Matiu 21
21
Jisas mwa Dalin̄oro Jerusalem i Sinombu Ram Uloi Roroainia
(Mak 11.1-11; Luk 19.28-40; Jon 12.12-19)
1Batena Jisas mai non roron̄tai ram mai sosori Jerusalem, ram botu vanua Betvej la vusin gai Oliv. Haḡe Jisas mwa hora dotomua non roron̄tai gairua, 2mwa bevea be, “Giru vi vano vai la vanua mwa do vavtutu ban aia, i giru vi habwe darihou don̄ki vwate be ran vagohainia mwa eno mai nituna. I giru vi tugura ba laira vai abeku. 3Be ihei vi avo mai kimiru, giru vi vevea lalainia be, ‘Nomaru Ratahigi mwa doronira.’ Haḡe vi lin̄ darihoinira.”
4Ginau uhu mwa bisirai be men lol seserai avoana non atatun vevsera be nu vevea tuai be:
5“Giv vevea lalainira ata Saion be,
‘Giv gitae! Nomiu Ratahigi lavoa mwa mai huri kimiu.
Kea mwa binihi maḡemuinia,
mwa lago alun don̄ki, alun bwaloi don̄ki.’ ”
6I roron̄tai gairua uhu ramuru bano, ramuru lol hano be Jisas nu vevea lalainira, 7ramuru lai don̄ki gea mai nituna, i ramuru lelei gaisagara la ulun gatigun don̄ki gea, i Jisas mwa dogo amare aluna. 8Sinombu ivusi ram lelei gaisagara la hala, i rituai ram dai raran gai, ram bohainira la hala. 9Sinombu be ram domuainia i sinombu gabe ram du ataguna ram haharigi be, “Uloi roron Nitun Deved! God na vatavuhainia gabe mwa mai la ihana! Uloi roron God mwa do amare!”
10La mahavana be Jisas mwa dalin̄oro Jerusalem, vanua bwatutuga duluai ram daburi, ram hudali be, “Ihei uhu?”
11Haḡe sinombu be ram hae bulu ram bwaliura be, “Geki haḡea Jisas, atatun vevsera ata Nasaret nin vanua Kalili.”
Jisas mwa Ḡoro Luara Ram Lealeahi i Ram Bolvoli Lol Imwa Tataro non God
(Mak 11.15-19; Luk 19.45-48; Jon 2.13-22)
12Haḡe Jisas mwa dalin̄oro lol Imwa Tataro. Mwa ḡoro luara ram lealeahi i ram bolvoli alolona, i mwa dul burigai nora tebol gabe ram du ram lealeahi homu, i mwa bohai kakaburai nora tanon togotogo gabe ram du ram salei manbona. 13Haḡe mwa bevea be, “God mwa bevea lol Ravrava Sabuga be, ‘Imwaḡu vi uloiana gi Imwa huri Tataro,’ itake kimiu gim lolia gi imwan atat surasura.”
14Ira matagara i kera gabe bwalagera ran hantai ram mai vai aben Jisas lol Imwa Tataro, i mwa lol barahura. 15Ira muai tataroi maira vagahin Silo ram ḡita ginau dan̄an̄a gabe Jisas mwa lolira, i ram ron̄ naturirigi ram haharigi lol Imwa Tataro be, “Uloi roron Nitun Deved!” Haḡe lolora mwa horoinia, 16ram hudali Jisas be, “Gom ron̄ hano ram bevea?”
Haḡe Jisas mwa bwaliura be, “Uwe, nam ron̄oe. Matu gim hav vasogo te Ravrava Sabuga be mwa bevea be, ‘Gon vagahi ira naturirigi lalavoa maira la huhu be rav uloi roroainigo’?”
17Haḡe Jisas mwa derainira, mwa mwalue nin Jerusalem, mwa ban vai Betani, i aia mwa maturu.
Jisas mwa Av Badadai Bwatun Vig be mwa Hav Vwae Tehe
(Mak 11.12-14,20-24)
18Mwa rani mabon̄ gaituvwa, Jisas mwa dabagilu mulei vai Jerusalem. La mahavana be mwa mai la hala maro mwa ḡasia. 19I mwa ḡita gai vik aben hala. Haḡe Jisas mwa ban vai aben gai vik gea be men hiḡe ron̄ mwasina, take mwasina sigai, rauna n̄an. Haḡe Jisas mwa bevea lalai gai vik be, “Gosav mom bwae tehe!” Haḡe gai vik gea mwa ḡoru darihou.
20Non roron̄tai ram ḡitae, ram dan̄an̄a maragai. Haḡe ram hudalinia be, “Huri hano be gai vik gea mwa ḡoru vilvilehi kunia?”
21Haḡe Jisas mwa bwaliura be, “Nam bev mwasigi lalai kimiu be, be nomiu binihimwasigi si wasi, i si hav vinihi te gairuruai, gis lol dum ginau kunia gabe nan lolia lalai gai vik gea. I mulei gis vev dumwia lalai vusi geki be, ‘Tomare ba bohainigo lol tahi,’ i vi vora kunia. 22Be kimiu gim binihimwasigi alun God, havanau tehe be gim navohia lol nomiu tataro, vi laia lalai kimiu.”
Avoan Hudaligi huri Roron̄o non Jisas
(Mak 11.27-33; Luk 20.1-8)
23Jisas mwa dabagilu mulei vai lol Imwa Tataro, i mwa bagahi. Haḡe ira muai tataroi maira bwatmetua ira Jius ram mai vai abena, ram hudalinia be, “Gom lai hava roron̄o be gomen lol ginau kera geki? Ihei mwa laia lalainigo?”
24Haḡe Jisas mwa bwaliura be, “Inau mulei nav hudali kimiu huri ginau gaituvwa. Be giv vwaliu dumwia, haḡe inau mulei nai vev luae lalai kimiu hava roron̄o nam laia be nav lol ginau kera geki. 25Jon nu lai non roron̄o huri garuhisabuga halabehe? Nin God sa nin atatu?”
Haḡe ira lalavoa duluai gea ram biavoavo maginira, ram bevea be, “Be tai vevea be garuhisabuga non Jon mwa mai nin God, kea vi vevea be, ‘Huri hano gim hav vinihi te mwasiginia?’ 26Sa be tai vevea be mwa mai nin atatu n̄an, gida tam matagun sinombu, bwatuna be kera duluai ram bevea be Jon kea atatun vevsera vwate.” 27Haḡe ram bwaliu Jisas be, “Gam len̄a.”
Haḡe Jisas mwa bevea lalainira be, “Be kunia, inau mulei nasav vevea tehe be nam lai roron̄o be namen lol ginau kera geki halabehe.
Avoan Dalogai huri Atatu Vwate mai Nituna Gairua
28“Haḡe kimiu gim binihi haninia? Atatu vwate nituna gairua. Gubwen̄ vwate mwa bevea lalai tuagai be, ‘Tari, garigi goi van ba lol rovoga lol bilaku ute loloara.’ 29Haḡe nituna mwa bwaliua be, ‘Nam barihai.’ Itake ataguna mwa leahi binihina, i mwa bano. 30Haḡe tamara mwa ban aben gairuan nituna, mwa bev muleinia kunia lalainia. Haḡe nituna mwa bwaliua be, ‘Nu tavuha, tata.’ Itake atagu mwa hav vano tehe. 31Ihei ninira gairua uhu be nu lol hurin avoana non tamana?”
Haḡe ram bwaliua be, “Tuagai.”
Haḡe Jisas mwa bevea lalainira be, “Nam bev mwasigi lalai kimiu, be ira harahara homu maira vavin harahara homu kera haḡe gea rav haroro amua lol rahuan gara gabe God mwa ratahigi alolona, kimiu atagu. 32Bwatuna Jon Garuhisabuga nu mai mwa bagahi kimiu gin matanhala tavuha be giv huria, itake gim hav binihi te mwasiginia. Ta ira harahara homu maira vavin rovrovoi homu kera ram binihimwasiginia. Kimiu gin gitae, take gim hav binihi te dori huria, be gimen binihimwasiginia.”
Avoan Dalogai huri Ira Gitaḡoro Lol Talu
(Mak 12.1-12; Luk 20.9-19)
33Haḡe Jisas mwa bevea lalainira be, “Giv ron̄ mulei avoan dalogai vwate. Vuigin talu vwate mwa riv taligaon waen lol taluna, mwa lol ara dalisia, mwa ḡel lulu vwate huri be vi lol vwain gao vi mai gi waen, i mwa lol imwa holomare vwate huri matmatai ḡoro. Haḡe vuigin talu mwa mahin̄ai talu lalai ira gitaḡoro rituai be rav lol rovoga alolona ba lai ududui lalainia, mwa derai vanuana, mwa ban dagai. 34La mahavana be vwain gaon taligaon waen mwa metue, vuigin talu gea mwa hora non turin rovoga vai abera ira gitaḡoro huri be rav bete ududuna lalainira huria. 35La mahavana be kera gea ram ḡita non turin rovoga, ram wehi vwate, ram wehi bamate vwate, i ram boha vwate gin vatu. 36Haḡe vuigin talu gea mwa hora mulei non turin rovoga rituai liu nin amua. Ram lolira kunira amua. 37Haḡe nogonana vuigin talu gea mwa hora mwasin nituna vai abera gea, mwa bevea sibona be, ‘Nam bev mwasigi, kera rav gita nituku, rai vinihi marahinia.’ 38Itake la mahavana be ira gitaḡoro ram ḡita nituna, ram bevea ginira be, ‘Geki mwasin nituna. Tan wehia, i tav lai non talu!’ 39Haḡe ram haḡo batugehia, ram lai dagainia nin tano gea, vuvuri ram wehi bamatea.”
40Haḡe Jisas mwa hudalinira be, “La mahavana be vuigin talu vi mai, vi lol hano lalainira gabe ram ḡita ḡoro non tano?”
41Ram bwaliua be, “Kea vi wehi bamate ira atat hantai gea, i ataguna vi lai non talu lalai ira gitaḡoro dodolua, huri be lol mahavana be gao gea vi metue ita rav lai dum uduna lalainia.”
42Haḡe Jisas mwa bevea lalainira be, “Matu gim hav vasogo tehe lol Ravrava Sabuga be mwa bevea be,
‘Gai mahan̄an imwa gabe kera ran vohai kaburainia
kadogaha mwa bora mwasin gain imwa.
Ginau gea Ratahigi sibona nu lolia,
ginau dan̄an̄a la lolmatamai!’
43“Bwatuna gea, nam bevea lalai kimiu be God vi lai dagai nin kimiu rahuan gara gabe kea mwa ratahigi alolona, i vi laia lalainira gabe rav vwae mwasin vwaina. 44I gai mahan̄a gea be ihei vi hovi aluna vi wahai n̄andun̄andu rebehina, sa be si hovi alun atatu vwate, si momogai veroveroinia.”
45Ira muai tataroi maira Varise ram ron̄ avoan dalogai kera uhu be Jisas mwa bevea, ram iloe sibora be mwa bevea hurira. 46I ram lol ron̄oe be rav vwirihi Jisas. Take ram matagun sinombu be ram bevea be, Jisas kea atatun vevsera vwate.
Trenutno odabrano:
Matiu 21: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
