Jon 1
1
Avoan Mataisao non God
1Amua nin bwatun ureure, Avoana nu togo huba, kea nu togo mai God, i kea kun God. 2Nin bwativuna radui avoana nu togo mai God huba. 3God nu lol ginau duluai ginia; ginau vwate lol tauva nu hav tauana te dagai ninia. 4Avoana uhu kea bwatun rahuana, i rahuana geki mwa lai gigita lalai atatu duluai. 5Haḡe gigita mwa ḡigita lol ute meto, ta ute meto mwa hav tu te ḡoro dumwia.
6God nu hora non horata vwate, ihana Jon, 7kea nu mai be men vev luae lalai sinombu huri gigita geki, huribe atatu duluai rav ron̄ roroi huria ba binihimwasigi. 8Kea sibona nu hav vora te gigita; ta nu mai n̄an be men vevsera huri gigita. 9Geki haḡea mwasin gigita, gigita uhu mwa mai lol ureure i mwa ḡigitai atatu duluai.
10Avoan mwa dogo lol ureure, i God nu tau ureure ginia, take ureure mwa hav gita te batoia. 11Kea nu mai lol mwasin vanuana, take non sinombu sibona ran hav lai te ḡoḡoe. 12Ta kera rituai gabe ran lai ḡoḡoe, ram binihimwasiginia; i mwa lolira ram mai gi ira nitun God mwasigi. 13Ran hav mai tehe gi ira nitun God hurin alen̄an ureure, kun gabe, naturirigi ram bora nin ira tamara lol ureure geki; ta God sibona mwa doron be vivora Tamara.
14Haḡe Avoana mwa bora atatu, mwa masiri gin hogoi i mwasigi, i mwa dogo mai gida. Tam ḡita sarisarina, sarisari gabe nu laia kun gabe Nitun vora gaituvwa non Tamana.
15Jon nu avo huria. Nu vev luae be, “Geki haḡea wani gabe nan avo huria nan vevea be, ‘Kea vi mai ataguku, ta kea lavoa niniau, bwatuna kea nu togo amua nam siv vora.’ ”
16Kea mwa lol bamasiri gida duluai gin non hogoi tavuha, i mwa lai lalan̄an vatavuha vatvataha gida. 17God nu lai Silo sivi Moses, take God mwa lai hogoi i mwasigi sivi Jisas Kraes. 18Atatu vwate mwa hav gita te radui God. Nituna vora gaituvwa, gabe kea kun God sibona i mwa dogo hurin Tamana, kea mwa seserainia lalai gida.
Jon Garuhisabuga mwa Bev Lua Roroi huri Jisas
(Mat 3.1-12; Mak 1.1-8; Luk 3.1-18)
19Ira tomuai ḡoro ata Jius nin Jerusalem ram hora ira tataroi maira ata la varan Livae vai aben Jon, ram hudalinia be, “Giḡo ihei?”
20Jon mwa hav busbusi tehe be men vwaliura, take mwa bev lua didininia mwa bevea be: “Nam hav vora te Kraes.”
21Haḡe ram hudalinia be, “Matu giḡo ihei? Giḡo Elaija?”
Take Jon mwa bwaliura be, “Sigai, nam hav vora te Elaija.”
Haḡe ram hudali muleinia be, “Giḡo Atatun Vevsera?”
Take mwa bwaliura be, “Sigai.”
22Haḡe ram bevea lalainia be, “Kunia vevea lalai kamai be giḡo ihei. Bwatuna be gav lai avoan vwaliu mulei lalainira be ran hora kamai. Take giḡo sibomwa gom bevego be ihei?”
23Jon mwa bwaliura gin avoana non atatun vevsera Aesaia mwa bevea be:
“Inau ‘silon wani gabe mwa ulo la vanua vuroi be:
Giv lol bavtutui halan Ratahigi huri non lagoana!’ ”
24Ira horata, gabe ira Varise ran horara, 25ram hudali Jon be, “Be giḡo gom hav vora te Kraes sa Elaija sa Atatun Vevsera, huri hano gom garuhisabuga?”
26Jon mwa bwaliura be, “Nam garuhisabuga gin wai, take atatu vwate mwa du bul mai kimiu gim hav iloe tehe. 27Kea mwa mai ataguku, take inau siboku nam hav dadariha tehe be nav tugu gaon non sus.”
28Ginau geki nu loli Betani, haltavlun wai Jodan batoi halan al tavwaga, lol ute gea be Jon mwa garuhisabuga aia.
Jisas Kun Sipsip Kolo Bilan God
29Haḡe gubwen̄ dolua Jon mwa ḡita Jisas mwa mai huria, mwa bevea be, “Kea ha kahaḡa be Nitui Sipsip bilan God, gabe mwa lai dagai vuron ureure! 30Wani haḡe uhu be nan vevea huria be, ‘Atatu vwate vi mai ataguku, ta kea lavoa niniau, bwatuna nu togo amua inau nam siv vora.’ 31Nan hav iloe tehe be kea vivora atatu kunhanigi, take nan mai nam garuhisabuga gin wai huribe men lol seserai wani gea lalai sinombu ata Israel.”
32Jon mwa bev luae be: “Nan gita Vui nu himai nin amare kun manbona vai aluna. 33Nam hav iloe te radu be kea haḡea, take God gabe nu horau be nav garuhisabuga gin wai nu vevea lalaiau be, ‘Gov gita wani gabe Vui vi himai aluna; kea haḡea wani gabe vi garuhisabuga gin Vui Sabuga.’ ” 34Haḡe Jon mwa bevea be, “Nam gitae, i nam bevea lalai kimiu be, kea haḡea Nitun God.”
Ira Muan Roron̄tai non Jisas
35Haḡe gubwen̄ dolua Jon nu tu aia mulei mai non roron̄tai gairua, 36batena be mwa ḡita Jisas mwa laḡao, mwa bevea be, “Gitae kea ha kahaḡa be Nitui Sipsip bilan God!”
37Haḡe ira roron̄tai non Jon gairua ramuru ron̄ avoana geki ramuru huri Jisas. 38Jisas mwa ban burigai, mwa ḡitara be ramuru huria, mwa hudalinira be, “Gumuru hiḡe havanau?”
Ramuru bwaliua be, “Matu gom do behe Rabae?” (Avoana geki binihiva be “Vagahi.”)
39Jisas mwa bwaliura be, “Giru mai ba ḡitae.” (Mahavana kun alo gaivasi huba atagun bobon alo.) Haḡe ramuru bano bul maia ramuru ḡita ute be mwa dogo aia, i ramuru dogo bul maia huri gubwen̄ duluai.
40Vwate ninira gea Andru, gabe tuan Saemon Pita. 41Haḡe mwa habwe darihou tuana Saemon mwa bevea lalainia be, “Gan habwe Mesaea.” (Avoana geki binihiva be, “Kraes.”) 42I kea mwa lai Saemon vai aben Jisas.
Jisas mwa ḡarere mwa ḡitae i mwa bevea lalainia be, “Ihamwa Saemon nitun Jon, take vi uloinigo be Kivas.” (Geki kun iha n̄an be Pita binihiva be “Vatu.”)
Jisas mwa Uloi Vilip mai Nataniel
43Haḡe gubwen̄ dolua Jisas mwa binihia be vi vano vai Kalili. I kea mwa habwe Vilip mwa bevea lalainia be, “Mai ba huriau!” 44(Vilip kea ata Betsaeda, bwatutun vanua be Andru mai Pita ramuru dogo aia.) 45Vilip mwa habwe Nataniel mwa bevea lalainia be, “Gan habwe wani gabe Moses nu ravae huria lol bukan Silo i kera atatun vevsera mulei ran ravae huria. Kea haḡea Jisas nitun Josep ata Nasaret.”
46Haḡe Nataniel mwa hudaligi mwa bevea be, “Matu ginau tavuha te dum abena be vi mwalue nin Nasaret?”
Vilip mwa bwaliua be, “Mai ba gitae.”
47Mahavana be Jisas mwa ḡita Nataniel be mwa mai huria, mwa bevea huri Nataniel mwa bevea be, “Geki haḡea mwasin ata Israel; kea atat mwasigi!”
48Nataniel mwa hudalinia be, “Gom iloau kun hanigi?”
Jisas mwa bwaliua be, “Nan gitago gon togo aten gai vik amua Vilip mwa siv uloinigo.”
49Nataniel mwa bwaliua be, “Vagahi, giḡo haḡea Nitun God! Giḡo haḡea Ratahigi Lavoa ata Israel!”
50Jisas mwa bevea be, “Matu gom binihimwasigi bwatuna n̄an be nam bevea lalainigo be nan gitago, gon togo aten gai vik? Gov gita ginau lalavoa ivusi ninia geki!” 51I kea mwa bevea lalainira be, “Nam bev mwasigi lalai kimiu be: giv gita mahao vi mahavan̄i i ira enjel non God rav hae i rav himai aluku, inau Nitun Atatu.”
Trenutno odabrano:
Jon 1: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
