Akisy. 2
2
1Kirikakin akisub kidiama, akwap ka ŋinibore daadaŋ ŋini eyai neni kec. 2Ani akoloŋit ŋina a ŋakanikaarei, kirikakinite Akuj akisub ŋiboro daadaŋ ŋulu sek asubi, ido abu kieŋu akoloŋit ŋin alotic keŋ a daadaŋ a ŋolo a akisub. 3Kiterereŋ Akuj akoloŋit ŋina a ŋakanikaarei kitesegu, anerae akoloŋit ŋin, abu iŋes kieŋu alotic keŋ a daadaŋ a ŋolo a akisub.
4Erae ŋol epite ŋolo asubia Akuj kidiama ta akwap.
Emanikor ŋolo ka Eden
(Akisy. 1:26-30)
Akoloŋit ŋina asubia Ekapolon Akuj akwap ka kidiama, 5ariŋa ŋikito ka ŋinya ŋulu ka ariet nyepena nakwap ka ariŋa nyerupuna ibore daadaŋ alokwap, anerae ariŋa Ekapolon Akuj nyisilima akiru ka amam ituŋanan ŋini etae akwap. 6Nai aitununuyete ŋakipi alokwap tolelekis akwap daadaŋ. 7Toyeu nai Ekapolon Akuj ituŋanan a ŋalup, tokutak ekieŋanu ŋolo erae akiyar lokumes a ituŋanan; toruwor ituŋanan ŋin ŋini eyari.
8Kiwuak Ekapolon Akuj emanikor lowae ŋolo alo Kide, neni anyaritae Eden, kiwuak ituŋanan ŋini asubuni iŋes nen. 9Analup a ŋuna a emanikor a ŋol, abu Ekapolon Akuj kiturup ŋikito daadaŋ ŋulu ebusak ka ajokak aŋuna ka akimuj. Ayakasi daŋ kidiŋ emanikor ŋol ŋikito ŋiarei, epei ŋolo ka akiyar ka epei ŋolo ka ayenut ajokis ka aronis. 10Ayai aŋolol ŋina ageunit alomanikor a Eden, ŋina alelenakini emanikor ŋol, ekicarit aŋolol ŋin a nen ŋaomwon. 11Arae ekiro a ŋina esyaunan Pison, ŋin iŋes ŋina irimokinit akwap ŋina ka Apila daadaŋ ŋina eyai egolid 12ka ejok egolid a akwap a ŋin ka eyai nakwap ŋin eminae ŋolo akukunyon ka ŋamoru ŋuna areŋak puu ŋuna enyaritae Onikis. 13Arae ekiro ka aŋolol a ŋina a ŋaarei Gion, ŋin iŋes ŋina irimokinit akwap ŋina a Kuc. 14Arae ekiro ka aŋolol a ŋina a ŋauni Tigris, ŋin iŋes ŋina elele lowae ŋolo alo Kide anakwap a ŋina ka Asiriya. Aŋolol ŋina a ŋaomwon iŋes Eupurate.
15Ya Ekapolon Akuj ituŋanan, kiwuak lomanikor ka Eden, akitiya nen ka akidar emanikor ŋol. 16Kicik Ekapolon Akuj ituŋanan tema, “Ipedori iyoŋ akinyam ŋaraito a ŋolokitoe daadaŋ eyai lomanikor; 17nai ŋuna a Ekitoe a ŋolo ka ayenut ajokis ka aronis, nyitemokino iyoŋ akinyam, anerae akoloŋit ŋina inyamia iyoŋ ikes, itwani iyoŋ kire jik.”
18Tema Ekapolon Akuj, “Nyejok ekile erae iŋes bon eyai. Etiyauni ayoŋ ikeŋarakinan ŋini ejok aneni keŋ.” 19Tosodi Ekapolon Akuj kitatakanu analup ŋityaŋ ŋulu ka ariet daadaŋ ka ŋikyeny daadaŋ, yau ikes neni a ekile ecamit aanyun epite ŋolo enyaraa ekile ikes. Ekiro daadaŋ ŋolo abunio ekile tonyaraa ŋinisubuna daadaŋ, ekiro keŋ ŋolopei. 20Tolimonok ekile ŋibaren, ŋikyeny ka ŋityaŋ daadaŋ ŋulu ka ariet ŋirorwa. Nai mam alosubuna a ŋul ŋini abu Akuj toryamu itemokino erae ikeŋarakinan ekile. 21Kitojotoo Ekapolon Akuj ekile nooi, tosodi tolemu amaran keŋ apei, kimuleleya nen a akiriŋ. 22Kitiyau Ekapolon Akuj aberu anamaran a ŋina alemuni alokile, ido yau aberu ŋin neni a ekile. 23Tema ekile,
“Erae tokona na akoit ŋina anakoyo kaŋ,
akuwan ŋina anakuwan kaŋ.
Enyarao iŋes aberu,
anerae neni ke ekile elemunitere iŋes.”
24Aŋakiro aŋun, eesikini ekile papa keŋ ka toto keŋ, tosodi kimorikinos ka aberu keŋ; toruworos ikes apeikuwan. 25Apaki ŋin alerete, ekile ka aberu keŋ, pa erumito ikes ŋileec.
Trenutno odabrano:
Akisy. 2: NIB2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Ngakarimojong Interconfessional Bible © Bible Society of Uganda, 2008.