dena. 11Do apostoloro ne iri nanao pataro iri sine go qolero dena iki ogoto kaega, iago iriki vaogoto qira so kaega. 12Do Pita i degere mana i teteṉe za, i tudu za mana i miasoba zaqe poga ni koego leṉa ne, do kapata napu kaega. Gonae i gado ule za komala ne mana ilete poloso sivala ne pata ro ni sadaka go.
Karua Valeke Iru Seko Tabe Ze Jesu Tepa Zuka Na Emaus
(Maka 16.12-13)
13Kameka musaqara na so ṉalu ni gogo ne, kaki karua basoe iru lululu ne Jesu, iru vele zae kaki komala iri vitoṉo ze Emaus, kavitu mael laqalaqa na, ṉalu reqe go Jerusalema. 14Mana iru vari sine ne deni gogo osina pata ro ni sadaka go. 15Pasi iru pepeu mana vari sine ne pata ni gogo ne, Jesu i lama mana i lulu ne qiru. 16Iru mia ia do, iruki mia rove kaega ia. 17Jesu i tana ne qiru, “Avana tane qaburu vari sine ne go zaza qaburu vae go na?” Gonae iru noto mana iru mimia lete maqata. 18Kaki kameka riru vitoṉona Kilopasi i tana ne ia, “Avigo tanumu so aro tane qo koego Jerusalema qoki rove go kaega pataro ni sadaka go musaqara ni sivala za go ba?”
19‘Avapatana?” igo Jesu. Iru vataule, iru go, “De iri vane go Jesu na Nazaret, valeke dena i kaki propeta, osina zazu ro ia mana seko ro ia i lete velaka sivala e tarakenaqa na God, mana de iri koego basoero topu go. 20Do ria batu ro ria patere ro remu mana vano kenakenaqa ro remu, iri vazao ze ia varitanae mana iri vae vale ze ia koluse ne. 21Mana remu qi nanao iato tina bauru ne go basobasoe na ro Izirel qi go! Do ninidena i kapisa to musaqara ni sivala nego pataro ni sadaka go. 22Kakiaro qolero qi kameka zazu go, iri va poloso qemu, pasi iri za ule me leṉa ne sarusaruku lolotoro nini, 23iriki za mia kaega tokamana Jesu. Iri lama sine iri go, qi miasoba aqelo mana i sine ne qemu Jesu i too bana. 24Kakiaro basoero qi kameka zazu go iri za mana iri za mia so osina pata, gere so iri sine go qolero ne, do iriki miasoba kaega Jesu.”
25Gonae Jesu i sine qiru, “Avana to ka bulaṉoe qaburu, i makuru qaburu vaogoto katikili na osina pataro iri sine go ria propeta ro ne! 26Avigo iki tora kaega Mesia tina vokara ne pataro dena go tina ra keba za go Too ikoego vari miasoka ia God?” 27Gonae Jesu i vatalupasa ne qiru, pataro iri sine go sauna tanuna loborona Buka tabo ne, tupi e buka ia Mosese mana osina karo ria propeta ro.
28Iru lama garogaro to komala iru vele zae go ne, Jesu i gere kapata i vele zaza sivala go, 29do iru koru vaule ia mana iru sine ne, “Ko tavisi qaru raru, i vele kuse to dena, gonae i za ko tavisi qiru to.” 30Ṉalu iri koloku, go tarina ṉaṉa go, Jesu i pala bureri, mana ivatabo, gonae i pasia mana i teke ne qiru. 31Pasi nae to mata qiru iara papaqa to, mana iru ara mia rove ia, do i zaga eso de iru koego. 32Iru vari sine ne tanuqiru, “Avigo iki gere kaega nako ni subi ego de qaturu koego, seko tabe nivae ne qituru go loborona zuka ne, mana sine lupasa nivae ne qituru go Buka tabo ne?”
33Iru tapa degere meto mana iru gado ule za Jerusalema de iru za soba qirae manoga kameka disipoloro, iri teṉo tavisi qira ria kero ne basoero ria, 34iri vari sine ne, “Pata ogoto bana, Batu ne i too napu me, iza sadaka banae de ikoego Saimon!”
35Gonae ia riru ne iru ara sine vasadake to pataro ni sadaka bana ego loborona zuka ne mana de go iru ara mia rove go Batu ne, pasi ni pasia go bureri ne.
Jesu I Sadaka Qira Ria Disipoloro Ia
(Matiu 28.16-20; Maka 16.14-18; Jon 20.19-23; Zazu Ria Apostoloro 1.6-8)
36Ṉalu iru ara pepeu ne qira ria kero ne sauna pataro ni sadaka go, iriki rove so kaega ria, i lama sadaka eso de iri koego tanuna Batu ne, mana i sine ne qira, “Dalo ina koe de qamu koego.”
37Iri lete poloso mana lete sareki go, iri nanao, iri mia manuru. 38Do Jesu i sine ne qira, “Avigo tane qamu lete sareki go? Avigo tane i ruama go nanao qamu? 39Mia me, karua karisiqu mana karua makequ go, era so dena, muna sibava, go tamuna vaogoto ava go, tanego manuru i kaega ka urina mana manuna, gerena qamu mia, era iko nava go dena.”
40I sine iadena mana iva mia qirae karua karisina mana karua makena. 41Ria disipoloro ne iriki vaogote so kaega, do iri lete kula mana iri va zazao so nanao qira. Gonae Jesu i tana ne qira, “Avigo iko ne qamu pata gege?” 42Gonae iri teke ne ia takoboro na iṉana moza. 43I pala mana i ge ze tarakenaqa qira.
Valupolupo Na Seko Ia Jesu I Sine Ne Qira Go Disipoloro Ia
44Mana i sine ne qira, “Iato dena pataro tina sadaka go gerena so qa sine bana go, torana qako tavisi qamu go, osina pataro sauqu era ni karo ego Tamana ia Mosese, pataro iri karo go ria propeta ro, mana buka na Kera ne tina lama sadaka ogoto lupo so.”
45Gonae i va papaqa nanao qira, go tarina nanao rove de go zazao na Buka tabo ne. 46Mana i sine napu ne qira, “Iato dena pata ni sine go Buka tabo ne, Mesia ne tina pala vokara mana tina le, taramuzina kapisa musaqara ia tina too napu me tepa le ne. 47Mana loborona vitoṉo na ia, seko na nanao maqata na vasakata pata ro, mana nanao ule na vasakata pata gogo ne, tina vari vatatana ze osina dia kolabana pua ne, tina tupi e Jerusalema. 48Ramu to tamuna seko ne go pataro dena. 49Era tanuqu tuna turine me pata i pui bana ne go Mamae, do ramu muna piri eso komala lavata ne, go tina doka so ṉalu karaputa na zakazaka ne tina lama koe de qamu koego.”
Jesu I Popoka Za Rani Ne
(Maka 16.19-20; Zazu Ria Apostoloro 1.9-11)
50Gonae Jesu i lulu qira ria disipoloro ia, iri kasi ne komala lavata ne mana iri zae komala Betani, gonae i kazara ne karua karisina mana i va tabo qira. 51Ṉalu i vatabo lupo qira, Jesu i kasi ne qira mana God i pala va popoka zaqe ia rani ne. 52Iri vazaka ia, mana iri gado ule za Jerusalema iri lete kula sivala. 53Osina to ṉalu iri za koe Pade Lotu ne iri seko velaka mana iri vazaka God.
Trenutno odabrano:
Luka 24: VRSNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Varisi, Solomon Islands © Bible Society of the South Pacific, 1994, 2004.
