Bar 8
8
Obwomeezi obuleetwa Mwoyo Ahikiriire
1Aho nu, abo abali omu Kristo Yesu, tibakyaina musango hati. 2Habwokuba ebihaburo ebya Mwoyo Ahikiriire anyakuleeta obwomeezi oburukuraba omu Kristo Yesu bikambohorra ha kiragiro ky'ebibi n'orufu. 3Habwokuba Ebiragiro, ebi bitarasoboire kukora habw'obuceke bw'omubiri, Ruhanga akabikora naatuma Omwana we nyabwe aina omubiri nk'ogwaitu ogukora ekibi, gube kyonzira habw'ekibi. Kandi omu mubiri ogu nuho ekibi yakisingisiize omusango. 4Nukwo tuhikiririze kimu Ebiragiro ebi birukuragira, itwe abatahondera eby'omubiri, baitu abahondera ebya Mwoyo. 5Abo abahondera eby'omubiri, emitima yabo bagita ha by'omubiri, baitu abo abahondera ebya Mwoyo, emitima yabo bagita ha bya Mwoyo. 6Okuta omutima ha by'omubiri kurugwamu okufa; baitu okuta omutima ha bya Mwoyo kurugwamu obwomeezi n'obusinge. 7Habwokuba omutima oguhondera ebi omubiri gugonza, guba munyanzigwa wa Ruhanga; tigworobera Biragiro bya Ruhanga, mazimakwo tigusobora. 8Kandi abo abalemwa omubiri tibasobora kusiimwa Ruhanga.
9Baitu Mwoyo wa Ruhanga obu araaba naikara kwo omuli inywe, timuli omu mubiri, baitu omu Mwoyo. Weena ataina Mwoyo wa Kristo, ogu tali muntu we. 10Kristo obu araaba ali omuli inywe, buli omubiri gufiire habw'ebibi, baitu omwoyo gwawe gwomeezibwa habw'obuhikiriire. 11#1Kor 3:16.Mwoyo w'Ogu ayahumbwire Yesu omu bafu, obu araaba naikara omuli inywe, Ogu ayahumbwire Yesu, alyomeeza n'emibiri yanyu enyakufa, habwa Mwoyo we anyakwikara omuli inywe.
12Nukwo nu beene baitu, twina ibanja eritali ly'omubiri, ngu tukuraatire eby'omubiri 13obu muraaba nimukuraatira eby'omubiri mulifa; baitu obu muraaba nimucwa ebikorwa ebibi by'omubiri habwa Mwoyo Ahikiriire, mulyomeera.
Abaana kandi abagwetwa ba Ruhanga
14Ningira boona abeebemberwa Mwoyo wa Ruhanga, baba baana ba Ruhanga. 15#Bag 4:5-7.#Mar 14:36; Bag 4:6.Na inywe mutaheebwe mutima ogw'obwiru ogw'okubagarra omu butiini; baitu mukaheebwa Mwoyo Ahikiriire ayabafoire baana, anyakutugambisa ati: “Abba, Isiitwe!” #8:15 Abba nikyo kigambo ky'Oruharamaika ekirukumanyisa Taata. 16Mwoyo ogu wonyini nuwe arukutumanyisa hamu n'omutima gwaitu, nkooku tuli baana ba Ruhanga. 17Kandi obu turaaba tuli baana, buli tuli bagwetwa. Bagwetwa ba Ruhanga abagweterwa hamu na Kristo, kakuba tubona emihito hamu nawe, nukwo tusobole kuheebwa ekitiinisa hamu nawe.
Ekitiinisa eki tuliheebwa
18 #
Ama 3:5,6. Ninteekereza nti: Emihito y'akasumi kanu tesemeriire kulengesanizibwa n'ekitiinisa eki tulisuukulirwa. 19Habwokuba ebihangwa byona biikara bitegeriize n'ekihika okwolekwa kw'abaana ba Ruhanga. 20#Kub 3:17-19.Ningira ebihangwa eby'omunsi bikaba bitakusobora kukora nkooku byakwegondiize; hatali habwabyo, baitu habw'Ogu ayabitegekere ati nukwo biikale bitegeriize ebiriija. 21Habwokuba ebihangwa ebi nabyo birisumururwa omu bwiru obw'okujunda, bitunge obugabe obw'ekitiinisa obw'abaana ba Ruhanga. 22Nitumanya ebihangwa byona nkooku biikara nibisinda kandi nibisaasa nk'ebirukurumwa kuzaara okuhika na hati. 23#2Kor 5:2-4.Tibiri bihangwa byonka, baitu na itwe abaahairwe Mwoyo nk'omuganuro ogw'okubanza, nitusinda omu nda yaitu, tutegeriize kuhindurwa baana, nubwo emibiri yaitu yoona ericungurwa. 24Kandi okunihira oku nukwo twajuniirwemu. Ningira okunihira ebirukurorwa, oku tikuba kunihira kwo. Nooha anihira ebi arukurora? 25Baitu obu turaaba nitunihira ebi tutarukurora, mazimakwo tubitegereza tugumire.
26Mwoyo nukwo atukoonyere ati mu buceke bwaitu; habwokuba titumanyire kusaba nkooku tusemeriire; baitu Mwoyo wenka atutonganirra hali Ruhanga, naasinda omu mulingo ogutagambwa. 27Ogu anyakwekebiija emitima y'abantu naamanya Mwoyo ebi arukugenderra; habwokuba Mwoyo atonganirra abantu be, Ruhanga nkooku arukusiima.
28Tumanyire ngu, omu buli kintu Ruhanga eki akora, agenderramu oburungi bw'abo abamugonza, abeetwa entegeka ye nkooku eri. 29Habwokuba abo aba yamanyire ira, batakabaireho, nubo yakomere basisane Omwana we, nukwo Omwana asobole kuba muzigaijo omu bagenzi be abaingi. 30Kandi abo aba yakomere batakabaireho, nubo yayesire; n'abo aba yayesire, nubo yahaire obuhikiriire; n'abo aba yahaire obuhikiriire, nubo yahaisize ekitiinisa.
Okwebuga habw'engonzi za Ruhanga
31Hati nu, ebi turabigambaho ki? Ruhanga obu araaba atwemeriireho, nooha aliturwanisa? 32Ogu ataraganyiire Omwana we nyabwe, baitu yamuhayo habwaitu itwena, alyangira ki okutuha ebintu byona hamu nawe? 33Nooha alijunaana abakome ba Ruhanga? Ruhanga nuwe anyakubaihaho omusango. 34Ow'okubacwera omusango nooha? Ni Kristo Yesu ayafiire, yagaruka yahumbuurwa omu bafu, anyakuli ha mukono gw'obulyo ogwa Ruhanga, nuwe arukututonganirra kwo! 35Nooha alitwihaho engonzi za Kristo? Eriba mihito, bujune, kuhiiganizibwa, njara, okugenda busa, akabi akandi rundi empirima? 36#Zab 44:22.Nkooku kyahandiikirwe kiti:
“Ekiro kyona twitwa habwawe;
nitusisanizibwa nk'etaama ez'okwitwa.”
37Nangwa, omu bintu ebi byona nitusingurra kimu habw'Ogu ayatugondeze. 38Nyowe ningumiza kimu nti: Busaho kintu na kimu noobu rwakuba rufu, rundi bwomeezi, abamalaika rundi emyoyo emibi, ebintu ebiroho rundi ebiriija, 39noobu byakubaire ebya ha iguru rundi eby'okuzimu, rundi ekintu ekindi kyona ekyahangirwe ekirisobora kutwihaho engonzi za Ruhanga na Kristo Yesu MUKAMA waitu.
Trenutno odabrano:
Bar 8: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.