Ebik 18
18
Abantu ba Korinto nibatandika kwikiriza
1Ebi obu byahoire, Paulo yaruga Ateena yagenda Korinto. 2Nuho yaitiraine Omuyudaaya arukwetwa Akwila, enzaarwa ya Ponto. Uwe na mukazi we Purisila nubwo bakaba bakyarugire Itale habwokuba Omukama omukuru Kilahudiyo akaba aragiire Abayudaaya boona baruge Rooma. Paulo yagenda kubabungira, 3kandi obu yarozire bali bakozi b'amaheema, omulimo ogurukusisa nk'ogu yakozire, yatandika kwikara nabo, nibakora hamu. 4Buli Sabbato yayegesaaga omu isorrokaniro lyayo kandi yalengahoga kusoonasoona Abayudaaya n'Abagiriiki.
5Siraasi na Timoteho obu baamazire kwija, nibaruga Makedoni, Paulo yayeheriireyo kimu ha mulimo ogw'okutebeza n'okusoborra Abayudaaya nkooku Yesu ali Kristo. 6Obu baatandikire kumuhakaniza n'okumujuma, yakunkumura ekijwaro kye, naagamba ati: “Esagama yanyu ebe hali inywe. Nyowe tinyina musango. Okuruga hati ninyija kugenda omu Banyamahanga.” 7Yaruga omu isorrokaniro lya Korinto, yagenda kwikara omunju y'omusaija arukwetwa Tito Yusto, omuntu ayatiinaga Ruhanga. Enju ye ekaba eri haihi n'isorrokaniro.
8Kirisipo, omukuru w'isorrokaniro, hamu n'ab'omuka ye boona baikiriza MUKAMA. Abakorinto abandi baingi abaahuliire enyegesa za Paulo baikiriza kandi baabatizibwa. 9Kiro kimu omu itumbi MUKAMA akabonekera Paulo yamugambira ati: “Otatiina, yegesa kandi otaculeera; 10ndi hamu na iwe, kandi tiharoho muntu araakukora kubi habwokuba omu rubuga runu nyinamu abantu bange baingi.” 11Paulo akamarayo omwaka gumu n'ameezi mukaaga, naabeegesa ekigambo kya Ruhanga.
Abayudaaya nibanyegerra Paulo hali omulemi mukuru wa Akaaya
12Galiyo obu akaba ali mulemi mukuru wa Akaaya, Abayudaaya bakaikirraniza okukwata Paulo, baamutwara omu kooti, 13nibagamba bati: “Omusaija onu naayohya abantu, baramye Ruhanga omu mulingo ogutarukwikirizibwa Ebiragiro bya Musa.” 14Kandi Paulo obu akaba atakagarukiremu, nubwo Galiyo yagambiire Abayudaaya ati: “Inywe Abayudaaya, kakuba omuntu onu abaire aina eki asobeze, rundi acwire ekiragiro kikuru, naakubagumiisiriize mbahurra; 15baitu empaka zanyu obu ziraaba ziri ha bigambo, rundi ha mabara, rundi ha biragiro byanyu, mubyemarre inywenka. Nyowe tindukwenda kucwa misango ey'ebintu nk'ebi.” 16Yababinga omu kooti. 17Aho boona baahinduka baagwera Soositene, mukuru w'isorrokaniro, baamuterra omu kooti. Baitu Galiyo ebi byona atabifeeho.
Paulo naagaruka Antyokiya
18 #
Kubar 6:18. Ebi obu byahoire, Paulo yayongera kumarayo ebiro bingi, nubwo yaragire ab'oruganda, yagwerra omu meeri, yayambuka yagenda Siriya, aina Purisila na Akwila. Obu bakaba bali Kenkereya, Paulo yayemwa isoke nkooku akaba aragaine. 19Kandi obu baahikire Efeeso, yabasigaho. Yataaha omu isorrokaniro wenka, yatandika kuhakana n'Abayudaaya. 20Abaikiriza obu baamusabire ayongere kwikara nabo ebiro bindi, yayanga; 21baitu yabaraga naagamba ati: “Ruhanga obu aliba agondeze, ndigaruka.” Yagwerra omu meeri, yaruga Efeeso.
Orugendo rwa kasatu
22Obu yasaabukire ahikire Kaisaariya, yagenda kuramukyaho ekitebe ky'abaikiriza, hanyuma yagenda Antyokiya. 23Obu yamazireyo ebiro bike, yarugayo, yagenda naaraba omunsi yoona ya Galatiya na Firigiya, naagumya abaikiriza boona.
Omulimo Apolo yakozire Efeeso
24Omu biro ebi, Efeeso hakaijayo Omuyudaaya, ibara lye Apolo, enzaarwa ya Alekizanderiya. Apolo ogu akaba ali muntu arukubaza kurungi kandi anyakumanyire muno Ebihandiiko ebirukwera. 25Omusaija ogu akaba ayegesiibwe Omuhanda gwa MUKAMA; yarangirra n'omuhimbo ebigambo ebirukukwata hali Yesu kandi yabyegesa kurungi, noobu araaba akaba naamanya okubatiza kwa Yohaana kwonka. 26Yatandika kwegesa n'obumanzi omu isorrokaniro ly'Abayudaaya; baitu Purisila na Akwila obu baamuhuliire, baamutwara owaabu, baayongera kumwegesa kurungi Omuhanda gwa Ruhanga. 27Apolo obu yagondeze kwambuka kugenda Akaaya, ab'oruganda baamusagika, baahandiikira abaikiriza baayo nibabasaba kumutangirra. Obu yahikireyo, yakonyerwa amaani ga Ruhanga kugumya abo abakaba baikiriize, 28habwokuba yahakanizaaga muno Abayudaaya burole, naaboolekera omu Bihandiiko ebirukwera Yesu nkooku ali Kristo.
Trenutno odabrano:
Ebik 18: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.