Matayo 10
10
1Adi dre dia ai tayilepi mudri‐dri‐iri dii zizo i vuna, dre aiiki mi bazo lanjilanji teri konji dii drozo dia ase, dra konji dii be o̱ei, dra toa dii o̱ei be tedrizo.
2Dia mule mudri‐dri‐iri diiki ru: Dia dridri di, Simona e, a zi Petero e, Andarea adrupia be; Yakobo mva‐ago Zebedayo adea, Yoane adrupia be; 3Filipo e, Batolomayo; Toma e, Matayo, ateloni e; Yakobo mva Alafayo adea e, Tadayo; 4Simona, dia Kananalese di e, Yudase Keriota be, akodi felepi di. 5Dia mudridri‐iri niie Yesu mudre, dre ta lanjizo aiidre, dre tazo, ki di,
Mi koli latii dia‐šuru adea ase ko, dre sizo ba murungu Samariya lena tejia ko: 6amba, ta nidi, mì koli kabiliki avilepi dii Yisarele diikia vuna. 7Mì dre lira’a, mì kongi tandu, dre taza, ki di, Mataya bu adea o tai alizo. 8Mì kotedri dia drafulepi dii, mì kotinga dia dralepi dii dra ase, mì kolede karidia, mì kodro teri konji dii: a fe amidre tako, mi kofe tako. 9Mì kodo da’abu e, fada e, kati be amiki popoko lena ko; 10Mì kodo komvo amiki latise ko, koti iri dii ko, kamuka ko, kutufa ko: dia a̱zi olepi dia ta tani dre kicoale ai nga ñale dise. 11Ba murungu na, ba na angodi ya mi kosi, mi konda dia angodi ya adrelepi tani di bana; mi dre aiyizo nale mi dre adrera’a ba nidi lena di. 12Mì dre sira’a, mi kota dia adrelepi jona diidre, Mi be ya? 13Jo adre tani di, mi ko’o amiki ta kedrikedri ali jodre: jo adre tani ko di, mi ko’o amiki tai kedrikedri ago ami vuna. 14Dia angodi ya kadre ami drile ko, amiki tai yi ko, mi dre afora’a jo nadi lese, mi kotowa kini ami pa ase. 15Ma ta amidre pati, ba murungu nadi do tai asualepi asuasua di amba tai asualepi asuasua di Sodoma adea, Gomora be di ruse, kitu tavo tazo dise.
16Mi no ka, ma mu ami ngoro kabiliki tini mangiliki ketona: tai nidise, mi kadre togi be ngoro ni tini, mi ko’o konji diaru ko ngoro kobola tini. 17Mì koga amiki mi mundiase: aii dre ami fele dia rukebelepi vura ta dii dre dise, aii dre ami coazo kinise aiiki sinagogona di: 18aizako, aii kodo ami miri e, mokonzi kandra ama ruse tandu tadazo aiidre di, dia‐šuru dre di, 19Aii ko fe ami di, amiki togo ko’o ta kuku amikia ta tara’a ado tini ya ko, amiki ta tara’a ko: i dre fele amidre saa nadise dise ado tai ya mi kota. 20Mì dre adrele dia talepi di ko dise, Teri amiki Ata adea e, akodi ta ta ami lena. 21Adrupi kofe adrupi drale, ata dre mvana fezo drale: anjia konga aiiki tilepi diiru, dreki aiiki ozo drale. 22Dia o̱ei dii koze ami zeze ama ruse: dia togo trotro di ta nii dre akezo di, a kotedri akodi. 23Aii kofo amiki mi ba murungu nidina di, mì kolapa ba murungu azi di na ndo: ma dre tale amidre pati dise, ki di, Mi koli ba murungu Yisarele diikia ase ko, Adamuni Mva kaca ka.
24Dia tayilepi di lavu ai ta‐tadalepi di ko, adremakandra lavu ai miri ko. 25Kicoa dia tayilepi di se, i adre ngoro ai ta‐tadalepi di tini, tai nidi kicoa adremakandrase, i adre ngoro ai miri tini. Aii zi dre joliyi Balazebuba di, amba ta nidi, aii kozi dia akodi jona. 26Tandu nidise mì koro aii ko: i dre tai o̱ei adrelepi tako dii tadale dise; ta o̱ei zule dii a ko ni. 27Ado tai ya ma dre tale amidre tinimvana dii, mi kota ngadrana: ado tai ya mi dre yile bibalese dii, mi kongi tandu jodri adea. 28Mì koro dia ruba fulepi drale dii ko, akodi kicoa diaki lindri fu drale ko: amba tai nidi, mì koro dia anda diaki lindri tizalepi, diaki ruba be, iriti Geyena na di. 29A gi kilibu iri pinda iri dise ko ya? kilibu alo di kode vudri tejia ko amiki Ata akoko. 30A la amiki dribi o̱ei dre kania. 31Tai nidise mì koro nga ko; amiki lagi lavu lagi kilibu poya dii adea. 32Dia angodi ya ama tadalepi sibalese dia kandra di, ma kotada akodi ama sibalese ama Ata buna di kandra. 33Dia angodi ya ama losolepi dia kandra di, ma koloso akodi ama Ata buna di kandra.
34Mi kotusu ko ma ali ta kedrikedri bazo vudri: ma ali tai kedrikedri bazo ko, senge bazo. 35Ma dre alile ago ku atana ruse dise, mvatoko ku andrena ruse, adra ku adra ruse: 36diani kariba kadre ai kiarero. 37Akodi ata andre be, aiiki lelepi amba ma ruse di, akodi ta tani kicoa mase ko; akodi mva‐ago mvatoko aiiki lelepi amba ma ruse di, akodi ta tani kicoa mase ko. 38Akodi ai fa atipatipa tingalepi ko di, lilepi ma vuse ko di, akodi ta tani kicoa mase ko. 39Dia angodi ya kokusu ai lindri, akodi lindri kaviro; dia angodi ya ko’o ai lindri avile di, akodi kokusu ai lindri.
40Akodi ami drilepi di, ko dri ma, akodi ma drilepi di, kodri ama mulepi di. 41Akodi nabi drilepi di, runa nabi adea kodri nga nabi adea; akodi ago ta olepi piri di drilepi di runa ago ta olepi piri di adea, kodri nga ago ta olepi piri di adea. 42Dia angodi ya kofe mvamva alo di dre yi kidri mvule kega a, dia tayilepi di ni ruse, ma ta amidre pati akodi kodo ai nga vele.
Trenutno odabrano:
Matayo 10: LOG
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
first printed by the British and Foreign Bible Society in 1924 and 1927.
