Ebik 14
14
Paulo na Baranaba nibarangirra Amakuru Amarungi Ikoniyo
1Obu bakaba bali Ikoniyo, baataaha omu isorrokaniro ly'Abayudaaya, baayegesa ebigambo ebyagwire abantu ha njoka, byaleetera Abayudaaya n'Abagiriiki baingi kwikiriza. 2Baitu Abayudaaya abamu baayanga kwikiriza, baata omu Banyamahanga omutima mubi banobe abantu abaikiriize. 3Oku Paulo na Baranaba baamarayo akasumi, nibeegesa ebya MUKAMA batarukutiina, nawe akagumya ebi baayegeseze ha kisembo kye ky'embabazi, naikiriza ebihuniriza n'ebyamahano bikorwe emikono yabo. 4Baitu abantu ab'omu rubuga bakaba beebaganizeemu; abamu bali ha rubaju rw'Abayudaaya, abandi orw'abakwenda. 5Ekyarugiremu, Abanyamahanga n'Abayudaaya baikirraniza n'abalemi baayo, baacwa amagezi kubakora kubi n'okubateeza amabaale. 6Baitu abakwenda obu baakimanyire, bairukira Lisitura na Derube, embuga za Likaoniya, n'omunsi ezindi eziherraineho. 7Oku nuho baarangiriire Amakuru Amarungi.
Paulo naakiza omulema omu rubuga Lisitura
8Omu rubuga Lisitura hakaba haliyo omusaija ayazairwe ali mulema; akaba atarukusobora n'okurubata. 9Yaija kuhuliriza Paulo naayegesa; kandi Paulo obu yamurozire, yamanya nkooku aina okwikiriza okurukusobora kumukiza. 10Yagamba n'iraka likooto ati; “Imuka, oyemerre toro.” Omusaija ayazairwe ali mulema yamatuka, yatandika kurubata. 11Ekitebe ky'abantu obu kyarozire Paulo eki akozire, baatokera haiguru omu rulimi rwabu Orulikaoniya bati: “Abacwezi batwiziremu, bali omu bisisani by'abantu!” 12Baranaba baamukubya Zeu, kandi Paulo ow'akaba naabaza muno, baamweta Herume. 13Nubwo nyakatagara w'ibandiro ly'omucwezi Zeu erikaba liri omu maiso g'orubuga yaizire n'abantu be, yaleeta enimi zijwekerwe emiihura, boona baagonza kutamba ekyonzira ha irembo ly'orubuga. 14Baitu abakwenda Baranaba na Paulo obu baakihuliire baatemura ebijwaro byabo, bajumbutuka nibaraba omu kitebe ky'abantu hagati nibabatanga n'iraka likooto bati: 15#Kurug 20:11; Zab 146:6.“Basaija inywe, kiki ekirukubakoza binu? Na itwe tuli bantu nyabuntu nka inywe. Tubaleetiire Amakuru Amarungi, nukwo muleke abacwezi abo abataina mugaso, muhindukire Ruhanga omwomeezi, ayahangire iguru n'ensi, hamu n'enyanja, na byona ebigirumu. 16Omu businge bwa ira Ruhanga akaikiriza buli ihanga kwekorra ebyalyo nkooku lirukwenda; 17baitu nabwo ateebuzeeho obwakaiso obw'ebirungi abakorra naabanagira enjura enyakuruga omwiguru, naabeereza oburo bwanyu omu busumi bwabwo, naabaigusa ebyokulya kandi emitima yanyu naagiijuza okusemererwa.” 18Paulo na Baranaba noobu baabaliize ebi byona, kake konka balemwe kutanga abantu kubatambira ekyonzira.
Paulo naateerwa amabaale Lisitura
19Nubwo haizire Abayudaaya abaarugire Antyokiya na Ikoniyo. Baatandika kusoonasoona abantu. Ekyarugiremu, Paulo bakamuteera amabaale, baamukurra, baamuturukya omu rubuga, nibagira ngu, afiire. 20Baitu abaikiriza obu baamuhikireho, yaimuka, yagaruka omu rubuga. Ha kiro egyakurasireho, uwe na Baranaba baagenda Derube. 21Obu baamazire kurangirra Amakuru Amarungi omu rubuga oru, baatungamu abeegesebwa baingi, baagaruka Antyokiya nibaraba Lisitura na Ikoniyo, 22nibagumya emitima y'abaikiriza nibabateererra kweyongera omu kwikiriza, kandi nibabagambira itwena nkooku tuli b'okuhikwaho obulemeezi bwingi tutakataahire omu bukama bwa Ruhanga. 23Obu baamazire kukomera buli kitebe ky'abaikiriza abakuru b'okubarolerra, nibasaba kandi nibasiiba, boona baabakwasa MUKAMA ou baikiriize.
Paulo na Baranaba nibagaruka Antyokiya orwa Siriya
24Nubwo Paulo na Baranaba baayongiire orugendo nibaraba Pisidiya, baahika Panfiliya. 25Obu baamazire kurangirra ekigambo kya Ruhanga omu Perige, baayongera baagenda Ataliya. 26Obu baarugire oku, baagwerra omu meeri, baahika Antyokiya nambere baabandiize kuheebwa obukonyezi bwa Ruhanga habw'omulimo ogu bahikiriize. 27Obu baahikire Antyokiya, baasorooza ekitebe ky'abaikiriza, baabasoborra byona Ruhanga ebi yabakoleze, kandi nkooku yakinguliireho Abanyamahanga omuhanda gw'okwikiriza. 28Bbo baikara n'abeegesebwa baayo okumara ebiro bingi.
Trenutno odabrano:
Ebik 14: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.