Matius 3
3
Yohanes ima usa'isekhe lageikhe meke etnogo nen hagakhe lageikhe wene
(Markus 1:1-8; Lukas 3:1-9, 15-17; Yohanes 1:19-28)
1Itithogon hagakhukhasik oba nen, at Yohanes ima usa'isekhe lageikhe meke etnogo, o Yudea limo akhuni dekma etoma wageikhesik wene yakulisekhe dogolik, yigithogon ekhe lageikhe,
2“At kok pogot oba meke apma 'bisagein etnogo yogotak arat 'binanigin. Halok he, yi weak ti weak hagakhe lagap meke here'isalok hinobabut hebelatni o,” iluk yogeisekhe lageikhe. 3#Yesaya 40:3 Iti ekhe lageikhe iti, at Yesaya Allah ane yogeisekhe lageikhe meke etnogo nen yogeisekhe dogolik,
“Ap ageikhe o limo akhuni dekma etoma ane wai
ekhe dogolik,
Eiya! Ninoe Etagapogot wisiginke, holak
hanorogo yakhik, korlo meke mothogon
yakhik, yakhe dogoni o, iluk waisiliogo,”
iluk Yesaya nen ekhe lageikhe etnogo, at Yohanes ebeat wageikhe iti. 4Wageikhesik, limo akhuni dekma etoma dogolik wam unta isi meke karogo, asu ikhigik, oado meke karogo, therlok hagarogo ikhigik, ikhe dogolik hipiri nau hak, yibirla nikik, themuk apusu okama meke nikik, hagakhe lageikhe. 5Itithogon werekma, it akhuni o kota Yerusalem nen, o propinsi Yudea nen, i Yordan aik obake etoma tha'bokhogonat nen, at oba natogosi agoukha. 6Wagoukhasik nen, yi weak ti weak hagakhe lagoukha meke 'bualogo thogotdisugunem, i Yordan ima usa'isekhe lageikhe. 7Itithogon, hagakho werekma, it ap Farisi meke aperek inom, ap Saduki meke aperek inom, inebe doalegat nen,
“Nit ninomat ima usa'inanuak,” iluk oba wagunem yigithogon yogeisekhe lageikhe,
“Hit warlo pelal nen itago meke yomarani! Hit nen Allah akla aga apik dageigin etnogo hinoba 'bisinem lo erlok lugun iluk tha nen husupi yokhisekhemo? Erlok dek o. 8Halok he, hinakla ebetdiluk, weak hagakhe lagap meke here'isalok, hinobabut eberogonat hebelaga iluk ekagat asuak nen mothogon hagakhe dogono o. 9Nen, hinakla nen,
Abraham iti nit ninopase iluk, apugup o. At Allah nen Abraham a'buri negen helekit yi meke erlok hagasusak o. 10O erlo dopok eken hano meke ikhidek halok, mukhogo hetumo la'isagaluk pisue o omaken oba pakpakthek motok werek o,” iluk yogeisasikhe.
11Itithogon yogeisasikhesik ageikhe men yogeisasikhe,
“Hit weak hagakhe lagap meke here'isalok hinobabut eberogonat hebelaga iluk, an nebe yekerek nobatne dek meke nen ima usa'inagakhe lagei. Meke re, at kok obatneak meke yabokane wisigin o. At ebe kok obatneak iti nen, an nebe yekerek meke nen isok agot ugu meke wolok lausak erlok dek o. At nen ima usa'inagu hak, Allah Agoreke inom, hetu inom, hinoba usa'isigin o. 12Gandum eken abubuleke hulusak hasik than oba huphogon la'igin meke, at iteerek meke ikimo werek iti. Karelusak oba tak-tak asi aga halok, hano meke halok, karelogo 'bekherekma hanoma 'bigik, abubuleke halok hetu nagulusak dekma etnogo baga la'isigik, hagasigin o,” iluk yogeisasikhe.
Yohanes nen Yesus ima usa'isikhe wene
(Markus 1:9-11; Lukas 3:21-22)
13Yohanes nen wene etnogo yogeisekho werekma, at Yesus ima usa'uagaluk o Galilea nen Yohanes i Yordan aik oba werekma oba waga lageikhemo, 14at Yohanes nen,
“An nen ima usa'agousak erlok dek o. Hat nen an ima usa'anusak meke re, an noba wagan yoma re!” iluk yogokhikhe. 15Yogokhikhemo, at Yesus nen,
“An usa'anusagat o. At Allah nenat yi hasik ti hasik itithogon hagasuagaluk apekherek tak-tagat hagatnabusak o,” iluk isikhemo,
“I o,” iluk 16ima usa'isikhemo 'buakhogon dageisigin hak, pogot kagoukhogon Allah Agoreke thue merpati yogeik negen, at oba labi usa'agunem ileken hasikhe. 17Oba duk i ageikhemo, Allah ane pogot oba nen,
“An na'but netaiken hunik dogolik noba hotok egerek ebe ithiat o,” iluk ane usa'i ageikhe.
Trenutno odabrano:
Matius 3: LAIDNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
