OKHUCHIAKA 19
19
Obwononi bwa Sodoma?
1Olwa abamalaika babili yabo boola Sodoma khubwiile, Loti yali niyekhaaye hasilibwa sie litookho. Olwa yabalola, yasinjila natsia okhubakaan'na. Yabenamila khulwo oluyali, 2ma naboola, “Abaami, yanze mwitse munyumba mwanje, mwesaabe ebilenje ma mukone obutukhu bwolwalelo. Mukamba tsuli namutsilil'le noluchendo.”
Nebutswa nabo bakalusia mbu, “Tawe, khulakona khunjila khuno.” 3Natsilil'la okhubahomba, ma okhwola nibahuchil'la okhutsia n'naye munyumbamwe. Loti nalaka abatiiyi babe okhulomba emikaati ma nibalomba ebiakhulia ebilahi khubacheni. Olwa biali nibierechekhele ne nibalia.
4Abacheni nibasili okhukona, abasaatsa ba Sodoma beetsa nibafumbila inyumba tsimbeka tsiosi. Abasaatsa bosi abomwitaala yilio baliho, ababuukha nende abasakhulu. 5Balanga Loti nibareeba mbu, “Abasaatsa betsele okhukona munyumba mumwo bali hena? Baleere esioba yino khukone n'nabo!”#Abakh. 19:22-24
6Loti narula esioba ma niyekala omuliango. 7Nababool'la mbu, “Abasianje, musaayanga mbu nimuyanza murakhakholakhwo esifwabi sifwana mbwo tawe. 8Lole, ndi nende abakhaana banje babili abasili okhubukaanakhwo nomusaatsa wosi. Lekhe muleer're mubakhole singa obwa mwenya. Nebutswa murakhol'lakhwo abandu bano ling'ana liosi tawe, sichila nabacheni munyumba yanje, ne okhwola mbalinde.”
9Nebutswa nabo nibaboola mbu, “Rulayo, ibe oli butswa omucheni yino! Oli nabunyali sina obwokhukhubool'la akakhukhola? Rulayo khase khwakhakhukhola akayombele akakhukhol'la abachenibo yabo.” Ma nibasindikha Loti inyuma nibesuta ahembi mbu bafunake omuliango. 10Nebutswa abasaatsa babili abali munyumba banyiila amakhono kabwe nibakhwesa Loti nibamwinjisia munyumba, ma nibeekala omuliango. 11Nibabofusia abasaatsa bosi abali esioba, kata sibali abanyala okhunyoola omuliango tawe.#2 Abar. 6:18
Loti yarula Sodoma
12Abasaatsa babili yabo nibabool'la Loti mbu, “Nolikhwo nende omundu undi wosi – abasianibo, abakhaanabo, abakhasi babasianibo, nohomba abeekhobo bandi abamenyele mwitaala muno bahiiniemwo bosi, 13sichila khwitsa okhumulula litaala lino liosi. OMWAMI uhuliye obusitaki obutinyu khubandu yaba ma ukhurumile khwitse okhumulula Sodoma.”
14Ma Loti natsia khubasaatsa abali nibakhwetsanga abakhaanabe, nababool'la mbu, “Eyunjie murule hano, OMWAMI yetsa okhumulula habundu hano.” Nebutswa bakanakana mbu netsimbakha butswa.
15M'mabwebwe abamalaika bateema okhumuyungia Loti nibaboola mbu, “Khola bwangu. Bukula omukhasiwo nende abakhaanabo babili murule, khe mulekhe okhukosia obulamu bwenywe olwe litaala liba nilimululwanga.” 16Loti niyesingoyoyiakhwo. Nebutswa OMWAMI yamubelel'la, ma abasaatsa yabo nibamutiila omukhono, khandi nibatiila omukhasiwe nende abakhaanabe babili amakhono, nibabahiinia esioba welitaala.#2 Pet. 2:7 17Ma mulala khubamalaika naboola mbu, “Mwilukhe, muhonie obulamu bwenywe. Murakhahengakhwo inyuma kata okhusinjila musipaapi tawe. Mwilukhile mubikulu khe mubule okhwirwa.”
18Nebutswa Loti nakalusia mbu, “Tawe, noyanza orakhol'la mbwo tawe, Omwami wanje, 19ukholeye aketsimbabasi amenji ma uhonisie obulamu bwanje, nebutswa ebikulu bili ehale okhusila. Okhumumwa khunyala okhunyoolel'la, ma haundi nyala okhufwa nisili okhwolayo. 20Ololanga akhataala khatititi khala? Khali ahembi okhusila. Lekha nzilukhilemwo – nakhatititi butswa – ne nyala okhuhonelamwo.”
21Naye nakalusia mbu, “Nobulahi, mbuchiliye. Simulula akhataala khala tawe. 22Yilukha bwangu! Sikholakhwo esindu siosi tawe okhwola olwoba niwol'leyo.”
Sichila Loti yakhalanga akhataala khatititi, khamala nikhalangwa Soari#19:22 Soari Esifuni sieliira yiili ni akhataala khatititi..
Okhumululwa khwa Sodoma nende Komora
23Eliuba liali niliakharula olwa Loti yoola Soari. 24Ma OMWAMI nakwisilia Sodoma nende Komora Elamu yomul'lo singa ifula,#Mat. 10:15; 11:23-24; Lk. 10:12; 17:29; 2 Pet. 2:6; Yuda 7 25ma nakamulula kosi nende libanda liosi, halala nende abandu balimwo bosi nende ebindu biosi ebiamela khwiloba. 26Nebutswa omukhasi wa Loti yakhupa amasemo inyuma ma nakwa lichina liechumbi.#Lk. 17:32 27Omukamba kwalondakhwo, mumabwebwe, Aburahamu yahuuna habundu hayali nasinjiyenje imbeli wo MWAMI. 28Nahenga Sodoma nende Komora mwibanda liosi nalola omwosi nikutumanga khusibala yisio singa omwosi okurula khusitioli esikali. 29Nebutswa olwa Nyasaye yamulula amataala komwibanda aha Loti yamenyanga, yetsul'la Aburahamu ma nahuchiil'la Loti ahone ma abe omulamu.
Obuchiachilo bwabandu ba Moabu nende Amoni
30Khulwa mbu Loti yaria okhumenya Soari, ye nende abakhaanabe babili batsia okhumenya muluhangaywa musikulu. 31Omukhaana omukhulundu nabool'la omukhaana wabwe, “Papa wefwe luno atsitsanga nakhunguha, ne abasaatsa sibalikhwo musibala muno abalikhuleera khe khulanyoole abaana tawe. 32Chenda khuhelesie papa amalwa ma akholwe, ma khube n'naye, khwibule abaana n'naye.” 33Kho mubutukhu yibwo bamuhelesia amalwa nanywa ma omukhaana mukhulundu naba n'naye. Ne yali nakhol'we okhusila kata siyamanya esiekhola tawe.
34Litukhu lialondakhwo omukhaana mukhulundu nabool'la omukhaana wabwe, “Ise ndabeye nende papa obutukhu bwabeeye, leelo khumuhelesie amalwa akholwe, ma nawe obe n'naye. Ma fwesi khube nende abaana okhurula khu Papa.” 35Obutukhu yibwo bahelesia samwana amalwa, ma omukhaanawe omutu nakona n'naye. Khandi sichila yali nakholwe okhusila siyamanya esiali okhwekhola tawe. 36Khe abakhaana ba Loti babili bamala nibabelekha tsinda okhurula khu samwana. 37Omukhaana omukhulundu yebula omwana omusiani namukulikha Moabu. Niye kukanyene Abamoabu baliho luno. 38Omukhaana mutu naye khandi yebula omwana omusiani, owa yakulikha Benami. Niye kukanyene Abaamoni baliho luno.
Trenutno odabrano:
OKHUCHIAKA 19: EBAIBO
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Bible Society of Kenya, 2019