Kananet 1
1
Teheenyinet ci ta̱mu̱-kengo ki lo̱o̱c ki kaal do̱o̱k
1Bali oowa kananta eenyca Ta̱mu̱ta̱dde̱n ta̱mu̱-keng ki lo̱o̱c. 2Aave da̱ bobor ollin ki̱zzi̱ rok guul kize mu̱hu̱ri̱te̱n do̱, ma̱i̱je̱ Vongizi ci Ta̱mu̱ta̱dde̱no̱ owo maame ta̱dde̱na̱.
3I̱i̱te̱n wa een oo, odola Ta̱mu̱ta̱dde̱n ize ne, “Anyik vooriten ki̱ye̱la̱i̱,” ize zin vooriten ne paa, 4atal zin Ta̱mu̱ta̱dde̱n vooriten, kar kenger vooriten ki mu̱hu̱r. 5Akatek zin Ta̱mu̱ta̱dde̱n vooriten kize wazin kar mu̱hu̱ri̱te̱n kize ba̱a̱li̱n. Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een co̱de̱.
6I̱i̱te̱n wa een rama, odola zin bo̱do̱k Ta̱mu̱ta̱dde̱n ize ne, “Anyik bobor ka̱vvu̱ to kar kenger maam cik aavtte ta̱mu̱-kenga ki cik aavtte todowai.” 7U̱tu̱gu̱we̱ zin zoz neci ki baling u̱du̱wa̱ Ta̱mu̱ta̱dde̱n, enger maam cik aavtte bobora ki maam cik aavtte ta̱dde̱na̱. 8Akatek zin Ta̱mu̱ta̱dde̱n bobor kize “ta̱mu̱-keng.” Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een rama.
9I̱i̱te̱n wa een i̱i̱yo̱, odola Ta̱mu̱ta̱dde̱n, ize ne, “Anyik maam ne̱k lo̱o̱ta̱ todowai ko̱ ku̱lu̱te̱ nga̱to̱de̱ kar looci ki̱ye̱la̱i̱.” U̱tu̱gu̱we̱ zin zoz neci ki bali ming a̱du̱wa̱ enne ke̱. 10Akatek zin Ta̱mu̱ta̱dde̱n ngin neci odoi ke̱ kize “lo̱o̱c,” kar maama ne̱k alute ke̱ kizeto “li̱i̱llo̱k cik a̱ddi̱ki̱re̱.” Kar Ta̱mu̱ta̱dde̱n kicin niko ming abunna.
11Odola bo̱do̱k Ta̱mu̱ta̱dde̱n ize ne, “Anyik arte ki keen cik een o̱ya̱u̱ ki cik anyak bu̱ra̱ ki̱ti̱li̱zza̱.” I̱ti̱li̱zza̱ zin keena ne̱ko̱ do̱o̱k. 12Aanyik zin looci keen ki arte do̱o̱k ki̱ti̱li̱zza̱: Aarik arte ki bu̱ra̱ cigge̱k ki keen do̱o̱k cik aavtte do̱ do̱ guule cinne̱ng. Kar Ta̱mu̱ta̱dde̱n kicin niko ming abunna. 13Eteehenya zin Ta̱mu̱ta̱dde̱n kaal ne̱ko̱ do̱o̱k. Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een i̱i̱yo̱.
14I̱i̱te̱n wa een we̱c, ize Ta̱mu̱ta̱dde̱n ne, “Anyik tukulen ka̱vvu̱to̱ to bobora ta̱mu̱-kenga kar kengerit wazin ki ba̱a̱li̱n. Kar bo̱do̱k kengerit lo̱lo̱yo̱k ki i̱i̱nya̱ ki e̱rki̱to̱k, 15kar anyik nogo kizeto tukulen cik aavtte bobora ta̱mu̱-kenga kar kataranit lo̱o̱c.” U̱tu̱gu̱we̱ zin zoz neci ki bali ming a̱du̱wa̱ enne ke̱. 16Idiman Ta̱mu̱ta̱dde̱n tukulen cik a̱ddi̱ki̱re̱ een rama, i̱i̱ ki nye̱lo̱k, kar kutukullet lo̱o̱c, okko i̱i̱ atukul lo̱o̱c waaz, kar nyelowi kutukul lo̱o̱c ba̱a̱l. Kar enne bu̱k kidiman munyuny. 17Aarik Ta̱mu̱ta̱dde̱n tukulen ta̱mu̱-keng kar kutukullet lo̱o̱c, 18kar kutukullet wazin ki ba̱a̱li̱n kar bo̱do̱k kengerit vooriten ki mu̱hu̱r. Kar Ta̱mu̱ta̱dde̱n kicin niko ming abunna. 19Edeccai zin wazini neci. Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een we̱c.
20I̱i̱te̱n wa een tu̱r, odola zin bo̱do̱k Ta̱mu̱ta̱dde̱n ize ne, “Anyik elegje cik aruge kabaito maame, anyik iballi ku̱ku̱lle̱t ta̱mu̱-kenga.” 21Kar bo̱do̱k Ta̱mu̱ta̱dde̱n kanyik elegje cik a̱ddi̱ki̱re̱ nyatapar ci a̱ddi̱ki̱re̱ ki elegje wak abak maame ka̱vvu̱to̱ do̱ do̱, ki guulnya cik iballi cik aavtte do̱ do̱. Kar Ta̱mu̱ta̱dde̱n kicin niko ming abunna. 22U̱mu̱yu̱k zin Ta̱mu̱ta̱dde̱n elegje do̱o̱k izek ne, “I̱ti̱rre̱t izet meele, anyik u̱lu̱g kibbitet li̱i̱llo̱k cik a̱ddi̱ki̱re̱. Kar iballi bu̱k ki̱ti̱rre̱t kibbitet lo̱o̱c.” 23Edeccai zin wazini neci. Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een tu̱r.
24I̱i̱te̱n wa een torkonom, ize Ta̱mu̱ta̱dde̱n ne, “Anyik lo̱o̱c kanyak elegje wak o̱rgu̱, ki wak a̱vu̱vu̱t kengtinne ki wak abak zara mootik, kanyait guulnya do̱ do̱.” U̱tu̱gu̱zze̱ zin kaala ne̱ke̱ ki bali ming a̱du̱wa̱ enne ke̱. 25Idiman Ta̱mu̱ta̱dde̱n elegje ne̱k mootik ke̱ guulnya cik aavtte do̱ do̱, elegje cik o̱rgu̱ ki guulnya cigge̱k, kar elegje cik abak lo̱o̱ta̱ ngatu guulnya cik aavtte do̱ do̱. Kar Ta̱mu̱ta̱dde̱n kicin niko ming abunna.
26Ize zin bo̱do̱k Ta̱mu̱ta̱dde̱n ne, “Keteheenyca zin e̱e̱t ci diiri kudukto ki agita kar kabal u̱lu̱g cik nyatapar ci a̱ddi̱ki̱re̱ ki iballi ki elegje ki kaal cik lo̱o̱ta̱ ko̱ do̱o̱k.”
27Idimana zin Ta̱mu̱ta̱dde̱n e̱e̱t ci diiri kudukto ki nonno,
imma zin ri̱ri̱to̱ne̱ ci Ta̱mu̱ta̱dde̱no̱, idimana enne nonno,
idimana zin enne nogo, e̱e̱t ci maci ki ci nga̱a̱ye̱.
28U̱mu̱yu̱k Ta̱mu̱ta̱dde̱n nogo kar kizek ne, “I̱ti̱rre̱t ibbizitanit lo̱o̱c do̱o̱k, abalit kaal cik abak nyatapare ci a̱ddi̱ki̱re̱ ki iballi ki elegje cik abak lo̱o̱ta̱ do̱o̱k.” 29Izek bo̱do̱k Ta̱mu̱ta̱dde̱n nogo ne, “Ka̱a̱nyu̱ng keen cik anyak bu̱ra̱ ki i̱nyo̱mo̱ cik atin adakku. 30Ma̱i̱je̱ elegje cik zarak ki iballi kanyiya nogo arte ki varany cik keenu kadait” U̱tu̱gu̱zze̱ zin kaala ne̱ke̱ ki bali ming u̱du̱wa̱ enne ke̱.
31Icin zin Ta̱mu̱ta̱dde̱n kaal ne̱k adimana enne ke̱ do̱o̱k ming abunna oroot. Kar zin yo̱mo̱ni̱ ki nge̱rre̱ti̱n ka̱vvu̱to̱ to, een necu i̱i̱te̱n wa een torkonom.
Trenutno odabrano:
Kananet 1: tex
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2018, Wycliffe Bible Translators, Inc. All rights reserved.