2 Abakor 3
3
Abaheereza b'Endagaano Empyaka
1Hati twagaruka kwehaisa itwenka? Nitwetaaga ebbaruha ez'okuturanga hali inywe, rundi inywe kutuha ez'okuturanga ahandi, nkooku abandi barukuzeetaaga? 2Inywe inywenka niinywe bbaruha yaitu ey'okuturanga, ehandiikirwe omu mitima yanyu, erukumanywa kandi erukusomwa abantu boona. 3#Kurug 24:12; Yer 31:33; Ezek 11:19; 36:26.Kandi inywe muli bbaruha ya Kristo ei twakwasiibwe, ebbaruha eterahandiikirwe na bwino, baitu eyahandiikirwe Mwoyo wa Ruhanga omwomeezi; hatali ha bibbali by'amabaale, baitu ha mitima y'abantu.
4Obu nubwo obwesige obu twina hali Ruhanga omuli Kristo. 5Itwe titurukwemarra. Titurukusobora kugamba ngu, ekintu kyona nikiruga hali itwe; baitu okwemara kwaitu kuruga hali Ruhanga, 6#Yer 31:31.ayatusoboize kuba baheereza b'Endagaano Empyaka, etarahandiikirwe omu nyuguta, baitu eyahandiikirwe omu myoyo yaitu; habwokuba enyuguta ita, baitu Omwoyo gwomeeza.
7 #
Kurug 34:29. Endagaano eya ira eyasarwirwe ha mabaale, obu eraaba yaizire n'ekitiinisa kingi, ekyatangire Abaisirairi kurora amaiso ga Musa habw'okumulikana kwago, kandi kunu ekaba neija kuhwaho, 8endagaano empyaka enyakuleetwa Mwoyo teriija n'ekitiinisa ekirukukiraho? 9Nahabweki endagaano eyasingisize omusango obu eraaba yaizire n'ekitiinisa, endagaano erukwihaho omusango esemeriire kugikirra kimu ekitiinisa. 10Mazimakwo endagaano eyaizire ira n'ekitiinisa hati tekyainakyo, habwokuba kikamarwaho ekitiinisa ekindi ekirukukikiraho. 11Endagaano enyakuhwaho obu eraaba yatungire ekitiinisa kyayo, egi etarukuhwaho esemeriire kutunga ekirukukiraho obwingi.
12Itwe abaina okunihira nk'oku, nikyo twegeseza n'obumanzi. 13#Kurug 34:33.Tituli nka Musa ayayeswekeriire ha maiso, nukwo Abaisirairi baleke kurora ekitiinisa kye nkooku kyagendaga nikikeeha. 14Mara emitima yabu ekagumangana; n'okuhika hati obu basoma Endagaano ya ira, ekisweko nk'eki kiroho kandi tikibaruga ha maiso, habwokuba omu Kristo wenka nuho kiihirwaho. 15Nangwa n'okuhika hati ebya Musa obu bisomwa, ekisweko eki kiikara kiswekere emitima yabu; 16#Kurug 34:34.baitu omuntu obu ahindukira MUKAMA, ekisweko eki kiihwaho. 17Hati MUKAMA ogu nuwe Mwoyo, kandi nambere hali Mwoyo wa Ruhanga, nuho haba obusinge. 18Na itwe itwena obu turaaba niturora ekitiinisa kya MUKAMA n'amaiso agataswekerwe, tuhindurwa kusisana nawe, nituruga omu ktiiinisa ekimu, nitutaaha omu kindi ekirukukiraho; kandi eki kikorwa MUKAMA anyakuli Mwoyo.
Trenutno odabrano:
2 Abakor 3: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.