Madius 3
3
1An naopan iyehki is apan an namasacen an pece Jutaia a Joanes Natimi baptiso, um tas, 2um ika, Akumu adumoij anliinmopomia aijaua: et mun ubutpotet nelcau an nohatag. 3Aien aigki is tas vai yin a Aiseya naprofeta, um ika, “Nohran tah et ethi etpu ahlaig aien an namasacen, um ika, Akumu ahped nefalaig vai Ihova aijaua, um ago yi atoh efalaig vai yin.” 4Is aso yin a Joanes an napelumai alau irai kamela, um ahid narasi kurimatau, um caig inheled im hune.
5Eris ahtag pan ehelen a nupu Jerusalem, im nupu Jutaia asega, im nup urai urai pece asega u nofowai Jortan, 6is baptiso ira ra aien an wai Jortan, eris asuptecnaig nedo has ura ara.
7Is alum ilpu Farisi is ahinag aien im ilpu Satusi napanvaig u nabaptiso o un, is um ika ehele ra aien, Ak ilpu imyiv, et mun ated caua a di, mika aki aha aijaua vai intayaitap etpu yetpam? 8akumu ohoai itai aijaua yi idivaig nadumoij u inliinmopomia: 9akumu jim aktaktai anliinmopomia aijaua, um ika, Et etpoija a Ebraham; ek asaig ehelemia ainyak mika, Et emda a Atua par imyiatidai ilpu halav imi Ebraham irai hat iji eigki: 10eh mun ati inpas u nohu auicai an naopan ineig: uhpu acaldei nauicai asega et eti upene nasau iran, um erekhaigjai an cop: 11ek idim baptiso iramia ainyak an wai mika aki adumoij anliinmopomia aijaua: ja aien inyi ham aien um apitac nyak inyi idim esjilid irak aien, ek eti upene ainyak par apos incedpun eduon: etpu baptiso iramia aien an Nesgan Upene im lep incop: 12et apos nitai ucjucjai itai o un aien, etpu idim ago adicinadicin nuarin ikni sito o un aien, etpu ikni hwiit o un aien anliin neom ikni hwiit iran, ja etpu atnamud narasin aien an cop inyi ti lep opos.
13Is ahes Calili a Iesu um apan Jortan ehele Joanes, mika yi baptiso iran aien. 14Ja is acaiji yin a Joanes, um ika, Eris idim ika apu baptiso irak aiek, na auri aiek par apam ehelek? 15Is tas a Iesu, um ika ehelen, Jim imyiisjis aiek an naopan ineig: eris idim ika ti imyiaiji intas alep asega akaija. Is eti lep imyiisjis aien. 16Is wat leh nabaptiso iran a Iesu, is ahes u inwai aien, um atga o un: is asalgei nohatag vai yin, is ecet Nesgai Atua aien nasuolvaig is idivaig nalaupa, um ateuc iran: 17is ahes an nohatag nohran tah, um ika, Inhalav cop unyak ineigki, ek imyiacitak yin ainyak.
Trenutno odabrano:
Madius 3: ATY1863
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
historic text maintained by the British and Foreign Bible Society
