Mak 3

Jisas mwa Barahu Atatu mai Lima Mate

(Mat 12.9-14; Luk 6.6-11)

1Haḡe Jisas mwa dabagilu mulei vai la imwa tataro ta aia atatu vwate abena be limana nu mate. 2I mulei atatu rituai ran doron be rav vevegi Jisas huri ute vahala, i kera ram hohov ḡoḡonainia be rav gitae be mandevai vi varahu wani gea lol gubwen̄ mambuharai. 3Haḡe Jisas mwa bevea lalai atatu limana nu mate be, “Hamai lua teti.” 4Haḡe kea mwa hudali sinombu be, “Nonda silo mwa bev hano lalai gida be tav lolia lol gubwen̄ mambuharai? Tav bului sage tav lol hantai; tav varahu rahun atatu sa tav lol kaburainia?”

I kera ram hav vwaliu te dumwia. 5Jisas mwa lol horo i mwa ḡitara duluai dalisia, ta mulei mwa hagavira bwatuna alen̄ara nu wasi hantai. Haḡe mwa bevea lalai atatu gea be, “Vugeri limwamwa.” Haḡe kea mwa bugeri limana i mwa davuha mulei. 6Ira Varise ram bwihavare nin imwa tataro i ram ḡoḡo vilvilehi maira rituai ata lol vatugigi non Herod ram lol taritari be rav wehi Jisas kunhanigi.

Sinombu la Balsin Numbu Gaivua

7Jisas maira non roron̄tai ram ban vai lol numbu gaivua Kalili, sinombu gaivua ram huria. Ram mai nin vanua Kalili, nin Judia, 8nin Jerusalem i nin utuhin vanua Idumia, nin vanua haltavalun wai Jodan, i nin vanua gabe ram dogo daldalis bwatutun vanua Taea mai Saidon. Kera duluai uhu ram mai huri Jisas bwatuna ram ron̄ huri ginau duluai gabe nu lolia. 9Sinombu gaivua maragai, haḡe Jisas mwa bevea lalainira non roron̄tai be rav lol vatuvwai waḡa huria, bwatuna be sinombu rasav viviri te dumwia. 10Kea mwa barahu sinombu ivusi, i ira hei gabe ram haro ram ḡihi halara huri be rav sibweri dumwia. 11Kera gabe vui hantai alolora ram ḡitae ram hovi ḡoro lolmatana ram haharigi ram bevea be, “Giḡo Nitun God.”

12Kea mwa borotai wasi ira vui hantai be rasav vevea te lalai ihei tehe be kea ihei.

Jisas mwa Ḡitaluara Hala Han̄vul Domwan Gairua

(Mat 10.1-4; Luk 6.12-16)

13Haḡe Jisas mwa hae alun vusi i mwa uloi lua ira hei gabe mwa doronira. I kera ram mai abena, 14i mwa ḡita luara han̄vul domwan gairua gabe mwa uloinira be ira hala mwa bevea be, “Nam ḡita lua kimiu be giv togo bul maiau,” haḡe mwa bevea mulei lalainira be, “Nav hora lua kimiu huri toretore, 15i giv haḡo roron̄o be giv goro lua ira vui hantai.”

16Geki haḡea ira han̄vul domwan gairua gabe nu gita luara: muana Saimon (gabe Jisas nu lai ihana be Pita); 17Semes mai tuana Jon gabe ira nitun Sebedi. (Jisas nu uloinira be Boanajes, binihiva be “Ira atatun bwahilo”); 18Andru, Vilip, Batolomiu, Matiu, Tomas, Semes nitun Alvius, Tadeas, Saimon kea gabe Patriot ninira vatugigi gabe ram barihainira ata Rom, 19mai Judas Iskariot gabe nu sine Jisas.

Jisas i Vui Hantai

(Mat 12.22-32; Luk 11.14-23; 12.10)

20Haḡe Jisas mwa dabagil mulei vai la vanua. Sinombu ivusi ram ḡoḡo bwatuna gea mahavana sigai lalai Jisas maira non roron̄tai be rav gan ginau. 21Haḡe ira havan Jisas ram ron̄ dumwia ram mai be ramen laia, bwatuna sinombu ram bevea be, “Mwa daltale!”

22Ira vagahin Silo ram mai nin Jerusalem ram bevea be, “Ratahigi ḡoro vui hantai mwa bulusia! Kea haḡea mwa lai muramura be men goro luara vui hantai.”

23Haḡe Jisas mwa uloinira vai abena mwa avo lalainira gin avoan dalogai mwa bevea be, “Kun hanigi be Setan vi goro lua Setan? 24Be vanua vwate si haraborae sibona gi tatan̄an ivusi be men bwalo ginia sibona, vanua gea vi hovi. 25Be imwa vwate si haraborae sibona nin tavaluna imwa gea sihav tu te dum. 26Be ute ratahigi non Setan si haraborana lol tatan̄ana ivusi sihav tu te dum, vi hovi i vi vinogonogo.”

27“Ihei sihav dalin̄oro te surai dum alolon imwan atat rihumaragai be men surai non viloḡoana, be wani gea vi hav vauhi te atat rihumaragai amua haḡe gim siv sura.”

28“Mwasigi nam bevea lalai kimiu be vuro duluai vi tugu kaburaiana be wani mwa binihi leahi huri hava ute hantai be mwa lolia sa mwa bevea. 29Ta be ihei mwa av hantai vai alun Vui Sabuga sihav vinihi te dum kaburai vurona, kea vi vuroga vai tuai.” 30(Jisas mwa bev ginau kera geki bwatuna kera rituai ram bevea be, “Vui hantai mwa do alolona.”)

Ira Mwasin Havan Jisas

(Mat 12.46-50; Luk 8.19-21)

31Haḡe ratahin Jisas mai ira tuana ram mai; ram du avare ram hudaligi huri Jisas. 32Sinombu ivusi ram do dalis Jisas, i ram bevea lalainia be, “Gita ratahimwa mai ira tuamwa i ira hogosimwa ram doronigo avare.”

33Ta mwa bwaliura mwa bevea be, “Ihei ratahiku? Ihei ira tuaku?” 34I kea mwa ḡarere mwa ḡitara ram dogo dalisia, i mwa bevea be, “Gitae! Geki haḡea ratahiku i ira tuaku! 35Ihei tehe mwa lol ginau gabe God mwa doronia be vi lolia, kea haḡea tuaku, hogosiku, mai ratahiku.”

Trenutno odabrano:

Mak 3: HNB

Istaknuto

Podijeli

Kopiraj