Mbete Marki 4
4
1Zezu ti̧h si ɓel mahmbih Galile. Ke mbi nzak fe firma ɓay lák mbay Ŋgerzah mí ƴo firma nzukri. Daɓa nzukri ŋgi̧ mbamba gi mbu̧h hani mer mer ké ta̧w ye. Kaŋ mí ke hil kaɓ ɓil kumbon. Nzukri-aw gbam ba, ƴo nzak mahmbih. Mí ke ɓah lawɓayri ɓa ŋgi̧-u. 2Ke firma niri keni ɓahri : 3« Í te wuri suk, í lah ɓay nzuk ké si waka ɓay mi̧h mi̧hri. 4Ke ƴo mi̧h mi̧hri dale, mi̧hri a haniri ku̧ mahful, mí gundoyri gi te mi̧hri-u ɔh riw. 5Mi̧hri a ɓoruri ku̧ gel ké siɓa ŋgi̧ ya ɓay kasaw ké na diŋu. Sa gelaw mí mi̧hri fe pay ra ti̧h ɓay siɓa ké ŋgi̧ ri ya. 6Seh zaŋ, mí fe pay ra ri̧h mí el ho̧k wɔh ɓay sa̧wu ké ɓar siɓa ya. 7Mi̧hri a haniri ku̧ gel ŋgatukru. Fe pay ra ti̧h. Ŋgatukru kara ti̧h pi, mí ŋgatukru kaŋ tul fe pay ra kiɗik kiɗik fu̧h fe payaw hi̧ fe pay ra leh ya. 8Mi̧hri a ɓoruri ba, ku̧ siɓa a suki. Fe payri ra ti̧h el hu̧h mí leh ɓa suki. Sa̧wu mbew le, leh bon say, a ɓoru leh bon tɔtɔklɔ. A haniri ba, leh sɔɗ. »
9Mí Zezu el ɓah ɓay ɓahri : « Nzuk a suŋ suŋ ké ƴo ke suk-lah ɓay le, ké lah. »
10Daɓa nzukri-aw ɓá poŋ Zezu ke nzuk-dih fal ye a boh falu seɗeri ke nzuk-dih fal ye a ɓoruri le, ku vbi ni ɓay ké ten sa̧w lawɓay nzuk-mi̧h mi̧hri ra hi̧ niri kú lah. 11-12Mí ke ɓahri : « A woiri le Ŋgerzah ten sa̧wɓay lák mbay ye ké mu̧-mu̧h hi̧ wuri i lah. Nzuk a kalari ba, lah ɓa lawɓay. Ku ko ke nun woyri ko-ko mí ku ko da̧h. Ku lah ke suk la-lah mí guh law woyri ya ɓay rɔkɔ kú sɔɓ el gi ta̧w Ŋgerzah hi̧ ké sel niri ké ndɔk suya. »
13Mí Zezu el ɓahri, i tu sa̧w lawɓayay ra ya wa, ani mí i ɓay tu sa̧w lawɓay a ɓoruri ɓáy le ? 14Kandɔkaw mi̧hri ké nzuk mi̧h ra ɓa ɓay Ŋgerzah. 15Mahful ké mi̧hri ku̧ ri ra ɓa nzukri. Gelku-u lah ɓay Ŋgerzah ra, sa gelaw mí mbay záh tukala gi lu ɓayu ké law nzukri-aw. 16Gel ké siɓa ŋgi̧ ya ɓay kasaw ké na diŋu ra ɓa nzukri kú-u lah ɓay Ŋgerzah. Sa gelaw mí ku ya̧ ɓayu ke law rihna. 17Mí ɓayu ɓar sa̧w ya. Kal ɓa kuna. Bol fal kú-u lah, fe-leh law ziŋ niri mini nzuk laɓ niri koseh ɓay tul ɓay lák mbay Ŋgerzah. Sa gelaw mí ɓayu el ti̧h ɓa ndaw ké nun woyri. 18Gel ŋgatukru ké mi̧hri ku̧ ri ra ɓa nzukri ké lah ɓay lák mbay Ŋgerzah, 19mí kerɓay tukala ke kuŋɓay fe ziŋna ke sa̧y fe a ɓoruri ri̧h law woyri. Fe-uri kaŋ tul nzukuri-aw kiɗik kiɗik. Ku hi̧ Ŋgerzah lak mbay tul woyri ya. Ku ŋgu̧-ŋgu̧h, ku le-lehna ya. 20Siɓa a suki ké mi̧hri ku̧ ri ra ɓa nzukri ké lah ɓay lák mbay Ŋgerzah, mí ku mgba ɓa suki. Ku hi̧ ɓayu leh lehna kandɔk sa̧w fe pay mbew le, leh bon say, a ɓoru leh bon tɔtɔklɔ, a ɓoru ba, leh sɔɗ.
21Zezu el ɓahri : « Nzuk oh hɔrɔ ta lampe ɓay el mbi mbɔhrɔ guɓ ri ya. Ke ta mbi lampe mu̧h huh ŋgasaka ya pi. Nzuk oh hɔrɔ ta lampe ɓay mbi kan síɓa. 22Ɓayu ké feri gbam ké mu̧h nun nzukri le, mu̧h ɓay ten gel a teh-u. Sa̧w fe mu̧h gɔr ya, wara le mu̧h ɓay ti̧h kala hi̧ nzukri ko. 23Nzuk ƴo ke suk ké lah ɓay le, ké lah. »
24Zezu el ɓahri se : « Í ko-ko ke ɓay ké i lah. Suk ké i lah ɓay keni ra i zíŋ a ɓoru dɔm ri. 25Ɓayu ké nzuk a suŋ suŋ ké ƴo ke suk ké lah ɓay le, ke ɓay lah a mbaŋu ɓáy. Nzuk a a̧y ké ta ke suk ɓay lah ɓay ya ba, ɓay a ndi̧ ké-e lah-aw ra ɓay zi wu̧m. »
26Zezu el ɓahri : « Lák mbay Ŋgerzah na kandɔk mi̧hri fe pay ké nzuk si ruh ɓil waka ye. 27Ke el si puh, nam kal, mi̧hri ra ɓur mí ti̧h. Ke tu ani mí fe-u laɓ ya. 28Tusiɓa hi̧ fe pay ra hu̧h, munu laɓ tul mí ŋger. 29Tul fe pay ra ŋger. Sa gelaw mí ku gi vbeh fe payu ɓay fe le, nam vbeh-u ka̧h da. »
30Ke el ɓahri : « A fe mí nah mgba tuh ke lák mbay Ŋgerzah ɓáy le ? Lawɓay fe mí nah mgba tuh keni le ?
31Lák mbay Ŋgerzah na kandɔk mi̧hri fe pay a hani-u. Mi̧hri ra hu̧h ya kalak kaŋto. Hu̧hna-aw mah ke mi̧hri fe a ɓoruri ya. 32Gelke fe pay ra ti̧h mí hu̧h dale, hu̧hna-aw kal tul fe pay a ɓoruri gbam. Ndɔkuri vba gbah gbah, mí gundoyri gi kaɓ ɓil temu laɓ ri vul. »
33Kandɔkaw mí ke ɓah lawɓayri ŋgi̧-ŋgi̧, ke ɓah a ké mah lahna nzukri. 34Lawɓay ta-a le, ke ɓah ya. Seh ké-e ƴo ke nzuk-dih fal yeri le, ke el ten sa̧wɓayuri riw hi̧ niri ku lah.
35Bɔklewu mí Zezu ɓah hi̧ nzuk-dih fal yeri ɓahri : « Náh tɔr wuri si kala mahmbih fál sa̧. »
36Ku poŋ daɓa nzukri, ku rih kaɓ ɓil kumbon ke Zezu mí ku tɔr. Kumbon a ɓoruri ku̧ gelaw pi. 37Dale mahmbam to, baw kuna ku bivbiɗ bivbiɗ laŋ mbih gbɔksɔ gbɔksɔ fer ku̧ ɓil kumbon. Toŋ ndi̧ ɓay mbih ɓá mbah ɓilu. 38Zezu ra na fal ké ɓil kumbon. Ke ger tul ye ke fe ƴo na nam. Mí nzuk-dih fal yeri tom ni ɓahri : « Metere, nah ɓay hu wuri wo, ɓayu ta se mu ya ley ? »
39Zezu tom. Ke hah kuna, ke el ɓah hi̧ mbih ɓá tuk el na ɗeŋ. Mí kuna ke mbih tuk kelek hi̧ gel na ɗeŋ gaŋ ba. 40Zezu el ɓah hi̧ nzuk-dih fal yeri ɓahri : « Ɓay fe mí i hi̧ hȩkme mgba law woiri. Law woiri ƴo ziŋ mi ya ɓáy le ? »
41Bale baw hȩkme se niri ɓa hȩkme a mbamba-u. Ku ɓah ke haniri ɓahri se : « Nzukay gaŋ ba wa, na ani mí kuna ke mbih kara lah nzak ye-ay le ? »
Trenutno odabrano:
Mbete Marki 4: SIAFNK
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.
