YOHANES 2
2
Sal᷊iwangu pẹ̌kakawing su Kana
1Dua ěllo tuhụ e piạko sal᷊iwangu pẹ̌kakawing su soang Kana su ěntanang Galilea, kụ i ninangu Mawu Yesus mal᷊aing ene sene. 2Mawu Yesus dingangu manga muritʼE nighausang lai su sal᷊iwang ene. 3Sarạeng anggorẹ̌ e nasuẹ e, i ninangʼE nẹ̌berạe su Mawu Yesus, ”I sire nikasueěngu anggorẹ̌.”
4Mawu Yesus simimbang, ”Inang, abe pěngoro si Siạ e. Deng bal᷊ine tempone Iạ mělahẹ u watangeng-Ku.”
5Kaiso i ninangu Mawu Yesus nẹ̌bera su manga kokị, ”Měngkate koạ apan nioronʼE si kamene.”
6Ene kai nạung piạ běnsadu akẹ ěnnungu waụ mạpapěllọ sene, baugu panganguhaseng tuhụewe tundung tau Yahudi. Běnsadẹ̌ ene pẹ̌sěmbaụ mangawe lohong mahasụ su litere. 7Mawu Yesus něhengetang su manga kokị ene, ”Lohoingkong akẹ běnsadẹ̌ ene kěbị.” Tangu i sire nělohọe niapakapenẹ. 8Bọu ene Mawu Yesus něhengetang si sire, ”Pěnggaingko kadodọ akẹ ene kụ bawako su anung těmbonangu sal᷊iwang.” I sire nẹ̌bawạe akẹ ene sarang anung těmbonangu sal᷊iwang e, 9ringangu i sie nẹ̌temangke akẹ kụ seng nẹ̌bal᷊ụ nakoạ anggorẹ̌. (I sie wẹ̌ga wue měnsang bọu apa asal᷊e anggorẹ̌ ene, u tumbạeweng kokị apang němpěndal᷊ingu akẹ ene e masingkạ.) Tangu těmbonangu sal᷊iwang ene himaungke su kaghiang esẹ, 10mase nẹ̌bera si sie, ”Tuhụ tundune, taumata e mẹ̌siliwirẹ̌ u anggorẹ̌ mapapia kal᷊imona, dingangu mạengbeng sake semben naundang doune, buhụewe anggorẹ̌ bal᷊ine. Arawe i kau e kawe něndesọ u anggorẹ̌ kapiaěnge sarang orasẹ̌ ini!”
11Kai ene hal᷊ẹ̌ nakaral᷊inaụ kahumotongange kinoạu Mawu Yesus. I Sie někoạ hal᷊ẹ̌ ene su soang Kana su Galilea. Su hal᷊ẹ̌ ene e i Sie nělahẹu kasasěllahʼE. Tangu manga muritʼE němpangimang si Sie.
12 #
Mat. 4:13
Bọu ene Mawu Yesus riměsung sol᷊ong Kapernaum i siren ninangʼE, manga anạ u sěmbaụʼE ringangu manga muritʼE. I sire němpẹ̌tanạ sene mangawe pira ěllo karěngụe.
Mawu Yesus simuẹ̌ su Wal᷊em Mawu
(Mat. 21:12-13; Mrk. 11:15-17; Luk. 19:45-46)
13 #
Sas. 12:1-27
Sarạeng Ěllon Paskang tau Yahudi seng masandigẹ̌, Mawu Yesus nakoạ e sol᷊ong Yerusalem. 14Su Wal᷊em Mawu su Yerusalem i Sie nakaěbạe mal᷊ahumbal᷊ụ u sapi, domba, ringangu manụ paluma; ringangu manga měnanal᷊iu roitẹ̌ mạhungkaiang sene. 15Mawu Yesus nẹ̌koạ gagheserẹ̌ bọu tal᷊i kụ něliwuahẹ̌ kal᷊awọu manga binatange bạe domba arau sapi, wọu ral᷊ungu Wal᷊em Mawu. Manga medang měnanal᷊iu roitẹ̌ e niwal᷊intụiʼE hakịu roitẹ̌ e měngkatewe nẹ̌sal᷊iawuhẹ̌ tamai ramahi. 16Bọu e i Sie něhengetang su manga měbawal᷊ụ u manụ paluma, ”Pakasuẹ e hengkẹ bọu ini apa tamai ene. Bal᷊eng Amang-Ku abe koạ tampạ u pal᷊ahumbal᷊ukang!” 17#Mzm. 69:10 Tangu manga muritʼE nakatahěndungke ayetʼu Winohẹ Susi ini, ”Kakěndagẹ̌-Ku baugʼu Wal᷊enʼU, o Ruata-Ku, makạtutung naung-Ku.”
18Manga těmbonangu tau Yahudi e kai rimokạ Mawu Yesus, angkuěng i sire, ”Kěnang pěnodẹu hal᷊ẹ̌ makạdal᷊inaụ su těngong kami e tadeạu i kami makahěngangu su tampạ e wue i Kau mẹ̌koạ kere ini.”
19 #
Mat. 26:61, 27:40; Mrk. 14:58, 15:29 Mawu Yesus simimbang, ”Goghahe Bal᷊e ini, kụ su ral᷊ungu těllu ěllo Takụ pětikang kạpia.”
20Bọu e i sire němpẹ̌bera, ”Epạ u pul᷊o ěnnung su taunge karěngụe nipamětikang ini. Bọu e i Kau mamětị kạpia su ral᷊ungu těllu ěllo?”
21Arawe Bal᷊em Mawu su timonan Mawu Yesus ute kai watangengʼE sẹ̌sane. 22Kụ tangu susamurine, sarạeng Mawu Yesus niapẹ̌bangung kapia wọu kapapohong, nakatahěndungke manga muritʼE u hal᷊ẹ̌ ene kai seng bọu nipěhengetangʼE. Tangu němpangimangke i sire su apan mạbawohẹ su ral᷊ungu Winohẹ Susi e ringangu su apan iwẹ̌berang Yesus.
Mawu Yesus masingkạ u patikụ taumata
23Těntal᷊ang Mawu Yesus deng ene su Yerusalem su tempon pěmamantugu Ěllon Paskah, lawọ taumata mạngimang si Sie ual᷊ingu hal᷊ẹ̌ kẹ̌koatengʼE. 24Kaiso Mawu Yesus sẹ̌sane tawe nahimang si sire, watụ u i Sie masingkạben sire kěbị. 25Tawe wahal᷊uasẹ̌ taumata manualagʼu kakanoạ i sai-sai si Sie, batụu i Sie sẹ̌sane seng masingkạu ral᷊ungu naungu taumata.
Trenutno odabrano:
YOHANES 2: SXN
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
@ LAI 2003
