Genese 29
29
1KE Jekob ame vheno deny me o ka aten hnyei e deiö. 2Ke e ame bwele me wâ bi ke hna khû an hnyi hnyei, ke wâ bi kun ta hnahat mamoe ame mokut eling; anyin adre me labö habelen ta je mamoe hnyi an eling; ke gan hmâ veto hlinginy an. 3Ke adre me labö ûkhacaköuâ kâ e ta je mamoe hia: ke adre me tetebulo veto ûnyi hnyi hnyimen an, me söû belen ta je mamoe, me hlöng hmeto an hnen veto. 4Me haingö Jekob ködrin, ka habe, Hnyat me lakeiny mönya lö, öbun e mwi ua? Haingödrin, ka habe, Öhmun je aten hnyei Karan. 5Me e ame ha ködrin, ka habe, Hawa, e khanʼ öbun Labana nöku Nahora! Haingödrin, E khanʼ öhmun. 6Me e ame ha ködrin, ka habe, Hawa, ame sot e? Haingödrin, ka habe, e ame sot: ke wâ bi Rakela nokon hlu ame he jem me ta je mamoe. 7Me haingen, ka habe, Wâ bi, e tiga jebigö, ke tiga ca ûen he ka ûkhacaköuâ ta je meno: he thʼ öbun ka söû belen ta je mamoe, me he thö ka hān. 8Ke ödrin e ha, ka habe, E ca khanʼ öhmun, e so bân ka ûkhacaköuâ ta je hnahat hia, mʼ adre me he ka tetebulo veto ûnyi hnyi hnyimen an, me waleling öhmun e he ka söû belen ta je mamoe. 9Ke e ame tiga ûhnenamö mödrin, me ame o thö Rakela me ta je mamoe haleny kamen; anyin a e at ame tuö. 10Ke hnyi ûen Jekob ame ō Rakela nöku Labana a mahinyen, me ta je mamoe hale Labana a mahinyen, me Jekob ame hakekeny me tetebulo veto ûnyi hnyi hnyimen an, me söû belen ta je mamoe hale Labana a mahinyen. 11Ke Jekob ame ûcimhnyimak me Rakela, me tenge hwege göranyai. 12Ke Jekob ame thumetu Rakela a e utha ge kamen, ke nöku Rebeka e: ke ame wadring hlu me thumetoâ kamen. 13Ke e ka löng Labana ûthumetu ga Jekob a nokon haniny, me e ame wadring he ka iouny më, me e ame delûâ e, me ûcimhnyimak më, me su e ka hnyi hnyaban. Ke e ame aû gaga kö Labana ta je ûnyi hia. 14Ke haingö Labana kâu, ka habe, E hnathu u hanen jeiök, me hanen utiöik. Ke khaca tehi ödru me tha laba hnyin. 15Ke Labana ame ha kö Jekob, ka habe, Hawa, u ma huliwa gufa könya anyin a ötu liamenakaûnyin? Ha thö könya hwabâm. 16Ke lo laku Labana li hlu: haba ien atö, me, Lea, ke Rakela ien wakeiat. 17Ke vhihne li emakö Lea; ke khula ûdren makö Rakela, me so hmainy. 18Ke Jekob ame weny Rakela, ke haingen, ka habe, Oge me he ka huliwa köu hnyi seven je huna hwabö Rakela nokom a wakeiat. 19Ke haingö Labana, ka habe, E ti so könya he ka ham e köu hon hnök hna he ka ham ka ke at: tha laba ju mönya. 20Me Jekob ame huliwa seven ta je huna hwabö Rakela; ke helâke je bong ae wakhalet thibi kâu, can anyin betenge ka hlu. 21Ke Jekob ame ha kö Labana, ka habe, Ham but könya öiök, anyin a um dö ta je bonguk, mʼ inye he ka tha laba më. 22Ke Labana ame ûkhacaköuâ aten hnyei hia me bi jeû. 23Ke haba hnyi hnyinghet e ame hum Lea bi a nokon, me su e kâu; me ödru me tha laba. 24Ke Labana ame ham Zilepa a athnyabainy kö Lea a nokon me hnân anyin hlu. 25Ke wâ bi, hnyi hnyomakatu Lea bi eling: me e ame ha kö Labana, ka habe, Ieû e u je ânyâ könya? hawa, oge ca huliwa köu hwabö Rakela? ieû gam u je iyawö nya. 26Ke haingö Labana kâu, ka habe, Ca hwakecin ihmun hnyei he ka ham bânâ wakeiat, ke biliny bi atö. 27Oumo thö wikiny at ang, ke öhmun e he ka ham minya köu ke at, a hwaban huliwa u ma he ka ânyâ könya hnyi seven hmetu ta je huna. 28Me Jekob ame ânyâ helâe, me oumo anyin wik: me e ame ham Rakela a nokon me hnân âiân. 29Ke Labana ame ham Bila a athnyabainy kö Rakela a nokon, me hnân anyin hlu. 30Ke e ame tha laba me Rakela minya, ke e ame betenge ga Rakela hu Lea, me e ame huliwa kâu hnyi seven hmetu ta je huna.
31Ke Iehova ame wâ a gʼ adre me höciö Lea, me e ame ohnoko e: ke toûnyi bi Rakela. 32Ke Lea ame erkin dut me e ame hnokoâ da, me hwenyi ien Reubena: ke haingen, ka habe, Anyin a wâ but Iehova anyik vec; kʼ ame he öiök ka betenge gak walang ang. 33Ke e ame erkin hmetu, me e ame hnokoâ da, ke haingen, ka habe, Anyin a Iehova ame löng hna höciö nya, me e ame ham minya könya da eang: ke e ame hwenyi ien Simeona. 34Ke e ame erkin hmetu, me e ame hnokoâ da; me haingen, ka habe, Ame ne ûen dut ang ame he öiök ka tha hnyok mönya, anyin oge hia but hnokoâ kun lakon ta baga: anyin a wale adre hwenyi ien Levi. 35Ke e ame erkin hmetu, me e ame hnokoâ da: ke haingen, ka habe, Walang ang Oge me he ka ogânö Iehova: anyin a wale e ame kwenyi ien Juda; ke e ame mwi thö.
Trenutno odabrano:
Genese 29: IAAI
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
maintained by the British and Foreign Bible Society