Akisy. 12
12
Tonyarae Aburam
(Ŋitic. 7:2-5)
1Abu Ekapolon tolimok Aburam tema, “Toesik akwap kon ka ŋituŋa kon ta ŋulu ke ekal a papa kon; tolot nakwap ŋina eketoodikini ayoŋ iyoŋ. 2Eketipituni ayoŋ iyoŋ anakwap ka eketerereŋi, ido eturuwo ekiro kon ŋolo eyenen anakwap, ikotere iyoŋ iruwor ŋolo ka arereŋu. 3Eterereŋi ayoŋ ŋulu ikiterereŋete iyoŋ, tosodi eceni ŋulu ikicenete iyoŋ. Aŋuna kon, eterereŋi ayoŋ ŋituŋa ŋulu ka akwap daadaŋ.”
4Torotok nai Aburam lopite ŋolo alimokinitor Ekapolon iŋes; torukosi iŋes ka Lot. Arae ŋikaru ka Aburam ŋatomonikanikaarei ka ŋikan apaki ŋina awuotokinia iŋes alo Aran. 5Towotokis Aburam ka aberu keŋ Sarai ka Lot lokoku alokaato keŋ, towuotokiniata ibore daadaŋ ŋini aris ikes keryamut eya Aran; kaapei ka ŋituŋa daŋ. Towotokis ikes alo Aran tolomiyasi nakwap ŋina a Kanaan. Ani edolete ikes Kanaan, 6torubak Aburam elosi ŋaren, akitodol ŋina anaŋia nakibois ŋina anyaritae Sekem, neni ayai ekuyon ŋolo apolon ŋolo ayai neni anyaritae More. Apaki ŋin, arae Ŋikanaani ayakasi nakwap ŋin. 7Totakanu Ekapolon neni ka Aburam kirworik tema, “Ainakini ayoŋ akwap na neni a eletonit kon.” Aŋun, todukok Aburam Namuroet nen aŋuna ka atamunitor Ekapolon ŋolo abu totakanu neni keŋ. 8Towotok Aburam a nen lomukura ŋulu alowae a ŋolo alo Kide Besel, tolom nen, kigurok eema. Ayai Besel lowae ŋolo ka anam, To neni alomit Aburam, toyai Ai Kide keŋ. Todukok Aburam Namuroet nen aŋuna ka akilipya neni ke Ekapolon; ido abu kilip enyarit ekiro ke Ekapolon. 9Torubak Aburam ewosi jik a ŋarwa Negeb #12:9 Negeb Iŋes lowae ŋolo alo Kwap
Towoto Aburam ka Sarai
10Toyakaun eron nakwap a Kanaan, kitowuoto ŋun Aburam totiyaar tolomiya Ijipit akiboi a nen erae egelaanot, anerae arono eron nooi alo Kanaan. 11Ani eapikini iŋes alomar Ijipit, tolimok Aburam aberu keŋ Sarai tema, “Ayeni ayoŋ kire jik atemar irae iyoŋ aberu ŋina ebusan; 12ido ani ŋina ikiŋolikiniata Ŋijipitian iyoŋ, etemarete, ‘Erae na aberu keŋ’; ido akaarete ikes ayoŋ, ikimyekis iyoŋ toyar. 13Tolimok kare ikes ebe irae iyoŋ nakaato kaŋ, ikotere nyitiyata ikes adio aronis neni kaŋ, nyakaar ayoŋ aŋuna kon, itoiut iwon ŋuna ilimuni iyoŋ.” 14Ani elomari Aburam Ijipit, kiŋolikis Ŋijipitian aberu keŋ ibus nooi. 15Ani iŋolikinete ŋikapolok ŋulu epukato ka Parao aberu ŋin, kipuro iŋes alokiŋaren a Parao; ido aponi yae aberu ŋin kai a Parao. 16Aŋuna ka aberu a ŋin, abu Parao kitiya ŋuna ajokak neni ka Aburam; inak Parao Aburam ŋamesekin, ŋimoŋin, ŋisigirya, ŋipi ka ŋapi, ŋasigirya ka ŋikaala.
17Nai kisican Ekapolon Parao ka ekal keŋ a ŋidekesyo aŋuna a Sarai aberu ka Aburam. 18Tonyarau Parao Aburam kiŋit tema, “Anukiro nu ŋuna itiya iyoŋ neni kaŋ? Nyo pa ikilimokinia iyoŋ ayoŋ atemar erae iŋes aberu kon? 19Kaanukiro itemarya iyoŋ ebe, ‘Erae iŋes nakaato kon?’, ido ŋun abunio ayoŋ eturuworya iŋes aberu kaŋ. Nai tokona akoniberu na, ya iŋes toloto.” 20Tonyarau Parao ŋiketiyak keŋ neni keŋ tolimok ikes akitowotokin Aburam; kitowuotokis ikes Aburam ka aberu keŋ, ya Aburam ibore daadaŋ ŋini ayakar iŋes.
Trenutno odabrano:
Akisy. 12: NIB2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Ngakarimojong Interconfessional Bible © Bible Society of Uganda, 2008.