Luk 20
20
Nibakaguza Yesu nambere yaihire obusobozi
(Mat 21:23-27; Mar 11:27-33)
1Kiro kimu, Yesu obu akaba naayegesa abantu omunju ya Ruhanga kandi naabarangirra Amakuru Amarungi, banyakatagara abakuru n'abeegesa b'ebiragiro hamu n'abakuru b'abantu baija, 2baamukaguza bati: “Tugambire, busobozi ki oburukukukozesa ebintu binu, rundi ayabukuhaire nooha?” 3Yesu yabagarukamu ati: “Na nyowe ka mbakaguze, mungambire. 4Okubatiza kwa Yohaana kukaruga hali Ruhanga rundi omu bantu?” 5Baitu bbo baatandika kuteezangana empaka bati: “Obu turagarukamu ngu: ‘Kukaruga hali Ruhanga’, naija kutukaguza ati: ‘Habwaki mutaramwikiriize?’ 6Obu turagarukamu ngu: ‘Kukaruga omu bantu’, abantu boona nibaija kututeera amabaale, habwokuba bananukire Yohaana nkooku akaba ali murangi.” 7Nukwo kugarukamu ngu: Tibamanyire nambere kwarugire. 8Yesu nubwo yabagambiire ati: “Na nyowe tindukwija kubagambira obusobozi oburukunkoza binu.”
Orufumo rw'abakozi ababi omu rugonjo rw'emizaabbibbu
(Mat 21:33-46; Mar 12:1-12)
9 #
Is 5:1. Nubwo Yesu yayongera kuganikiza abantu oruganikyo runu ati: “Omusaija akabyara orugonjo rw'emizaabbibbu, yarusigira abapangisa okururolerra, yagenda omunsi endi, amaleyo omwanya. 10Obusumi obw'okunoga obu bwahikire, yatuma omuheereza hali abapangisa abo, bamutwekere ha bijuma by'emizaabbibbu. Baitu abapangisa baamuteera, baamubinga, yarugayo ngaro-nsa. 11Yagaruka yatuma omuheereza ondi, nawe baamuteera, baamuswaza, baamubinga. Nawe yarugayo ngaro-nsa. 12Yayongera yatumayo omuheereza owa kasatu; onu nawe baamuhutaaza, baamubinga. 13Nubwo mukama w'orugonjo yayekagwize ati: ‘Nyowe ndakora ki? Ka mbatumire omwana wange omugonzibwa; rundi uwe baraamugayuka!’ 14Baitu abapangisa obu baamurozire naija, baagambirangana bati: ‘Onu nuwe mugwetwa. Muleke tumwite, obugwetwa bube bwaitu’. 15Baamuturukya omu rugonjo, baamwita.
“Boojo, mukama w'orugonjo, abapangisa abo alibakora ki? 16Aliija abahwerekereze, n'orugonjo arukwase abandi.” Abantu obu baahuliire eki baagamba bati: “Nikikafuuhe!” 17#Zab 118:22.Baitu Yesu yabarolerra nabakaguza ati: “Ekyahandiikirwe kinu ekirukugamba kiti:
‘Ibaale lyonyini abombeki eri baayangire,
niryo lyafookere bugumizo bw'enju’,
nikimanyisa ki? 18Omuntu weena anyakugwa ha ibaale eri alicwacwanuka; kandi weena ou lirigwera lirimusasangura.”
Ekikaguzo ha kuha omusoro
(Mat 22:15-22; Mar 12:13-17)
19Omu kasumi ako abeegesa b'ebiragiro n'abanyakatagara abakuru bakaba nibagonza kukwata Yesu, habwokuba bakamanya oruganikyo oru nkooku yaruganikize nirukwata hali bo, baitu bakatiina abantu. 20Nahabweki balinda akasumi aka baraamukwatiraho. Baatuma n'entasi ezayesisanize kuba b'amananu, basobole kumukwasa omu bigambo ebi arukugamba, nukwo bamuheyo omu mikono n'omu busobozi bw'omulemi mukuru. 21Baakaguza Yesu bati: “Mwegesa, tumanyire nkooku agamba kandi oyegesa ebihikire, kandi tosoroora omu bantu, baitu oyegesaakwo omuhanda gwa Ruhanga. 22Kihikire kuha Kaisaali omusoro rundi nangwa?” 23Baitu uwe yamanya obugobya bwabu, nukwo kubagambira ati: 24“Munyoleke siringi. Ekisisani kinu n'ebihandiikirweho by'oha?” Baagarukamu bati: “Bya Kaisaali”. 25Yesu yabagambira ati: “Ebya Kaisaali mubihe Kaisaali n'ebya Ruhanga mubihe Ruhanga.” 26Batasobole kumukwasa omu kigambo kyona omu maiso g'abantu. Eki yabagarukiremu kyabahuniriza, baahuna kwonka.
Ekikaguzo ha kuhumbuuka omu bafu
(Mat 22:23-33; Mar 12:18-27)
27 #
Ebik 23:8. Abasadukaayo abamu, abo abagamba ngu, abafu tibahumbuuka, bakaija hali Yesu 28#Bir 25:5.baamukaguza bati: “Mwegesa, Musa akatusigira ekihandiiko ekirukugamba kiti: ‘Omusaija obu araafaaga akasiga omukazi atazaire baana, mugenzi w'omusaija ogu aswere omufaakati nukwo bazarre kifa abaana.’ 29Hakaba haroho banyineemu musanju; mukuru wabu yaswera omukazi, baitu yafa atasigire baana, 30n'owa kabiri yaswera omukazi ogu, 31n'owa kasatu nukwo ati, okuhika boona musanju obu baafiire batasigire baana. 32Abo boona obu bahoireho, omukazi nawe yafa. 33Obu, ha kiro ky'okuhumbuuka aliba muk'oha? Habwokuba boona musanju bakamuswera.”
34Yesu yabagarukamu ati: “Abantu ab'ebiro binu baswera kandi baswerwa, 35baitu abantu abalisangwa basemeriire kuhika oku hanyuma y'okuhumbuuka kw'abafu, tibaliswera. 36Bbo tibaligaruka kufa, habwokuba balisisana nk'abamalaika, kandi baana ba Ruhanga, ningira babagaine ha kuhumbuuka. 37#Kurug 3:6.Baitu abafu nkooku bahumbuurwa, na Musa wenka akakimanyisa omu byahandiikire okwoleka ebyabaireho ha rusaka ruli, nambere yagumize MUKAMA nkooku ali Ruhanga wa Abburahamu, Ruhanga wa Isaaka, kandi Ruhanga wa Yakobbo. 38Tali Ruhanga w'abafiire, baitu w'aboomeezi, habwokuba hali Uwe boona baba boomeezi.” 39Abamu ha beegesa b'ebiragiro nukwo kugarukamu bati: “Mwegesa ogambire kurungi!” 40Kandi batongere kumukaguza ebindi.
Kristo omwijukuru wa Daudi kandi MUKAMA we
(Mat 22:41-46; Mar 12:35-37)
41Yesu yabakaguza ati: “Abantu nibasobora bata kugamba ngu: Kristo aba mwijukuru wa Daudi? 42#Zab 110:1.Kandi kunu Daudi wenka omu kitabu kya Zabbuli akagamba ati:
‘Atahwaho akagambira MUKAMA wange ati:
Ikarra ha mukono gwange ogw'obulyo,
43okuhika abanyanzigwa baawe obu ndibafoora akatebe k'ebigere byawe.’ 44Daudi obu arraba yayesire Kristo MUKAMA we, obu aba ata mwijukuru we?”
Naahabura okwerinda abeegesa b'ebiragiro
(Mat 23:1-36; Mar 12:38-40)
45Abantu boona obu bakaba nibamuhuliriza, Yesu akagambira abeegesebwa be ati: 46“Mwerinde abeegesa b'ebiragiro abagonza kugendagenda bajwaire ekanzu ezirukukwekweya, okuramukibwa n'ekitiinisa omu butale, n'okwikarra ha ntebe ez'ekitiinisa omu masorrokaniro, n'ebiikaro ebirukukira oburungi omu magenyi. 47Bbo banyaga amaju g'abafaakati, hanyuma beezookesa nibarandagatana omu kusaba! Abo balicwerwa omusango ogurukukira ogw'abandi!”
Trenutno odabrano:
Luk 20: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.
