Lukas 6
6
Aphwami Yahudi a’ge Allah paget weat
oruakhwe, Yesus osi gandum e’gen daganogo
nil legesa wene
(Matius 12:1-8; Markus 2:23-28)
1 #
Ula. 23:25
Aphwami Yahudi a’ge agauwa sabit a’ge pam Allah paget weat welagai ano pam mesik erlige re, at Yesus osi iak wogu legesa a’ge ebano enemin, gandum yogo’gwe lagalat e, osi en gandum e’gen daganogo ene’gik en lul wusogo nil-nil legesa. 2Asogo nil lagaimu re, is ap Farisi a’ge pema en e,
“His yu agauwa sabit pam Allah paget weat welat e,
Asogo togup no, oluk wene ’belak oruak a’geat de, nopaget daganil wegep,” oluk mo’gulentigisa. 3Asogo mo’gulentigisema, at Yesus en e,
“Ap Daud osi e’berlik legesa a’ge enemin so’boru nele yen enede ’borok hasu lagama re, at en tegei a’ge Allah iak pam pelal wogo oruak a’ge ano, his en onuk mo’gulik erlak welegep no? Onuk mo’gulogu legebat ani o. 4#Ima. 24:9#1Sam. 21:1-6Ye, Allah owi werikmu ’goluk so’boru roti a’ge Allah paget pogwi a’ge yogunat no modok erlak. We, is ap Allah eiye a’ge holuk nagat no yo, oluk, wene ’belak a’geat de, at Daud en wesirik, at mesik nasulat e, ado osi e’berlik legesa a’ge ebano wogentesi, oluk pelal wogo ano his onuk mo’gulik erlak welegep no?” oluk mo’gulentesirik e, wene mesik disogo mo’gulentesi,
5“Agauwa sabit a’ge pam Allah paget weat welege ai, eiye re, an abat daklau wegi nebe yuat o,” oluk mo’gulentesi.
Allah paget weat oruakhwe, Yesus en ap mesik e’gik il ’gorlo a’ge obaptegei wene
(Matius 12:9-14; Markus 3:1-6)
6Ye, agauwa sabit a’ge pam mesik erlige, is Allah paget weat oruakhwe, at Yesus o aphwami Yahudi a’ge se’ban ogumu mesik ’gwi lagarik e, wene mo’gulentesi. Mo’gulentasumu, at ap mesik e’gik ’bekhit akhit il ’gorlo a’ge eba welaga. 7Oruakma re, is ap Allah iak pelal wogo eiye a’ge emin, ap Farisi a’ge emin, onogola en e,
“Yogodak agauwa sabit pam Allah paget weat oruakhweat de, at en ap ai obaptua ya? Erlak a. Obaptiso holuk e,
Hat wiak tigen, oluk wene ebam pouwok o,” oluk, enil en wogu legesa. 8Asogo enil en wogukhwe, at Yesus en onogola epegesa a’ge enagat pobi enebegeitik e, ap e’gik il ’gorlo a’ge ano disogo mo’gulesi,
“Hebe inotluk e, ’burlmu ya suk o,” oluk mo’gulesimu, ap ano inotluk e, ’burlmu eriano inlai lagama re, 9at Yesus en aphwami ebano disogo mo’gulentesi,
“An en wene mesik hin wokhentaik. Agauwa sabit a’ge pam Allah paget weat welat, obabonobu a? Wiagabonobu a. Delonobu a? Waronobu a. His en it da,” oluk, 10asogo mo’gulentesirik e, is ’berlegat il ontoluk lagarik e, ap ano disogo mo’gulesi,
“He’gik ’belinghemen,” oluk mo’gulesimu e’gik ’belinghesi ’gal e, arat op aga. 11Asogo obaptegeimu, is ap Allah iak pelal wogo eiye a’ge ebano emin, is ap Farisi a’ge ebano emin, onolot het egesarik e,
“At Yesus ’gesogo tolu e,” oluk, is-is nak obok ’balugu legesa.
At Yesus en ap enebe 12 pulogo edigenebesi wene
(Matius 10:1-4; Markus 3:13-19)
12Ai erlige re, at Yesus se’ban iogoluk dom pam ligaga. Ligagarik hup hwedik Allah yo’go pasu modok oruakma, o arat dakha egei. 13O dakha egeimu re, at osi iak wogu legesa a’ge ebano worlentesimu wegesema re, is a’ge enebe 12 poligonoboluk e,
“Henebe perakhenebaik o,” oluk edigenebesi. 14Ap pulogo edigenebesi a’ge ebano ononuk e, Simon onuk agaikhen Petrus tualegei a’ge ano emin, ot onuk Andreas emin, Yakobus emin, Yohanes emin, Filipus emin, Bartolomeus emin, 15Matius emin, Tomas emin, Alfeus omlogo Yakobus emin, Simon,
“O yema nonowirak a’ge nak wolomul o,” oluk ese laga a’ge ano emin, 16Yakobus omlogo Yudas emin, Yudas Iskariot Yesus woruagoluk pobuk yo’go laga a’ge ano emin, enebe eriayat pulogo edigenebesi.
At Yesus en aphwami modok a’bik a’ge wene mo’gulentasulat, ou obabenebiselat, tegei wene
(Matius 4:23-25)
17At Yesus asogo osi pulogo onoboluk, enemin dom pam en ’bu egesarik e, ’gwiang hegit takma eba mo egesarik oruakma, at osi iak wogu legesa a’ge ebano pema akhit enebe a’bigat emin, aphwami modok a’bik o Yudea da ya a’ge emin, o kota Yerusalem a’ge emin, o Tirus Sidon ik laut esa’goma welegesa a’ge emin, 18is enat Yesus iak holugulat, at en is ou wiak a’ge obabenebiselat, tuogoluk e, e’bek odoktu egesa. Asogo odoktu egesema, mu’gat enebabut wiak a’ge onogola ’goluk oruakma eminat obabenebegei. 19Aphwami enemde a’ge lebikpogwi ano ’gela’ge, at en annisogo tagenebasuam e, is aphwami enebe ’berlek en asogo tagonobouwagoluk, enebe ’berlegat ene’gik tenak pouwogoluk walhegesa.
Is nin pema obabenebisoam, onogola enagai
hogulat, is nin pema wiagabenebisoam, enede
wiak agalat, tua o, oluk egei wene
(Matius 5:1-12)
20Asogo tisokhwe, at Yesus en osi iak wogu legesa a’ge ebano il enebam poluk e, disogo mo’gulentesi,
“His henerlagaik a’ge Allah eragam honobouwa ai en e,
honogola henagai hogu lomup o.
21Ye, his yogodak honogola nele ’gela’ge welegep a’ge ai,
pobuk wokhontouema honogum ningsogo nagup ai en e,
honogola henagai hogu lomup o.
Ye, his nge togu legep a’ge, pobuk eida togup ai en e,
honogola henagai hogu lomup o.
22-23 #
1Pet. 4:14
#
2Taw. 36:16; Per. 7:52 Ye, is ap yema ene’balak en, is ap naduk Allah iak mo’gulontogu legesa a’ge tagonobogu legesa ’gela’geat,
his yogodak an abat daklau wegi ano niak wegep ai en enebiraphonobogulat,
his nak enakho honobogulat, eniak ere’gik wiak yakhontugulat,
Ap yu wiak, oluk hononuk ’bakholuk honobok wiak ’balugulat,
asogo takhonobogwi holuk e, o’go wokhontouwa a’ge ’bogorl pam a’bik oruak ai en e,
honogola henagaisogo sirogu lomup o.
24Asogo a’geat de, his ap ’gain henilmu oruak a’ge nak e,
hena’ge a’bik ai pam en,
honogola henagai hogu legep a’ge, pobuk wiagaphonobua o.
25Ye, his pema yogodak lodu a’ge paget nak,
honogum ningsogo no’gu legep a’ge wiagap henebisokhwe, pobuk nele hagup o.
Ye, his yogodak lodu a’ge paget eida togu legep a’ge wiagap henebisokhwe,
henede wathorlugulat nge togubat ani o.
26Is ap yema ena’bulak en e,
is ap pema Allah iak mo’gulontogwi a’ge ’gela’ge takpoluk lalonobogukhweat de, erligonobogu legesa ’gela’ge,
aphwami ’berlek en erlikhonobogwi holuk e, wiagaphonobua o,”
oluk mo’gulentesi.
At Yesus en, “Is ap henemin il ’belak a’ge ai henedesogo wolom o,” oluk mo’gulentesi wene
(Matius 5:38-48; 7:12)
27Asogo mo’gulentesirik e’berlik e, disogo mo’gulentesi,
“Asogo a’geat de, his an niak hologu legep a’ge yu, an wene mesik mo’gulhentaik. Is aphwami henemin il ’belak a’ge ai henedesogo wolomup o. Is en hallorak honoboluk enebiraphonobogukhweat de, his en o’go op a’ge nak tagonobogu lomup o. 28Is en his heman honobogukhweat de, his en e, henede aganhan enebam pogu lomup o. Ye, is en wiagaphonobogwi a’ge ai, Allah en obabonobuagoluk, is enebaget se’ban ogu lomup o. 29Is nin pema en honorogole pema akhit la’buksogo wathonobogwi holuk e, pema akhit ogo wathonobuagoluk wogentemit o. Ye, is pema en honosum sogwei sum a’ge ai horlogwi holuk e, honosum ogola a’ge ano eminat horlouwagoluk e, erlele wagup o. 30Is pema en,
His en a’ge ai, woknentemit o, oluk ’gonu mo’gulhontogwi holuk e, enebe lo’bok en, wogontogu lomup o. Ye, is en his hena’ge wogwi holuk e, pobuk, his en,
Woknentemit, oluk ’gonu mo’gulentagup o. 31#Mat. 7:12His honogola en e,
Is nin pema en disogo taknenebelep e! oluk opogu legep ai ’gela’geat, his en is ai asogoat tagonobogu lomup o. 32Ye, is ap enedeaphonobogwi a’ge nak his en henedeabonobogup holuk e,
Op, oluk mo’gulhontouwa no? Is aphwami wiak togwi a’ge en asogo enedeabonobogwi a’ge, is en ogo re, enedeabonobogwiat o. 33Is aphwami obaphonobogwi a’ge ai nak e, his en obabonobogu legep holuk e,
Op, oluk mo’gulhontouwa no? Is aphwami wiak togwi a’ge enebabut ai disogoat togwi o. 34His en, is aphwami o’go woknontouwak, oluk opogulat wogontogu legep holuk e,
Op, oluk mo’gulhontouwa no? Is ap wiak togwi a’ge ai re,
Pobuk o’go hegitsogo woknontouwak, oluk enarilak wiak togwi a’ge pema wogontogwiam, is en ogo re, wogontogwiat o. 35Is asogo togwi a’geat de, his en e, henemin il ’belak a’ge henedeabonoboluk, opsogo lerontogulat,
O’go is en logon woknontouwak, oluk opogwi erlagat we yogunat wogontugulat, togu lorogup holuk e, henebe Allah ’gain Onuk Logo a’ge eiyagaiat oruakma re, o’go lok a’ge wokhontouwa ani o. Aphwami en, at ebe hau worogwi erlak wiak tisokhweat de, edeabenebiso yo. 36Holuk e, nenaik edeabenebiso ’gela’ge, his en aphwami henedeabonobogu lomup o,” oluk mo’gulentesi.
Aphwami wene enebam pasulat, no’gorliselat, togwi a’ge paget mo’gulentesi wene
(Matius 7:1-5)
37Asogo mo’gulentesirik e, wene mesik disogo mo’gulentesi,
“Allah en wene henebam pou wano oluk e, his en aphwami muon wene enebam pagup o. Allah en wene henebam poluk e, wiagaphonobuano oluk, his en aphwami muon wene enebam poluk e, wiagabonobogup o. Holuk e, his en wiak togu legep a’ge Allah en erlagapsogo ukpou wagoluk e, aphwami en wiagaphonobogwi a’ge his en erlagapsogo ukpogu lemis o. 38His en di a’ge yu a’ge yogunat wogentagup holuk e, at Allah en ogo asogo yogunat wokhontouwa o. Ye, elit a’ge sogoluak pam walholuk, emde loropsogo yagarogwiam, sogoluak emde hegitsogo yagarak poluk pobuk ’bok ’bok ’bi lasukhwe, hoposogo wogontogu legep ai ’gela’ge, Allah en asogoat loksogo wokhontouwa o. His en elit a’ge walholuk en wogontogu legep ai ’gela’ge, Allah en elit a’ge ai pamat walholuk wokhontouwa o,” oluk mo’gulentesi.
39 #
Mat. 15:14
Asogo mo’gulontoluk e, wene mesik ebam elitsogo disogo mo’gulentesi,
“At ap mesik il hopnik a’ge en, are il hopnik a’ge mesik mo’guleselat e,
Ebela ’go yu lus, oluk e’gik tenakho woluk lo epegep? Asogo louwa holuk e, e’biregat e’girlogo ’galok wogoma ’bule ’bilo erlak no? ’Biloat o. 40#Mat. 10:24,25; Yoh. 13:16; 15:20Is guru lak wene mo’gulontogwi a’ge sebelak ’gela’ge oruakhwe is eneiyagai mo’gulontogwi a’ge ebano adia ’gela’ge logo welagai erlak o. Asogo a’geat de, sa en wene arat mo’guliselat pobisogo aluk emarik holuk e, aik mo’gulentasu a’ge ai emin hegirat o. 41His honu’gwarek henil pam, e ’gong ’belak a’ge walurak oruak ai ’gwelakho erlakma en de, is henarilak honorokhwi pema enil mokmuk wei a’ge ’goluk oruakma wokhouwogoluk ’gwelagontogu legep ai nak e, nopaget. 42Honu’gwarek henil pam, e ’gong ’belak a’ge walurak oruak ai ’gwelak erlak welarat de, henarilak honorokhwi ai mo’gulontogulat e,
Hil pam hil mokmuk ’gwegei a’ge ai wokhiaik o, oluk u no? Henagap pam nak e, op a’ge ’gela’ge henede ’biren yema re! Honu’gwarek henil pam, e ’gong ’belak lok a’ge walurak oruak ai naduk wokha ’gwi lotluk en de, henil arat pobisogo yethogulat holuk e, pobuk henarilak honorokhwi enil pam enil mokmuk oruak a’ge ai, elirat wokhomup o,” oluk mo’gulentesi.
E e’gen oso ano pam en edip enagat pobi togwi o,” oluk mo’gulentesi wene
(Matius 7:16-20; 12:33-35)
43Asogo mo’gulentesirik e, pobuk mesik disogo mo’gulentesi,
“E edip op a’ge en e’gen wiak a’ge mesik oso erlak o. Ai ’gela’ge re, e edip wiak a’ge en, e’gen op a’ge mesik oso erlak o. 44#Mat. 12:33Di agan yu agan eba re, e’gen oso ai pam edip enagat pobi togwi o. Molip orlok wiak a’geat de, e’gen ara op a’ge e’gen ’gela’ge mesik egesisoam daganogwi modok erlak o. Ai ’gela’ge re, herle mul orlok wiak a’geat de, e’gen e, anggur e’gen op a’ge egesisoam daganogwi modok erlagat o. 45#Mat. 12:34Aphwami en di wene yu wene enemdema en ogwi ai re, onogola ’betesogo welat, ’gagalogo orlu agoam ogwi o. Enebabut op a’ge onogola op wene ’betesogo welat, wene op a’geat lebikpou wagai o. A’geat de, aphwami enebabut wiak a’ge onogola wiak welat wene wiak a’geat lebikpou wagai o,” oluk mo’gulentesi.
“Ap enebe ’biren en, o ebe ’birenat werigisa o,” oluk ebam elitsogo mo’gulentesi wene
(Matius 7:24-27)
46Asogo mo’gulentesirik e, mesik disogo mo’gulentesi,
“His an en mo’gulhentasu legi a’ge togwi erlak welarat de,
Nue, nue, oluk nopaget mo’gulnogu legep. 47-48Sa en an ne’bek wotluk niak hwelak poluk hegitsogo tago a’ge ai, o worogwi a’ge pam elitsogo mo’gulhentaik. At ai, ap en o worogwi ai ’gela’geat o. Ap mesik o werigoluk ’gwiang pelak poluk e, helep poluk e, o wa’gi helep pam louksogo poluk en o ebe weregei. Asogo weregeimu en de, pobuk ik ebe lok a’ge wagalat o ano moluktigoluk walhesi a’ge re, modok ningsogo weregeimu no oluk e, o’borlogouk mesik u erlak modok mo egei. 49Asogo a’geat de, ap sa en niak hweliselat, hegitsogo tago erlak holuk e, ap mesik o werigoluk o wa’gi ’gwiang pam poluk woru erlakma re, ik ebe lok a’ge wagalat o ano sasogo woluk lasulat modok moluk-melak takpesi ai ’gela’geat o,” oluk mo’gulentesi.
Trenutno odabrano:
Lukas 6: Wul
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
