Jon 2
2
Vari Vabusi Na Komala Kena
1Taramuzina karua musaqara, kaki vari va busi i koe komala Kena loborona Qalili. Sinana Jesu i za ko tavisi go, 2mana iri rave napu qira Jesu mana disipoloro ia sauna vari vabusi ne. 3Ṉalu vino iri besia go vano vari vabusi ne i lupo, sinana Jesu i vane de Tuna, “Vino ne i lupo to.”
4Jesu i vataule, “Qole, oniki sine nava era avana tuna zazu ne, tanego ṉalu era iara kaebo lama doka.”
5Sinana Jesu i sine ne qira vano zazu ne, “Muna zazu ne so pata tina sine ne qamu go.”
6Vano Jiu ne i ko ne qira topu tamana de go saboro vadalo na tokamaqira, sauna to ia igogo ne, i ko ne qira go kaonomo pata kukukulu iri palapala besi ne, nogoto na pata kukukulu ne i mazala vapurake na kameka vasa ba kameka vasa neqo lita. 7Jesu i sine ne qira vano zazu ne, “Vapuraka ze pata kukukulu ro nae besi,” mana ria iri vapurake za vadoka zeto saqe na, 8gonae i sine ne qira, “Nete vakava desuka besi ne mana za teke ne batu na kelo ne.” Iago iri pala vazao, ne ia 9besi i kavale go vino ne mana i ge pada. Iki rove kaega adepa tane i reqe mego vino dena, do vano zazu iri kima va kava mego so iri rove go, iago i korua valeke i busi go, 10mana i sine ne ia, “Osina ṉalu basoero ne iri soso kenaqa ne vino velaka, taramuzina basoero ne iri lete ge va topu to, iri ara soso napu ne vino iki lete velaka go kaega, do aro qo sotia so vino velaka, iato qo ara valama go dena.”
11Jesu i vasadake zazu vari va poloso kenaqa dena loborona kena Qalili komala Kena, de go i vasadaka ze de go mazala na karaputa ia, mana disipoloro ia iri vaogote iago.
12Taramuzina to vari va busi dena, Jesu mana sinana, ria togana ro mana kaena ro, disipoloro iago iri zae Kapanaum, iri za koe de go kavia so musaqara.
Jesu I Zae Pade Lotu Ne
(Matiu 21.12-13; Maka 11.15-17; Luka 19.45-46)
13I garogaro to doka na ṉalu vano Jiu tarina teṉo ne sauna nanao taru na, ṉalu God i vasiporo kasi ne qirae Izipito vanovano bana ria, iri vitoṉo ze Pasova, iago Jesu i zae Jerusalema. 14Ṉalu i za dokae go, Pade Lotu ne, i mia qira valeke ro iri volivoli ne buluka, sipi mana kurukuru go, mana i mia napu qira basoero iri koloku mana iri kavale kesa ria vano kakavata go. 15Gonae i za pala qolo mana i zazu va sima ne, i kakale vasiporo lupo qira basoero ne, sipi ro mana buluka ro go, i tubele va sorua tevolo ria vano iri kavakavala kesa go, mana i pero kesa ro ria go, 16mana i sine ne qira vano iri volivoli nego kurukuru ne, “Pala vakuziki ne qirae pade dena, mamanava to vagere ze na pade ia Mamae dena de vari va volivoli ramui” 17Pasi nae disipoloro ia, iri nanao zaqe to seko i karo ego Buka tabo ne igo, “God vamazala qavae nego era Pade aro, i gere nako i subi ava go era.”
18Vano batubatu ria vano Jiu iri lamae de koe Jesu mana iri tana ne ia, “Ava lala na tane qo mazala go vasadaka ne qemu remu, go timuna rove, God tane i teke nigo karaputa go qo zazu ne pataro i gogo nae.”
19Jesu i vataule ne qira igo, “Ṉalu tamu papate go ramu Pade lotu dena, qa mazala so era vadegere ule napu na torana kapisa musaqara so”.
20Batubatu ro ne iri vane de Jesu, “I sapu ne qirae vasiṉaulu kaonomo ave vano iri vadegere go Pade Lotu dena, do aro qo mazala so vadegere na kapisa musaqara?”
21Do tokamana tanuna tane i seko nego Jesu, ni vapadapada ze go Pade Lotu ne. 22Iago ṉalu Jesu i too ule me tepa le, disipoloro ia iri nanao tarua seko i sine bana go, mana iri vaogote Buka tabo ne mana pataro i sine go Jesu.
Jesu I Rove Velake Osiqira Basoero
23Torana ko i vae go Jesu Jerusalema, sauna teṉo lavata na kelo nanao taru na Pasova, topu ria iri vaogote ia, tanego iri mia go zazu vari va poloso ro i zazu ne go. 24Do Jesu iki vasadaka lupo ne qira kaega nanao na ro, tanego i rove lupo qira. 25Patavolomo kaega ka basoe i lama sine ne ia sauqira basoero ne, ia i rove lupo bana so pata ikoego loborona nanao qira.
Trenutno odabrano:
Jon 2: VRSNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Varisi, Solomon Islands © Bible Society of the South Pacific, 1994, 2004.
