Yohana 10
10
Umulango wa iwanghondolo yuyo Yesu
1Yesu kawalongela, “Kingongongo nomulongelani, Heyo yolema kwingila hamulango wa ikikwama cha iwanghondolo, bali kokwelela hayagwe, ayo mbavi kabili mbazazi. 2Yobitila hamulango iyo mchunga wa iwanghondolo. 3Na halalingwe jovugulilwa heyo, na iwanghondolo womuhulika dizwi jake; na heyo kowakema nghondolo wake matwaga gawo na kuwagala kunze. 4Na yahawagala kunze nghondolo wake, kowalongolela, na waja iwanghondolo womkoleleza, kwa mzoko waditanga dizwi jake. 5Amba munhu iyungwa hawamkoleleza, komu womkimbila, kilumbo hawatangile dizwi ja munhu iyungwa.”
6Hala hijo Yesu kawapetela, bali hewo hawamanyile ago goyotambula.
Mchunga yanogile kolava ugima wake
7Viyagwe Yesu kawalongela, “Ihoko ihoko nomulongelani, niye nene umulango wa nghondolo. 8Wandongolele wose iwo wabavi na wabokonyo, bali nghondolo hawawahulike. 9Niye nene mulango; munhu yahengila kumwangu kohona, kokwingila na kulawa, na heyo kokwiguta. 10Mbavi yokwiza giladi yebe na kusika nghondolo na kubananga; niye niza giladi wawe na upile, vyemela wawe nawo dubwa.
11Niye nene mchunga nogile; mchunga yanogile koulava ugima wake kwa kilumbo cha nghondolo. 12Munhu wa kitumetume, na heyo si mchunga wala nghondolo si zake, yahamona mbwizi yokwiza, kowaleka nghondolo, kokimbila; na mbwizi kowagoga na kuwapwilisa. 13Yuja kokimbila, kilumbo heyo munhu wa kitumetume, na nongwa ya nghondolo si kinhu kumwake. 14Niye nene Mchunga yanogile, na hewo iwangu niwatanga, na iwangu wanhanga niye. 15Kamba vija Tata viyanhangile, na niye vinimtangile Tata; na niye noulava upile wangu kwa songelezo ya nghondolo. 16Ninawo na nghondolo wayagwe, si wa kikwama kino; hiwo nawo vinyandama niwagale, nawo wodihulika dizwi jangu; ilawa baho dokuwa dale dimwe na Mchunga yumwe.
17Avo Tata kanogela, kilumbo noulava upile wangu giladi kwiza niusole viyagwe. 18Haduhu youbokonya kumwangu, bali noulava mwenyecho; ukelemange uno ninawo wa kuulava, kabili kuusola viyagwe; ndagizo hiyo niibokela kwa Tataangu.”
19Baho Wayuda wamana kwigola kilumbo cha ulonzi hiwo. 20Wayagwe walonga, “Kana mizuka yuno, kabili kana kikwale, vilihi vumumtegeleza? 21Wayagwe walonga, “Ulonzi hiwo si wa munhu mwene mizuka mbe; che, mzuka wodaha kubabazula meso kimbugumbugu?”
Yesu hana isiku nghulu ya Zingulo; Nghondolo za Yesu vuwali
22Kukala na sikunghulu ya Zingulo hiko Yerusalemu, ivikila kilingalinga na kihuhe. 23Na heyo Yesu kakala yotembela mdihekalu muna umsana wa Salomo. 24Baho Wayuda wamzunguluka wamulongela, “Kotululusa mmoyo vino hata kulihi? Kamba gweye gwegwe Kristo, utulongele kibunubunu!” 25Yesu kawedika, “Niwalongela, komu hamtogola; kazi zino zinitenda mditwaga ja Tata wangu zizo zisindila niye. 26Bali mweye hamtogola, kwa kitando mwamduhu mmwanza wa nghondolo wangu. 27Nghondolo wangu wodihulika dizwi jangu, na niye niwatanga, na hewo wongholeleza. Na niye nowagwelela upile wa digunge, vyemela honda wage ngʼo; wala haduhu munhu yonda yawasamhe kulawa mumkono wangu. 29Tata wangu yaninghile hiwo, yuyo mkulu kubita wose, avo haduhu munhu yodaha kuwasamha kulawa mumkono wa Tata. 30Niye na Tata twa yumwe.”
Yesu na Tata wayumwe
31Baho Wayuda wadondola mabwe kabili, giladi wamsune. 32Yesu kawedika, “Kazi zinogile bwando zinitendile kumwenu, zilawa kwa Tata; kazi ilihi imbanange, kileka mnhowa na mabwe?” 33Wayuda wamwidika, “Kwa mzoko wa kazi inogile hatukutowa na mabwe, bali kwa kufulu; gweye kwa mwanaadamu, ilawa baho kokigamba mwenyecho kwa Mulungu!” 34Yesu kalonga, “Che, hayandikigwe muna Inzuma yenu, “Niye nonga, mwa milungu?” 35Ihawa kawakema milungu waja wagalilwe mbuli ya Mulungu, wala Jandiko honda digwe hasi; 36Momulongaze kana kufulu heyo vyemela. Tata kamngʼazula na kumtuma mulumwengu? kileka vinongile, niye na Mwanage Mulungu? 37Kamba sizitenda kazi za Tataangu, segemnhogole! 38Bali nihazitenda, zitogoleni zija zikazi, kamba hamnhogole niye; giladi mvimanye na kuvitanga, kumbe Tata kamgati mmwangu, na niye namgati mwa Tata.”
39Walonda kumgoga viyagwe, bali kawazuhuluka mmikono yao. 40Kagenda kabili umwambu wa Yordani, kavika ihanhu haja hayakalile Yohana yasingule wanhu haikilongozi, kakala hiko. 41Na wanhu bwando wamgendela, walonga, “Yohana viyali hatendile kilolomboto chochose, baye gose gayalongile Yohana, gagambile mbuli za yuno, za ihoko.” 42Na wanhu bwando wamtogole hiko.
Trenutno odabrano:
Yohana 10: ZAM75
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
New Testament in Zaramo © United Bible Societies, 1975.
