Mataio 5
5
1Ina oubi piipiiha nouro naibaha iauriwa, akabuito nou naibaha ioro, naibaha emi; wia nou kitomudio mere nouido naibaha o’umo. 2Wia nou maata nou naibaha abooa ina neido nouro iatomuai. Nou naiba iaowa:
3Oubi nei imini iparomo biahai neivia geiigeiihari, mabu nouri Toboro‐bububati nou neimu airia.
4Koadodidio oubi neivia geiigeiihari, mabu nouri koroiio neiio aiwaimo‐oweai.
5Muni oubi neivia geiigeiihari, mabu nouri batibati auwoha neiio aiwaimo‐irahooi.
6Nouri oubi nei meamea kidia auwo niro rimahebidiodumo, obora doura aibo, neivia geiigeiihari, mabu nouri nei aiwai‐apeuti.
7Niainiai oubi neivia geiigeiihari, mabu nouri niainiai neiio aiwaimo‐iviai.
8Nouri oubi nei imini tiaha soviori neivia geiigeiihari, mabu nouri Iehova neiio aiwaimo‐eauri.
9Heauwo kimadoho oubi neivia geiigeiihari, mabu nouri nei paina Iehova Mereri aiwaimo‐iduti.
10Nouri oubi, ina ata oubio nei gooa iwaimowa, nouri nei kidia meahari, nei geiigeiihari, mabu nouri Toboro‐bububati neimu airia. 11Nou ta’uwa oubio rio imadauriaimowa wia rio gooa iwaimowa wia ubauba nana auwoha rioido naibaha iworohomowa, nouri rio mo mereri, 12riovia paipaiha tarohoumo wia auwo geiiha taimahebidioumo, mabu nouri rio wiha toborowa nou auwo auwori, ina nou aibo peroveta oubi, rio opuito nou o’umo, neiio nei gooa naibaha iwaumo.
13Riovia damobo aibori batibati auwoha. Ina ata, damobo nou topo tatori taiba waiia’i topo owai? Nouvia mea tatori, na’u wegewa aivemoi wia oubio konoito iatuutimoi. 14Riovia pidari batibati auwoha. Na’u oopo, akabu bariwa oawa, nou opiraa raihe. 15Ina oubi, nou ta’uwa lamepa neiio naibaha adiaumo, kepuri gorowa neiio edeiamo biahai. Dodoo ohuo neiio naibaha edeiaumo wia nou pida oubi auwoha imeivia, nouri motowa kemidio oubii. 16Ina nouri rio himia pida oubi auwoha mimeiviamo, nouri rio meamea kidia’i nei naibaha iaurimoi wia rio Abea, toborowa airemidio, nei nouido naibaha emabitimoi.
17Rio naibaha araromomo aue, mo nou no’uro bubui wia peroveta wade’i gooa iwai; moro nei gooa iwai ko’u biahai, na’u idodiai meaha no’uro. 18Nouri mo rioido naiheha niao; Toboro nana’i wia hopu nana’i auwoha ina nei oropoiioumo biahai, na’u keke keke wade wia na’u tiaha komo wade, bubudo o’u raihe hiwio’i nouowa nana auwoha meaha idodiaimoi. 19Ina dubu nouri na’u keke keke bubui nouowa iawahiai wia oubido naibaha aiwai‐matomudioi. Dubu nouri Toboro‐bububatiwa nou paina aiwaimo‐idodoi kekebuori. 20Nouri moro rioido ainaro, Ina rio meamea kidia’i auwo oitimo tatowa, Parisea oubira, titi oubira nei aibo biahai, rioo toboro‐bububatito idoutimo raihe.
21Rio tau orowaumo nouri modobo tauo oubido nou iaotutiumo, oubi iwoto aue, ina dubu nou dubu ata epiawa, kiwotoi kimeiwotai wade nouido, nou tore aiwamaati; 22wia rio’ido mainaro; Ina dubu nou dubu ataido hobo aibo heauwo aiwaiti, nourovia kiwotoi kemeiwotai wade tore aiwamaati, wia dubu nou dubu ata paina gooa owaiwa, nourovia wade kidodiai oubi tore aiwaimaati; wia dubu nou dubu ataido ubauba wade naibaha aiwai‐iaoi, nourovia kupo, uba urio batiwa, tore aiwamaati. 23Mabu nouri nou ta’uwa ro kimio na, Tana‐batiwa ro remaaidai, ina bati nouowa ro naibaha araromo dubu ata nou roido gunuuni remahebidio; 24ro kimio na, Tana‐bati hohowa tameheai; opuito ro dubumu meaha taititoi ina do’o taraiwairo wia ro kimio na tamaai. 25Nouri dubu nou ro paina gooa romowaidio, noumu taititoi hagohagoha, nou tauwa ro noumu navewa emidiotoiwa; noupa ro noumu oititoi aue, dubu nouri kiwotoi dubuido nouro ro aiwamaai, wia kiwotoi dubu nouro ro durii moto keauri dubuido naibaha aiwamaai wia durii motowa nouro ro aiwaive. 26Naiheha mo roido ainaro, roro noudo ohuo raihe taiba tutu keke moni auwoha ro naibaha emaatiwa.
27Ro tau orowaumo taiba tauo tauo oubii naibaha aroumo, Siwokori oworoho aue. 28Ata rioido mainaro, Dubu nouri o’bo ata nou iwo idomaito naibaha eauri, nouvia siwokori kidia o’boanu noumu tau ododiai nou himia iminiwa. 29Ina ro himia tuiha idomai ro nouro gooa owaiwa, nou tahiodidio wia ro mabudo taivei; mabu nouri roido nou meahari ina na’u goho na oropoiioi, nou mea biahai ro goho auwoha uba urio batito aivei. 30Ina ro tuiha tui ro nouro gooa owaiwa, nou tarahiai wia ro mabudo taivei; mabu nouri roido nou meahari ina ro goho na na’u nou aiwaropoiioi, nou mea biahai ro goho auwoha, uba urio batito aivei. 31Rioo tau orovidioumo nouri wade nou nou aro, Duburo nou o’boa ahoioutiwa, nouro nouido kaho’iouti pepa kemaatiha wamaati. 32Wia mo rioido naibaha niao, nouri dubu nou himia o’boa kaho’ioutiri, ina o’bo nou siwokori biahai, nou himia o’boa siwokori o’bo aibo nouro naibaha ododiai, wia dubu nouri kaho’iouti o’bo noumu naibaha idabuai, nouvia siwokori duburi.
33Ina rioo tau orovidioumo nouri wade tauo oubido nou iaotutiumo; Ro koromohuwo kowateai wade ia’o aue, wia auwoha wade roro pupuito owateai, nouri wade Iehovaido rovia kidodiaiha idodiai. 34Ata rioido mainaro, heauwo owateai wade aroumo aue. Ro heauwo wade owateai aue toboroito, mabu nouri nou Iehova kemidio batiri. 35Ro heauwo wade owateai aue hopudo, mabu nouri nouvia Iehova himia kono kiwotoi batiri; wia ro heauwo wade owateai aue Ierusalemaito mabu nouri nou Auwo Pai‐dubu nou himia oopori. 36Ro wade owateai aue ro himia opu painawa, mabu nouri na’u ho’obo bohoboho wia na’u ho’obo wibuwibu, taiba wadodiai ro umo biahai. 37Ina ata nou meahari, ro wade nou naibaha taiia’o, Io Io, O’o O’o; ina nouri amida wade nei godogodori nei uba urioudo ko’uri.
38Wia rioo tau orovidioumo nouri wade nou nou aro, Dubu nou ro idomai gooa owaiwa, roro nou wiha idomai gooa tawai; wia dubu nou ro iawa gooa owaiwa, roro nou wiha iawa gooa tawai. 39Ina mo rioido ainaro; ubauba dubu roro emadoho aue heauwo ramu; wia nouri dubu ro tuiha o’omuwa naibaha atotai, roro nouido hapuo ata naibaha wawaorai. 40Ina dubu ataro ro kiwotoi dubuido nouro owou niroi, ro uduuduo piroito owamemoi niroi; ro koko tama uduuduo’i nouido naibaha tameheai. 41Ina dubu roido na’u tutu naveito aiwawaboiai, rovia noumu neewatoi tutu navewa naibaha tarohotoi. 42Dubu nou roido nana iatodoiwa nouido tamaai wia ro hoho owaorai aue kowahoro dubu’i nou aueudo.
43Rioo tau orovidioumo nouri wade nou nou aro, Ro himia oubido ro niainiai taimahebidio wia ro korowaiematuti oubi ro neido heauwo taiti. 44Wia mo rioido nou niao, rio korowaiematuti oubi rio’o neido niainiai taimahebidiomo; wia nouri oubi neiio rioido ubauba wadeito imamauutimowa, neido niainiai wade taromo; wia nouri oubi rioido heauwo oitimowa, rio neido mea nana taidodiaimo; wia nouri oubi rioido gooa iwaimowa, neido kirodumea wadeito Iehovaido taroumo. 45Ina nouri, rio himia Abea toborowa remidio, rio nou mere aibo aiwaimoiti; mabu nouri, nouro hiwio ioroi owai uba oubido wia meamea oubido; wia wiha bubu nouro naibaha otiodoiro, gamooiha oubido wia gamoo tato oubido. 46Mabu nouri, ina rio niro emahebidiowaumo rio himia niainiai oubido touna wihai rio? Gavana wiha keauri oubi, nei nou aibo ridodiaidumo. 47Ina rio niamomio niainiai wade neido gauwoha iaomoi, rio taiba auwo waimoiti ata oubi aibo? Douboi oubi nei naiba idodiaimo tatora? 48Ina nouri, rioo auwo meaha taitimo, naiba rio himia Abea toborowa remidio, nouvia meari.
Trenutno odabrano:
Mataio 5: KXW1941
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the British and Foreign Bible Society in 1941.
