Lúkkë 15
15
Léehí har fa múuƴ ɗë a bi hélsë múuƴ ɗë
(Saame Maccëe 18.12-14)
1Yeekoh yi túmë a i bakaaroh kay leɓuute síkírëhí Yéesú. 2Yaa neɓaay fariseŋŋa a yëeddëh yí kootii Mëyíis, tahte wa na wonaaluu hanndal ki wa tih : « Ɓëyí bee tahaꞌ bakaaroh ya a yaꞌ ana na bok a wa ñam bee raa ! »
3Tígí daaha, Yéesú ñeyaꞌte wa léehí beh won wa tih : 4« Ow di ɗon na lah har tíméer (100), an naa múuƴlëꞌ yínë rëe, ɗi ii hel harri sabay payniil a payniilla (99) níirëe yë, ɗi saañ saame bee múuƴ ɗë níi ɗi ot ɗi a ? 5Te ɗi ot ɗi raa, keeña ay sos níi sos, ɗi ɓeɓ har fa tëgúm rí, 6ɗi saañ faam, anti dëek kooƴƴi a ɓëewë ɓani wa dékú rë, won wa tih : “Yen bokun yen lah sos-keeñ, ndée mi otte har fee ke soꞌ húmú múuƴ ɗë !” 7Mee ron won ɗa ee : ti ɗaaha nen, bakaaroh yínë kut lof pesaɗ raa, Koope lahaꞌ sos-keeñ ɗaaha. Sosi keeña lahaꞌ ri ɓëeꞌ lof pesaɗ baa ra, daa lukki gaan sosi keeña lahaꞌ ri ɓëewí sabay payniil a payniilla (99) júɓú te sohluuy lof pesaɗ ɗa. »
8« Mbée lah ɓelii lahaa hanjar úrís sabboo, an naa múuƴɗëꞌ úrís yínë rëe, ɗi ii këríɗ lampa, saak faam fa saame níi ot ri a ? 9Te ri ot ɗi raa, ɗi ay dëek kooƴƴi a ɓëewë ɓani wa dékú rë, won wa tih : “Mi otte hanjari úrísë múuƴɗëꞌ mí rë ; ëyí yen bok yen lah sos-keeñ !” 10Mee ron won ɗa ee biti ti ɗaaha nen : malaaka yi Koope ay lah sos-keeñ biti bakaaroh yínë kut lof pesaɗ. »
Anili koy ka múuƴ ɗë
11Yéesú ɓaatte ñeyaꞌte wa anili bee na léeh wë won tih : « Lahte ɓëyí húmú lahaꞌ koy ƴaal ana. 12Lahte bis, bee paaꞌ kúkëy rë won boffi tih : “Baap, mi fahaꞌ biti koon fu yeɗ soꞌ wodi soꞌ di alal ma lahuu yen ra.” Tígí daaha, boffa woraꞌte wa alal ma.
13« Tíkëh i waal, koy ka paaꞌ kúkëy rë yaayte ƴee lahaꞌ ri ra, ɓeɓpe hélsë saañce gini wulte, hompe dín fë na paŋ yii neɓaꞌ ri níi ri yahte alal mi ɗaaha. 14Yaayaꞌ ri hélsë ɓéeɓ rë, yaabi misikke haalte gina, ɗi lahlay yii ñama ri. 15Ɗi yeeltee saañ, haalte légéy ow di ɓëy gina na ; ɓëeꞌ yeñce ri meeyyin níirí mbaam-túgëllí. 16Yaaɓaꞌ ri níi yaaɓ ɗa, nufa tasse ñam di ñami mbaamma, ndaa ow na oneh ri na.
17« Tígí daaha, afa kúnsëhté, ɗi yíppée won nufi tih : “Ɓëewë në légéyírú baasoꞌ ra caakute ñam níi míníh yin na, mi anti home dee mi húlé a yaaɓ a ? 18May kolee koloo mi nimil faam baasoꞌ, mi won ɗi tih : Baap, mi bakaaɗte fíi Koope te mi tooñce ro ɓal. 19Mi caleh fu habee soꞌ koohu ; ɓeɓ soꞌ mi légéyíɗ ɗë ti ɓëewí kayya nen.”
20« Ɗi yíppée koloh na nimil boffi na. Ɗi teem hanndal boffa séenté rí, keeña ɗúmpé ɗii na ces ; ɗi múkëté téebílëhí, yabaalohte faana, wodohte ri níi wodoh. 21Koy ka won ɗi tígí daaha tih : “Baap, mi bakaaɗte fíi Koope te mi tooñce ro ɓal, mi caleh fu habee soꞌ koohu.” 22Ndaa boffa yíppée lec woni, yíssëhté súrgë yí në won wa tih : “Yípíi kali búubë lukki wun ɗa, ɗon ɓek ri koy soꞌ ; ɓékí rí supi kuna, ɗon ɓek ri ñafaɗ. 23Këlí fanfa lukki wun faan ɗa, ɗon hap ri, yen cëgíɗ ndaje. 24Koy kee ke soꞌ húmú habaꞌ mi biti húlté rë nimilte yéelíɗ ; ɗi húmú sooƴce te mi otte ri !” Ndaje ma yíppée dal.
25« Wahtii baaha, ɗeef koy ki saawi ɓëeꞌ húmú meey. Na nimil ri níi rí leɓohte faam fa ra, ɗi kelohte típpë a becca. 26Ɗi dëekké ow yínë súrgë yë në, meelte ri yee lah ra. 27Súrgëe won ɗi tih : “Ñéedú daa nimil, boffu antee hawroh fanfa lukki wun faan ɗa, af biti ri otte koohi te yin katay ri.” 28Koy ki saawa yíppée neeɓ, kaaꞌaꞌte haal faam fa. Boffa ɗúhté ɗii na, ɗaŋke ri haal filiɓ. 29Ndaa ri won boffa tih : “Síkírëh sëꞌ baap ! Hente kíil caak mi na hap faan soꞌ légéyírú, te yii túuƴ fú sëꞌ ɓéeɓ mi paŋ ri. Añcaŋ, fu ënɗëy sëꞌ wuti ƴaha ndeŋ sah mi hap ri, funi kooƴƴi soꞌ cëgíɗ ndaje. 30Ndaa ayaꞌ koohu ra, ɗi fa yah alal mu a ɓeleɓɓa na tílú rë, fu hawiɗte ri fanfa lukki wun faan ɗa.” 31Boffa won ɗi tih : “Koy soꞌ, fu mëssí hom soo na, te iña lahaꞌ mi ra ɓéeɓ daa fu lahaꞌ wa ɓal. 32Ndaa yen warutee cëgíɗ ndaje nam, yen lah sos-keeñ ! Ñéedée ke ro bee húmú habaꞌ mi biti húlté rë nimilte yéelíɗ ; ɗi húmú sooƴce mi otte ri.” »
Trenutno odabrano:
Lúkkë 15: NDV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.
