MATEO 5
5
Jesosaa eyiyojo nequiya sohuihuohuicapoa cuana
(Lc 6.20-23)
1Majoya Jesosa queahuisoneecuana onijjetii nequipoquiani bamajje eyiyohuasijje jaasohuapishanaquiapoa. Majotiiya oya anioqueñaquiapoa. O shajja-ajjajji poanicuana o aniyasijje jja-anichipiquiapoa. 2Majo aniya Jesosaa esohui jama huohuime acacuanapoa ba'a:
3—E'ejojonei queabihui poani cuana joya jjabaquiani queacamajanee ojaya Eyacuiñajjima' eba'epoquijji,
comacuanaya quijje Eyacuiñajjiya ba'etiitiimeecaje'yo ma ohua ojjaña huoojeacapoquianitii meshi Eyahuasijje.
4E'ejojonei queabihui poani cuana joya jjeya queayeno poani so'o,
quijje Eyacuiñajjiiya comacuanaya yenoama pomeecaje'yojjejojoya.
5E'ejojonei queabihui poani cuana joya oyaneitii queaca'a poani jjabaquiajja.
Ojjaña ma Eyacuiñajjiya quiacaje huisotii meshi comacuaaya jjeshecaje.
6E'ejojonei queabihui poani cuana joya Eyacuiñajjija esohui jayojja ba'esaneineipoani,
Eyacuiñajjiya comacuanaya ojjaña o queaja'a ba'epoquijji quiacajejjejojoya.
7E'ejojonei queabihui poani cuana joya pea yenoama pomeesahua'yojji poani,
Eyacuiñajjiya oya pea-ai yenoama pomeecaje'yojjejojo.
8E'ejojonei queabihui poani cuana joya e'ejojonei Eyacuiñajjijo jjashahuabaquipoquiani
oya beca jjashahuabaquime po-ajjajjejojoya.
Comacuaaya Eyacuiñajji bacaje quijje onijje ani'yomajje.
9E'ejojonei queabihui poani cuana joya quenequeneajja,
pea jjabeimeequi'yojji poani pea-ai.
Eyacuiñajjiya comacuanaya huohuicaje jama ba'a:
“Miquiana ecue bacuaejja, ecue bacuase poani.”
10E'ejojonei queabihui poani cuana joya queanee acani cuaa Eyacuiñajjija esohui jayojja ba'epoquianijojoya.
Comacuanaya Eyacuiñajjiya huoojeacapoquianitii meshi Eyahuasijje ba'etiitiipoquije'yo.
11—E'ejojonei queabihui poani quiana peacuaa miquiana niñebacani ejo, botiama acani, miquianaya siajje acani cuaa pea-ai ecuea epeejji poanijojoya. 12Jamajjeya quiana oe queabihuinee pocue onaa jama queanee acajje, queatai niñebame acajje pea-ai. Quijje Eyajo nequi'yomajje Eyacuiñajjija quia queapame jjesheje'yo ma queacamajanee ba'epoquinaje sosejje. Oya jayojja pea-ai yahuajonei miquiana chamahuajo Eyacuiñajjija esohuihuohuijji poacuana queacamajanee, queanee pea-ai pomeecapoquiapoa cuaa.—
Jesosaa esohui huohuipea-aicapoa sanejo, cuaquijijijo pea-ai
(Mc 9.50; Lc 14.34-35)
13Jesosaa esohui huohuitiicapoa cuana jama ba'a: —Miquianaya sane jayojja poani jiquio meshijo ba'e. Jamatii sane jjaseseamaquiajo ¿achajja queapame bobi shicuijji po-o'oyame? Achajjapishana. Jjaseseamaquimajje peajjanei poaje'yo, jeajeacajji. Majoya sane jama poajo quishicaje cuaa ejeajea ani.
14—Miquianaya ecuea epeejji poani cuaquijiji jayojja poani jiquio meshijo ejijinequijji. Bacue, equicuana eyiyojamacoojo ani queaquehua aniajja. Ojjañacuaa oya bacaje ja'anei ani. 15Oya jayojja cuaquijiji dahuahuojjemajje jijiqui cajonhuidojjohuasijje nequiaca-ajja. Eyahuasijje caca oe nequiacajji ejeaja'anequijji ojjañacuana equiyiyedojjojo anija ebajji. 16Jiquio ecua cuaquijijiya jeaja'acanequiani jama pea-aiya quiana oe ba'epoquicue queaja'a ojjañacuanaja miquiana ebajji. Majoya miquiana queaja'anee ba'epoquiani bamajje queahuisocuaa miquianaja Chii-ai Eyacuiñajji Eyajo nequi bihuiapea-aicaje.—
Jesosaa huohuipea-aicapoa Eyacuiñajjija esohui Moisesja tehuecuana queapameneetii jaa
17Jesosaa huohuitiica-aniapoa cuana jama ba'a: —¡A'a eya Eyacuiñajjija esohui Moisesja tehuecuana cajaa aa poeyanaje poso ajji quiaa! Oja sohuihuohuijji poacuanaja esohui pea-ai cajaa aa pojjeama eya poeyanaje. Majo pojjeama poe eya. Eya caca poeyanaje ojjañatii oja esohui etehue jayojja ba'epoquiya. 18Eyaya quiana e'ejojonei huohuiaña Eyacuiñajjiya jiquio meshi, eyatahuatahua pea-ai oe pomee'yojjimahuajo oja esohui Moisesja tehuecuana ojjañatii jaatiitiipoquije, ejjachamameequi'yojji pojjeamatii poaje ojaya. Eyacuiñajjiya ojjañatii oja esohuicuana ameejeyocaje'yo, bisoneicuana ohuaya ameejeyocaje'yo. 19Jamajjeya joya oja esohui Moisesja tehuecuanajo jjashajja-ajjaquiajja poanicuana jamatii che bisonei esohuijo, oya shajjama' jayojja poani Eyacuiñajjiya bacaje quijje-ejjenei enequi'yojji ma ohua ojjañacuana huoojeacapoquianitii meshi Eyahuasijje. Joya peacuana oja esohuijo shajjama' pomeejji poanicuana Eyacuiñajjiya bacaje quijje-ejjenei enequi'yojji pea-ai. Joya peacuanahuohuijji poani oja esohui etehue aca-ajja oya jayojja pea-ai bacaje quijje-ejjenei enequi'yojji. Ojjaña joya oja esohui etehuecuanajo jjashajja-ajjaquianicuana, peacuanahuohuijji poani pea-ai, comaya caca oe Eyacuiñajjiya bacaje queanahuenee ebionei ehuineijo enequi'yojji ma ohua ojjañacuana huoojeacapoquianitii meshi Eyahuasijje.
20—Bacue, fariseo dejjacuana, Moisesja tehuehuohuijji poanicuana pea-ai queapamenee poani poso jjabaquiani oya ojjañatii Eyacuiñajjija esohui oja tehuejo jjashajja-ajjaquitiisapoanijjejojoya. Eyaya quiana e'ejojonei huohuiaña miquianaya ojjañatii Eyacuiñajjija ejjashahuabaquijji mi-ajeyomajje ma Eyacuiñajjiya huoojeacapoquiani meshi Eyahuasijje epoqui'yojjitii pojjeama poaje quiana.—
Jesosa dejjacuana queaquene poanijo huohuipea-aicapoa
(Lc 12.57-59)
21Jesosaa huohuitiica-aniapoa cuana jama ba'a: —Miquianajaya etiiquiaa yahuajonei Eyacuiñajjija esohui shajja-ajjacapoa, oya esohuitiiya shajja-ajjanaje miquiaaya. Jama oja esohui poani ba'a: “¡A'a pea dejja quecua'yojji pojji! Joya pea dejja quecua'yojji poani dojocaje cuaa etii poaniyasijje napameeya.” Jamaya acapoa. 22Jjeya eyaya pea esohui huohuiaña quiana. Joya queaquene poani ecuea epeejjinijje Eyacuiñajjiya comaya queanee pomeecaje oja mimishijo. Joya Jesosaja epeejji niñebajji poani o mata-ajji poani dejja dojocaje cuaa emeshimeseja nequimee dejjacuana etii poani Junta Suprema aniyasijje oja napameejji. Joya Jesosaja epeejji queatainee ajji poanicuana Cuaqui-aiyasijje poqui'yochana.
23-24—Jamajjeya ma miya quiasa-aña Eyacuiñajjija yajji poquianiya altar nequiyasijje majoya shahuaba'yaña minijje Jesosaja epeejji queaquenetii poani minijje, ma miya quiasa-aña, ¡a'a jamatii quiajji so'o! Ebionei minijje Jesosaja epeejjinijje mimiqui'yosocue o jjabeimeequi'yohua minijje. Majoya ma miya quiasa-aña queapame quiacue jama po'yomajjeya.
25—Joya mi napameesapojjinijje ebionei mimiqui'yosocue ejjabeimeequi'yojji minijje etii poanicuanahuasijje poquijjimahua. Miya mijjabeimeequi'yajje ohuaya etii poanicuana huohuiquicaje mi jeanobiameejjijo. 26E'ejojonei eyaya miya huohuiaña, miya majotii ejjajeanobiaquijji equijo ani ecuayaqui'yojji pojjeamatii poaje bejjo mi cuayaqui'yojji sosejje miquiajeyomajje.—
Jesosaa huohuipea-aicapoa peacojjojji poanijo
27Jesosaa huohuitiica-aniapoa cuana jama ba'a: —Miquianajaya eshajja-ajja ma pea esohui Eyacuiñajjiya yahuajonei huohuicapoa. Jama poa ba'a: “¡A'a peacojjojji pojji!” 28Eyaya ca quiana ca oe jiquio pea esohui huohuiaña. Joya pea epona jeabajji poani ecojjojji jamatii ojaya oya napajjimajo, Eyacuiñajjiya comaya bacaje peacojjojji epo ojaya ejjashahuabaquijjijotii.
29—Miquea ebañei ecojjaa miya queamimishitii pomeecanijo, jjacojjacajjajeaquicue. Queahuesha jeajeacue. E'e jamaya queapame, mimishiama epojji ba'eje jamatii queaneepishana cojjamiji. Miya ca queamimishitii poanijo ojjañatii mique yami queaneeneetii quiyonequipoquije'yo Cuaqui-aiyasijje. 30Oya jayojjaya miquea ebañei emeya miya queamimishitii pomeecanijo, jjamejajasejjajeaquicue. Queahuesha miquea eme jeajeacue. E'e jamaya queapame, mimishiama epojji ba'eje jamatii queaneepishana mehuojja. Miya ca queamimishitii poanijo ojjañatii mique yami queaneeneetii quiyonequipoquije'yo Cuaqui-aiyasijje.—
Jesosaa esohui huohuipea-aicapoa ejjahueiquijjijo
(Mt 19.9; Mc 10.11-12; Lc 16.18)
31Jesosaa huohuitiicapoa cuana jama ba'a: —Miquianajaya eshajja-ajja ma pea esohui Eyacuiñajjiya yahuajonei jama acapoa ba'a: “Ojjaña joya oja huanase hueijji poajeja ebionei papeni ejjahueiquijji oya quiaca'yojji.” Jamaya poa yahuajonei. 32Eyaya ca quiana ca oe pea esohui huohuiaña. Ojjaña joya oja huanase hueijji poajeya, jamatii oja huanase peaja cojjojjima ani, ma dejjaaya oja huanase queamimishi pomeecaje oya pea dejjajo jjahueaqui'yajo. Joya ehuei ani eponajo jjahuanaquiani dejja queamimishi pea-ai poani, peacojjojji poani oya.
33—Miquianajaya eshajja-ajja pea esohui ma etiiquiaa yahuajonei shajja-ajjacapoa esohuiya. Maya jama poa ba'a: “Miquianaja esohui e'ejojonei ajeyoca'yojji cua miquiaaya Eyacuiñajjija ebajjijo huohuinaje huisotii esohuiya. Jamajjeya jama pomajje a'a miquianajaya esohui pajea'yojji. Ojjañatii ajeyoca'yojji.” 34Jjeya eyaya ca quiana ca oe pea esohui huohuiaña. A'a jama ajji ba'a: “Esohui ecuea e'ejojonei eajeyojji Eyacuiñajjija ebajjijo huohuije.” Oya jayojja a'a jama ajji ba'a: “Esohui ecuea e'ejojonei eajeyojji ma eyajo nequija ebajjijo huohuije.” Chojja, jama aca-ajja Eyacuiñajjiya majo aniya huoojeacapoquianitiijojoya. 35Oya jayojja a'a jama ajji ba'a: “Jiquio meshijo nequija ebajjijo esohui e'ejojonei eajeyojji huohuije.” Chojja, jama aca-ajja Eyacuiñajjiya jiquio meshijo oja ejeojji nequiacanijojoya. Oya jayojja a'a jama ajji ba'a: “Ciudad Jerusalén meshijo nequija ebajjijo queajeajo esohui e'ejojonei eajeyojji huohuije.” Chojja, jama aca-ajja maya Eyacuiñajjija meshi poanijojoya. Oya Emeshimesenei Eojjañamese poanitii. 36Oya jayojja a'a jama ajji ba'a: “Esohui e'ejojonei eajeyojji huohuije ecuea sapaneija ebajjijo.” Chojja, jama aca-ajja miquianajaya bajjimatii poani achajja miquianajaya sapa poaje. Jamajjeya miquianaja ehuohuijji pojjeama achajja ehuojjaña cuayaje, a'a oshe, a'a tehue, ehuohuijji pojjeamatii poani. 37Esohui mahuiso acue queaja'a ba'a: “E'e, jamaya eyaya aje.” Majoya jama amajje oya jayojja acue. “Chojja, ecuea jama eajji pojjeama.” Majoya jama amajje oya jayojja acue pea-ai. Miya esohui peaja ebajjijo e'ejojonei eajeyojji huohuiajo edosiquiaa quiana queamimishi pomeecaje.
Peaa queanee acajje, a'a jjasoseaquijji
(Lc 6.29-30)
38—Miquianajaya eshajja-ajja pea esohui ma Eyacuiñajjiya yahuajonei huohuicapoa. Jama poa ba'a: “Joya jjacuiaquimajje pea cojja cuiacajjajeajji poanaje oya pea-ai cojja cajjajeacaje cuaa esosejje. Oya jayojjaya jjacuiaquimajje joya ese' cuiacajjajeajji poanaje oya pea-ai se' cuiacajjajeacaje cuaa esosejje.” 39Eyaya ca quiana ca oe pea esohui huohuiaña. A'a joya mi queanee ajji poajejo jjasoseaqui'yojji. Ohua mi shemo cuiasejjacajje, shemo peajje nahuejjima acue ojaya o shemo pea-ai ecuiasejjajji. 40Joya mi napameejji poajeya, ohua mique daquieyami jjeshemeecajo dejja etii poani cojjaneijo, mique daqui-ao oya quiapea-aicue. 41Soldadocuaa miya huohuicajo oja aquiana iyehuesha edojojji, queahueshanee dojocue ma ohua mi huohuicanaje huesha pojjeama. 42Cua miquea aquiana ohua huohuiajjacaje quijje equia'yojji oya quiacue. A'a jjajacajjajeapajjaquinanajji joya miquea aquiana huohuiajjajji poajecuanajo.
Mi botiama ajji poanicuana queajeanee acajji
(Lc 6.27-28,32-36)
43—Miquianajaya eshajja-ajja pea esohui ma yahuajonei etiiquiaa huohuicapoa esohuiya. Jama poa ba'a: “Miquea epeejjicuana queajeanee acue. Joya mi botiama ajji poanicuana botiama apea-aicue esosejje.” 44Eyaya ca quiana ca oe jjeya pea esohui huohuiaña. Joya mi botiama ajji poanicuana queajeanee apoquiacue. Ojjaña joya mi queacamajanee pomeejji poani mi botiamajjejojo Eyacuiñajjinijje mimicue comacuanajoya. 45Jama poajoya miquianaya Eyacuiñajji Eyajo nequija bacua poani bacaje cuaa. Eyacuiñajjiya eshequi jaasohuameecani dejjamimishicuana, dejja queapame poanicuana pea-ai jeaja'apoquiajji. Oya jayojjaya ohuaya ena huoojeacani oja epeejjicuanaja yajji, oja epeejji pojjeamacuanaja yajji pea-ai. 46Jamajjeya miquiaaya joya mi queajea ajji poanicuana mahuisotii queajea apea-aiañajo queapame pojjeama poani quiana bacaje Eyacuiñajjiya. Roma emeshimeseja yajji bejjo chichapoquiajji poani dejjamimishicuana jama pea-aiya ba'yani joya o queajea ajji poaninei ohuaya queajea acani, mahuisotii. Jama pea-ai pomajje miquianajaya Eyacuiñajjija quia mi botiama ajji poani queajea aña sosejje ejjeshejji pojjeama poaje quijje. 47Miquiaaya miquianajaya huapa pojjeamaneicuana mahuisotii esohui queapame o ajjequijji añajo, ¿a'a quiana queapame jamaya poani? Chojja, joya ecua Eyacuiñajjija esohui bapojjima'neicuana poani jama pea-aiya quiana ba'yani, queapamenee pojjeama. 48Jamajjeya quiaa oe ojjañacuana queajeanee apoquiacue miquianaja epeejji pojjeamacuanaya. Jiquio ecua Eyacuiñajjiiya Eyajo nequiya ojjañacuana queajeaneetii acapoquiani jama pea-aiya apoquiacue peacuana.—
Trenutno odabrano:
MATEO 5: ESE
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Copyright Mision Nuevas Tribus, 2006