Ebik 28
28
Paulo ali omu kizinga Melita
1Obu twamazire kukira, nubwo twamanya ekizinga eki nkooku kyayetwaga Melita. 2Abantu baamwo bakatukunira kurungi muno. Baatutangirra itwena, kandi habw'enjura kutandika kugwa n'obwire kuba bw'obutiti, baatuhembera omurro. 3Paulo akaba asenyere ekiganda ky'enku, yakita ha murro; baitu habw'ekibabu kyagwo, hahurumukamu encwera, yamwezinga ha mukono. 4Enzaarwa ez'omu kizinga eki obu baarozire nerengiija ha mukono gwe, baagambirangana bati: “Nyabura inywe omusaija onu mwisi w'abantu. Noobu araaba atabukire enyanja, baitu encwa ya Ruhanga ey'amazima temwikirize kwikaraho.” 5Baitu Paulo, enjoka yagikunkumurra omu murro atahikirweho kabi koona. 6Abantu baalindirra nibateekereza ngu, naija kuzimba rundi aragwa hansi akanguke; baitu obu baamazire kulindirra omwanya mukooto, batarozire kabi koona akamubaireho, baatandika kuteekereza kundi, baagira ngu, mucwezi.
Paulo naakiza ise Pubuliyo
7Haihi n'ekiikaro eki, hakaba haroho ebibanja by'omunyoro omukuru w'ekizinga eki, ibara lye Pubuliyo. Akatutangirra kandi yatukunira muno okumara ebiro bisatu. 8Omu kasumi ako, ise Pubuliyo akaba abyamire omu kitabu, arwaire omuswija n'ensese. Paulo yagenda kumubungira. Obu yamazire kumusabira, yamutaho emikono, yamukiza. 9Eki obu kyabaireho, abarwaire abandi ab'omu kizinga eki nabo baija baakizibwa. 10Abantu baayo bakatuha ebisembo bingi, kandi obu twayeteekaniize kugwerra omu meeri, baatuboherra na byona ebi tukaba nitwetaaga.
Paulo naahika Rooma
11Obu haahingwireho ameezi asatu, tukaihwayo emeeri eyarugire Alekizanderiya ei ekaba emazire ebiro by'obutiti omu kizinga eki, eroho ekisisani ky'Aboojo Abarongo omumaiso gaayo. 12Obu twahikire Sirakuuse, twamarayo ebiro bisatu. 13Twarugayo nitwekiisa omusa gw'enyanja, twahika Reegiyo. Obu haahingwireho ekiro kimu, haimuka omuyaga ogw'obukiizi bw'obulyo, kandi ha kiro kya kabiri twahika Puteyoli, 14nambere twasangire ab'oruganda abaatusabire kumara nabo ebiro musanju. Hanyuma twairrayo, twahika Rooma. 15Ab'oruganda ab'oku obu baahuliire nkooku tuhikireyo, baija baatutangaana ha Katale ka Apio na ha ntangatangano ya Ngonyo Isatu. Paulo obu yarozire ab'oruganda yasiima Ruhanga, yagarukwamu amaani. 16Obu twahikire Rooma, Paulo yaikirizibwa kweraaza mbere arukwenda, aina omuserikale ayamulindaga.
Paulo naahanuura n'Abayudaaya ba Rooma
17Obu haahingwireho ebiro bisatu, Paulo akeeta abeebembezi b'Abayudaaya, beesorooze. Obu baamazire kwesorooza yabagambira ati: “Bagenzi bange, noobu ndaaba ntaina eki nasobiize abantu rundi ntacwire engeso z'abaisenkuru itwe, baitu nabwo nkakwatirwa Yerusaalemu naaheebwayo omu mikono y'Abarooma. 18Obu baamazire kuntonganiza, baasanga ntaina musango gw'okunnyisa, baayenda kundekera. 19#Ebik 25:11.Baitu Abayudaaya obu baayangire, nyowe nukwo kujurra hali Kaisaali, noobu ndaaba ntaina eki ndukwenda kunyegerra abantu ab'ihanga lyange. 20Nahabweki nikyo nsabiire kubarora n'okubaza na inywe. Ningira Abaisirairi eki baikara bategeriize, nikyo kintaisize omu njegere zinu.” 21Nabo baamugarukamu bati: “Itwe titukatungaga bbaruha ezirukuruga Buyudaaya ezirukukugambaho, noobu yakuba omuntu w'owaitu araizire kutusoborra rundi kutugambira ekibi kyona hali iwe. 22Baitu nitwenda iwe wenka otusoborre ebyawe. Ekitebe eki, eki tukimanyaho nkinu: hoona nikigambwaho kubi.”
Paulo ebi yayegeseze Abayudaaya ba Rooma
23Obu baamazire kumuraganiza ekiro ekindi, baingi omuli bo bakaija omunju ye nambere akaba naagoonya ha kiro eki. Yabasoborra ebye okuruga nyenkya kuhika rwebagyo, naabamanyisa eby'obukama bwa Ruhanga, kandi naalengaho kubaikirizisa Yesu naasigikira omu Biragiro bya Musa n'omu by'abarangi. 24Abamu bakaikiriza ebi yabagambiire, abandi baayanga. 25Kandi bbo nkooku batarasoboire kwikirraniza, baayahukana, Paulo amazire kubamanyisa ekintu kimu ati: “Mwoyo Ahikiriire akahikya obu yagambiire baisenkuru inywe naakirabya omu Isaaya omurangi ati:
26 #
Is 6:9,10. ‘Hikaho abantu abo, obagambire oti:
Okuhurra mulihurra, baitu timulyetegereza;
okurora mulirora, baitu timulihweza.
27Habwokuba emitima y'abantu banu egumangaine,
n'amatu gaabo nigahurra kubi,
n'amaiso gaabo bagazibiriize.
Habw'amaiso gaabo okutarora,
n'amatu gaabo okutahurra,
n'emitima yabo okuteetegereza
nikyo baayangiire okumpindukira nkabakiza.’
28Mukimanye nu, okujunwa kunu okwa Ruhanga nkooku kuhairwe Abanyamahanga nabo. Bbo nibaija kuhurra.” [ 29Obu yamazire kugamba ebi, Abayudaaya baarugaho, nibateezangana empaka.]
Eky'okumalirra
30Paulo akamarayo emyaka ebiri yoona, naayesasurra ebyetaago bye byona, kandi yatangirraga boona abaijaga kumubungira, 31naabarangirra obukama bwa Ruhanga kandi naayegesa bwerebwere ebya MUKAMA Yesu Kristo hataroho arukumutanga.
Trenutno odabrano:
Ebik 28: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.