Lukas 7
7
Ap tentara a’ge onue ’gain eragam a’ge Yesus en ou obaptegei wene
(Matius 8:5-13)
1At Yesus en aphwami esan ebano wene asogo ’berlegat mo’gulontoluk e, o Kapernaum ’gu aga. 2At ’gu agama, eba ap tentara Roma a’ge onue ’gain mesik eragam a’ge ede hwedik a’ge ebam ou modok wiak oruak en e, warom ’gela’geat welaga. 3Asogo oruak en, ap tentara a’ge ano onue ’gain Yesus obok esa’go hwelegeitik e, eragam a’ge ano obaptumagoluk, ap enarluedek Yahudi a’ge pema mo’gulentasulat e,
“Yesus hai lit o,” oluk mo’gulentesi. 4-5Asogo mo’gulentesimu, is ebano Yesus e’bek wegesarik e, eniak ningsogoat disogo mo’gulegisa,
“At ap tentara a’ge onue ’gain ai aphwami nis a’ge edeapnenebiselat, at en o nis se’ban ogumu werik nenebasulat, tisoma ai re, at eragam a’ge ai ou obapti loat o,” oluk, asogo mo’gulegisema re, 6Yesus ebe emin legesa. O pam legesarik e, ’guogoluk horok lai legesa ’gal e, ap tentara a’ge onue ’gain ano en osi pema wene Yesus mo’gulesi louwagoluk peragonobou waga. Peragonobou wagama, is ebano nak Yesus e’bek wegesarik e, disogo mo’gulegisa,
“Nue. Nis nonue en e,
At oyuk almasogo wemano. An nebe malik wei a’geatma, at an nowi pam ’guom mia o. 7Ye, an en, at e’bek laigoluk opo erlagat o. Mia o. We, at iak nak hwelak poma re, an neragam a’ge yu op ema o. 8An ogo re, nuelak ’gaindek eneragam welat eniak hweliselat, ye, an nosi tentara a’ge neragam welat, niak holugulat, tugumu re, an en, ap mesik,
Lak o, oluk mo’guloso holuk e, lasuat o. Ye, ap mesik,
Suk o, oluk mo’guloso holuk e, wagoat o. Ye, neragam a’ge mesik,
Yu a’ge tin, oluk mo’guloso holuk e, tagoat o, oluk mo’gulhemagoluk peraknonobou wagama wege o,” oluk mo’gulegisa. 9Mo’gulegisema, at Yesus en e, disogo egei,
“Ap ai nogorlok e,” oluk, erliktegeitik e, orogole edenogo aphwami a’bik e’berlik legesa a’ge ebano disogo mo’gulentesi,
“Ap ai ede an nebam he’berik pesi ai ’gela’ge, is aphwami Israel a’ge logon enede asogoat he’berik pogwiam entasu legi erlak a’ge nogorlok e,” oluk egei. 10Asogo mo’gulentesimu, is yo’go wegesa a’ge ebano onowi pam legesa ’gal e, ap is onue tentara a’ge eragam a’ge ano arat op agarik oruakma enil hai legesa.
At Yesus en ap souwe a’ge mesik o Nain a’ge werak oruakma elalugaptegei wene
11Asogo toluk e, pobuk at Yesus o seli onuk Nain ligagarik lasumu re, at osi iak wogu legesa a’ge ebano emin, aphwami pema enebe modok a’bik emin, e’berlik legesa. 12Laga legesarik, leget pakleget wogoma ’goduk emde ’belakma lau wegesa ’gal e, ap souwe a’ge mesik ebe omu nak dogo a’ge ia ogo sugwe oruakma waragama re, aphwami o seli ano a’ge enebe logolholuk ap werak a’ge ano e yesogo woluk ia emin liplau wagaimu yerentesi. 13Yerontoluk e, nonue ’gain Onuk Logo a’ge en e, hwe sugwe ano il holuk ede agarik e, disogo mo’gulesi,
“Nerei o. Nge togun o,” oluk mo’gulesirik e, 14ap werak a’ge yesogo woluk wegesa a’ge ano eragam lagarik e, e’gik tenhesi. E’gik asogo tenhasuam aphwami en werak a’ge ano e yesogo woluk wegesa a’ge ebano duksogo mo egesa. Mo egesema re, at Yesus en ap werak a’ge ano mo’guleselat e, disogo egei,
“Not yu! Helaluk emen oluk mo’gulheselegi o,” oluk mo’gulesimu re, 15malik waraga a’ge ano elaluk agarik hweriogo welat iak egei. Iak egeimu re, Yesus en ap ano ia wogosi. 16Asogo tegeimu, aphwami a’bik ebano onogorlok agarik e, Allah erliktugulat, disogo egesa,
“Ap ’gain Allah iak mo’gulnentasu lema a’ge mesik nene’gerlakma en hebarligen aga yu o! Allah en eiyagai delnenebigoluk waga o!” oluk egesa. 17Asogo egesarik e, wene aga a’ge ai, o Yudea da ya eba en ’bekhit e, o esa’go’gwe eba Yesus obok woluk libegesema re, saga egei.
At Yohanes ik olomu ’belabenebise laga a’ge ano en osi Yesus e’bek peragenebesi wene
(Matius 11:2-19)
18Obok woluk libegesema re, is at Yohanes osi iak wogu legesa a’ge ebano en, wene aga a’ge ano at Yohanes mo’gulegisema esa’go holholuk e, at en osi enebe ’biren worlentesimu wegesema re, 19disogo mo’gulentesi,
“Ap mesik wema ogu legesa ano re, harat no? Ye, at e, ap muon yetharok wolomul a, oluk mo’gulesi lit o,” oluk, nonue ’gain Onuk Logo a’ge e’bek perakpou waga. 20Perakpou wagama, Yesus e’bek wegesarik e, disogo mo’gulegisa,
“Nonue. At Yohanes ik olomu ’belabenebiso a’ge ano en e,
Ap mesik wema oluk ogu legesa ano harat a? Ye, at e, muon yetharok wolomul a, oluk, ebam hin wai lit o, oluk peraknonobou wagama wege o,” oluk mo’gulegisa. 21Asogo mo’gulosu egesarik oruakhwe eria hegit e, at Yesus en e, aphwami ou wiak a’ge emin, nonouk a’bik togu legesa a’ge emin, obabenebiselat, mu’gat ebabut wiak a’ge onogola ’gwegeitik oruakma henokho lebikpasulat, enil hopnik a’ge op emagoluk dektak enebasulat, taga lagarik, 22#Yes. 35:5-6; Yes. 61:1Yohanes osi wegesa a’ge ebano disogo mo’gulentesi,
“His en e, an disogo yusogo tagokhwe henil niogulat, wene osokhwe henesa’go holugulat, tigep a’ge ai, at Yohanes dokhumsogo mo’gulesi lit o. Enil hopnik a’ge dek otluk op agalat, enawe edenak a’ge op otluk ebela lagalat, enebam hwena’go onogorlok a’ge ’gela’ge oruakma obabenebisoam op agalat, enesa’go lerak a’ge husogo holugulat, werak a’ge enelalugabenebiselat, is pema ena’ge erlak a’ge op wene mo’gulentasulat, tagokhwe henil niegep a’ge ano dokhumsogo mo’gulesi lit o. 23Mo’gulotluk e,
Ap sa en an ebirapsogo uknebasu erlak welema holuk e, ogola agai hasu lema o, oluk mo’gulesi lu o,” oluk mo’gulentesi.
24Asogo mo’gulentesimu, is Yohanes en yo’go peragonobou waga a’ge ebano legesema re, pobuk at Yesus en aphwami esan ebano Yohanes obok disogo mo’gulentesi,
“His e, o leimu aphwami erlakma eba no’gwe henil houwogoluk laga legeptik no. ’Bide e’gen ’bare e’gen sogwei en pusogo lak-wak osokhwe dim tuogoluk laga legeptik a? 25Ye, at e, no’gwe on henil houwogoluk laga legeptik. Ap mesik osum op modok a’ge ’buktak oruakma de, houwogoluk laga legeptik a? Yethemit! Ap ’gain a’ge onowi pam welat holugat onosum op a’ge ’buktugulat, ena’ge di a’ge yu a’ge a’bik tenak welat en de, togwi ani o. 26Holuk e, eba no’gwe a’ge houwogoluk laga legeptik. Ye, at e, ap Allah iak mo’gulontogwi a’ge mesik oruakma de, houwogoluk laga legeptik a? Demat ai o. An en mo’gulhentaik. Is ap Allah iak mo’gulontogu legesa a’ge logon welegesa a’geat de, is ai ononuk mia ’gela’ge. A’geat de, at Yohanes ai nak e, onuk oruak a’ge logoat o. 27#Mal. 3:1Ye, wene at Allah en disogo egei,
Nomlogo yo. Hat pobuk ebela lagun o’gwe, he’gebela yakhese lemagoluk,
ap mesik yo’go poluk naduk perakpaik ani o,
oluk egeimu pelal wokho pegesa ano ebe re, at Yohanes pagerat egei yo. 28Holuk e, an en wene mesik yu mo’gulhentaik. Aphwami ’berlegat enialak en dagenebil wegesa a’ge re, ononuk erlak nak. A’geat de, Yohanes ai nak e, onuk oruak ’gela’geat o. A’geat de, Allah eragam enebasumu eba re, at Yohanes onuk erlak ’gela’geat de, is aphwami muon ononuk erlak a’ge eba ononuk oruak ’gela’geat o,” oluk mo’gulentesi.
29 #
Mat. 21:32; Luk. 3:12 Asogo mo’gulentesimu, aphwami esan ebano emin, pemerintah paget uang ’gonu oluk odoksogo pogwi a’ge ebano emin, at Yohanes en pageat ik olomu ’belabenebegeimu no oluk e, wene Yesus en mo’gulentesi a’ge ai enesa’go hweligisarik,
“At Allah ogola en epasu a’ge ai re, hegit modok o,” oluk egesa. 30Asogo egesa a’geat de, is ap Farisi a’ge emin, is ap Allah iak pelal wogo mo’gulontogu legesa a’ge emin, is nak e, Yohanes en ik olomu ’belabonobuagoluk lo erlak welat, Allah en asogo taga lemagoluk ogola epesi a’ge ano enebit en ukpoluk welegesa.
31At Yesus en wene mesik mo’gulentasulat e,
“Is aphwami o yogodak ya pam oruak a’ge re, no’gwe pam elitsogo mo’gulhentaik. ’Ge ’gela’ge oruak. 32Is enebe re, yu emin hegit o. Malik pasar o’go wogumu hweriogo welat, enarilak enemin eniak pei lo wom ogulat,
Nis en weni his wathontouwogoluk edip lebige a’geat de, his en pangtak lagai erlak o. Ye, lo’gu maruogoluk lo’gu edip lebige a’geat de, his en lo’gu maru erlagat o, oluk ogwi ai ’gela’ge togwi o. 33At Yohanes ik olomu ’belabenebiso a’ge waga ai re, so’boru emin, anggur e’gen a’bosu emin, no erlakma en wagama no oluk e, his en,
Mu’gat ebabut wiak a’ge ogola ’gwegeitik oruak o, oluk ogu legep. 34A’geat de, an abat daklau wegi ano nak e, so’boru emin, anggur e’gen a’bosu emin, nil wegirikmu no oluk e, his en e,
Yethemit! Ap yu re, so’boru emin, anggur e’gen a’bosu emin, emde lagorak wiak nasulat e, ap pemerintah a’ge paget uang ’gonu oluk wogwi a’ge emin, ap wiak togwi a’ge emin, enemin hwediktak poluk no’gwi yu yethemit, oluk mo’gulnogu legep. 35Asogo a’geat de, at Allah ede modok ’gagalak welat tago ai en, is pema en op opoluk, asogo hegitsogo togu lema holuk, ai hegit o, oluk e, pobi tua o,” oluk mo’gulentesi.
Hwe wiak tiso a’ge mesik en a’bosu e’ben op a’ge Yesus oyuk pam egelegei wene
36At Yesus en asogo mo’gulentesirik oruakma re, ap Farisi a’ge mesik onuk Simon, Yesus e’birek so’boru at owi pam mesikmu nouwogoluk yo’go pesi. Yo’go pesimu owi pam ’gwigisarik e’birek so’boru nouwogoluk, huraga. 37#Mat. 26:7; Mrk. 14:3; Yoh. 12:3Huragarik, so’boru no’gwi oruakma, hwe o seli eba a’ge mesik wiak tagokhwe obok aphwami enaluk a’ge, aphwami en,
“Yesus o ai welat so’boru nasu,” oluk egesema esa’go hwelegeitik e, a’bosu e’ben op a’ge o’go e’gin a’ge ’balogo ik e’be helep a’ge onuk pualam hele’gik a’ge ogola na’gogo woluk waga. 38Woluk wagarik ogola ’goluk e, Yesus oyuk o’gurl akhit horoksogo o’borlma wagarik e, eba edik welat nge taga laga. Nge tisokhwe il a’bosu Yesus oyuk pam ’begeimu re, asu pam pobuk horegei. Horegeitik e, oyuk pam hau emde motok weregeitik e, a’bosu e’ben op a’ge woluk waga ano Yesus oyuk pam egelik pesi. 39Asogo tisokhwe, ap Farisi a’ge en,
“Yesus, so’boru nemin nul o,” oluk yo’go pesi a’ge ano ogola en disogo epesi,
“Ap yu Allah iak mo’gulentasu a’ge wellepma re,
Hwe yu wiak tago a’ge en taknebesi, oluk enak a’ge pobi telip o,” oluk ede epasumu, 40at Yesus en e, disogo mo’gulesi,
“Simon. An wene mesik mo’gulheik o,” oluk mo’gulesimu at en e,
“Nue. Mo’gulnemin da,” oluk mo’gulesimu, 41at Yesus en e, disogo mo’gulesi,
“Ap enebe ’biren a’ge de, ap mesik o uang lodu paget wogese laga a’ge en wogentesimu enebam ’belak welaga. Mesik uang lok a’ge 500.000 rupiah ’gela’ge. Ye, mesik e, 50.000 rupiah ’gela’ge enebam ’belak welaga. 42Asogo oruakma, is en o’go wogoum mia agama re, uang wegesa a’ge pelal wogo ai, at ’gain ano en hosogo ukpoluk e,
Weat hwerlegep ai o, oluk mo’gulentesi. Asogo tegeimu re, ap enebe ’biren eriano sa ’gela’ge en onue ’gain ano edeaptegei epegen,” oluk mo’gulesimu, 43at Simon en e,
“Ai ap mesik uang a’bik ’gela’ge ebam ’belak welaga a’geat de,
Weat hwerlegen o, oluk mo’gulesi ai en, edeaptegei yo,” oluk mo’gulesimu at Yesus en,
“Egen aiat o,” oluk mo’gulesi. 44Asogo mo’gulesirik e, at Yesus orogole edenogo, hwe ano akhit poluk e, disogo mo’gulesi,
“Simon. Hwe yu hil hegen a? Erlak a. An hat howi pam ’gu wegi a’geat de, hat en e,
Hoyuk petne emerin, oluk, ik mesik woknigen erlak. A’geat de, hwe yu nak e, il a’bosu noyuk pam ’belakpoluk e, asu pam honebegei o. 45Ye, hat en hau hemde motok watnebigen erlagat o. A’geat de, hwe yu nak e, an ’gu wegi hwerli en, noyuk pam hau emde motok watnebiso modok oruak o. 46Ye, hat en a’bosu an na’gul pam mesik watniegen erlak a’geat de, hwe yu nak e, a’bosu e’ben op a’ge noyuk pam watniesi o. 47Asogo tegei ai en e, an en hat mesik mo’gulheik o. At hwe yu en wiak logat tiso a’geat de, at ogola en e,
Yesus en erlagapsogo ukpesimu, oluk loksogoat edeapnebesi ai pam enagat aga o. Is aphwami weiyat wiak togwi a’ge, Allah en erlagapsogo ukpasuam, we, wei ’gela’ge enedeap pogwi o,” oluk mo’gulesirik e, 48at hwe ano disogo mo’gulesi,
“Wiak taga legen a’ge ai, arat erlagapsogo ukpegi o,” oluk mo’gulesi. 49Asogo mo’gulesimu, is aphwami Yesus emin hweriogo welat so’boru ne’gesa a’ge ebano, is-is nak ogulat e, disogo egesa,
“Aphwami wiak togwi a’ge erlagapsogo ukpasu yu, ebe sa ’gela’ge en erlagapsogo ukpasu epegep,” oluk ogukhwe, 50at Yesus en, hwe ano mo’guleselat e, disogo mo’gulesi,
“Hat hede an nebam he’berik pegen ai en delhebegis o. Holuk e, hogola opsogo howi pam lak o,” oluk perakpesi.
Trenutno odabrano:
Lukas 7: Wul
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
