Yosua 17
17
Tana napumanah sitangngana suku Manasye llan kalambunanna Sa'dan Yordan
1Ia to padang llan kalambunan Sa'dan Yordan, diundi nadiben sangtawan naputawai sitangnganapa suku Manasye, anak pamungahna Yusuf. Na ia to tana Gilead sola Basan jio kadellekanna Sa'dan Yordan, mangkai diben tonna tee lako Makhir, anak pamungahna Manasye, sanga mesa'i pangbarani. Ia tee Makhir ambe'na Gilead. 2Na sitangnganapa suku Manasye to diben tana llan kalambunan, iamo to rapunna Abiezer, Helek, Asriel, Sekhem, Hefer na Semida. Ia ngasanmo to anakkana Manasye muane, ampona Yusuf, situru' rapunna. 3Apa ia to Zelafehad, anakkana Hefer, ampo jajianna Gilead, ampo uttu'na Makhir, ampo gariginna Manasye, te'da anakkana muane, apa baine ngasan, iamo to Mahla, Noa, Hogla, Milka na Tirza. 4Male ngasanni mangngolo lako Imang Eleazar sola lako Yosua anakkana Nun na lako tomangparenta, namangkada nakua, “Mangkami Napangparentan PUANG Allataala lako Nabi Musa kumua, la diben todakan tana la kipumanah susi rapungki' muane.” Iamo joo nadiben toda tana napumanahhi naparitangnga tanana ambe'urena, susi to mangka Napangparentan PUANG Allataala.#Bilangan 27:1-7 5-6Yosua mben tana lako rapunna suku Manasye jio kalambunan Sa'dan Yordan, moi anakkana Zelafehad baine. Iamo joo nadiben sangpulo tawana padang lako suku Manasye. Laenpa to tana Gilead sola Basan jio kadellekan Sa'dan Yordan to mangka dibenni lako sitangngana suku Manasye.
7Ia to tana manahna suku Manasye jajanna liu sikatonan tana manahna Asyer mangnguju sau' kota Mikhmetat jio kadellekanna kota Sikhem. Jio mai kota Mikhmetat male sau' kampongna to-En-Tapuah. 8Ia to kampongna to-Tapuah tanana suku Manasye, apa ia to kota Tapuah, to siandah katonan tana suku Manasye, kotana ia suku Efraim. 9Sitarruhna ia to katonan tana manahna suku Manasye male do' sau'na Salu Kana. Na ba'tu pira-pira kota llan tangnga-tangngana kota suku Manasye sau'na Salu Kana diben lako suku Efraim. Sitarruhna ia to katonan tana manahna suku Manasye nnola jajanna liu Salu Kana nacappa' llan randan Tasik Tangnga. 10Susimi joo, ia to suku Efraim torro llo'na liu, na suku Manasye jajanna liu, na llan kalambunan angge randan Tasik Tangnga. Ia to tana manahna suku Manasye jajanna liu sikatonan tana manahna suku Asyer na jio kadellekan sikatonan tana manahna suku Isakhar. 11Apa llan tana manahna suku Asyer sola Isakhar den toopa pira-pira kotana suku Manasye, iamo to kota Bet-Sean, kota Yibleam, na den toopa to-Dor llan randan tasik, to-En-Dor, to-Taanakh na to-Megido sola sininna kampong mengguririkinna. 12Apa te'da nakullei suku Manasye nnula'ii to to-Kanaan to ntorroi joo kota, sanga mawatangngi to to-Kanaan iamo nada'tan mariqpih.#Hakim-hakim 1:27-28 13Ia tonna mawatangmo to to-Israel napupangjama to tangdigajimi to to-Kanaan, apa te'da nakulle nnula'ii.
Suku Efraim sola suku Manasye to torro llan kalambunan mpeta'dapa padang manah
14Mangkadami suku Efraim sola suku Manasye, bati'na Yusuf, lako Yosua nakua, “Nabarakka'ikan PUANG Allataala ratu lako too allo kimembati' buda. Ciapari na sangtawan bangra padang manah dibenkan?” 15Mebalii Yosua nakua, “Gaja budamo kamu', na ia to tana membuntunna Efraim te'damo miganna'. Iamo joo, malemo kamu' mbelahhii to pangngalahna to to-Feris na to-Refaim, minii torro.” 16Mebalii to bati'na Yusuf nakua, “Te'da kiganna' joo tana membuntunna, na ia to to-Kanaan to torro jiong merrantena, la ia to torro jio Bet-Sean sola sininna kampong mengguririkkina, la ia to torro jiong Lombok Yizreel, te'da kikullei nnewai, nasaba' nnampui kareta bassi to dipake parari.” 17Nakuamo Yosua lako suku Efraim sola suku Manasye to llanna kalambunan, “Ia tee kamu' nang budamo kamu', misigaja watang, sipato'mo kamu' dibenpa tana. 18Ia toomo la miputawa tuu de' buntu, moiraka namempangngalahpa, belahhi mipuapai minii torro. Na ia to to-Kanaan nang la mikulle ia nnula'ii, moiraka namawatang sola nnampui kareta bassi to dipake parari.”
Trenutno odabrano:
Yosua 17: mvpAD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.