Matiu 2
2
To Mata alo mohaoki Yesu
1I tempona Datu Herode moparenta, Yesu rapoanaka i boea Beteleme i tampo Yudea. I tempo iti, arahe bahangkia tauna au hawe i Yerusale hangko i tamponda au karao ntanda i Mata alo. To Mata alo iti mapandehe mampeita tanda i betue. 2Mekunemohe i to Yerusale, rauli, “Iumba Datunda to Yahudi au hangko rapoanaka iti? Kiitami betue i Mata alo au mopakanoto pesupaNa.#Pmb. 24:17 Ido hai maingkai, lawi kipeinao menomba Iria.”
3Kanahadina Datu Herode bambari iti, tingkara laluna, nodo worihe ope-ope tauna i Yerusale. 4Hangko inditi, nakakiomohe ope-ope kapala tadulako mpenomba hai guru agama Yahudi bona maihe mogulu. Moteruhumohe ope-ope, mekunemi Datu Herode irihira, nauli, “Iumba mpuu karapoanakana Datu Topehompo au nadandi Pue Ala hangkoia?”
5Mehanahe, rauli, “I boea Beteleme i tampo Yudea, lawi arami lolitana Pue au nauki hadua nabi hangkoia. Nauli Pue:
6‘Boea Beteleme i tampo Yudea,
barako boea au tepakokoi.
Ina mahile hangamu
hangko i ope-ope boea i tampo Yudea.
Lawi hangko irio ina mesupa hadua Tadulako Mahile;
batena Ia au motadulakoi taunaNgku to Isaraeli.’ ”#Mik. 5:2
7Kanahadina Herode lolitanda, nakakio ngkandiimohe to Mata alo dati raisa tauna ntanina. Napekunehe impira mpuu betue iti nguru-nguruna mesupa. 8Roo indo, natudumohe lao i Beteleme, nauliangaahe, “Laomokau i Beteleme, nihaoki mpuu Anangkoi iti. Ane nilambimi, maina niuliangaa bona lao worina menomba Iria.” Lao mpuumohe.
9-10I tanga rara, moita mbulihe betue iti ntanda i Mata alo. Matana ntepuuhe. Betue iti mampoioruahe duuna mengkaroo i wongko sou paidaana Anangkoi iti. 11Kahawenda, mesuamohe i lalu sou, hai liliuhe moita Anangkoi iti hihimbela hai Maria inaNa. Motumpamohe menomba Iria. Roo indo, mobungkahimohe pambolia anu-anunda, hai mohuhuhe popenombanda Iria. Popenombanda iti iami bulawa hai anu-anu mawongi au masuli nodo dupa hai mur. 12Tanga kaindi, Pue Ala mampopaingaahe i lalu pangipinda, Nauli, “Ineekau mesule i Herode!” Mewali i pesulenda i tamponda, barahe moliu i Yerusale, moulamohe rara ntanina.
Yusupu moanti Maria hai Yesu lao i tampo Masiri
13I pesulenda to Mata alo, mampatongawa mbulimi malaekana Pue i Yusupu i lalu pangipina. Nauli malaeka iti, “Yusupu! Herode mohaoki Anangkoi iti lawi napeinao napapate. Mearomoko, antimide Anangkoi iti hai inana lao i tampo Masiri! Maidamokau hampai inditi duuna mololita mbulina irikamu.”
14Kaindi iti, mearomi Yusupu, hai moanti Maria hai Yesu lao i tampo Masiri. 15Maidamohe inditi duuna Datu Herode mate.
Mewali, tepabukeimi Ngkorana Pue au napahawe nabiNa hangkoia au manguli node, “Kukakio mai AnaNgku hangko i tampo Masiri.”
Anangkoi i Beteleme rapapatehe
16Kanaisana Herode karaakalangina to Mata alo, rumihi ntepuu karumpuna. Ido hai napohawaami surodadona lao mopapate ope-ope anangkoi tobalilo i Beteleme hai i boea au hungku inditi bona Anangkoi au ina mewali datu kana wori rapapate. Naisa mpuu Herode impira pesupana betue iti, lawi napekune hangkoia i to Mata alo. Ido hai natuduhe bona ope-ope anangkoi tobalilo i Beteleme rapapate, mepongka i analei au hangko rapoanaka hawe i anangkoi au romparemi tinuwunda.
17Bosa ampu boea Beteleme moteriahi ananda au rapapate surodadona Herode. Ido hai tepabukei lolitana nabi Yeremia hangkoia au manguli:
18“I boea Rama tehadi topoteria hai topandawi.
Raheli moteriahihe anana.
Bara mau rapalindo,
lawi barapohe ara.”#Yer. 31:15
Yusupu moanti Maria hai Yesu mesule hangko i tampo Masiri
19Tanganda mani Yusupu, Maria hai Yesu i tampo Masiri, matemi Datu Herode. Roo indo, hawe mbulimi malaekana Pue i Yusupu i lalu pangipina. 20Nauli malaeka iti, “Tauna au mampeinao mopapate Anangkoi iti, matemi. Mewali, mearomoko, antimide Anangkoi iti hai inana, mesulemokau lao i boeami i tamponda to Isaraeli.” 21Mearo mpuumi Yusupu moanti Anangkoi iti hai Maria mesule lao i tamponda to Isaraeli. 22Agaiana nahadi Yusupu, Arkelaus anana Herode mopahuru umana mewali datu i tampo Yudea. Mewali, langa mesule inditi. Roo indo, ara mbuli au napahawea Pue i lalu pangipina. Ido hai laohe i tampo Galilea, 23hai maidahe i boea au rahanga Nasare. Mewali tepabukeimi lolitanda nabi hangkoia kana i Datu Topehompo au manguli node: Ia ina rauli to Nasare.
Trenutno odabrano:
Matiu 2: NPY
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
@LAI 2016
