Matayo 13
13
1Kitu nadise Yesu afodre jolese, dre lirizo yitapara laga. 2Dia lezolepi we dii dreki rukebezo adi vuna, kadre nitini adi si kaluṅbana, dre lirizo; dia lezolepi dii dreki adrezo o̱ei ta’ana. 3Adi dre tai poya taza aiidre tandu alale dise, dre tazo, ki di, Mi no ka, dia kori rilepi di afo kori ri; 4kadre nitini adi dre kori rira’a arukana de lati laga, aria dreki alizo te na: 5arukana dre dezo voe kiraro dii mi, kini voe anda mi we ko: nga dre mbazo mbelembele, kini dre adrele we ko dise: 6kitu ko ka di nga dre lañazo, dre ’yozo, dre adrele andu ako dise. 7Arukana dre dezo kucina, kuci dre mbazo ru na, nga dre azo ko; 8Arukuna dre dezo vo tani di mi, dre mbazo ale, arukana ñadinji, arukana ñabana, arukana ñadinji‐dri‐mudri. 9Dia adrelepi bibale be ta yi di, ko yi wa.
10Dia tayilepi dii dre alizo, dre tazo adidre, ki di, Mi ta ta aiidre tandu alale dii se adose ya? 11Adi dre ta akozo tale, dre tazo aiidre, A fe mataya bu adea ni tai zule dii amidre: a fe taii nii aiidre ko. 12Dia dre adrele nga be dise, a kofe akodidre, adi kadre nga be ambani: dia adrelepi nga ako di, a kodo nga akodi drekase, ngani tandi akodi dre adrezo aba di. 13Tandu nidise ma dre tale aiidre ta alale diise; aii dre adrele nga no dise, dre atogiazo ko, aii dre adrele tai yi dise, dre yizoa ko, dre nizoa ko. 14A o nabi tai Yesaya adea akele aiidre; ta nidi ta, ki di,
Tai yile dise mì ko yi, dreki nizo tejia ko;
Tai nora’a, mì ko no, dreki atogiazo tejia ko:
15Dia niiki togo adre lingale lingalinga,
Aiiki bibale kuduru,
Aii dreki aiiki mi tabozo;
Dra aii konoro aiiki mise di,
Dreki yizo aiiki bibalese,
Dreki nizo geagea aiiki togose,
Dreki alazo todia,
Ma kotedriro aii ni e.
16Amiki mi titi ariro, aii dreki nole dise; amiki bibale titi ariro, aii dreki yile dise. 17Ma dre tale amidre pati dise, nabi poya dii, mundia ta olepi piri poya dii ledre, ngae mì adreki nole dii nole, aii dreki nozo ko; aii dreki tai mì adreki yile dii lezo yile, aii dreki yizo ko. 18Tai nidise mì koyi tandu alale di dia kori rilepi di ni tandu. 19Dia angodi ya koyi ta mataya adea di, dre tai ni yizo geagea ko, dra teri konji anda are lile dre tai i dre rile akodia togona dre, lawazo. Dia rile lati laga di, dia nidi e. 20Dia rile vo kiraro dii mi di, akodi e tai ni yilepi di, drañano tai ni dolepi arise di; 21adi anduna da yokodo, adini togo tro ca; dra tiza kaca tai nidise di, ta diaki mi fozo fofo di be, drañano adi o dele. 22Dia rile kucina di, akodi e, tai ni yilepi di; ta vo adea olepi diaki togona kuku di e, ta nga dre dia litizo di be, adreki ta nidi fu, dre’azo ko. 23Dia rile vo tani mi di, akodi tai ni yilepi di, dre tai ni yizo geagea: akodi dre ’azo ’a’a, dre ’azo, aruka dre lezozo ñadinji, aruka ñabana, aruka ñadingi‐dri‐mudri.
24Tandu alale azina di, adi ba aii kandra, dre tazo, ki di, Mataya bu adea adre ago kori tani rilepi ai amvuna di tini: 25Mundia dre aiyira’a, akodi kariba dre alizo, dre tirile rizo mondu ketona, dre njizo. 26Aluna kafo di, dre ’azo, dra tirile afoki indi. 27Adremakandra joliyi adea dre alizo, dreki tazo adidre, ki di, Bwana, mi ri kori tani di ami amvuna ko ya? tandu nidise tirile afo angolese ya? 28Adi dre tazo aiidre, ki di, Dia karibaro di o tai nidi dre. Adremakandra dreki tazo adidre, ki di, Tandu nidise, mi le ma liki, dreki tirile akuzo ya? 29Adi dre tazo, ki di, Koko; ngale mì dre tirile akura’a, mì aku mondu tirile be di. 30Mi koka’i kombaro tumani lokia laña dre kazo di kaca tolo: lokia laña dre kazo dise, ma kota dia laña lolepi dii dre, ki di, Dridri mi kaku tirile, dre lambezo tumani zazo: mi dreki mondu dozo bale ama kerona.
31Tandu alale azina di, adi ba aii kandra, dre tazo, ki di, Mataya bu adea adre mutadi‐kisia tini, ago do, dre rizoa ai amvuna: 32nga‐kisia nidi komba di, adre amba laña o̱ei di ruse, dre gozo adrele faro, kadre nitini aria bu adea aliki dre lirizo fekola dri.
33Tandu alale azina di, adi ta aiidre, ki di, Mataya bu adea taku tini toko dre dole di, dre zuzo lofura i dre tibile vese na di lena, lofura go adrele o̱ei takuro.
34Tai nii dii, Yesu ta ndu alale dise dia lezolepi dii dre, adi ta ta dia dre tandu alale dise alokodia: 35a ko’oro nabini tai akele tara’a, ki di,
Ma konji ama sibale tandu alale dise;
Ma kota tandu zule vese i dre vo bale dise dii.
36Dra adi ta’i dia lezolepi dii dre, dre sizo jona: dia ai tayilepi dii dreki alizo adi vuna, dre tazo, ki di, Mi kotada tandu tirile adea alale amvuna di amadre. 37Adi dre ta akozo, dre tazo, ki di, Akodi kori tani rilepi di Adamuni Mva e; 38Amvu vo o̱ei di a di; kori tani mva mataya adea e, tirile mva teri konji adea e; 39Dia karibaro aiiki rilepi di teri konji murungu di e: lokia laña dre kazo di vese nga akezo di dre acazo di e; mundia laña lolepi dii malaika e. 40Tandu nidise, ngoro a aku tirile, dre zazo acise di tini; a ko’o tai vese nga dre akezo di dre acazo di tini. 41Adamuni Mva komu ai malaika, aii dreki ngae o̱ei dia olepi dele dii, mundia takonji olepi dii be, kuzo ai mataya ase: 42dreki aii bezo aci murungu di na: tai ngozo a’ose di e, tai si cizo di be kadre nale. 43Vese nadise dia ta olepi piri dii koka kitu tini mataya aiiki Ata adea na. Dia adrelepi bibale be ta yi di, ko yi wa.
44Mataya bu adea nga lagi murungu zule amvuna di tini; ago dre kusule di dre zuzoa adini arise, adi lidre, nga o̱ei i dreka adi gizo, dre amvu anda gizo.
45Kadre nitini mataya bu adea ago nga gilepi di tini, lulu avelepi dii ndara’a: 46lulu alo di lagi kaka di kusura’a, adi lidre dre nga o̱ei i dreka dii gizo, dre gizoa.
47Kadre nitini mataya bu adea kimba i dre bele yi murunguna di tini, dre kosia toa dii ruzo o̱ei: 48kosia kode kimba a bi di, a se yitapara ase; aii dreki lirizo, dreki kosia tani dii bazo kopona, aii dreki kosia konji dii bezo. 49Kadre nitini a ko’o vese nga akezo di dre acazo dise: malaika kafo, dre ta‐konji olepi dii kuzo dia ta ole pi piri dii ase, 50Dreki aii bezo aci murungu di na: tai ngozo a’ose di e, tai si cizo di be kadre nale.
51Mì yi taii nii o̱ei geagea dre ya? aii taki adidre, ki di. Ai’i. 52Adi dre tazo aiidre, ki di, Tandu nidise, dia ta‐tisilepi dii o̱ei i dre alale dia ta mataya bu adea yilepi di joliyi, ngae todi dii, ngae aku dii be dolepi di ai nga ase di tini.
53Kadre nitini Yesu ko’o tandu alale nii dii akele di, i njida nalese. 54Ai tandini la’una sira’a, i tada ta aiidre aiiki sinagogona dre, kadre nitini di aiiki lindri gaga, dre tazo, ki di, Ago nidi ni togi nidi, a̱zi murungu nii be angolese ya? 55Akodi mva fa‐galepi di adea ko ya? A zi andrena Maria ko ya? adrupiina Yakobo e, Yose e, Simona e, Yuda be ko ya? 56Amvupiina, aii o̱ei adreki ama be ko ya? Ago nidi ni tai nii dii o̱ei angolese ya? 57Aiiki togo dre asuazo adiru, Yesu dre tazo aiidre, ki di, Nabi kañi bale la’u azidi lena di be; a ba akodia kañi akodia tandini la’una di ko, akodia tandini adrupiia kofula a di ko, akodia tani bana ko. 58Adi dre a̱zi kokoroko poya dii ozo nale ko, aiiki ta ka’ile ko dise.
Trenutno odabrano:
Matayo 13: LOG
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
first printed by the British and Foreign Bible Society in 1924 and 1927.
